MATIUS 26
26
Wene inenggal mende Yesus oba birugwa wene
(Mrk. 14:1-2; Luk. 22:1-2; Yoh. 11:45-53)
1Ar Yesus nen ye wene nde wene etoma emeriraga lagagerek, Ar mutok lagwi mende yoraga dogolir, 2#Kel. 12:1-27“Kir kinilu o, nininggi mbere adek dogoluk Paskah erugun o, nen Akuni Inakbur enogo, o kari karo paga warogo buak nen yiluk, wogoragun o.”
3Etinem, ir ap imam-imam kepala o, nen ir ap Yahudi mende inewai o, ap imam Agung Kayafas werekma uma wonggalkugwa. 4Wonggal diluk, Ar Yesus kirak-kirak pagago warogo buok o, yiluk ir inane dambulkugwa. 5“Ogwe,” ir nen yugu dogolir, “Wene nggok komakwi paga kwak eru maga o, nenaluk akuni nawor kawor yiluk, warar ebelik nggok paga erurak o.”
Ar Yesus o Betania etoma obari-obari amburu oba kidikugwa wene
(Mrk. 14:3-9; Yoh. 12:1-8)
6Ar Yesus, o Betania ar Simon u agakdo paga, nggibi-nggibi agode yurak kunik welagage mende enogo uma werekma, 7#Luk. 7:37-38kwe ambi Ar oba wagage. Ar kwe enogo amburu obari-obari amburu onggo nggok mende todek inggimo wolok wagagerek, Ar Yesus erom nengga kigik, ar kwe enogo nen minyak amburu ernogo, Ar Yesus aluak paga amburu kidilogo wurakige o. 8Eka kalok, Ar Yesus mutok lagwi mende yemenogo, kwe enogo wenemuk yugu dogolir, “Wee, elamarogo mondok yi, nena ake erir taga nda,” yiluk yirugwa. 9“Obari-obari amburu yi onggo kunumo, onggo nggok arar waganurak o, onggo wokbiluk uang ebe, akuni ininggi dek mende inakba eru pano ar o,” yiluk yirugwa.
10Wene yugwi, Ar Yesus ir iniliti eberkwi yenggak daga lagagerek yoraga dogolir, “Kir kwe yi oba dida togon yitagwi eti nenaluk? Ar An nake pano mondok mende arar erir taga o. 11#Ul. 15:11Akuni ininggi dek mende eti, kir kinom mondok dogogun o, ogwe, An eti, kir ninom idu paga mondok dogogun dek o. 12Obari-obari amburu pano mende amburu, An noba kidike yi, An kubur erogo banurak paga, An nebe pugurogo arar banengge o. 13Kinakla ebebar andani o! O, ya nda agar paga yoma, Pano Wene Ar Allah nen lakbi wagage mende yi, wigalarir liginmo etoma, ar kwe yi oba eberogo abok mbiliku dogogun o.”
Ar Yudas nen Yesus onggo mbalkige wene
(Mrk. 14:10-11; Luk. 22:3-6)
14Tuguluk ar Yudas Iskariot enogo, medorogo togok dalok, ir ap imam-imam kepala inoba lagage. 15#Za. 11:12Ar inoba laga lagagerek yoraga dogolir, “Ar Yesus an kir wokeramo, kir nen an nena wotnirugun?” yiluk yoragage. Yoragagemo, ir enogo nen tiga puluh uang perak wenagago nen, ar wogorugwa. 16Wogorugwa etanogo kudi nen, Ar Yudas ernogo, Ar Yesus ininggimo bu paga, o telek ngga kenam arigin, yiluk il mbenaka lagage o.
Ar Yesus mutok lagwi mende Paskah ake dago inom narugwa wene
(Mrk. 14:12-21; Luk. 22:7-14,21-23; Yoh. 13:21-30)
17O hari Roti Ragi Bigikdek #26:17: O hari raya Roti Ragi Bigikdek eti: Ir akuni Yahudi mende hari Raya Paskah ake komaku lagatek, ininggi tujuh nogo yugu dogolir eta paga, hari raya Roti Tidak Beragi eti ake komaku lagugwa. Etegerogo komakwi dogolir, O Mesir ap Firaun apma dogolir anggon panggon eginaka lagage inakla ebeki dogolir, roti eti ragi paga piruak nen yiluk ekidek, we wedek mban werak biluk nunggu dogolir, aii, Allah ninombae woknirek wundi wagagen wa, yiluk komaku lagugwa. ake nggok komakwi paga, o ibibir yirige paga, Ar Yesus mutok lagwi mende yemenogo, Ar Yesus oba wagu lagugwarik, kinok yogu dogolir, “Nir Ninombae kake dago paska ake naurak ernogo, o nggoma pik puk erogo bugun o?” yiluk yorugwa.
18Yorugwama, Ar Yesus nen yoraga dogolir, “Kir o kota etoma lani o, nen ap ambi kota etoma yegerogon yokno, ‘Ninombae Guru nen, An nao telek arar panggo yegemo, An mutnarek wagwi mende ninom, kar kuma Paskah ake dago nugun yiluk yege o,’ ” yiluk yoragage.
19Ar Yesus mutok lagwi mende enogo Paskah ake dago naurak yirige ernogo, Ar Yesus yoragage ndak-ndak pik puk ndugurogo bi lagugwa.
20O arar kukbaga agagemo, Ar Yesus aworomi dua belas enogo erom inom nuok nen yiluk korek tagage. 21Erom nunggu dogolir, ar Yesus nen, “Kinaruk dogoni, ap ambi kir yi kinakla nen, An maduk erogo banigin o.”
22Wene yirige enogo inaruk kolku lagugwarik, Ar Yesus awurimi mutok lagwi mende enogo iniliti buru yiluk, wene kinok Ar Yesus oba ar ambi yogik yugu dogolir, “Nombae kar kakla andagen eti an kwak dek o,” yigik inadik ndak dombok yir lagugwa.
23 #
Mzm. 41:10
Ar Yesus nen wene onggo yoraga dogolir, “Akuni eti ebe An nimbirak ndak-ndak, roti i mangkok akla dabulko yi nen arar, An maduk erogo banigin o. 24Ar Akuni Inakbur endak tagage eti, Alkitab akla diru mbalek ndak-ndak arar kambigin ogwe, akuni Ar Akuni Inakbur oba maduk erogo bigin enogo perak, engga werek nen maduk erogo bartege o. Ap eti endaru mondok-mondok dambe kalep ma perak, ar ake pano atep o!”
25Tuguluk ar Yudas ap akla maduk ebekige enogo nen yega dogolir, “Guru Nombae wene yegen yi, an yiluk kakla andalok yegen kwak dek o?”
Ar Yesus nen onggo yoga dogolir, “Kar yegen eti ar o!”
Ar Tuhan edago nunggu dogorak kologo birige wene
(Mrk. 14:22-26; Luk. 22:14-20; 1Kor. 11:23-25)
26Ir dago nuok nen yiluk eku dogolir, Ar Yesus roti ambi wagangga lagagerek, wa, yiluk tamban ekige. Eka lagagerek roti enogo inggi paga nggagik nggagok eka lagagerek, Ar aworomi noak nen yiluk wogoraga dogolir, “Yi An Nebe arar ma, wokbiluk nani o yiluk, yoragage.” 27Eka lagagerek, Ar i anggur amburu todek inggimo wokbiluk, Allah waa, yiluk tamban ekige. Eka lagagerek, i anggur todek enogo, Ar mutok lagwi mende enogo wogoralok yoraga dogolir, “Kir obogar nani o. 28#Kel. 24:8; Yer. 31:31-34Nenaluk, Ar Allah Ane amburu, ir akuni obogar inomaduk dek erogo baurak ake paga yirige mende eti, An namep kidirik yi arar o. 29Anggur amburu yogondak ya, An ninggikdek mondok kigik, o anggur amburu ngger mende todek, kir ninom, An Nombae nen o ngger mende erogo binaninggigemo etoma, ari lugun eti paga, amburu eti ninom na lugun o. Ma, wene yigi yi, kir ebebar andani o,” yiluk yoragage.
30Etanogo eku lagugwarik, ir enogo pogoraku dogolir, Ar endai ambi wakugwa. Waku lagugwarik, ir inebe kur Zaitun paga arar lagugwa.
Ar Petrus nen Ar Yesus nunggukdek yiluk yirige mende elalkige wene
(Mrk. 14:27-31; Luk. 22:31-34; Yoh. 13:36-38)
31 #
Za. 13:7
Tuguluk Ar Yesus nen aworomi mutok lagwi mende yemenogo yoraga dogolir, “Kir obogar yogondak kukbaga yi, An togok baniluk kode tidik mbidik mbugulugun o, nenaluk Alkitab akla diru mbalek yegero: Ar Allah nen yega dogolir, ‘An nen gembala eti warigin o, waka nalok, ar mende anggumi domba etoma kode tidik mbidik mbugulugun o,’ yiluk yirige. 32#Mat. 28:16Etiar ogwe, An watatuk nen niluk atuk, An nalep o Galilea paga, kir tokirek ari ligin o.”
33Yigi nanggige, ar Petrus nen Yesus yoga dogolir, “Nombae ir amberak kwak Kar togok dagaluk kode wulkwi kigik ogwe, an kwak medorogon bagaluk ligin mondok dek arar o!” yiluk yorige.
34Yorigi nanggige, Ar Yesus nen yoga dogolir, “Kakla eberek dogono o, yogondak kukbaga yi ar, tewe ayam ane yigikdek kigik, kinggi mbere ambi paga, Ar endi an nunggukdek o yiluk, kenggal yoragin o.”
35Yigi nanggige ar Petrus nen onggo yoga dogolir, “An nimbirak wataru dek kalok pano ar ogwe, wene Nombae Kar nunggukdek yiluk kwak eti, an mondok yigin dek o.”
Yiluk yigi nanggige, ir Ar mutok lagwi mende amberak etegerogon ar yirugwa.
Ar Yesus o Getsemani paga tamban ekige
(Mrk. 14:32-42; Luk. 22:39-46)
36Eku lagugwarik, Ar Yesus mutok lagwi mende enogo inom, o ambimo endaga Getsemani etoma arar lagugwa. Etoma ari lagugwarik, Ar nen ir yoraga dogolir, “An tamban eri lagi ma, ya korek dogoni o,” yiluk yoragage. 37Yoralok Ar nen Petrus o, Ar ap Zebedeus akburi mbere enogo o, imbirak wai yoralok, Ar Yesus inom lagugwa. Lagugwarik nen, Ar Yesus enogo nenggerogon erigin yiluk, akla ebeka dogolir, iliti arar buru yirige o. 38Etegerogon eka dogolir, aworomi Ar mutok lagi mende yemenogo men yoragage, “An niliti buru-buru yitaga o, nen An noba etoma kamburak negen arar ernabi taga o. Ma nawurumi kir ya dogolir, ninom tuam pipak waku dogowok o,” yiluk yoragage.
39Yoralok Ar Yesus nogo, liru togo ari lagagerek, endop yunggu yiluk, elokte wandu yiluk tamban eka dogolir, “Nombae o, eru ndak kalok, anggin panggin An noba arigin yi, waganogo mbo lakbin o. Ogwe An nakla andagi ndak-ndak kwak maga o, Ar tewe Nombae kakla andagen ndak-ndak ar erin o, wa,” yiluk tamban ekige.
40Eka lagagerek, Ar iyok paga aworomi inebe mbere ambi enogo inoba lagage mende, ir enogo nogo yugu nanggugwa il da lagage. Il dalok, Ar nen iniluk dalok yoraga dogolir, “Kir An ninom we satu jam ar, tuam waru ndak dek a? 41Kir maduk erurak ekinaka kau, tamban eku dogolir tuam pikpak waku dogoni o. Kir kinebe kinaguringge paga eti, pano mende eti eru wadok ogwe, kir kinebe eti obatne dek mende ma, kir nen eru ndak dek o.”
42Tuguluk Ar Yesus ambi inom ar tamban eri lagagerek eka dogolir, “Ai Nombae o, wene anggin panggin yi wogalogo bu ndak dek mondok ar etarigin kalok, Ai Nombae kakla andagen ndak-ndak ar etaruak o,” yiluk ekige. 43Eka lagagerek, tuguluk iyok paga lagage mende, Ar mutok lagwi mende yemenogo, noge inilimo apir ar etagagerek ma, ir enogo noge yugwi mban ar, il da lagage.
44Ar Yesus nogo ir dambe dalok inggi mbere ambi paga tamban wene alep ekige etnogoar iyok paga eri lagage. 45Eka lagagerek, Ar iyok paga, ir Ar mutok lagwi mende inoba wagagerek yoraga dogolir, “Kir noge yugwi, tar mbalkwi, ekwi ar agotik? Lakdani, o Ar Akuni Inakbur ap maduk mende wogoraurak enogo arar panggo yi waga yio. 46Ibar kiniluk arni. Lakani, akuni An nonggo nggeralke mende enogo muk waga eli kogop!”
Ar Yesus paktarugwa wene
(Mrk. 14:43-50; Luk. 22:47-53; Yoh. 18:3-12)
47Wene etanogo yega amor-amor, Ar aworomi dua belas mende inogar Yudas enogo, ir ap nggok dogalek tige tega ininggim wolok inom arar wagugwa. Nen ir ap eti, ir imam-imam kepala o, nen ap Yahudi mende inewai o, ir nen Yesus paktau paga lakbarugwama arar wagugwa. 48Ar ap onggo nggeralkige werek enogo, ir nen eru mende yoragage eti, ap nir paktau werek eti, an nane paktega dogolir, elokte nande taduk eka nalok, ap ebe eti ar eti yiluk, kir arar paktano o.
49Etegerogo yirugwarik ma, ar Yudas enogo lok-lok Ar Yesus oba lagagerek, wene yoga dogolir, “Ae, Guru Walak!” wene etanogo yega dogolir Ar Yesus kudik kambuk elokte ande taduk arar ekige.
50Ar Yesus nen wene onggo yoga dogolir, “Ae nogar, kar yoma eti ake nen wagan a?” Yorigemo nen, ir ap dogalek yemenogo, Ar Yesus oba panggok togon ari lagugwarik nen, ebe paktarugwa.
51Etanogo paktugu nanggugwa, Ar Yesus awor ambi inom etanogo nen, mbirok nggigik togon wagangga lagagerek, ap ambi imam agung ayedoman wagage mende, aruk tabok togon arar mbalkige. 52Ekinanggige, Ar Yesus nen wene yoga dogolir, “Mbirok wulabi wagan eti, akdikmo onggol din o. Nenaluk, ir akuni mbirok paga erugun mende ernogo, ir mbirok paga ar kambugun o. 53Kar kakla nen, An Nombae nggino yoru mo, Ar nen malaikat mende inebe dua belas paga dogalek dagik, yuk negen ar lakba waru ndak dek kakla andagen a? 54Ogwe etegerogon erumu, Alkitab aklah etaru yiluk, elalir wagugwa mende yemenogo ndak-ndak, nenggerogon etarubuk eti paga ma, ir erir tagwi ya, eru ndak-ndak arar o?”
55 #
Luk. 19:47, 21:37 Tuguluk, Ar Yesus nen, ap dogalek yemenogo yoraga dogolir, “Kir kinakla nen, An yi ap inakwa maduk mende negen agimo, paknabu paga mbirok a, ndugi a, yoma wolok wagop a? O ninggi nanggi Ar Allah Ai palek ma, wene emeriraga lagi enogo, etoma ar paknakop dek? 56Eta ar ogwe, ebe ya etaru ake nen ar, ir ap nabi-nabi nen Alkitab akla diru mbalkugwa mende ndak-ndak apma dik yuak nen o.”
Etanogo ar, Ar aworomi mutok lagwi mende yemenogo, Ar dambe kalok kode mbugulkugwa.
Ar Yesus Mahkamah Agama paga wolok lagugwa
(Mrk. 14:53-65; Luk. 22:54-55,63-71; Yoh. 18:13-14,19-24)
57Ir akuni Ar Yesus paktarugwa ernogo, Ar pagago wolok ap Imam Agung #26:57: Imam Agung eti: Ir agama Yahudi paga inewe anggup idu negen welagage. Ar nen o hari raya Perdamaian eti ake paga, o akuni ugun unggir tagodek ma endaga Ruang Mahasuci etoma inggi satu tahun omanggi paga mban unggi lalok, ar omaduk ake inom nen ir akuni Yahudi mende inomaduk ake paga inom, Tuhan nen dek erinabuwak nen yiluk, Ane Amburu Yugu Apeti yagadek eti paga, sapi warogo amep wari onggega lagage. Kayafas werekma wolok lagugwa. Lagugwa mende, ir ap guru-guru agama o, ap Yahudi mende inewai o, obok kuak ekbiluk werekma, inoba arar wolok lagugwa. 58Ar Petrus enogo Yesus mutok kwi yakbok ap imam agung werekma yemenogo lagage. Lagagerek, uma tilimo onggega lagagerek, nenggerogo ekwi dagin yiluk, ilu aru wadok nen, ap tuam barugwa mende inom korek tatuk welagage. 59Ir ap imam-imam kepala o, nen ir ap Mahkamah Agama pago mende o, maduk nggi kwak eke paga wene maduk oba biluk, mondok min waruok yiluk, wene kwakugwa. 60Ir ap inebe pakalok nen, wene inenggal mende Ar oba bu paga yirugwarik ar ogwe, ndakdek mban ar etagage o. Etarigi nanggige, ap inebe mbere menagugwa. 61#Yoh. 2:19Ir menatuk yugu dogolir, “Akuni yi nen yega dogolir, Allah Ai Palek yi miyak mayak lakbiluk, palka nagik ninggi mbere ambi paga erigin o,” yiluk yirige o.
62Yugu nanggugwa ar imam agung menagagerek, Ar Yesus yoga dogolir, “Kar wene maduk koba biktagwi yoma onggo yorau ndak dek a?” yiluk yorige. 63Ogwe Ar Yesus ane dek mban ar puk agage. Etegerogo agagemo, Ar Imam Agung nen, ambi inom ar yoga dogolir, “Ar Allah iluk mende endaga paga, Kar Raja Ndilinakwa, Ar Allah akbur kar arar a?” yiluk yorige.
64 #
Dan. 7:13
Yigi nanggige, Ar Yesus nen, “Kar yegen eti arar o. Ogwe ebebar andani o, yogondak ya ar, Akuni Inakbur enogo Inggi Ebengga korek kinil kugun o.#26:64: Inggi ebengga korek: Kinil kanio 22:44. Allah obatne werek mende mbogor paga agagona paga warigin o. Ar Allah obatne ambik mende, mbogor ma nen agagona paga waga kinil kugun o!” yiluk yorarige.
65 #
Im. 24:16
Yigi nanggige, Ar ap imam agung enogo iyom likbik lakbak#26:65: Ar iyom likbik lakbak ekige: Ir ap Yahudi mende. winimuk yugu dogolir kalok eti iniyom likbik lakbak eku lagugwa. eka dogolir men yirige, “Yogo Ar Allah puduk padak arar eke! Ap wene inilu werek mende kwaginabu dek arar aga, Ar andema nen yege mende, kinaruk obok ar kolalkop o.
66Yogo kir kinakla nenggerogon andagop?” Yoragagemo ir nen onggo yogu dogolir, “Ar maduk mende arar o. Ma, mondok min arar warurak o.”
67 #
Yes. 50:6
Yugu lagugwarik, inawori oba bugwi, ndugi wakwi, ekugwa. Ekwi kigik, ir amberak nen ininggi ndugi elokte tagik tagok waku dogolir men yorugwa, 68“Ap Raja Ndilinakwa yi, Kar kelokte kake eti ta nen, yokneran nda?” yiluk enok mbenok yorugwa.
69Ekwi kigik, ar Petrus nogo tilimo korek werek ma, kwe inayedoman mende ambi waga lagagerek, ar Petrus yoga dogolir, “Kar yi, Yesus kimbirak nega lagan ap o Galilea mende etnogore yi?” yiluk yorige.
70Yorigi nanggige, ar Petrus nen akuni obogar inilka paga onggo yega dogolir, “Kar yegen endi an nunggukdek o,” yiluk onggo yotuk, mendok togon bakma nggwe lagage. 71Lagagemo, tuguluk ar kwe inayedoman mende ambi nen, ar Petrus il kega lagagerek, akuni yemenogo yoraga dogolir, “Ar akuni yi, Ar Yesus ai Nazaret mende yi imbirak mende arar o.”
72Yiluk yigi nanggige, ar Petrus enggal ambi inom ar, ar ane uwak mbalka dogolir, “An ebebar yigi o, Ap endi an nunggukdek o,” yiluk yoragage.
73Dogoluk dek ar, ap mendek etanogo welagugwa mende enogo nen, ar Petrus oba wagu lagugwarik, “Kar kane unggur yega paga, kar kebe, ap ir inom mende arar o,” yiluk yenggak keyago o.
74Tuguluk ar Petrus nogo ane obatne togon uwak mbalka dogolir, “Ap endi an nunggukdek o,” yiluk yirige.
Etanogo yega amor-amor ar, tewe ayam ane yirige. 75Tewe ane yirigemo, ar Petrus enogo, ar Yesus wene yorige enogo akla eber tari wagage, “Te ane inggi mbere ambi paga yigik dek kigik, kinggi mbere ambi paga nonggokdek yigin o,” yiluk yirige mende, wene eti ar akla ebetatuk tekman nggwe wulka lagagerek, iliti buru yiluk de pakalok mondok arar yirige.
सध्या निवडलेले:
MATIUS 26: WLW
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
