PANDARIADDI 37
37
I Yusuf wuṛṛu manga tuṛṛangnge
1I Yakub namanuate su wanua Kanaan, su tampa atatanaannu iamangnge, 2wuṛṛu ete indi watti'u amonanni Yakub.
Su tempo i Yusuf, ana'i Yakub uukke mapul᷊o pitu su tonnane, i tou uapadul᷊i ammul᷊annu ambinga domba suadio'a ringannu manga iaangnge, eteudde ana'i Bilha wuṛṛu i Zilpha, ruan katou awingngu iamangnge waine. I tou nangalae su iamangnge inolaanna lal᷊eo apan niola'u manga iaangnge.
3I Yakub lembon marangngu si Yusuf wuassu anambon anangnge waine, ana waugu i Yusuf niasungkanga su tempo iamangnge timmadete. Su allo sambau i Yusuf niolaanni tou sambau juba apan lembon maṛṛa mago. 4Napawe manga iaangngi Yusuf naasilo manungku iamangngi mangitou lembon marangngu si Yusuf wuassi mangitou, i mangitou nasa'ute si Yusuf, na'oman sara i mangitou maddirite maggahatton tou.
5Su ṛabbi sambau i Yusuf nabbal᷊iawa, wuṛṛu napawe i tou nabbati'u wal᷊iawane udde su manga iaangnge, i mangitou lembon massa'u si tou. 6Ete indi apan niwatti'i Yusuf si mangitou, “Paddaringikka! 7I ya'u nabbal᷊iawa i ite sarangkanambone tantal᷊anna su wailla mamma'isa gandumma, ana see gandumma tatahuanangku dirumarisikka matul᷊idda. Manga gandummi yamiu apan buatte niwa'issa namal᷊iwutta gandumma apan buatte ta'u niwa'issa ana see nassubba si tou.”
8“I'o massunna manungku i'o sarun maola'a ratu wuṛṛu uataṛṛino si yami?” wisaran manga iaangnge. Ana see lembon massa'ute i mangitou si tou ana waugu manga wal᷊iawane wuṛṛu ana waugu sarangkanambone apan buatte niwatti'i tou.
9Wua'udde i Yusuf nabbal᷊iawa apia, wuṛṛu i tou nabbatti'a su manga iaangnge, “I ya'u nabbal᷊iawa apia, i ya'u naasilo matannallo, wul᷊anna wuṛṛu mapul᷊o dua anumpitanna nassubba si ya'u.”
10Wal᷊iawa udde niwatti'i tou lai su iamangnge, wuṛṛu iamangnge nanagu si tou, wisarane, “Wal᷊iawa apa udde? Su ṛingirannu i ya'u, inangngu wuṛṛu manga tuṛṛangngu sarun dumanta wuṛṛu massubba si'o?” 11Manga iaangngi Yusuf piate naungnga lal᷊eo si tou, arawe iamangnge sidutu maṛṛingiddu wal᷊iawa udde.
I Yusuf niwal᷊u'a wuṛṛu niapidda watukku Mesir
12Su allo sambau su tempo manga iaangngi Yusuf inaite watukku Sikhem mallu'adda ammul᷊annu ambinga domban iamangngi mangitou, 13i Yakub nabbisarate si Yusuf, “Roote watukku Sikhem, su tampa manga iaangngu mallu'adda ammul᷊annu ambinga domban kite.” I Yusuf sinumimbakka, “Ore Papa.”
14Iamangnge nabbisara, “Ellehete ereapa olangnge manga iaangngu wuṛṛu ammul᷊annu ambinga domba, ana see pabbelengke pabbal᷊o si ya'u.” Ne i tou namallosen i Yusuf inaite nanantangngu Wawal᷊annu Hebron.
Tawe nal᷊annu i Yusuf na'omate su Sikhem. 15Tantal᷊anna i tou u'aamatta uapapal᷊ele su wadda'a, i tou nassombaten sangkatou esakka wuṛṛu naiwal᷊o si tou, “Apa raddeaannu?”
16“Manga iaangku. I mangitou tantal᷊anna uariaga ammul᷊annu ambinga domba,” sasimbakki Yusuf, “I Papa masingkatta suapa i mangitou uatana'a?”
17Sasimbakku taumata udde, “I mangitou nangingkatte wua isindi. I ya'u naaringikka manungku i mangitou inai watukku Dotan.” Ana see i Yusuf inaite nattuṛṛutta manga iaangnge wuṛṛu inaratinganna i mangitou su Dotan.
18Ro'en ta'e marau i mangitou naasilote si Yusuf, wuṛṛu tantal᷊anna i tou taambe na'oma ringanni mangitou, i mangitou nabbaidda mamate si tou. 19Unni mangitou sangkatou ringannu sangkatou, “Pa'elega, i taṛṛa wal᷊iawa nirumantate. 20Wette pateanni ite i tou, wuṛṛu winal᷊unanne iramme su paṛṛihi mamara. Mantewe iwal᷊on kite manungku i tou nate niaṛṛatu winatangnga mal᷊aṛṛaga. Ellehanten kite ereapa sal᷊immurine manga wal᷊iawane udde.”
21I Ruben naaringikka ṛiinni mangitou udde, ana see i tou madea'a lal᷊anne manal᷊amatta si Yusuf. “Arie pappate i tou,” wisarane. 22“I tou ilomboteng kite sulal᷊ummu paṛṛihi su wadda'a indi, arawe imbaṛṛangnga i ite mamuulla ara'e mallessa si tou.” Olangnge udde niwisarane ana waugu i tou pia pandumma manal᷊amatta si Yusuf wuṛṛu mandolokki tou iapaapul᷊e watukku wal᷊en. 23Napawe i Yusuf na'omate ringannu manga iaangnge, ringannu maṛṛagissa i mangitou nalluatta juban i Yusuf apan tumaniten maṛṛamaga udde. 24Ana see i mangitou namol᷊engnga si tou wuṛṛu nilombo sulal᷊ummu paṛṛihi apan mamara. 25Tantal᷊anna i mangitou u'anna, inaṛṛombanganne i mangitou naasilo sambau ammul᷊annu taumatan Ismael apan tantal᷊an sulal᷊ummu amatanna wuassu Gilead watukku Mesir. Manga unta mangitou lal᷊uranannu manga rampa-rampa wuṛṛu anggore namarate. 26Ana see i Yehuda nabbisara su manga tuṛṛangnge, “Apa hunane mamate tuaring, kite wuṛṛu mangadapingngu pamamate udde? 27Wette i ite mabbal᷊u'i tou su taumatan Ismael udde. Ariete i ite manansara si tou. Salaiwe ereapa i tou tuarin kite sassane.” Manga tuṛṛangnge inumirete, 28wuṛṛu napawe manga pira mabbawal᷊u'a wuassu Midian sinumabbi, i Yusuf niapaasabangu manga iaangnge wuassu lal᷊ummu paṛṛihi udde ana see niwal᷊u'a su taumatan Ismael udde ringannu aregane ruan pul᷊o roitta sal᷊a'a. Wua'udde i tou niapiddu manga mabbawal᷊u'a udde watukku Mesir.
29Napawe nabelengnga su paṛṛihi udde wuṛṛu tawe naasilo si Yusuf isudde, i tou nanggesa'a laungnge ana waugu massusa. 30I tou nabelengnga ringannu manga tuṛṛangnge wuṛṛu nabbisara, “Ana'a udde tate baddi'a isudde! Apa sarun ta'u olaanna orassa indi?”
31Ana see i mangitou namototte ambinga sambau wuṛṛu nangammon juban i Yusuf sulal᷊ummu daṛṛan ambinga udde. 32Wua'udde juba udde niapa'untuddi mangitou ringannu iamangngi mangitou ringannu tanatane, “Juba indi niasombanganni yami. Apa indi darotongngu ana'i Papa?”
33I Yakub naaillal᷊a juban udde, ana see nabbisara, “Atonna, indi juban ana'u! I tou buatte nitamboannu winatangnga mal᷊aṛṛaga. Uare, ana'u i Yusuf natete nihesa'u winatangnga udde!” 34I Yakub nanggesa'a laungnge ana waugu massusa wuṛṛu nalluṛṛen laubbu lalal᷊o. Aroddi al᷊annune i tou lulluain anangnge udde. 35Anambon anangnge, mawae esakka aroddi lai wawine nirumanta mallimbatta, arawe i tou tawe al᷊imbatanna. Wisarane, “Maddatingngu papate'u i ya'u sidutu lulluain ana'u.” Aroddite i tou sidutu lullal᷊o ana waugu anangnge.
36Tatantal᷊anna udde, su Mesir, manga taumatan Midian buatte nabbal᷊u'i Yusuf si Potifar, sangkatou mamanaran datu apan uaagassa mamamiaṛṛa'u mandariaga wal᷊en kararatuanna.
सध्या निवडलेले:
PANDARIADDI 37: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन