Jénesii̱s 28
28
1Kósꞌe̱ Isaa̱ tsíchji̱a̱a̱ Jakoo̱b, kó nguije katsꞌénchikonñé, bi̱ tsꞌén atíxomaa̱:
«Ngata̱ na̱ xi chji̱a̱ni nangui Kanaa̱njín mindyinje̱ ji. 2Tasá tꞌen ji nangui Padan Araa̱n, ndiꞌaa̱ na̱ꞌmindyiboáa Betuee̱l, kó ki̱a̱ ti̱xenje̱ ji ngo ndichjexti ji xi ndí ínchjiín Labaa̱n. 3Mejénna an nga kui Néná xi tjiín ngaꞌniuú ngatsꞌenchíkonñeé, kó ngatsjaá nga kꞌuieé kjín ndí. Kó ti̱ mejénna nga ngo na̱xi̱ńdá xí ꞌniú je ngatama xota̱ tji̱e̱ tse̱. 4Néná ngatsꞌenchíkonñeé ji ko̱jo xota̱ tji̱e̱ tse̱, xikótsꞌen katsꞌénchikonñé Abraa̱n. Kó bo̱a̱ tsꞌén nga ji xi sa̱ko̱ó nga tse̱ ka̱ma kui tꞌanangui nínga tindyin ji ngotꞌe̱ xikoó tsi ngo xota̱ xi xín nangui, ngatꞌa̱ Néná boá xi katsjaá Abraa̱n kui ngu̱i̱ndiee̱».
5Nguije kamá kui nii̱, Isaa̱ katsꞌénkixotꞌa Jakoo̱b nga kijí nangui Padan Araa̱n kó ki̱a̱ kisꞌijña ndiꞌaa̱ xkjín na̱aa̱n.
6-8Kó nguije kamábe Esauu̱ ngayeje ni xi tsíchji̱a̱jo Isaa̱ Jakoo̱b ko̱jo nga ki̱a̱ nangui Padan Araa̱n kijí Jakoo̱b, kamákjiín nga na̱ꞌmii̱ chꞌo kamaá ínchjín xí chji̱a̱ni nangui Kanaa̱n. 9Kuíni nga nda tsi je tjiín kje̱ꞌe ínchjín Esauu̱, ti̱ ixánjo̱ ngo tsa̱kji̱ín Ismaee̱l, ndií Abraa̱n, xi ꞌmí Maalaa̱t ndichja Nebaioo̱t.
Bi̱ tsꞌén tseꞌéchi̱nii̱ Jakoo̱b
10Kó Jakoo̱b jatjoni nangui Beerseba̱, sꞌe̱ kijí nangui Araa̱n. 11Kó nga jachó ngo ngu̱i̱ndie ki̱a̱ katsꞌénkjaꞌyá kui ni̱xtji̱e̱e̱n, ngatꞌa̱ jè kjimajñó. Kó ngo ndi̱jo̱ xi tjín kuí nguindiee̱ iskjíbé xi ínguitoko, sꞌe̱ kisꞌifé ki̱a̱a̱. 12Kui ni̱xtji̱e̱e̱n tseꞌeé ngo chi̱ni nínga kamábe ngo yákíjo̱n xi sikón són nga̱són tꞌananguii̱, kó ngaskande ndiꞌakꞌajmii̱ jachó ndyi̱ko̱n kui yákíjoo̱n, kó kamábe nga ndítsjiee̱ Néná ndyi̱fínijínguí ndyi̱fíjaya kui yákíjoo̱n. 13Kó kamábe nga nínga tikón ndyi̱ko̱n kui yákíjoo̱n, ki̱a̱ tikón Néná, kó Néná bi̱ katsó:
«Án boá xí Nee̱ Abraa̱n, ko̱jo xi Nee̱ Isaa̱, kó tsꞌénxiyaa nga kui tꞌanangui nínga titsjajni ji, ji ko̱jo xota̱ tji̱e̱ tse̱ boá xí tsjàa̱. 14¡Xota̱ tji̱e̱e̱ kjín ka̱ma xikó maá xa̱a̱ tꞌananguii̱! Kó kꞌi̱e̱ kꞌuíndo ngayeje kui na̱xi̱ńdaá, kó ngatꞌaa̱ ji ko̱jo xota̱ tji̱e̱ tse̱ boá nga ngayeje xota̱ na̱xi̱ńdá xí tjín nga̱sondiee̱ ka̱machikonñé. 15Kꞌi̱e̱ tikónjoo̱ ji, kó jmí ni̱xtjin kꞌuijñámasiee̱n ngaskande nga kjo̱tjosón ni xi tꞌíxiaán. An skoo̱n ta̱ nínga kꞌuin jí, kó an kjoéꞌe̱jo nguiñaá kui ngu̱i̱ndiée̱».
16-17Kó nguije jaꞌaá Jakoo̱b, achichí katsakjónní nga bi̱ katsó: «¡Achichí ndikón kuí ngu̱i̱ndiee̱! Ja̱koxi̱ boá nga kꞌi̱e̱e̱ nínga tikón Néná kó nde bejín an. ¡Kꞌi̱e̱ bí ndiꞌaa̱ Néná! ¡Kꞌi̱e̱ bí nga̱ntjo̱a̱a̱ ndiꞌakꞌajmii̱!»
18Kó nga kamánguindyiojón achichí ta̱jñó jastjíe̱n Jakoo̱b, kó iskjíbé kuí ndi̱jo̱ xi ínguitoko, iskjininkꞌa nga íjñá ngo chi̱bo̱a̱ sꞌe̱ katsꞌénkꞌasꞌiee̱n Néná nga iskjitjónjón isti̱ kui ndi̱jo̱o̱. 19Kó nda tsi nga tjón tjón ki̱a̱ na̱xi̱ńdá nínga kisꞌijña kui ndi̱jo̱o̱ Almendra̱ kiꞌmí, ta̱nga Jakoo̱b Betee̱l ítꞌa jaꞌén kuí nguindiee̱, «Ndiꞌaa̱ Néná» ꞌmí nga én ebreo̱. 20Sꞌe̱ jaskan Jakoo̱b bi̱ katsó nga sa̱ꞌínkjatjosón ngo ni:
«Tsi Néná ko̱e̱je̱jona, kó tsi skónna ndi̱ya nínga tsꞌénfí an, kó tsi tsja̱ána ni xi skjíni̱e̱ an ko̱jo ńjño xi koajá an, 21kó tsi nda tikòn an nga kjoéꞌe̱ nguiñá an ndiꞌaa̱ na̱ꞌmina, ja̱ ti̱ Ne tsa̱ꞌa̱n ka̱ma nga. 22Kó kui ndi̱jo̱ xi je iskjininkꞌa an kꞌi̱e̱e̱, kuí boá xi ka̱ma chi̱bo̱a̱a̱ ngu̱i̱ndie nínga ngayeje xi kji̱ndi̱boá tsꞌendíkón Néná, kó ngayeje ni xi tsja̱ána Néná, tie nga úchán tsja nguiñáa̱ kui».
सध्या निवडलेले:
Jénesii̱s 28: MAIX
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014