MATIUS 13
13
Perumpamo tetang suang penebea
(Mrk. 4:1-9; Luk. 8:4-8)
1Pado bilai'o kulo Yesus teminggea umeak'o lajau lalau moi biding daneu ngen temot neak di. 2#Luk. 5:1-3 Dau nien tun bekopoa neak keliling Yesus, kerno'o Si lalau temot neak lem biduk, tapi tun dau'o kutene je neak patoi. 3Lajau Yesus majea dau hal ngen tobo'o ngen makei perumpamo.
“Suang petani lalau tembea biniak,” awei'oba Yesus muloi ngen cerito-Ne. 4“Tiko gi dong tembea, ade biniak de cucia moi dalen. Lajau burung teko ngen biniak'o abis nembukne. 5Ade kulo de cucia moi penan bebutau, de pitokne didik. Biniak-biniak'o segro temuak kerno ku'ang pitok. 6Tapi waktau matai bilai bi terbit, tunes-tunes'o muloi lew, sudo'o ke'ing ngen matai kerno baletne coa sapei lem. 7Ade kulo biniak de cucia neak tengeak belukea tebok. Belukea tebok'o temuak ngen nipit tunes-tunes'o sapei matei. 8Tapi ade kulo biniak de cucia neak pitok de subur, lajau bebueak; ade de sotos, ade de nam puluak, ade kulo de telau puluak kilai lepet.”
9Sesudo cemrito perumpama'o Yesus madeak, “Amen temuan tiuk, teni'ukba!”
Getai Yesus makei perumpamo
(Mrk. 4:10-12; Luk. 8:9-10)
10Sesudo'o penotoa-penotoa Yesus teko ngen betanye ngen-Si, “Getai Bak makei perumpamo amen miling ngen tun dau'o?”
11Yesus jemawab, “Sebab udi bi nelei rahmat utuk namen resio tetang awei ipe Allah meriteak, tapi tobo'o coa. 12#Mat. 25:29; Mrk. 4:25; Luk. 8:18, 19:26 Kerno'o tun bi temuan, bakea nelei lebiak dau igai, ngen si bakea nelei ngen melipeak. Tapi tun de coa temuan jano-jano, mako didik de ade ngen si bakea nemok. 13Do'oba sebabne Uku makei perumpamo amen miling ngen tun dau, kerno tobo'o kemliak, tapi awei tun de coa kemliak; tobo'o temi'uk tapi awei tun de coa temi'uk ngen coa ngertai. 14#Yes. 6:9-10 Mako tejijaiba jano de nadeak Nebai Yesaya,
‘Allah madeak:
Tobo'o bakea terus temi'uk
tapi coa ngertai;
tobo'o bakea terus kemliak
tapi coa namen jano de tejijai.
15Sebab pekeran tun-tun yo bi ijai tupua,
tiuk tobo'o bi jijai seti'uk ngen matai tobo'o bi mejem cendok utuk ngerti.
Dio tejijai kunyau matai tobo'o jibeak kemliak,
ti'uk tobo'o jibeak temi'uk
pekeran tobo'o jibeak ngertai
ngen jibeak belek ngen Uku,
lajau Uku kema'en tobo'o.’ ”
16 #
Luk. 10:23-24
“Tapi padeak butungne udi,” nadeak Yesus ngen penotoa-penotoa-Ne, “kerno sungguak kemliak ngen temi'uk. 17Ingetba, dau nebai ngen tun de taat ngen Allah lok kemliak de udi kemliak uyo yo, tapi tobo'o coa kemliakne. Tobo'o lok temi'uk jano de udi tiuk uyo yo, tapi tobo'o coa temi'ukne.”
Yesus tem'ang perumpamo tetang su'ang penebea
(Mrk. 4:13-20; Luk. 8:11-15)
18“Teni'ukba jano tai perumpamo tetang penebea'o. 19Biniak de cucia moi dalen awei tun-tun temi'uk kabar tetang awei ipe. Allah meriteak, tapi coa ngertai. Tun jahat'o teko ngen mbut jano de sudo tenbea lem atei tobo'o. 20Biniak de cucia neak penan de bebutau, awei tun-tun de temi'uk kabar'o, ngen lajau temimone ngen senang atei. 21Tapi kabar'o coa bebalet lem atei tobo'o sehinggo coa taen an. Amen tobo ndrita saro atau sikso kerno kabar'o, lajau tobo'o murtad. 22Biniak de cucia neak tengeak-tengeak belukea tebok awei tun-tun de temi'uk kabar'o, tapi renyeng tetang idup tobo'o ngen lok idup mewah. Kerno'o kabar kunei Allah tipit neak lem atei tobo'o sehinggo coa bebueak. 23Ngen biniak de cucia moi pitok de subur awei tun-tun de temi'uk kabar'o ngen mahamne. Tobo'o bebueak dau, ade de sotos, ade de num puluak, ade de telau puluak kilai lipet aseane.”
Perumpamo tetang lalang neak antaro gendum
24Yesus cemrito igai de bueak perumpamo ngen tun dau, nadeak-Ne, “Amen Allah meriteak, keadaanne awei perumpamo yo: Suang petani tembea biniak de baik neak kebunne. 25Pado waktau klemen, tiko kute tun gidong tidua, musuak petani'o teko tembea biniak lalang neak antaro gendum'o lajau alau. 26Tiko tanem-tanem'o temuak ngen tunes-tunesne muloi timboa kulo lalang'o. 27Lajau tun-tun de kerjo ngen petani'o teko ngen si ngen madeak, ‘Tuan isokah Tuan temanem biniak de baik neak kebun Tuan? Au coa? Awei ipe jijaine sapei ade lalang neak di?’ 28Petani'o jemawab, ‘Do'o plep musuak.’ Lajau tun-tun de kerjo ngen petanio betanye igai, ‘Jano tuan lok keme lalau mekot lalang'o?’ 29‘Coa’, jemawabne, ‘Kerno amen lalang, tekot be gendumne milau bekot. 30Kunyauba lalang'o temuak besamo-samo sapei waktau panen. Be uku bakea madeak ngen tun-tun de menea: Melungguk kileak lalangne neket, lajau nemben. Sesudo'o kenopoa gendumne, lajau naik neak lem tuoa?’ ”
Perumpamo tetang soa sawi
(Mrk. 4:30-32; Luk. 13:18-19)
31Yesus cemrito igai do perumpamo ngen tun dau, nadeak-Ne, “Amen Allah meriteak, keadaanne awei perumpamo yo: do soa sawi nemok ngen suang tun, lajau tenamen neak kebunne. 32Soa sawi adeba biniak de kembiak titik. Tapi amen bi temuak, si jijai de kembiak lai neak antaro tanem-tanem. Si jijai pun, sehinggo burung-burung teko menea sa'ang pado dan-danne.”
Perumpamo tetang agai
(Luk. 13:20-21)
33Ade do perumpamo luyen de cenrito Yesus ngen tun dau. “Amen Allah meriteak, keadaanne awei agai de nemok ngen su'ang selawei, lajau naduk ngen pat puluak liter gendum sapei ngembang kutene!”
Getai Yesus makei perumpamo
(Mrk. 4:33-34)
34Kutene najea Yesus ngen tun dau ngen makei perumpamo. 35#Mzm. 78:2 Mako tejijaiba de nadeak ngen nebai,
“Uku makei perumpamo amen miling ngen tobo'o;
Uku bakea melei kabar hal-hal de coa keten sejok tejijaine dunio yo.”
Yesus tem'ang perumpamo tetang lalang neak antaro gendum
36Sesudo'o Yesus teminggea tun dau'o, lajau moi lem umeak. Penotoa-penotoa-Ne teko ngen madeak, “Cubo Bak tem'ang ngen keme tai perumpamo tetang lalang neak antaro gendum'o.”
37Yesus jemawab, “Tun de tembea biniak de baik'o adeba Anok Manusio. 38Kebun'o adeba dunio yo. Biniak de baik'o adeba tun-tun de bi jijai anggota umat Allah. Lalang'o adeba tun-tun de jijai golongan Iblis. 39Musuak de temanem lalang'o adeba Iblis. Maso panen adeba Bilai Kiamat, ngen tun-tun de manen'o adeba malaikat-malaikat. 40Awei'o lalang nelungguk ngen nemben neak lem opoi, awei'o kulo pado Bilai Kiamat be. 41Anok Manusio bakea meluak malaikat-malaikat-Ne kemopoa umat-Ne kute de sembab tun menea duso, ngen kute tun luyenne de menea hal-hal de jahat. 42Tobo'o kute bakea nuang moi lem tukau be opoi de kembiak panes; neak di tobo'o bakea ngindoi ngen derito. 43Ngen tun-tun de menea kelok Allah bakea besinea awei matai bilai neak lem Dunio Belau Allah, Bak tobo'o. Jijai amen temuan tiuk, tiukba!”
Perumpamo tetang harto de tependam
44“Amen Allah meriteak, keadaanne awei perumpamo yo: Ade harto de tependam neak pitok lajau tenmau ngen su'ang tun, ngen nasuk igai hartone moi lem pitok. Sudo'o kerno kembiak riangne, tun'o lalau jemuea kute hartone, lajau belek igai ngen temukua taneak'o.”
Perumpamo tetang mutiaro de ba'es
45“Amen Allah meriteak, keadaanne awei perumpamo yo: Su'ang tun tukang jagea mesoa mutiara-mutiara de bego. 46Tiko si temau do mutiara de luea biaso baesne, segro si lalau ngen jemua kute hartone, lajau si temukua mutiara de do'o.”
Perumpamo tetang jalai
47“Amen Allah meriteak, keadaanne umpamo ngen jalai de nambua moi daneu, lajau dapet mecem-mecem kan. 48Sesudo jalai penuak, jalai'o naket moi daet ngen penjalai. Sudo'o tobo'o temot ngen misah kan-kan'o: De baik naik lem pasau, de coa baik nuang. 49Awei'oba hal de pado Bilai Kiamat, malaikat-malaikat bakea lalau misah tun-tun jahat kunei tun-tun de menea kelok Allah. 50Sudo tun-tun jahat'o nuang moi lem tukau bopoi. Neak di ba tobo'o bakea ngindoi ngen derito.”
Barang blau ngen barang an
51“Jano udi ngertai kutene yo?” tanye Yesus.
“Ngertai Pak!” jawab tobo'o.
52Lajau Yesus madeak, “Do'o sebabne tiep Gu'au Agamo de sudo ijai anggota umat Allah, adeba awei suang tuan umeak de kemluea kunei hartone barang-barang be lau ngen an.”
Yesus coa tenimo neak Nazaret
(Mrk. 6:1-6; Luk. 4:16-30)
53Sesudo Yesus cemrito perumpamo-perumpamo'o, Si teminggae penan'o, 54lajau belek moi sadei-Ne. Neak di Si lajau ngajea neak umeak semyang tun Yahudi, ngen tun-tun dau temi'uk Si neak di, heran nien. Tobo'o madeak, “Kunei ipe tun yo dapet kepacok awei yo? Ngen kunei ipe Si dapet kuaso utuk menea mujizat? 55Iso Si anok tukang keyew? Iso si Mariam'o mak-Ne; ngen pasuak-pasuak-Ne adeba Yakobus, Yusuf, Simon ngen Yudas? 56Ngen pasuak-pasuak selawei-Ne tinggea neak piyo kulo dau coa? Kunei ipe Si dapet kutene'o?” 57#Yoh. 4:44 Mako tobo'o temulok Yesus. Lajau Yesus madeak ngen tobo'o, “Suang nebai nehormat neak ipe bae, seluyen neak sadeine ngen neak umeakne dewek.” 58Kerno'o Yesus coa kemerjo dau mujizat neak di sebab tobo'o coa pecayo.
सध्या निवडलेले:
MATIUS 13: REJ
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
@ LAI 2011 Indonesian Bible Society (Lembaga Alkitab Indonesia)
