Oyinyima 6
6
Ebira edivi aza
1 #
Ijov 1.6; 2.1 Ịnị ụmẹ ọnọọ aza e si nyima aa rụrụụ dị ẹ yaa garaa hi ịnị ẹhẹ, dị ẹ yaa ma ezi anẹẹ nị. 2Ụmẹ ọnya anggẹẹrị ẹnyị ee re ka ezi anẹẹ ana aza ma ê zoza. Dị ẹ ọzọza nyị ene zee wa eyi dị ẹ sị mẹ ose ẹnịnị nị. 3Di Ẹnẹyịmavara Ohomorihi va ka, “Mẹ yị vaa zẹẹ ka ọza ọ̀ ra ịnị ẹhẹ pooro zịna-zịna, agụvị ka òo si oo yị vi ee su nị. Ịrayị ẹchịhịnọnyị (120) kẹnẹ mị vaa zẹẹ ka ọ̀ ra ẹhẹ vị nị.” 4#Ịrị 13.33Â vịdị nyị aza bahị-bahị ene hi ịnị ẹhẹ ịnị ụmẹ ẹnẹẹ, ẹnị ẹ vị ezi ana ma yị anggẹẹrị ẹnẹẹ nị. Ịrẹma ọnọọ ẹngụ anggẹẹrị ẹnẹẹ ẹ̀ẹ rẹ nọ ịda ezi anẹẹ ana aza ma, dị ẹ ma ezi nị. Ezi ẹnẹẹ ẹ vị ọnọrụ ịyẹẹyẹ nị. Ẹnịnị ệ ngụ ịrẹyị. 5#Imt 24.37; Irk 17.26; 1 Ipi 3.20Ẹnẹyịmavara o ve re ka ebira edivi ana aza aa mẹ ịnị ẹhẹ ọ sị vị ẹnẹmẹhị, ariro odivi pooro kẹnẹ o hì ịnị ayị aza nị. 6Di ọ ka àa yẹ asị ọnị mẹ̀ ọza vẹ ẹhẹ. Ộ zị ọ ẹtẹẹtẹrẹ ka ọnị ộ mẹ̀ ọza. 7Dị Ẹnẹyịmavara va ka, “Ọza ọnị mị tụ́ vẹ ẹhẹ aanị vị ọnị maa kụ́ụ kwooze hụụnị ẹhẹ saka-saka. Ọza, uye ịnị avị, ịsụpa ini eehi, uye eneē tura ne beri inomi ene hi ẹbẹẹba vị ọnị maa kụụ kwooze piti, ô du mị ayị ka mâ mẹ wa vẹ ẹhẹ.” 8Ama Inowa ọnị ộ nyị ebira ene zee Ẹnẹyịmavara eyi.
Inowa ộ mẹ̀ ebira ene hine Ohomorihi ayị
9 #
2 Ipi 2.5
Ịtọpa Inowa yị, Inowa ộ mẹ̀ ebira ana vọrọ ini eyi Ohomorihi. Ọnịnya kẹnẹ ọ rẹ ẹ̀ yị mẹ̀ ebira ohuvọ vụrụ-vụrụ ịnị avaba ụmẹ anị nị. Inowa ọnịrị Ohomorihi ệ rị vabẹ. 10Ezi ẹẹta ọnị Inowa ma ẹ vị Isemi, Ihami ọnịrị Ịjahwẹtị nị. 11Ohomorihi ô re ka anẹhẹ ệ ta divi, ebira ẹngụkata kẹnẹ e kuku hi ịnị ẹhẹ nị. 12Ịjị Ohomorihi maanị re ẹhẹ ka ộ ta divi, ka avaba ebira ọnị ọza kụkụ aa mẹ bemi vị ebira odivi, 13di Ohomorihi va kà a yị Inowa dị ọ ka, “Ọnị o si aro mẹ ka ọnị ee vú anẹhẹ ẹtẹ, agụvị ka ẹ raà kụ́ ebira ẹngụkata hi ịnị ẹhẹ. Ọ kà ọnị ee vú wa ẹtẹ ọnịrị avaba ịsa ene hi ịnị ẹhẹ. 14Ohomorihi ka Inowa ọ̀ dà ọchị Ịsayịpụrẹsị ozoza mẹ ẹpa ọbanyị ọnya. Ọ kà ọ̀ mẹ̀ ẹ dị ọ̀ nyị aku hi ịnị ịnẹ anị. Dị ọ sị ọ̀dà sisi ọ ịnẹ ọnịrị ẹhẹ vị asị enyi zụ ngụ ọ. 15Ọ kà aanị ọ mẹ̀ vaa mẹ ẹpa ọnọọ nị: ụgọdọ anị vaa vị ahụ akava tụra ẹvarẹwụ, (450) dị ụgana anị ọ̀ vị ahụ ẹtarẹwụ tụra ẹẹhị. (75) Ụnẹba anị rẹ vaa vị ahụ ẹbẹẹva tụra ẹẹhị. (45) 16Ọ kà ọ mẹ̀ ịsa di ò si kú ịrẹsụ ẹpa ọnọọ, dị ọ̀ kụ̀rà tu ẹba ịnị akakana hị́ ahụ ọnya rị ẹjịjị. Dị ọ mẹ ukere oze ẹpa ọnọọ tụ́ ịnị akaha anị. Ọ kà àaa mẹ ẹpa ọnọọ, ọ̀ vị ịnị ọtụrọsa ẹẹta. 17Ohomorihi ka ọnị ụvọta vaa kụ́ ọhaara enyi vẹ ịrẹsụ ẹtẹ dị ọnị sị wụ̀ avaba ịsa ana aa tụ́ ụhwẹ ịrẹsụ ẹtẹ ọnọnị. Avaba ịsa ene hi ịrẹsụ ẹtẹ bemi vee sú. 18Ama ịsị ọnị vịdị kà tịtẹ ka ọnị vaa mẹẹ yị aza vị ọnị ọnị vaa mẹẹ wu. Ọ kà Inowa vaa ngụ ịnị ẹpa ọnọọ, di ezi anị beri ose anị ọnịrị ose ezi anị rẹ ngụ ọ. 19Ịnị avaba ịsa ana aa tụ́ ụhwẹ dị ọ kụ́ wa ẹẹva ọnọrụ ọnịrị ọnẹẹ dị ẹ ngụ ịnị ẹpa ọnọọ di ọnịrị wa ra hi ịzọọ dị asị e su. 20Dị inomi ọzọza ọnịrị evere anị, uye nịnị ọzọza ọnịrị evere anị, avaba uye eneē tụra ọzọza ọnịrị evere anị e ve tu wu ịnị ẹpa ọnọọ. Dị ọ vavọọ ẹẹva di è hi ịnị ẹpa pè e, agụvị asị e sú. 21Ọ kà kụ́ avaba ịsọyịrị irenyi-irenyi, dị ọ kụ́ ọ tẹ, dị ọnịrị wa ọ̀ọ rị ọ.” 22#Ihib 11.7Ịzẹyịza dị Inowa vavọọ mẹ̀ ẹ nị. Avaba ịsị Ohomorihi ka ọ̀ mẹ, dị ọ vavọọ mẹ̀ ẹ nị.
सध्या निवडलेले:
Oyinyima 6: EBTP
ठळक
सामायिक करा
कॉपी करा
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.