PANDARIADDI 38
38
I Yehuda wuṛṛu i Tamar
1Iraṛṛangngo su tempo udde i Yehuda nanantangngu manga tuṛṛangnge wuṛṛu natana'a suadio'a ringanni Hira, sangkatou esakka niarantanne wuassu soan Adulam. 2Isudde i Yehuda naggawen sangkatou maṛṛualan Kanaan, ana'i Sua, ana see itarua na'awingnga. 3Ana'i tarua pahul᷊u esakka, nisaggon iamangnge i Er. 4Ana'a aruane, esakka lai, nisaggon tou i Onan. 5Ana'a atallune lai esakka, wuṛṛu nisaggon tou i Syela. Su tempo i Syela niasungkanga i Yehuda tantal᷊anna su Kezib.
6I Yehuda nangawingngu anangnge i Er, anangnge pahul᷊une ringanni Tamar. 7Pallal᷊aghun i Er tumaniten dal᷊eo atonna, na'oman sara Mawu nasa'u wuṛṛu namate si tou. 8Ana see i Yehuda nabbisara si Onan tuarin i Er, “Roote ringannu inawal᷊uannu iaangngu, wuṛṛu atiille ringanni tou. Suunga'e manaranu ringanni tou, ana waugu i'o tuarin awingnge; ringannu aroddi iaangngu wotongnge maasomba pallaṛṛite.” 9Arawe i Onan masingkatta manungku manga anangnge sarun tawe maola'a pussaane. Nariaddi, suapan i tou matatamban inawal᷊uannu iaangnge udde, sal᷊ingnge niwalan tou maramme su liudde tadea'u iaangnge tawe maasomba pallaṛṛite. 10Inolaanne udde naasa'u Mawu, wuṛṛu Mawu namate si tou lai. 11Wua'udde i Yehuda nabbisarate si Tamar mananambone udde, “Pabbelengke su wal᷊en hagurangngu wuṛṛu atana'e isudde ere sangkatou inawal᷊uanna maddatingngu ana'u i Syela mahewalla.” I tou nabisara aroddi ana waugu matta'utta aṛṛengenne i Syela sarun pateannu Mawu lai, ere iaangnge ruan katou. Ne i Tamar napul᷊ete watukku wal᷊en hagurangnge.
12Manga pira tempo nal᷊iudda awingngi Yehuda nate. Napawe nasuete tempone lullal᷊o, i Yehuda nangahe si Hira, hawene wuassu Adulam udde, inai watukku Timna, su tampa manga dombane pappol᷊oanna wambul᷊une. 13I Tamar naaringikka watti'a manungku i Yehuda la'iananne sarun dumanta su Timna mamol᷊o wambul᷊u manga dombane. 14Ne i tou nanal᷊iu laubbu inawal᷊uanne ringannu laubba waine. Hatine nilindumanna, ana see i tou inuma'iante su ngara pasallangannu soan Enaim, apan addone su lal᷊anna mattudan Timna. I Tamar masingkatta atonna manungku i Syela ana'i Yehuda ṛembonne, wahewalle, arawe i tou taambe lai niawingnga ringannu umbasanna udde.
15Napawe i Yehuda naasilo si Tamar, su sunnane wawine udde wawine masandaga, ana waugu hatine lal᷊indumanna. 16Ana see i Yehuda nangundanin tou su winggin dal᷊anna udde, wuṛṛu nabbisara, “Pira apan dorongannu?” I tou wagga manungku wawine udde mananambone sassane.
I Tamar sinumimbakka, “Walate i Tuangnga.”
17I Yehuda nabbisara apia, “I ya'u sarun mangonggola si'o samba'u ana'u ambinga saṛṛen tumuwo.”
Sasimbakki Tamar, “Wotongnge, sawal᷊iate pia wataṛṛune, ma'oman sara i Tuangnga mapaapidu ambinga udde.”
18“Apa wataṛṛune?” aiwal᷊on i Yehuda.
Sasimbakki Tamar, “Onggol᷊a'e si ya'u cappan Tuangnga ringannu tal᷊ine wuṛṛu lai ta'inna apan aagasanni Tuangnga udde.” I Yehuda nangonggolu manga saranapa udde si tou, ana see itarua natatambate, wuṛṛu i Tamar piate illoṛṛo. 19I Tamar napul᷊ete watukku wal᷊ene wuṛṛu nalluatta lal᷊indummu hatine, ana see nalluṛṛen laubbu inawal᷊uanne apia.
20Manga pira tempo wua'udde i Yehuda nandolokki Hira, hawene, iapa'untuddu ambinga udde wuṛṛu mangul᷊e apia manga saranapa apan buatte nionggoli tou maola'a wataṛṛu, arawe i Hira tawe naasangkalla wawine udde. 21I Hira mangke ma'iwal᷊o manga taumata su Enaim, “Suapa wawine masandaga apan inanaramanne ual᷊aṛṛaddo su winggin dal᷊anna indi?”
“Tawe saran paassa pia bawine masandaga isindi,” sasimbakki mangitou.
22Ana see i Hira nabelengke apia ringanni Yehuda wuṛṛu nabbisara, “I ya'u tawe maasangkalla wawine udde. Tumuṛṛutu manga taumata poiaroddi tawe saran paassa pia wawine masandaga isudde.”
23Unni Yehuda, “Wala'e manga saranapa udde onggol᷊a'e si tou, sawal᷊iate i ite tawe maasomba asasili. I ya'u buatte mattinsahadda mamaekka, arawe i'o tawe naasangkalla si tou.”
24Iraṛṛangngo tallu wul᷊ana wua'udde i Yehuda naaringikka watti'a manungku i Tamar mananambone buatte nail᷊al᷊ihidda wawine masandaga wuṛṛu piate illoṛṛo.
Ana see i Yehuda mamarenta, “Al᷊appe i tou wuṛṛu tambuna'e ma'oman sara mate!”
25Tantal᷊anna i Tamar niapidda su liudde, i tou nananata la'iananne, wisarane, “I ya'u piate illoṛṛo wuassu taumata apan uatahuanna manga saranapa indi. Parikisete isai tatahuannu cappa ringannu tal᷊ine wuṛṛu ta'inna indi.”
26I Yehuda naaillal᷊a manga saranapa udde wuṛṛu nabbisara, “Wawine udde tawe sal᷊ane. I ya'u tawe naatipussa manara'u si tou; ṛinone i ya'u mangawingngi tou ringannu ana'u i Syela.” I Yehuda tate lai natatamban Tamar.
27Napawe nia'omante tempone i Tamar mangunsiwe, inauranna i tou manungkangu ana'a ṛindua. 28Tantal᷊anna i tou mangunsiwe, sangkatou suwallatu ana'a ṛindua udde napasabangngu limane, ana see biangnga nangagassa ta'iakka udde wuṛṛu niwa'issu wananna maṛṛamu. Wisarane, “Ana'a udde masungkanga paarorone.” 29Arawe ana'a udde namelengngu ta'iakke apia, wuṛṛu eteudde ana'a sambau nisungkanga paarorone. Wua'udde biangnga nabbisara, “Nariaddi etearoddi olangngu mamata'a sumabbangnga!” Ne ana'a apan niasungkanga paarorone udde nissagon tou i Peres. 30Wua'udde niasungkangke tuarine apan limane pia banannane maṛṛamu. I tou nisaggo i Zerah.
सध्या निवडलेले:
PANDARIADDI 38: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन