Matewu 18
18
Lwenkulu Mfun'wini wa Xikwembu i mani?
(Marka 9:33-37; Luka 9:46-48)
1 # Vona ni: Luk. 22:24. Nkarhini wolowo, vajondzisiwa vata ka Yesu vaku: “Lwenkulu Mfun'wini wa matilo i mani xana?” 2Yesu avitana ntsongwana, amuyimisa xikarhi ka vona, aku: 3“Nitiyisile nili ka n'wina: Loko mingahundzuki mifana ni vatsongwana, amingangheni Mfun'wini wa matilo. 4Hikolaho-ke, lweyi atitsongahataka kufana ni ntsongwana lweyi, hi yena lweyi anga lwenkulu Mfun'wini wa matilo. 5Nasvona lweyi ayamukelaka ntsongwana wofana ni lweyi hi vito ra mina, ayamukela mina.
Ta svikhunguvanyiso
(Marka 9:42-48; Luka 17:1-2)
6“Kambe lweyi angatayendla lesvaku mun'we wa lavatsongo lava vapfumelaka ka mina, akhunguvanyeka asvitayampsa loko aboheleliwa ribze ra kusilela ka rona nhan'wini, ahoxiwa xiziveni xa lwandle. 7Yini khombo misava hikolaho ka svikhunguvanyiso; loko kuli kukhunguvanyisa, kunene kufanele kuva kona, kambe a ni khombo munhu lweyi kukhunguvanyeka kuhumelelaka hikolaho ka yena. 8Loko voko ra wena kumbe nenge wa wena svikukhunguvanyisa, svitseme, usvicukumeta kule na wena; hikuva svingayampsa loko unghena vuton'wini na uli xilima kumbe na ukhwita, kutlula kuhoxiwa ndzilweni lowungatimekiki na uli ni milenge yimbirhi kumbe mavoko mambirhi. 9Ni loko tihlo ra wena rikukhunguvanyisa, rixokole, uricukumeta kule na wena; hikuva svingayampsa kunghena vuton'wini na uli ni tihlo rin'we, kutlula kuhoxiwa ndzilweni wa Tihele na uli ni mahlo mambirhi.
Ta xifaniso xa nyempfu leyilahlekeke
(Luka 15:3-7)
10“Tivoneleni lesvaku mingatshuki michipisa ni mun'we wa lavatsongo lava; hikuva namibzela lesvaku tintsumi ta vona matilweni titshama nkarhi hinkwawu na tivona mombo wa Tatana wa mina lweyi anga matilweni. [ 11#Vona ni: Luk. 19:10. Hikuva N'wana-wa-Munhu atile kutalava ni kutaponisa lesvilahlekeke.]#18:11Van'wana avatsalanga ndzimana leyi. 12Xana miyanakanya yini hi mhaka leyi ke: Loko munhu ali ni dzana (100) ra tinyempfu, kutani yin'we ya tona yilahleka, xana angakala angasiyi leti ta ntlhanu ni mune wa makume ni ntlhanu ni mune (99) nhoveni, ayalava leyilahlekeke ke? 13Nitiyisile nili ka n'wina: Loko atshuka ayikumile, atayitsakela ngopfu kutlula leti ta ntlhanu wa makume ni mune leti atingalahlekanga. 14Hi mukhuva wolowo, ahikurhandza ka Tatana wa n'wina lweyi anga matilweni lesvaku kulahleka ni mun'we wa lavatsongo lava.
Ta makwenu lweyi akujoheleke
(Luka 17:3)
15 # Vona ni: Luk. 17:3. “Loko makwenu akujohelile, famba uyakombisana na yena kuhoxa ka yena, na mili n'wina vambirhi ntsena; loko akuyingisa, utava uvuyisile makwenu. 16#Vona ni: Dew. 19:15. Kambe loko angakuyingisi, teka munhu mun'we, kumbe vambirhi, lesvaku mhaka hinkwayu yifakaziwa hi milomo ya timboni timbirhi kumbe tinharhu. 17Loko ayala kuvayingisa, bzela nhlengeletanu ya vakriste; loko ayala kuyingisa na yona nhlengeletanu, ka wena aakotise muhedeni kumbe muhakelisi wa rhesa.
Ta kuyalela ni kupfumelela
18“Nitiyisile nili ka n'wina: Hinkwasvu lesvi mingatasviyalela laha misaveni, svitayaleliwa ni le tilweni; ni hinkwasvu lesvi mingatasvipfumelela laha misaveni, svitapfumeleliwa ni le tilweni. 19Nasvona namibzela kambe, nili ka n'wina: Loko vambirhi xikarhi ka n'wina vatwanana laha misaveni ka mhaka yihi na yihi, kutani vayikombela hi kukhongela, vatanyikiwa yona hi Tatana wa mina lweyi anga matilweni. 20Hikuva laha vambirhi kumbe vanharhu vahlengeletanaka kona hi vito ra mina, na mina nikona kolaho xikarhi ka vona.”
Ta xifaniso xa mutirhi lweyi angatsetseleliki nakulobze
21 # Vona ni: Luk. 17:3-4. Hi loko Petrosi ata ka Yesu, afika amuvutisa aku: “Hosi, loko makwerhu atshamela kunijohela, xana nitamurivalela kangani ni ke? Kungava ka ntlhanu ni ka mbirhi ke?” 22Yesu aku ka yena: “Anikubzeli kumurivalela ka ntlhanu ni kambirhi, kambe nili akuve, makume ya ntlhanu ni mambirhi loku kuyandzisiwaka hi ntlhanu ni kambirhi. 23Hikuva Mfumu wa matilo wufana ni hosi leyinaveleke kukambisisa timale letitameliweke hi vatirhi, va yona. 24Kuteloko yisungulile kukambisisa, kutisiwa munhu lweyi anga ni xikweneti lexikulu xa male ya khume wa makhulu (10 000) ya titalenta. 25Kambe lesvi munhu lweyi aapfumala xomuhakela ha xona, n'winyi wa yena atsema mhaka ya lesvaku axavisiwa, yena ni nsati, ni vana ni hinkwasvu lesvi anga nasvo, lesvaku nandzu wa yena wutahela hi mukhuva wolowo. 26Hi loko mutirhi lweyo awela milengeni ya n'winyi wa yena, akombela aku: ‘Nilehisele mbilu, nitakuhakela hinkwasvu.’ 27N'winyi wa mutirhi lweyi amutwela vusiwana, amutshunxa ni kumurivalela nandzu wakona. 28Kambe loko mutirhi lweyi ahuma handle, ahlangana ni mutirhikulobze lweyi aamudevha male ya tidenari ta dzana (100); hi loko amukhoma, amutlimba nkolo, aku: ‘Humesa male ya mina!’ 29Mutirhikulobze yelweyo awela milengeni ya yena, amukombela aku: ‘Nilehisele mbilu, nitakuhakela hinkwasvu.’ 30Kambe yena ayala, ayamuhoxa jele kukondza ahakela male hinkwayu. 31Kutani loko vatirhi lava van'wana vavona lesvihumeleleke, vakhomiwa hi kuvaviseka ngopfu, vayarungulela n'winyi wa vona hinkwasvu lesvihumeleleke. 32Hi loko n'winyi wa vona avitana mutirhi lwiya, aku ka yena: ‘Mutirhi lweyi wobiha! Nikutsetselelile nandzu wa wena hinkwawu, hi lesvi unganikombela; 33asvingakufanelanga na wena kutsetselela nakuloni, kufana ni lesvi na mina ningakutsetselela xana?’ 34Kutani n'winyi wa yena amukarihela, amunyiketa mavokweni ya maphoyisa, mutirhi yelweyo akondza ahakela male hinkwayu. 35Tatana wa mina wa le matilweni atayendlisa svosvo ka n'wina, loko mani na mani wa n'wina angatsetseleli makwavu hi mbilu ya yena hinkwayu.”
सध्या निवडलेले:
Matewu 18: NTC2014
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Novo Testamento Changana © Bible Society of Mozambique, 2014.
