Jénesii̱s 19
19
Bi̱ tsꞌén katsꞌénkjie Néná na̱xi̱ńdaá Sondoma̱ ko̱jo Ngomorra̱
1Kó nguije kjimanguixoón jachó jó kui já ndítsjiee̱ ki̱a̱ na̱xi̱ńdá Sondoma̱, kó Loo̱t ki̱a̱ xió tikón tꞌa nga̱ntjo̱a̱a̱ na̱xi̱ńdá Sondoma̱, kó nga kamábe Loo̱t kui já ndítsjiee̱, jastjíe̱n nga kijítsꞌentínde, kó asién tikoó ngaskande nga kisitꞌaa̱ xtjien tꞌananguii̱ nga kamábendikón kuí jaá. 2Kó bi̱ katsoó:
—Jún ndi̱a̱, ꞌniú míꞌájnúꞌun nga kji̱ndi̱boájnú ndiꞌana, ki̱a̱ ka̱ma ku̱i̱ndáyájnú, kó ka̱ma ki̱a̱ tsjayójojnú, kó ndyiojón ta̱jñó ka̱ma konguínrajnú ndi̱yajnú.
Ta̱nga kui já ndítsjiee̱ bi̱ katsó:
—Jmí, ndokꞌóchji̱í, ta̱nga ngu̱i̱ya ndi̱yatieé tsjayójojne̱.
3Kó Loo̱t ꞌniú tsíꞌaá kui já ndítsjiee̱ nga ko̱e̱je̱ ndiꞌaa̱. Kó nguije tsꞌasꞌien ndiꞌaa̱, Loo̱t katsꞌéndaa̱ pan, kó katsjaá ni chinie, kó kui ndítsjiee̱ iskjinie ni chiniee̱.
4Jè má mejeén kjoyójo kui já ndítsjiee̱ nga jachó ngayeje já xíꞌin xi chji̱a̱ni na̱xi̱ńdá Sondoma̱, xi xchá xí kjindí, kó jaꞌatjiyajoo̱n ndiꞌaa̱ Loo̱t. 5Kó kui jaá ꞌniú askjandáyaá Loo̱t nga bi̱ katsoó: «Loo̱t ñá síndo kui já xíꞌin xi jeꞌekoón kui ni̱xtji̱e̱e̱n. ¡ꞌNa̱xié ji! ¡Ngatꞌa̱ mejénjne̱ tsjayójojojne̱!».
6Kó Loo̱t jataxie tsi̱ꞌe̱ nga tsíchji̱a̱jo kui jaá, kó tji̱e̱nmá íchjá nga̱ntjo̱a̱a̱ nga jataxie. 7Kó ki̱a̱ ndi̱tsee̱n, bi̱ katsoó kui jaá:
—Ngo kjo̱a̱nda já amingo̱, ngata̱ niꞌánjínjnú kui ni chꞌokjiꞌii̱. 8Jéꞌe̱n jó ínchjín xo̱ngo síndona xi kji̱e̱ jmí xi̱ꞌin bejín, kꞌoxié an, kó ta̱ ni xi mejénjnú ti̱ꞌanjo̱jnú, ta̱nga kui já ndítsjiee̱, ngata̱ jmí ni niꞌánjo̱jínjnú, ngatꞌa̱ an boá xi tsꞌénkóo̱n.
9Kó kui jaá bi̱ katsó:
—¡Tji̱ta̱xínboeꞌé ji! ꞌYá jií bo̱a̱ nga ji kon xi kꞌuiyéjne̱ ni xi si̱ꞌanjne̱. ¡Nde kꞌi̱e̱jín ndokjo̱e̱ ji kui ngu̱i̱ndiee̱! ¡Ngotꞌe̱ ꞌne̱ chꞌo ngase si̱ꞌanjo̱jne̱ ji ta̱bo̱a̱jiín kui jaá!
Kó katsanguińña Loo̱t ngamasiee̱n kui jaá nga kamámejeén akján nga̱ntjo̱a̱a̱ ndiꞌaa̱. 10Ta̱nga kui já ndítsjiee̱ tsꞌaxiéxkjá tsja kó iskjien Loo̱t nga katsꞌénkꞌasꞌien ngu̱i̱yaa̱, sꞌe̱ íchjá nga̱ntjo̱a̱a̱. 11Kósꞌe̱ kui já ndítsjiee̱ katsꞌénti̱ka̱ ngayeje xota̱ xi síndo ndi̱tsee̱n tsi̱ꞌe̱ nga sa̱kójiín nga̱ntjo̱a̱a̱ nga kꞌo̱sꞌien. 12Jaskan nguije kamá kui nii̱, kui já ndítsjiee̱, bi̱ katsoó Loo̱t:
—Tsi tjín ngasee̱ ndí chjo̱on, ko̱jo ndí xíꞌin, ko̱jo xkanda, ko̱jo xota̱ xi xingu̱i̱ ji, ꞌna̱xié ji kꞌi̱e̱e̱, 13ngatꞌa̱ si̱ꞌankjiejne̱ kui ngu̱i̱ndiee̱. Achichí ni xi tjíꞌmí kondraa̱ kui xota̱ na̱xi̱ńdaá, kó kuíni nga Néná xí katsanguiyajne̱ tsi̱ꞌe̱ nga si̱ꞌankjiejne̱.
14Kósꞌe̱ jataxie Loo̱t, kó tsíchji̱a̱jo já xí ka̱ma xkandaa̱, kó bi̱ katsoó:
—¡Tsá ti̱sítji̱e̱njnú, kó tja̱tjójnú kui ngu̱i̱ndiee̱, ngatꞌa̱ Néná jè sa̱ꞌínkjié kui na̱xi̱ńdaá!
Ta̱nga kui já xí ka̱ma xkandaa̱ Loo̱t, ta̱ tsajnókie. 15Kó nguije ndiboáꞌásieén, kui já ndítsjiee̱, bi̱ katsó nguinií Loo̱t:
—Loo̱t tsá ye ji, ꞌna̱xié ji chjóo̱n ko̱jo nga jó ndí ínchjíi̱n kui ngu̱i̱ndiee̱. Tsi bo̱a̱jín si̱ꞌin ji, ko̱ye jí ndatsa ji nga si̱ꞌankjie kui na̱xi̱ńdaá.
16Kó nga tsájín tjítsꞌén Loo̱t, kui já ndítsjiee̱ iskjíbé tsja Loo̱t ko̱jo chjo̱ón ko̱jo ndí ínchjiín, kó tsꞌaxié kui na̱xi̱ńdaá. Tsꞌaxiéꞌá ngatꞌa̱ Néná ni̱ma̱kamaá. 17Nguije kaꞌnaxié kui na̱xi̱ńdaá, ngo kui já ndítsjiee̱ bi̱ katsoó:
—¡Tsi mejénjnú nga kjo̱tjoꞌajnú, ti̱yojnú! ¡Ngata̱ tsitsijenjínjnú nga̱xtonjnú, ti̱ nde nga ki̱a̱jín nangui soón mindyiajnú! ¡Xtji̱e̱e̱n na̱xi̱i̱ ti̱yojnú, tsi mejénjnú nga kjo̱tjoꞌajnú! ¡Tsi bo̱a̱jín si̱ꞌánjnú, kju̱i̱e̱jnú ndatsa jún nga!
18Ta̱nga Loo̱t bi̱ katsó:
—¡Jmí ndi̱a̱, ꞌniú míꞌájnúꞌun nga jmí! 19Jún achichí kjo̱a̱nda je kiniꞌánjnúꞌun, kó ta̱ngatꞌanii̱ nga ndajnú xota̱ nga nda kiniꞌánjo̱jnúꞌun nga kaꞌnaxiéꞌájnúꞌun, ta̱nga ka̱májín konga an xtji̱e̱e̱n na̱xi̱i̱, ngatꞌa̱ tsi ta̱ nga tsꞌénfí an ngu̱i̱ya ndi̱ya̱á kjo̱chótji̱nguina ni xi ka̱maa̱ kósꞌe̱ ko̱ya an. 20Jéꞌe̱n, ki̱a̱a̱ tikón ngo ndí na̱xi̱ńdá xi chichí xi tikón tiñaa̱, teꞌéndiéjnúꞌun nga ki̱a̱ xtji̱e̱e̱n konga an, tsi̱ꞌe̱ nga kjo̱tjoꞌa an. Bokia nga achichí chichí kui ngu̱i̱ndiee̱.
21Kó ngo kui já ndítsjiee̱ xi bi̱ katsoó:
—Ndakjíꞌí, sa̱ꞌinkjatjosón an ni xi tꞌísé ji, kó sa̱ꞌinkjiéjín an kui ndí na̱xi̱ńdá xí tꞌísé ji. 22Ta̱nga tsá tꞌen ji, ti̱yí jí jánján, ngatꞌa̱ jmí ni sa̱ꞌínjín an ngaskande nguije kjóchí ji ki̱a̱a̱.
Kuíni nga kui na̱xi̱ńdaá Sóaa̱r kiꞌmí, «ngu̱i̱ndie xi chichí» tsó kui jaꞌeén.
23Jè má tjitjó tsꞌueé nga jachó Loo̱t ki̱a̱ na̱xi̱ńdá Sóaa̱r. 24Kósꞌe̱ kjiꞌa boá nga Néná katsꞌénkixó ndiꞌí ko̱jo ndso̱ko̱a̱n asufre̱ ki̱a̱ nga̱soón na̱xi̱ńdá Sondoma̱ ko̱jo Ngomorra̱. 25Kó bo̱a̱ tsꞌén katsꞌénkjie nga jó kui na̱xi̱ńdaá ko̱jo ngayeje ngu̱i̱ndie nínga soón, kó katsꞌénkjie ngayeje xota̱ xi kisꞌińdo kui ngu̱i̱ndiee̱ ko̱jo ngayeje ni xi kamáxchá. 26Ta̱nga chjo̱ón Loo̱t katsꞌénkꞌafóyá nga askotsijen nga̱xto̱n, kó ndi̱jo̱ na̱xa̱ kamá ngayeje yojoo̱ kui xota̱chjo̱on.
27Nga kamánguindyiojón, achichí ta̱jñó jastjíe̱n Abraa̱n kó kijí nguiní nínga tsíchji̱a̱jo Néná. 28Kó askotsijen xtji̱e̱e̱n na̱xi̱ńdá Sondoma̱ ko̱jo Ngomorra̱, ko̱jo ngayeje kui tꞌanangui soón, kó kamábe nga ṉdi̱i̱ tꞌananguii̱ tjitjó xikó maá ṉdi̱ xi tjoo̱ ngo orjno̱. 29Bo̱a̱ tsꞌén Néná katsꞌénkjie kui na̱xi̱ńdá xi kisꞌińdo kui nangui soón, ta̱nga Néná jaꞌátsjiee̱n Abraa̱n kó tsꞌaxiéꞌá Loo̱t nga kiniꞌánkjié kui na̱xi̱ńdaá.
Bi̱ katsꞌén ínchjiín Loo̱t
30Kó Loo̱t ko̱jo ndí ínchjiín katsakjónní nga ki̱a̱ kꞌuíndo na̱xi̱ńdá Sóaa̱r, kó jatjo kui ngu̱i̱ndiee̱, kósꞌe̱ ngo ti̱xa̱ na̱xi̱ kijíkꞌíndo. 31Ngo ndi̱ya tsa̱kjin xí xchaá Loo̱t, bi̱ katsoó tsa̱kjin xi kjindií:
«Na̱ꞌminá jè ꞌniú xchá kó nguiti̱ jmíjín xota̱ xi̱ꞌin kui ngu̱i̱ndiee̱ xi ka̱ma ku̱i̱xanjo̱ tsi̱ꞌe̱ nga kꞌuiéná ndí. 32Ja̱bíꞌi̱n kó si̱ꞌanchꞌi̱ na̱ꞌminá, sꞌe̱ jaskan tsjayójojo̱ tsi̱ꞌe̱ nga kꞌuiéná ndí xí tsi̱ꞌe̱».
33Kó ti̱ kuii̱ ni̱xtji̱e̱e̱n kui ínchjiín katsꞌénchꞌi̱ na̱ꞌmii̱, sꞌe̱ na̱ xi xchaá kisꞌiejo̱ na̱ꞌmii̱, kó Loo̱t nde kamábejín nga kisꞌiejo̱ tsa̱kji̱ín, ti̱ nde kamábejín nga jastjíe̱n kui naa̱ nga kisꞌietꞌaa̱.
34Nga kamánguindyiojón, na̱ xi xchaá bi̱ katsoó na̱ xi kjindií:
«Ngoye jñó kisꞌiejo̱ an na̱ꞌminá. Ingo ndi̱ya si̱ꞌanchꞌi̱ nguiñá tsi̱ꞌe̱ nga jí má ra tsjajnije̱ nga ꞌne̱. Kó bo̱a̱ tsꞌén nga jó ñá kꞌuiéná ndí xí tsi̱ꞌe̱».
35Kó kui jñoó, nguije katsꞌénchꞌi̱ na̱ꞌmii̱, na̱ xi kjindií kisꞌiejo̱. Kó Loo̱t nde kamábejín kóchon kisꞌiejo̱ kui tsa̱kji̱ín, ti̱ nde kamábejín nga jastjíe̱ntꞌaa̱ kui naa̱. 36Kó bo̱a̱ tsꞌén nga jó ndí ínchjiín Loo̱t kisꞌiee̱ ndí xí tsi̱ꞌe̱ na̱ꞌmii̱. 37Kó nga katsen ndií tsa̱kjin xí xchaá, ngo ndí xíꞌin kisꞌiee̱ kui xi Moaa̱b ítꞌa jaꞌén, kó ki̱a̱ kjindiboáni tji̱e̱e̱ xota̱ Moaa̱b ngaskande ngotꞌe̱. 38Kó ti̱ katsen ndií tsa̱kjin xí kjindií, kó ti̱ ngo ndí xíꞌin kisꞌiee̱ nga, kui xi Ben-Amii̱ ítꞌa jaꞌén, kó ki̱a̱ kjindiboáni tji̱e̱e̱ xota̱ Ben-Amii̱ ngaskande ngotꞌe̱.
सध्या निवडलेले:
Jénesii̱s 19: MAIX
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014