Jénesii̱s 29
29
Bi̱ tsꞌén jachó Jakoo̱b nangui Padan Araa̱n
1Kó Jakoo̱b kijí ra ndi̱ya̱á, sꞌe̱ jachó nanguii̱ xota̱ xi síndo xtji̱e̱e̱n nínga fotjo tsꞌueé ki̱a̱ nangui Kanaa̱n. 2Kó ki̱a̱ ngu̱i̱jin kꞌijñaá kamábe ngo ndańchꞌi̱ nínga ndyi̱ꞌbi ndójoa cho̱o̱, kó ki̱a̱ tꞌa kui ndańchꞌií síndo nga ndyi̱tsꞌénkjaꞌyá ján xtín cho̱tsa̱nga̱, kó ngo ndi̱jo̱ tjixtió tsꞌoa kui ndańchꞌií, 3kó ta̱ kjiꞌa tsí boeꞌeé ndójoa cho̱tsa̱nga̱a̱ ngaskande nga matikó ngayeje xtín cho̱tsa̱nga̱ xi fochójo̱ já xí koón kui cho̱o̱, sꞌe̱ nguije katsꞌe ndójoa foꞌmá nguiní kui ndańchꞌií. 4Kó Jakoo̱b kijíkón tiñaa̱ kui já xí koón cho̱tsa̱nga̱a̱ kó asíyaá ñá chji̱a̱ni kui jaá. Nguije katsóyaá nga nangui Araa̱n chji̱a̱ni, 5bi̱ katsó nguiní Jakoo̱b:
—A yajínjnú ngo nda̱ xi ꞌmí Labaa̱n, kui xi ndínde manii̱ Naoo̱r.
—¡Jo̱o̱n yajne̱! —katsó kui jaá.
6—Kó a nda tikón kui nda̱a̱. —Katsó Jakoo̱b.
Kó kui jaá bi̱ katsó ngase:
—Jo̱o̱n, nda tikón, jánꞌa̱n ki̱a̱ tsꞌéndibá na̱ Rakee̱l, tsa̱kji̱ín Labaa̱n, nga tsꞌéndibájo̱ cho̱tsa̱nga̱a̱.
7Kósꞌe̱ Jakoo̱b bi̱ katsoó:
—Xotí ngase kó kji̱e̱ ma jñójín, ta̱sá teꞌéjnúu̱ ndójoa cho̱tsa̱nga̱a̱, sꞌe̱ ti̱ niꞌánkjí nguiníjnú nínga kjién ndi̱xcho̱, kji̱e̱ chi̱bo̱a̱jiín nga ku̱i̱ndyiaꞌya.
8Kó bi̱ katsó kui jaá:
—Kji̱e̱ ka̱májín ko̱e̱ꞌéjne̱ ndójoa, chjiéngá xchiyájne̱ ngaskande nga ka̱matikó ngayeje xtín cho̱tsa̱nga̱a̱, sꞌe̱ chje̱ꞌéxínjne̱ ndi̱jo̱ xi kjiꞌixtio tsꞌoa ndańchꞌií, sꞌe̱ ka̱ma kꞌuí ndójoa ngayejee̱.
9Tji̱e̱nga Jakoo̱b to̱kó tsꞌénchji̱a̱jo ngase kui jaá, jachó na̱ Rakee̱l nga jachójo̱ cho̱tsa̱nga̱a̱ na̱ꞌmii̱, ngatꞌa̱ na̱ xi koo̱n cho̱tsa̱nga̱ kamá kui tsa̱kji̱ín. 10-12Kó Jakoo̱b jaꞌáxiín ndi̱jo̱ xi kjiꞌixtio kui ndańchꞌií, kó katsjaá ndójoa cho̱tsa̱nga̱a̱, sꞌe̱ katsjaá ngo ndsó na̱ Rakee̱l, kó askjandá tsjá. Nguije Jakoo̱b katsóyaá na̱ Rakee̱l nga ntsꞌi̱e̱xtio ma xkjín, ngatꞌa̱ Labaa̱n ntsꞌi̱e̱ ma na̱aa̱n, na̱ Rakee̱l tsanga má kijíkoón na̱ꞌmii̱ nga kijítsáyaá kui nii̱.
13Nguije tsintꞌié Labaa̱n nga ki̱a̱ tikón Jakoo̱b, ndií ndichja, tsanga má kijíkjaꞌáyíndi̱ya, janíkjá kó katsjaá ngo ndsó tꞌanijon, sꞌe̱ kijíjo̱ ndiꞌaa̱, kó nguije jachó, Jakoo̱b katsóyaá Labaa̱n ngayeje ni xi kamaá. 14Kósꞌe̱ Labaa̱n bi̱ katsó: «Ja̱koxi̱ boá nga xingu̱i̱jne̱ ma ji».
Bi̱ tsꞌén ixánjo̱ Jakoo̱b na̱ Líaa̱ ko̱jo na̱ Rakee̱l
Nguije jaꞌa ngo sá nga jachó Jakoo̱b kui ngu̱i̱ndiee̱, 15Labaa̱n bi̱ katsoó Jakoo̱b: «Jmí tsi kjo̱a̱a̱ nga xingu̱i̱ má, sꞌe̱ ta̱ si̱ꞌinxé kjo̱a̱nde jí. Tꞌíyéní kótjín mejeén nga kꞌuichjií».
16Jó kamá ndí xí ínchjiín Labaa̱n, xi xchaá na̱ Lía̱ kiꞌmí, kó xi kjindií na̱ Rakee̱l kiꞌmí. 17Achichí tsjákón kamá ndyi̱ko̱n na̱ Líaa̱, ta̱nga na̱ Rakee̱l achichí ꞌniú tsjákisꞌie kui. 18Kó nga Jakoo̱b kamámejeén na̱ Rakee̱l, bi̱ katsoó Labaa̱n:
—Mejénná nga tsa̱kjíi̱n xi kjindií kotíjñajo an, tsi jo̱ꞌo ka̱maa̱ ji, yito nó sa̱ꞌínxájo̱ kjo̱a̱ndaa̱.
19Kó bi̱ katsó Labaa̱n:
—Ndakjíꞌí, ta̱sá nda nga ji ku̱i̱xenje̱, ta̱bo̱a̱jiín nga kje̱ꞌe xí ku̱i̱xanjo̱.
20Kó bo̱a̱ tsꞌén Jakoo̱b yito nó katsꞌénxá kjo̱a̱nda ta̱ngatꞌanii̱ na̱ Rakee̱l, kó ta̱sasá jaꞌa kui ni̱xtjii̱n, ngatꞌa̱ achichí kamámejeén na̱ Rakee̱l. 21Nguije jatjosón xi yito noó, Jakoo̱b bi̱ katsoó Labaa̱n: «Teꞌéní na̱ Rakee̱l ꞌne̱, tsi̱ꞌe̱ nga kotíjñajo an».
22Kósꞌe̱ Labaa̱n ngo sꞌué ꞌniú katsꞌén, kó katsóyaá ngayeje xota̱ xi chji̱a̱ni kui nguindiee̱. 23Kó nga kamájñoó, Labaa̱n iskjíbé tsa̱kji̱ín xi ꞌmí na̱ Líaa̱ kó kui kijíjoo̱ Jakoo̱b, kó Jakoo̱b kisꞌiejo̱ kui naa̱. 24Kó Labaa̱n ti̱ katsꞌénkꞌasꞌiee̱n na̱ mosoo̱ xi ꞌmí na̱ Silpaa̱ nga, tsi̱ꞌe̱ nga kui xi ka̱ma chji̱ni̱e̱ꞌboo̱ na̱ Líaa̱, xikoó tsi ngo ni xi katsjaá kjo̱a̱a̱ kjo̱a̱bixaa̱n. 25Nga kamánguindyiojón nga kisisie̱én, nga kamábe Jakoo̱b nga na̱ Líaa̱ boá xi kjiꞌijñatꞌaa̱ kijíkoón Labaa̱n nga bi̱ katsoó nga asíyaꞌa:
—Míkjo̱a̱a̱ nga kichꞌíṉche̱jení. ¡Kjo̱a̱a̱ na̱ Rakee̱l boá nga katsꞌenxá kjo̱a̱ndaa̱!
26Kó Labaa̱n bi̱ katsoó:
—Chjiéngá tjón tsa̱kjin xí xchaá xi bixan, jmí tsi tjón tsa̱kjin xí kjindií, bo̱a̱ kjiꞌi kjo̱a̱xcha̱á kui ngu̱i̱ndiee̱. 27Ta̱nga tsi mejeén si̱ꞌinxé kjo̱a̱ndení ngui yito nó, nguije kjo̱a̱ꞌa ngo xomana̱, ka̱ma tsjaa nga ku̱i̱xenje̱ ji na̱ Rakee̱l nga.
28Kó Jakoo̱b katsꞌénjo̱ꞌo ni xi kiꞌmií, kó nguije jaꞌa xi ngo xomanaa̱ ixánjo̱ na̱ Rakee̱l. 29Kó Labaa̱n ta̱ katsjárií na̱ mosoo̱ xi ꞌmí na̱ Bilaa̱, tsi̱ꞌe̱ nga kui xi ka̱ma chji̱ni̱e̱ꞌboo̱ na̱ Rakee̱l, xikoó tsi ngo ni xi katsjaá kjo̱a̱a̱ kjo̱a̱bixaa̱n. 30Kó Jakoo̱b tjó ngase kamaá na̱ Rakee̱l ta̱bo̱a̱jiín na̱ Líaa̱, nda tsi ngui yito nó katsꞌénxájo̱ kjo̱a̱nda ngase Labaa̱n.
Ndií Jakoo̱b xi kisꞌiee̱ na̱ Líaa̱
31Kó Néná kamábe nga Jakoo̱b katsꞌénchꞌó na̱ Líaa̱, kó katsjaá nga kisꞌiee̱ ndí, ta̱nga na̱ Rakee̱l ndi̱ kamá. 32Kó na̱ Líaa̱ kisꞌiee̱ ngo ndí, kui xi Rube̱n ítꞌa jaꞌén, ngatꞌa̱ bi̱ katsó: «Néná kamábe kjo̱a̱ndasenna, kó ngotꞌe̱ ꞌné nga ja̱koxi̱ nga sa̱ꞌínmejénna xi̱ꞌinna».
33Jaskan ti̱ tsaꞌa nguiní ingo ndí na̱ Líaa̱, kó nga katsen kui ndí xí ma joó, bi̱ katsó: «Néná boá xi katsjána kui ndií nga, ngatꞌa̱ tsintꞌié nga tjójiín an xi̱ꞌinna». Kó kuíni nga Simeo̱n ítꞌa jaꞌén, ngatꞌa̱ kui jaꞌeén «Néná ntꞌié» tsó.
34Jaskan ti̱ tsaꞌa nguiní ingo ndí na̱ Líaa̱ xi ma jaán ndi̱ya, kó nga katsen kui ndií, bi̱ katsó: «Ngotꞌe̱ ꞌné nga ꞌniú ngase ka̱mangojne̱ an ko̱jo xi̱ꞌinna, ngatꞌa̱ jè ján ndí katsjáa̱». Kuíni nga Lebi̱ ítꞌa jaꞌén, ngatꞌa̱ kui jaꞌeén «Xi kamángo» tsó.
35Jaskan ti̱ tsaꞌa nguiní ingo ndí na̱ Líaa̱, kó nga katsen kui ndií, bi̱ katsó: «Ngotꞌe̱ ꞌné nga sa̱ꞌintsjáa̱ Néná». Kuíni nga kui ndií Judáa̱ ítꞌa jaꞌén, ngatꞌa̱ kui jaꞌeén «Nga kiniꞌántsjá» tsó. Kósꞌe̱ nguiti̱ kisꞌiejiín ngase ndí.
सध्या निवडलेले:
Jénesii̱s 29: MAIX
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014