Matewu 17
17
Takuhundzuka ka nghohe ya Yesu
(Marka 9:2-13; Luka 9:28-36)
1Loko kuhundzile masiku ya ntlhanu ni rin'we, Yesu ateka Petrosi na Yakobe na Yohani makwavu wa Yakobe, aya na vona ntshaveni leyoleha na vali voxe. #Vona ni: II Pet. 1:17-18. 2Kutani ahundzuka mahlweni ka vona; nghohe ya yena yivangama kufana ni jambu, nasvona sviyambalu sva yena svihundzuka lesvobasa, svivangama kukotisa kuvonakala. 3Hi loko Moxe na Eliya vahumelela kolaho, vavulavula na yena. 4Kutani Petrosi aku ka Yesu: “Hosi, svatsakisa kuva kola; loko usvirhandza, ningayaka mintsonga yinharhu kola, wun'we wa wena, wun'wanyana wa Moxe, wun'wanyana wa Eliya.” 5#Vona ni: Gen. 22:2; Dew. 18:15; Psal. 2:7; Ez. 42:1; Mat. 3:17; 12:18; Mar. 1:11; Luk. 3:22. Aku ahavulavula, refu lerovangama rihumelela, rivafunengeta; kutani kutwakala rito lerihumaka ka refu, riku: “Lweyi i N'wananga lweyi nimurhandzekaka, lweyi nimutsakelaka, muyingiseni!” 6Loko vajondzisiwa vatwa rito lero, vawa hi svimombo, hi kuchava. 7Kambe Yesu avatshinelela, avakhumba aku: “Sukanimiyima, mingachaveni!” 8Loko vatlakusa mahlo, vavona Yesu na ali yexe, kungali na mun'wana kolaho.
9Loko vahaxika hi le ntshaveni, Yesu avalerisa aku: “Mingatshukeni mibzela vanhu lesvi misvivoneke, kukondza N'wana-wa-Munhu atava apfukile kufeni.” 10#Vona ni: Mal. 4:5. Kutani vajondzisiwa vamuvutisa, vaku: “Hikolaho ka yini Vatsali vavula lesvaku Eliya afanele kurhanga ata xana?” 11Avahlamula aku: “Kunene Eliya wata, kutani atatlhela alulamisa hinkwasvu. 12#Vona ni: Mat. 11:14. Kambe mina namibzela lesvaku Eliya atile, kambe avamutivanga; kutani vamuyendlile hinkwasvu lesvi vasvirhandzeke. Hi mukhuva wolowo, vatatwisa na yena N'wana-wa-Munhu kuvava.” 13Hi loko vajondzisiwa vatwisisa lesvaku aavabzela hi ta Yohani Mukhuvuli.
Ta Yesu loko ahanyisa jaha leri arili ni dimoni
(Marka 9:14-29; Luka 9:37-43a)
14Kuteloko vafikile axitshungwini, munhu ata ka yena, atakhinsama, aku: 15“Hosi, twela n'wana wa mina vusiwana, hikuva axanisiwa ngopfu hi vuvabzi bza n'weti; hakanyingi awela ndzilweni, ni le matini. 16Nimutisile ka vajondzisiwa va wena, kambe vatsandzekile kumuhanyisa.” 17Yesu ahlamula, aku: “Ha! Rixaka leringapfumeliki, lerohomboloka, nitava na n'wina kufika rini xana? Nitamixanisekela kufika kwihi ke? Mutiseni halenu.” 18Hi loko Yesu akhahla dimoni, kutani dimoni rihuma ka lweyi wajaha; kusukela nkarhi wolowo jaha leriya riva rihanyile.
19Kutani vajondzisiwa vata ka Yesu hi tlhelo, vaku ka yena: “Xana hina hitsandzekile ha yini kurihlongola ke?” 20#Vona ni: Mat. 21:21; Mar. 11:23; I Kor. 13:2. Aku ka vona: “Hikolaho ka kupfumela kutsongo ka n'wina. Nitiyisile nili ka n'wina: Loko mili ni kupfumela loku kuringanaka ni ndzoho ya sinapi, mingaku ka ntshava leyi: ‘Suka laha uya lahaya!’ Kutani yitarhurha; kuhava lexi xingatamitsandza. 21[Dimoni ra rixaka leri arihumi loko kungali hi kukhongela ni kutitsona svakuja.]” #17:21 Van'wana avatsalanga ndzimana leyi.
Ta Yesu loko atlhela ativisa ta rifu ra yena
(Marka 9:30-32; Luka 9:43b-45)
22Loko vajondzisiwa vatlhele vahlangana Galileya, Yesu aku ka vona: “N'wana-wa-Munhu atanyiketiwa mavokweni ya vanhu; 23vatamudlaya, kambe atatlhela apfuka kufeni hi siku ra vunharhu.” Kutani vajondzisiwa vatala hi kuvaviseka lokukulu.
Ta Yesu loko arhesa
24 # Vona ni: Eks. 30:13; 38:26. Loko Yesu ni vajondzisiwa vafika Kapernawume, vahakelisi va rhesa ra tidrakma timbirhi #17:24 Drakma: Male ya khale ya nsimbi ya Vagriki ni Varoma. vata ka Petrosi, vaku: “Xana mujondzisi wa n'wina angahumesi tidrakma timbirhi ke?” 25Aku: “Ina, wahumesa.” Loko Petrosi anghenile ndlwini, Yesu atekela kumuvutisa, aku: “Xana upimisa yini Simoni? Tihosi ta misava titeka ka mani rhesa ke? Ka vana va tona, kumbe a ka vanhu va le handle xana?” 26Petrosi aku ka yena: “Ka vanhu va le handle.” Yesu aku ka yena: “Loko svilitano, vana va tona avarhesi. 27Kambe lesvaku hingavakhunguvanyisi, yana ativeni, uyaringela; kutani hlampfi leyorhanga leyi ungatayiphasa, yikhome, uyipfula nomo; utakuma xitatare kona; xiteke, uvanyika xona, uhumesela mina na wena.”
सध्या निवडलेले:
Matewu 17: NTC2014
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Novo Testamento Changana © Bible Society of Mozambique, 2014.
