SASABANGNGA 3
3
Ruata namaggo si Musa
1Su tempo udde i Musa mallu'adda manga domba wuṛṛu manga ambingngi Yitro, la'iananne, imam su leta'u Midian. Su tempo i tou tantal᷊anna mangngul᷊uga winatangnga udde watukku samba'an badda'a lol᷊okka, i tou na'omate su Wowon Sinai, wowone apan susi. 2Isudde mala'ekattu Mawu naipasilon batanganne si tou sulal᷊ummu ṛenggammu putungnga apan sinumabbangnga wuassu pattangngannu ahuranganna. I Musa naasilo ahuranganna udde luṛṛenggamma, arawe tawe matutungnga. 3“Uare ereapate,” su ṛingidde. “Ahuranganna udde tawe matutungnga! Mappianne i ya'u ma'ellega marani.”
4 Mawu naasilo si Musa nangundanin tampa udde, ne i Tou niumui wuassu pattangngannu ahuranganna udde, “I Musa! I Musa!”
“I ya'u isindi,” sasimbakki Musa.
5Ruata nabbisara, “Imbaṛṛangnga mangundani. Luatte silopenu, ana waugu i'o uarisikka su leta'a susi. 6I Ya'u indi Ruatan iupungngu al᷊amonanu, Ruatan Abraham, Ishak wuṛṛu i Yakub.” Ne i Musa nallindumma hatine, ana waugu i tou matta'utta ma'ellega Ruata.
7Ana see Mawu nabbisara, “I Ya'u naasilo al᷊aṛṛana'u uatataṛṛangnga su Mesir, wuṛṛu naaringikke i mangitou u'ui mai'ipallossa wuassu manga taumata apan mangngallangnga si mangitou. I Ya'u mangke masingkattu anambon asasusa mangitou. 8Ana waugu udde i Ya'u sumossokke mamallossi mangitou wuassu liman taumata Mesir wuṛṛu mangapiddi mangitou sumabangnga wuassu wanua udde mattuddan sambau wanua apan mal᷊alangnga. Letangnge ala wuṛṛu masuwukka, wuṛṛu orassa indi wawanuannu balahannu Kanaan, balahannu i Het, i Amori, i Feris, i Hewi wuṛṛu i Yebus. 9Lal᷊uain balahannu Israel Ta'u niaringiṛṛanna, wuṛṛu i Ya'u naasilo lai ereapa i mangitou aallangannu taumata Mesir. 10Orassa indi i'o Ta'u irolokka sumaruanna ratu Mesir tadea'u i'o wotongnge mamiaṛṛa'u balahannu sumabangnga wuassu wanua udde.”
11Arawe i Musa nabbisara Ruata, “Isai ya'u indi, na'oman sara wotongnge sumaruanna ratu wuṛṛu mangapiddu taumatan Israel sumabangnga wuassu Mesir?”
12Ruata sinumimbakka, “I Ya'u sarun mantul᷊ungngu. Wuṛṛu napawe balahannu udde buatte niapiddu sinumabangnga wuassu Mesir, i yamiu sarun mattaṛṛamawu si Ya'u su wowone indi. Eteudde tatialane manungku i Ya'u nandolokku.”
13I Musa sinumimbakka, “Arawe amungkangngu i ya'u maisasomban manga taumatan Israel wuṛṛu mabbisara si mangitou: ‘Ruatan iupungngu al᷊amonanu nandolo'u ringanni yamiu,’ i mangitou sarun maiwal᷊o, ‘Isai arannu?’ Ana see apate sarun ta'u islimbakka si mangitou?”
14Unnu Ruata, “I Ya'u eteudde I YA'U INDI. Eteindi apan iwisaranu su balahannu Israel, i Tou apan isassaggo I YA'U INDI, buatte nandolo'u ringanni yamiu. 15Pasingkata'a lai si mangitou manungku i Ya'u, Mawu, Ruatan iupungngu al᷊amona mangitou, Ruatan i Abraham, i Ishak wuṛṛu i Yakub, nandolokku ringanni mangitou. Ete i Ya'u Mawu, eteudde arang-Ku saran mal᷊annu-l᷊annu. Eteudde pananagoang-Ku su anambon balahannu maṛṛana'a mappulunna. 16Roote wuṛṛu ammul᷊a'a anambon piaṛṛa'u Israel. Al᷊iata'a si mangitou manung-Ku, Mawu, Ruata iupungngu al᷊amona mangitou, Ruatan i Abraham, i Ishak wuṛṛu i Yakub, buatte naipasilon batangan-Ne si'o. Pasingkata'e si mangitou manungku i Ya'u nirumantate ringanni yamiu wuṛṛu naasilote ereapa i mangitou aalangannu balahannu Mesir. 17Wuṛṛu i Ya'u buatte nakkawessa mangapiddi mangitou sumabangnga wuassu Mesir, su tampa i mangitou a'allangana, wuṛṛu manguntuddi mangitou su sambau wanua apan ala wuṛṛu masuwukka, wanuan balahannu Kanaan, balahannu i Het, i Amori, i Feris, Hewi wuṛṛu i Yebus.
18Al᷊aṛṛana-U sarun maddaringikka manga wisaranu. Wua'udde i'o suadio'a ringannu manga piaṛṛa'u Israel ṛinone inai sumaruanna ratu Mesir wuṛṛu mabbal᷊o si tou; ‘Mawu, Ruata taumatan Ibrani buatte nirumanta naipasilon batangan-Ne si yami. Orassa indi wala'awe yami inai araune tallu allo amatanna watukku wadda'a lol᷊okka mangonggolu sasamba su Mawu, Ruatan kami.’ ” 19Wua'udde Ruata nabbisara apia, “I Ya'u masingkatta ratu Mesir tawe mamalang kamiu inai, tabene'e amungkangngu iwata'a. 20Arawe i Ya'u sarun mappa'attu taṛṛino-U, wuṛṛu makkuumannu Mesir ringannu manga asasusa apan bahewalla Ta'u iapa ta poiaroddi. Wua'udde, i tou sarun mamalan kamiu umamatta.
21I Ya'u sarun ma'ola'a taumata Mesir masaṛṛionto'a si yamiu, na'oman sara su tempo al᷊aṛṛana-U umamatta, i yamiu tawe inai ringannu lima tawe loṛṛone. 22Suapan wawinen Israel sarun madorongnga su al᷊indonganne taumata Mesir wuṛṛu wuassu wawinen Mesir apan uatana'a su wal᷊en sambau, laubba see lai lal᷊ogakka sal᷊a'a wuṛṛu wul᷊awanna. Udde sarun iluṛṛeng kamiu su manga anangngu. Ringannu olangnge aroddi yamiu sarun mangaṛṛo taumata Mesir.”
सध्या निवडलेले:
SASABANGNGA 3: LAITLD
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन