MATIUS 14
14
Yohanes Pembaptis Matei
(Mrk. 6:14-29; Luk. 9:7-9)
1Pado maso'o Herodes, penguaso negrai Galilea, temi'uk jano de kenerjo Yesus. 2Herodes madeak ngen pejabat-pejabatne, “Pasti dio Yohanes Pembaptis de bi idup igai! Do'o sebabne Si temuan kuaso menea mujizat.”
3 #
Luk. 3:19-20
Kerno ayok'o Herodes meluak temakep Yohanes ngen meket si serto mbin moi lem sel. Herodes menea awei'o kerno sual Herodias, ngenyen pasuakne dewek, Filipus. 4#Im. 18:16, 20:21 Kerno perneak Yohanes madeak awei yo ngen Herodes, “Coa buliak ko nikeak ngen Herodias!” 5Sebeneane Herodes lok munuak Yohanes, tetapi si saben ngen tun-tun, kerno tobo'o manggep Yohanes nebai.
6Pado waktau Herodes merayo bilai ulang taunne, anokselawei Herodias na'ai neak adep tamu. Ta'aine kembiak semnang atei Herodes. 7Sehinggo Herodes bejanjai ngen si ngen besupeak bahwo jano bae dei si kemlok bakea nelei ngen si.
8Kerno nasut ngen makne, semulen'o madeak, “Uku minoi ulau Yohanes Pembaptis nlei ngen uku. Uyo kulo neak das talam!”
9Temi'uk kelok ne'o, Herodes ijai kembiak sedih. Tapi kerno si sudo besupeak neak adep para tamune, si meriteak supayo kelok semulen'o kenabul. 10Si meluak tun lalau moi sel utuk macung ulau Yohanes. 11Sudo'o ulau Yohanes'o nembin neak das talam, ngen nelei ngen semulen'o. Lajau semulen'o mbinne kulo ngen makne. 12Sesudo'o penotoa-penotoa Yohanes teko mok mayit Yohanes ngen kemubuane. Lajau tobo'o lalau melei namen hal'o ngen Yesus.
Yesus melei kembuk lemo ribau tun
(Mrk. 6:30-44; Luk. 9:10-17; Yoh. 6:1-14)
13Waktau Yesus temi'uk berita'o, Si kemnek biduk suang ngen teminggea penan'o, utuk lalau moi do penan de sunyai. Tapi ketiko tun-tun temi'uk tetang hal'o, tobo'o teminggea kota-kota tobo'o ngen lalau semusul Yesus liwet dalen daet. 14Waktau Yesus tu'un kunei biduk ngen kemliak tun dau'o, Si slen ngen tobo'o. Lajau Si kema'en tun-tun de bolon neak antaro tobo'o.
15Pelbeak bilaine, penotoa-penotoa Yesus teko ngen madeak ngen-Si, “Bilai bi pelbek, ngen penan yo tepecea. Lebiak baik Bak meluak tun-tun yo lalau, supayo dapet temukua kembuk neak sadei-sadei.”
16“Mbeak tobo'o lalau,” nadeak Yesus, “Udi bae mlei tobo'o kembuk.”
17“Keme cuma temuan lemo ruti ngen dua ikan!” penotoa-penotoa Yesus'o jemawab.
18“Mbin do'o mindoi” nadeak Yesus. 19Sudo'o Si meluak tun dau'o temot neak das dukut. Lajau Si mok lemo ruti ngen duai kan'o, ngen cungok moi lenget, lajau mucep syukur ngen Allah. Sudo'o Si megit ruti'o ngen tangan-Ne ngen mlei-Ne ngen penotoa-penotoa-Ne utuk nagiak-nagiak ngen tun dau'o. 20Tobo'o kutene mbuk sapei kenyang. Sudo'o penotoa-penotoa Yesus kemopoa lebiak kembuk de lebiakne ade duai belas bokoa penuak. 21De mbuk pado waktau'o ade kiro-kiro lemo ribau tun, ati teitung selawei ngen anok-anok.
Yesus paneu neak das bioa
(Mrk. 6:45-52; Yoh. 6:16-21)
22Sesudo'o Yesus meluak penotoa-penotoa-Ne kenek moi biduk ngen lebiak dute sembe'ang daneu, sementaro Si meluak tun dau'o belek. 23Sudo tun dau'o lalau, Yesus kenek moi de bueak tebo suang dirai utuk bedu'o. Tiko bilai bi klemen, Yesus masiak berade neak di suang dirai. 24Sementaro'o biduk de tenupang penotoa-penotoa Yesus, bi uak neak tengeak-tengeak daneu. Biduk'o genuyang umbok de de'es, kerno ibut belawen arah ngen biduk. 25Antaro jam telau ngen jam num petang, Yesus teko ngen tobo'o paneu neak das bioa. 26Tiko penotoa-penotoa-Ne kemliak Si paneu neak das bioa, tobo'o kembiak tekanjet. “Atau!” tobo'o mekik ngen kembiak saben.
27Tapi Yesus lajau jemawab, “Tenangba! Uku Yesus. Jibeak saben!”
28Lajau Petrus madeak, “Amen ko Yesus, meluakba uku teko paneu neak das bioa.”
29“Tekoba!” Yesus jemawab. Lajau Petrus tu'un kunei biduk, paneu neak das bioa ngen teko ngen Yesus. 30Tapi waktau Petrus kemliak padeak laine ibut neak daneu'o, si saben ngen muloi tendem, “Tuhan, tulung!” pekikne.
31Yesus segro mulua tangen-Ne ngen temakep si, ngen madeak, “Petrus, Petrus, ko yo kuang pecayo. Getai ko ragau ngen Uku?”
32Lajau keduaine kenek moi biduk'o, ibut'o bedan. 33Mako penotoa-penotoa Yesus sujut nyembeak Si. Tobo'o madeak, “Sungguak Tuhan adeba Anok Allah!”
Yesus kema'en tun-tun bolon neak Genesaret
(Mrk. 6:53-56)
34Waktau tobo'o sapei neak di poa daneu, tobo'o ndaet neak Genesaret. 35Ngen tiko tun-tun neak di kemliak bahwa Yesus, tobo'o semiar berita'o moi kute daerah neak sekitar kota'o. Lajau kute tun bolon nbin ngen Yesus. 36Ngen tobo'o minoi tulung ngen-Si, supayo buliak megong jubah-Ne, kunyau cuma ujungne. Lajau kute de megongne jijai ka'en.
सध्या निवडलेले:
MATIUS 14: REJ
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
@ LAI 2011 Indonesian Bible Society (Lembaga Alkitab Indonesia)
