MATIUS 19
19
Kumi togok dagu dogorak yirige wene
(Mrk. 10:1-12)
1Ar Yesus etoma obogar yoraga lagagerek, o Galilea dambe kalok, o Yudea i Yordan alibagan nggwe etoma lagage. 2Akuni pakalok ar mutok lagugwa, nen Ar nen ir etoma u inoba dek erogo barige.
3Tuguluk ir ap Farisi mende, wene ambi yiduk kwaruok nen yiluk, wene endokma waganggu dogolir, yegerogon yorugwa, “Wene hukum agama nir mende paga, ap kumi waganek mende, wene ugunar yiduk kalok, mbo togok bau ndak a?” yiluk yorugwa.
4 #
Kej. 1:27, 5:2 Yorugwama, Ar Yesus nen onggo yoraga dogolir, “Ar akuni kenamer barige werek nen, ibibir ir ap o, nen kwe o, kenamer barige yiluk, kir alkitab akla diru endaga talukdek a? 5#Kej. 2:24Tuguluk Ar nen yega dogolir, ‘Eti paga nen ar ap ernogo, agwiya ombae dambe balok, agwe imbirak dambulkwi, nen imbirak ambiar arugun o.’ 6Etiar ma, ir imbirak mbere dek ogwe, ambiar o. Ma, Ar Allah nen dambulogo barige mende eti, akuni nen inadik ndak pigalogo mbo baurak mondok maga o.”
7 #
Ul. 24:1-4; Mat. 5:31 Yigi nanggige, ir akuni Farisi mende nen, kinok Ar yogu dogolir, “Eti kalok, Ar Musa nen kumi inadik ndak pigalogo mbo togor bau kalok, diru kumi mbo baurak mende mbalogo wogoragu dogorak o, yiluk yirige eti nenaluk?”
8Ar Yesus nen onggo yoraga dogolir, “Ar Musa nen, kir kinakburi waganek mende mbo bagu dogorak mende yirige eti, kir morokinabu kinalep akber wu warek kalok yirige o. Ogwe, ibibir etoma etegerogon dek arar o. 9#Mat. 5:32; 1Kor. 7:10-11Etiar ma, kinaruk kolini o: Ar kwe ambi, ap wedek mende inom maduk mbainak eka dek kigik, ta nen ar agwe eti mbo biluk, nen ar kwe edo paga ninggalok mende ar waganigin kalok, akuni eti maduk mbainak arar erigin o.”
10Yigi nanggige, Ar Yesus mutok lagwi mende nen yogu dogolir, “Ir agun agwe imbirak inawene etegerogon kalok, ir akuni eti nen, kwe ap edo paga wogonaburak eti dambe kalok dogorak kwak eti pano arar o.”
11Yorugwama Ar Yesus nen onggo yoraga dogolir, “Ir akuni obogar nen wene eti ndak-ndak waganurak ndak dek o, ogwe akuni Ar Allah etegerogon eruak nen yiluk, pulogo barige mende eti mban, erurak ndak o. 12Ir akuni amberak kumi wogonabu ndak dek eti, nenaluk ir eti etegerogo ake pulik ma o. Nen ir akuni amberak kumi wogonabu ndak dek eti, ir akuni nen etegerogo dogowak nen yiluk, eginaketek paga o. Nen ir amberak eti, an kwe waganu, an ap waganu, na'ir o, an Ar Allah eyabu mban erigin o, yiluk miketek paga o. Ir akuni nen, wene yugu yi waganu ndak kalok, wene yi, ir waganurak arar o.”
Ar Yesus nen ir elege adeknggen inoba birige wene
(Mrk. 10:13-16; Luk. 18:15-17)
13Ar Yesus nen elege bugudak ndak inaluak inggi tebel balok, inake tamban eruak nen yiluk, akuni nen elege bugudak ndak wogonarek, Ar Yesus oba wagagugwa mende: Ir Ar awurimi nen, akuni yemenogo wenemuk yorarugwa. 14Ogwe Ar Yesus nen yoraga dogolir, Ir elege etoma An noba waruwak nen dambek dani o. Nen ir An noba wagunem, inaruan nggodo mbalinabugup o. Nenaluk, ir akuni yegerogon mende arar, Ar Allah akburi ane waganggwi mende etarugun o. 15Yega lagagerek, Ar Yesus ir elegedak yemenogo inaluak inggi tebel dalok, Adeknggen inoba barige.
Ap lerago amende ambik nen ekige wene
(Mrk. 10:17-27; Luk. 18:18-27)
16O ambi paga, ap lerago ambi, ar Yesus oba waga lagagerek, yoga dogolir, “Guru wae, An niluk nabedal kabedal naitok mende ekodaurak paga, pano mondok erurak eti nena?”
17Ar Yesus nen onggo yoga dogolir, “Kar nen wene pano mende erurak kwak nggi yiluk, An yonegen nenaluk? Omanggi omangga ar pano mende werek o. Kar kiluk dogu wadok kalok, Ar Allah nen wene eku dogu kologo birige mende etoma, dik duk mondok arar erurak o.”
18 #
Kel. 20:13-16; Ul. 5:17-20 Ar ap lerago enogo nen wene onggo yoga dogolir, “Wene eku dogu yirige mende eti, nggi kwak?”
Ar Yesus nen onggo yoga dogolir, “Ap wakup o, kumi ugunar erinakup o, akuni inamendek kimodo waganugup o, wene kenggal mende yugup o. 19#Kel. 20:12; Im. 19:18; Ul. 5:16Kagwiya kombae inakba togon dogono o: nen kar kiliti kunik eta tagan ndak-ndak, ir akuni amberak inakba kaurak ar o,” yiluk yorige.
20Yorigemo, Ar ap lerago enogo nen wene onggo yoga dogolir, “Wene yegen mende etoma, an obogar nggidik nggedok erir taga o. Erurak mende ambi nggi kwak kegen?” 21Ar Yesus nen onggo yoga dogolir, “Kar ap pani pano mondok etarurak kalok, kamindik kamende obogar, onggo kuni lan o. Nen kauang etoma obogar akuni ininggi dek mende wogorano o. Etegerogon eka keyalok, kar kamende onggo mbogor paga koda ligin o. Eti eka dogoluk kalok, An mutnarek watno o!”
22Wene yorige yemenogo, obogar aruk kolalka lagagerek, ap enogo amindik amendek ambik ma, iliti buru yiluk, lagage.
23Tuguluk Ar Yesus mutok lagwi mende yemenogo yoraga dogolir, “Wene ambi An yokerak o, ir akuni inamendek ambik welaga mende, Allah akburi etarurak mondok didarek o.”
24Nen, An wene ambi yi inom ar yokerak o; unta #19:24: Unta eti: Sapi ndak-ndak ar ogwe, ar unta eti ambor inom nen iyok inom obatne ambik ma, akuni yarurogo wogorek nega dogu ake eku lagugwa. nen jarum elola unggurak eti ndak negen ogwe, akuni amendek ambik werek mende eti nen, Ar Allah werek ma unggurak eti, mondok ndak dek o. 25Ar Yesus wene yirige etnogo, ir Ar mutok lagwi mende inaruk kolku lagugwarik, we, au, yiluk bi waku dogolir, yegerogon yirugwa, “Etegerogon kalok, akuni ta nen kwak ndak ndil kodagin kogop?” yiluk yirugwa.
26Yugwi dalok, Ar Yesus ir il bikdaga lagagerek yoraga dogolir, “Ir akuni nen erurak eti mondok ndakdek o! Ogwe Ar Allah nen perak, erurak mondok ndak o.”
27Yigi nanggige, ar Petrus nen yoga dogolir, “Kil bikninan, nir Kar mukarek lagu dogu paga, ninamindik ninamendek obogar dambe kalok wago o, Ninombae. Nen nir onggo nena kodagun kegen.”
28 #
Mat. 25:31; Luk. 22:30 Ar Yesus nen yoraga dogolir, “O ngger erogo bigin mo etoma, Ar Akuni Inakbur ernogo, Ar akdip amu ari tagodek, aitok mondok paga etoma arar, kotari ligin o. O eta paga, kir An mutnarek lagwi mende yi, o takhta dua belas paga ndalek ma, etoma kir korek latuk dogolir, ir akuni 12 suku Israel enogo, ir inendokma waganogo, inuwak dolinabugun o. 29Nen ir akuni inai palek mende dambe kugwi, inogari wadigi, inirui komadigi, inagwiya inombae inom, inakburi elege inom, ineyabu waganek inom, An mutnarek lau paga togok biluk lugun etnogo, akuni eti onggo iyok paga, seratus paga yungguk medak#19:29: Seratus paga yungguk medak eti, walkigik negen: Ap ambi Yesus mutok lau paga, auang satu juta dambe kalok mutok ligin kalok, wenarigin eti: 100 x 1.000.000. Ma, Ar ap enogo onggo dambulik wogorigin eti: seratus juta. (100.000.000). onggo kodagun o. Nen ar nabedal kabedal iluk aitok mende eti, inom ar kodagin o. 30#Mat. 20:16; Luk. 13:30Ogwe ir akuni yogondak ya, inalep ibibir agarik mende ernogo, yabongga arugun o. Nen ir yogondak ya yabongga agarik mende eti, ir inalep arugun o,” yiluk yoragage.
सध्या निवडलेले:
MATIUS 19: WLW
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
