SASABANGNGA 6
6
Mawu namaggo si Musa
1Ruata nabbisara si Musa, wisarane, “Ete i Ya'u Mawu. 2I Ya'u naipasilon batangang-Ku si Abraham, i Ishak wuṛṛu i Yakub naola'a Ruata Apan Lembontaṛṛino, arawe i Ya'u tawe namasingkatu watangang-Ku si mangitou ringannu arannu ‘Mawu.’ 3Ruata lai na'ola'a pa'aire si mangitou. I Ya'u ma'ire sarun mangonggolu wanua Kanaan si mangitou, wanua tampan pabbiaṛṛanni mangitou dorone naal᷊ihidda taumata raho. 4I Ya'u naaringikke sasal᷊iomannu taumatan Israel apan niallangngu walahannu Mesir, ana see i Ya'u naaringikka pa'aire-U udde. 5Nariaddi al᷊iata'e su taumatan Israel manungku i Ya'u nabbisara si mangitou: Ete i Ya'u Mawu; i yamiu sarun Ta'u iapallossa wuassu pataṛṛuallanganna Mesir. I Ya'u sarun mapal᷊iatta'u taṛṛino-U apan bahewalla ipanal᷊amatta si yamiu wuṛṛu mangema'u ṛuumanna mawakkata su walahannu Mesir. 6I yamiu sarun Ta'u olaanna al᷊aṛṛana-U wuṛṛu i Ya'u maola'a Ruatanu. Ne i yamiu sarun maasingkatta manungku i Ya'u indi Mawu, Ruatanu, apan mamallossi yamiu wuassu patataṛṛuallangnganna su Mesir. 7I yamiu sarun Ta'u iapidda watukku wanua apan buatte nipa'ire-U ringannu sasalu si Abraham, i Ishak wuṛṛu i Yakub; leta'a udde Ta'u ionggola si yamiu maola'a pussaanu sassane. Ete i Ya'u Mawu.” 8Anambon tanata Mawu indi nipasingkatti Musa su walahannu Israel, arawe i mangitou maddiri maddaringikka si Musa, ana waugu pattaṛṛuallanganna apan maṛṛagissa udde naaola'a si mangitou niawul᷊iaten antimma.
9Wua'udde nabbisara si Musa, 10“Roote saruanna ratu Mesir wuṛṛu wal᷊oa'a si tou manungku i tou ṛinone mamalan balahannu Israel manantangngu wanuane.”
11Arawe i Musa sinumimbakka, “Taumatan Israel sassane maddiri maddaringikka si ya'u. Apa wotongnge ratu Mesir maddaringikka taumata apan longonna massinaukka ere i ya'u?”
12Ete aroddi Mawu nandolokki Musa wuṛṛu i Harun iapapasingkatta su walahannu Israel wuṛṛu su ratu Mesir manungku itarua nirolokku Mawu iapapiaṛṛa'u walahannu Israel sumabangnga wuassu Mesir.
Pangangawanni Musa wuṛṛu i Harun
13Indiwe pangangawanni Musa wuṛṛu i Harun; i Ruben, ana'i Yakub pahul᷊une, pia siri appata ana'a esakka; i Henokh, i Palu, i Hezron, wuṛṛu i Karmi. I mangitou udde iupungngu al᷊amona wuassu manga ṛuanganni sulal᷊ummu walagi i Ruben. 14I Simeon wuṛṛu awingnge sangkatou wawinen Kanaan pia siri annumma ana'a esakka; i Yemuel, i Yamin, i Ohad, i Yakhin, i Zohar wuṛṛu i Saul. I mangitou udde iupungngu al᷊amona ṛuanganna sulal᷊ummu ṛuanganni Simeon. 15I Lewi pia siri tallu ana'a esakka; i Gerson, i Kehat wuṛṛu i Merari; i mangitou udde iupungngu al᷊amona manga amonanna sulal᷊ummu ṛuanganni Lewi. I Lewi nal᷊al᷊appa uukka 137 su tonnane. 16I Gerson pia ana'a esakka darua; i Libni wuṛṛu i Simei; i mangitou uatahuanna manambo papapulunna. 17I Kehat pia siri appata ana'a esakka; i Amram, i Yizhar, i Hebron wuṛṛu i Uziel. I Kehat nal᷊al᷊appa uukka 133 su tonnane. 18I Merari pia ana'a esakka darua; i Mahli wuṛṛu i Musi. Eteudde manga amonanna sulal᷊ummu ṛuanganni Lewi ringannu papapulunni mangitou sambau-sambau.
19I Amram na'awingngi Yokhebed, tuarin iamangnge, wuṛṛu manga ana'i mangitou eteudde i Harun wuṛṛu i Musa. I Amram nabiakka 137 su tonnane. 20I Yizhar pia siri tallu ana'a esakka: i Korah, i Nefeg wuṛṛu i Zikhri.
21I Uziel lai pia siri tallu ana'a esakka; i Misael, i Elsafan wuṛṛu i Sitri.
22I Harun na'awingngi Eliseba, ana'i Aminadab wawine; i Eliseba lai pia tuṛṛangnge i Nahason. I Eliseba nanungkangngi Nadab, i Abihu, i Eleazar wuṛṛu i Itamar. 23I Korah pia siri tallu ana'a esakka; i Asir, i Elkana wuṛṛu i Abiasaf. I mangitou udde iupungngu al᷊amona wuassu ṛuangannu amonanni Korah.
24I Eleazar ana'i Harun esakka, naawingngu sangkatou su wallattu ana'i Putiel, wuṛṛu ana'i mangitou eteudde i Pinehas. Eteudde anambon timmadu ṛuanganna wuṛṛu tembonannu amonanna sulal᷊ummu ṛuanganni Lewi. 25I Harun wuṛṛu i Musa uddewe apan niparentannu Mawu iapaapiddu manga taumatan Israel sumabbangnga wuassu Mesir. 26Itarua sinumaruanna ratu Mesir tadea'u i tou mamallossu taumatan Israel.
Mawu nangonggolu parenta si Musa wuṛṛu si Harun
27Su tempo Mawu uahahatto Musa su Mesir, 28Mawu nabbisara, “Ete i Ya'u Mawu. Wal᷊oa'e su ratu Mesir sarangkanambone apan Ta'u niwal᷊o si'o.”
29Arawe i Musa sinumimbakka, “Mawu, I'o masingkatta manungku i ya'u longonna massinaukka. Ratu sarun tawe maddaringikka si ya'u?”
सध्या निवडलेले:
SASABANGNGA 6: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन