SASABANGNGA 7
7
1 Mawu nabbisara si Musa, “I Ya'u sarun ma'ola'a si'o naal᷊ihidda Ruata su saruannu ratu, wuṛṛu tuṛṛangngu i Harun sarun massinaukka si tou maola'a nabinu. 2Wal᷊oa'a si Harun sarangkanambone apan Ta'u nirolokka si'o. Doloṛṛa'e i Harun mabbal᷊o ratu manungku i tou ṛinone mamalan taumatan Israel manantangngu wanua Mesir. 3Arawe i Ya'u sarun mapaattikku naungngu ratu. I tou sarun tawe maddaringikka si'o, salaiwe i Ya'u mapaarantan manambo silaka su Mesir. 4Ana waugu udde i Ya'u sarun makkuumannu Mesir ringannu manga ṛuumanna apan mawakkata, wua'udde Ta'u iapidda balahannu Israel sarangkanambone al᷊aṛṛana-U, sumabbangnga wuassu wanua udde. 5Ne taumata Mesir sarun maasingkatta manungku indi Mawu, su tempo i Ya'u makkuumanni mangitou wuṛṛu mangapiddu Israel sumabangnga wuassu wanuan mangitou.” 6I Musa wuṛṛu i Harun tinumuṛṛutta srangkanambone apan nirolokku Mawu. 7I Musa uukke 80 su tonnane wuṛṛu i Harun 83 su tonnane su tempo itarua sinumaruanna ratu.
Ta'inni Harun
8 Mawu nabbisara si Musa wuṛṛu si Harun, 9“Amungkangngu ratu madorongnga siraddua ma'ola'a al᷊aṛṛindu'a apan maola'a tialane, doloṛṛa'e i Harun manganu ta'inne wuṛṛu lomboa'a su leta'a su saruannu ratu. Ta'inna udde sarun mawal᷊u mabbal᷊i atoanna.” 10Ne i Musa wuṛṛu i Harun inaite sinumaruanna ratu wuṛṛu itarua tinumuṛṛutte sarangkanambone apan buatte nirolokku Ruata. I Harun nallombon ta'inna su leta'a su saruannu ratu wuṛṛu manga mammamanarane, ana see ta'inna udde nawal᷊u nabbal᷊i atoanna. 11Ana waugu udde ratu lai namaggo manga taumatane apan pia asingkanne wuṛṛu taṛṛa wal᷊iimata, ana see i mangitou lai na'ola'a aroddi ringannu apande mangitou. 12I mangitou nallombon ta'inni mangitou su leta'a wuṛṛu manga ta'inna udde nawal᷊u nabbal᷊i atoanna. Arawe ta'inni Harun nangalluppa ta'inni mangitou. 13Salaiwe aroddi, ratu naungnge sidutu maatikka wuṛṛu maddiri maddaringikka wisara Musa wuṛṛu i Harun, ere buatte niwisara Mawu.
Mesir Naiṛṛiaannu Silaka
Ua'e nabbal᷊i daṛṛa
14Wua'udde Mawu nabbisara si Musa, “Ratu udde maatikka atonna naungnge; i tou maddiri mamalan balahannu Israel inai. 15Ana waugu udde roote paisasomban tou marua allo maṛṛanggapa, su tempo i tou sumossokka su Sal᷊ukku Nil. Apira'e ta'inna apan botongnge maawal᷊u mabbal᷊i atoanna udde wuṛṛu ṛaddoite su winggin sal᷊ukka. 16Pasingkata'a su ratu udde; Mawu, Ruata taumatan Ibrani, nandolo'u iapawal᷊o si Tuangku tadea'u mamalan al᷊aṛṛanang-Nge inai mattaṛṛamawu si Tou su wadda'a. Arawe naddatingngu sara orassa indi i Tuangku maddiri maddaringikka. 17Ana waugu udde, Mawu nabbisara arendi, ‘Wuassu sarangkanambone apan Ta'u olaanna sal᷊immurine, i'o sarun maasingkatta manungku ete i Ya'u Mawu. Ringannu ta'inna indi ya'u sarun mamuulla ua'en sal᷊ukka, wuṛṛu ua'ene sarun mabbal᷊i daṛṛa. 18Manga inassa sarun mate, sal᷊ukka indi hal᷊urune mawukku'a, na'oman sara balahannu Mesir tawe maainumma ua'ene.’ ”
19 Mawu nabbisara si Musa, “Doloṛṛa'e i Harun manganu ta'inne wuṛṛu wattea'a ire'e su anambon sal᷊ukka, manga enggesanne wuṛṛu manga li'u su Mesir. Ua'ene sarun mabbal᷊i daṛṛa, wuṛṛu su ahewallu wanua sarun pia daṛṛa, ewe'e lai sulal᷊ummu manga bowongnga alu wuṛṛu manga wensadda watu.”
20I Musa ruan i Harun tinumuṛṛutta parenta Mawu. Su saruannu ratu wuṛṛu manga mammamanarane, i Harun namatten ta'inna wuṛṛu namuulla ua'en Sal᷊ukku Nil, ne ua'ene nawal᷊u nabbal᷊i daṛṛa. 21Manga inassa sulal᷊ummu sal᷊ukka nate, wuṛṛu hal᷊urune mawukku'a atonna, na'oman sara taumata Mesir tawe maainumma ua'e udde. Su ahewallu leta'u Mesir pia daṛṛa. 22Arawe manga panden wal᷊iimata su Mesir na'ola'a aroddi lai ringannu apanden wal᷊iimata mangitou, na'oman sara ratu sidutu naungnge maattikka. Ere buatte niwal᷊o Mawu, ratu maddiri maddaringikka si Musa wuṛṛu si Harun. 23Ewe'e lai i tou napul᷊e watukku wal᷊en araratuanna ringannu tawe apendamma su arariadianna udde saran addio'a. 24Taumata Mesir sarangkanambone naal᷊i loṛṛangnga su al᷊o'engngu wiwikku sal᷊ukka maddea'a ua'en pa'inumanna, ana waugu ea'en sal᷊ukka tawe ia'inumma.
25Pitu allo nal᷊iute napawe Mawu buatte namontoga Sal᷊ukku Nil.
सध्या निवडलेले:
SASABANGNGA 7: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन