Jénesii̱s 18
18
Néná bi̱ tsꞌén katsóyatjoón Abraa̱n nga stse̱n Isaa̱
1Bi̱ kamá kjiꞌa nga Néná jatjokjaá Abraa̱n ki̱a̱ nínga tjín yáꞌensino̱ xi tikón tꞌa kꞌijñá xi ꞌmí Mamree̱. Kui ni̱xtjinján achichí sibé kamá ndoboaá, kó Abraa̱n xió kisꞌijña ngu̱i̱xtio nga̱ntjo̱a̱a̱ ndiꞌa xi tji̱xi̱ín cho̱ kamándanii̱. 2Kó ta̱niján má iskjininkꞌa kje̱n, kó kamábe ján já xí síndo tiña nínga tikón kui, kó tsanga má jataxie nga kijíkón tiñaa̱, kó nga jachókoón asién tikoó ngaskande nga kisitꞌaa̱ xtjien tꞌananguii̱ nga kamábendikón kui jaá. 3Kó bi̱ katsoó:
—Jún Ndi̱a̱, tsi nda tsꞌén kasasiennijnú an, ꞌniú míꞌájnúꞌun nga ku̱i̱ndyion ngotjónjnú kꞌi̱e̱e̱. 4Ngotꞌe̱ má kuíꞌá an chií ndójoa tsi̱ꞌe̱ nga ka̱ma ko̱niéjónjnú ndsa̱kojnú, kó ka̱ma si̱ꞌankjaꞌyáchiíjnú nguindie kui yaá. 5Fíkjaꞌamárajnúꞌun chií pan tsi̱ꞌe̱ nga sa̱kóngaꞌniuú ini̱ma̱jnú, sꞌe̱ jaskan tanguínjnú. ¡Ti̱ndyiónjnú xikoó tsi ndiꞌajnú kꞌi̱e̱e̱, án boá xi sa̱ꞌinsénjnúꞌun!
Kó nga ján kui jaá bi̱ katsoó:
—Ndakjíꞌí, bo̱a̱ ti̱ꞌin ji xikó kase ji.
6Kósꞌe̱ Abraa̱n tsanga má kijí ndiꞌa xi tji̱xi̱ín cho̱ kamándanii̱ nínga tikónꞌyá na̱ Saraa̱, kó bi̱ katsoó: «Tsá chjábé chií jí kan kilo̱ ndso̱ko̱a̱n ṉño̱pan, ti̱ꞌinnda̱ꞌyo̱ ji, kó ti̱ꞌinnde ji pan».
7Sꞌe̱ Abraa̱n tsanga má nga kijí nínga síndo cho̱yojoo̱, kó iskjíbé ngo xi je ndakjiꞌi ko̱jo xi kjindií, kó katsjaá ngo mosoo̱, kó kui nda̱a̱ xi tsá xi boaꞌa katsꞌénda ni chinie. 8Sꞌe̱ iskjíbé mantekiya̱ ko̱jo tsjién, ko̱jo kui ndí cho̱yojo xi je kachjaán, kó kijíjoo̱ kui jaá, kó ki̱a̱ iskjinie nguindiee̱ kui yaá.
9Kó kui jaá bi̱ katsó nga asíyaá Abraa̱n:
—Ñá tikón na̱ Saraa̱, chjóo̱n.
Kó Abraa̱n bi̱ katsó:
—Ki̱a̱ tikón ngu̱i̱ya ndiꞌa xi tji̱xi̱ín cho̱ kiniꞌándanii̱.
10Kó ngo kui jaá xi bi̱ katsó:
—Nó xí ndiboaá kji̱ndi̱boákón nguiñaá ji, kó kui ni̱xtjii̱n chjóo̱n je katsen ndií kjiꞌa.
Kó na̱ Saraa̱ nga̱xto̱n nga̱ntjo̱a̱a̱ ndiꞌa xi tji̱xi̱ín cho̱ kiniꞌándanii̱ tikón, kó ki̱a̱ tsintꞌieé ngayeje ni xi katsó Abraa̱n ko̱jo kui jaá. 11Kó Abraa̱n ko̱jo na̱ Saraa̱ jè ꞌniú xchá kamá, kó na̱ Saraa̱ kui ni̱xtjinján ja̱ bo̱a̱ jè je tjié. 12Kó na̱ Saraa̱ tsajnó, sꞌe̱ bi̱ katsó: «A ta̱ tsja ra kjiꞌi nga bo̱a̱ ka̱ma katsaki, ta̱nga an ko̱jo xingána jè ꞌniú xchájne̱ nga ndí kꞌuiéjne̱».
13Kósꞌe̱ Néná bi̱ katsoó Abraa̱n:
—Ánní nga tsꞌénmojnó kon na̱ Saraa̱. A sꞌijinjínrií nga ka̱ma kꞌuieé ngo ndí nda tsi je ꞌniú xchá. 14A tjín ngo ni xi niꞌin ka̱mana nga sa̱ꞌín an. Nó xí ndiboaá kji̱ndi̱boákón nguiñaá nguije stse̱n ndií na̱ Saraa̱.
15Nga tsintꞌié kuí nii̱ na̱ Saraa̱, katsakjónní kó bi̱ katsó:
—Tsajnójín an.
Ta̱nga Néná bi̱ katsó:
—A bejín xó an nga akajné ji.
Bi̱ katsꞌén Abraa̱n nga ꞌniú tsíchji̱a̱tjé na̱xi̱ńdá Sondoma̱
16Kó kui jaá jastjíe̱n nínga síndo, kó kijí xtji̱e̱e̱n na̱xi̱ńdá Sondoma̱, kó Abraa̱n nijan kijíjo̱ ngotjón tsi̱ꞌe̱ nga sa̱ꞌínkixotꞌa. 17Ta̱nga Néná bi̱ tsꞌén katsꞌénkjó:
«Ka̱májín kꞌuiꞌmáa̱ Abraa̱n ni xi sa̱ꞌin an, 18ngatꞌa̱ xota̱ tji̱e̱ tsi̱ꞌe̱ boá xi ka̱ma ngo na̱xi̱ńdá xí ꞌniú je, ko̱jo nga ta̱ngatꞌanii̱ kui nga sa̱ꞌinchikonñé an ngayeje na̱xi̱ńdá xí tjín nga̱sondiee̱. 19Kuí xá jaꞌajin an kui nga ko̱tíxomaa̱ ndií ko̱jo xota̱ xi síndo ndiꞌaa̱ nga ku̱i̱ntꞌiéꞌénna ko̱jo nga ni xi nda ko̱jo ni xi kixi̱ sa̱ꞌín. Tsi bo̱a̱ sa̱ꞌín Abraa̱n, sa̱ꞌinkjatjosón an ngayeje ni xi je kixiyatjóo̱n nga sa̱ꞌin an».
20Kósꞌe̱ Néná bi̱ katsoó Abraa̱n:
—Achichí ni xi ndajínkjiꞌi xi je tjíꞌmí kjo̱a̱a̱ xota̱ na̱xi̱ńdá Sondoma̱ ko̱jo Ngomorra̱, kó jeé jè ꞌniú kjima je ngase, 21ta̱sá kjuinkátsijée̱n, kó skuie so̱bo̱a̱ má an tsi ja̱koxi̱ ngayeje ni xi tjíꞌmína kjo̱a̱a̱ kui ngu̱i̱ndiee̱.
22Kó kijí kui jaá xtji̱e̱e̱n na̱xi̱ńdá Sondoma̱, ta̱nga Abraa̱n to̱kó kisꞌijña ra nguindyi̱ko̱n Néná. 23Kó Abraa̱n kijíkón tiñaa̱ Néná, kó bi̱ katsoó:
—A nijan si̱ꞌinkꞌin jí xota̱ xi ndaa̱ ko̱jo xi ndajiín. 24Kó tsi síndo ichítié xota̱ xi kixi̱ ngu̱i̱jii̱n kui na̱xi̱ńdaá. A si̱ꞌinjetakinjíi̱n ngayeje kui xotaa̱ ta̱ngatꞌanii̱ nga tjoó kui xota̱ xi kixi̱ xi ichítié xi síndo ki̱a̱a̱. 25¡Jí boá ngo Ne xi kotsijee̱n tsi nda ko̱jo tsi ndajín ndyi̱tsꞌen ngayeje xota̱ nga̱sondiee̱! ¡Kó jí ka̱májín nijan si̱ꞌinkꞌin ji xota̱ xi ndajín ndyi̱tsꞌe̱én ko̱jo xota̱ xi nda ndyi̱tsꞌe̱én! ¡Jí boá ngo Ne xi ndse̱je̱n tsꞌenseén ngayeje xotaa̱!
26Kósꞌe̱ Néná bi̱ katsó:
—Tsi sa̱kóna ki̱a̱ na̱xi̱ńdá Sondoma̱ ichítié xota̱ xi kixi̱, sa̱ꞌinjetakóo̱n ngayeje xota̱ xi síndo kui na̱xi̱ńdaá, ta̱ngatꞌanii̱ nga tjóna kui xi ichítieé.
27Ta̱nga Abraa̱n ti̱ bi̱ ti̱ katsó nguinií Néná:
—Ne tsa̱ꞌa̱n, ti̱ꞌinjetakínní nga bi̱ tsꞌén tsꞌénchji̱a̱joo̱ ji, ja̱ jè ye ji nga nguindyikin ji jmí ni chjíjiín an. 28Ta̱nga, mí xi si̱ꞌin ji tsi ngayeje kui na̱xi̱ńdaá, ta̱ yichán ún tsí xota̱ xi kixi̱ síndo. A ti̱ kuí xí si̱ꞌinkjieni ji kui na̱xi̱ńdaá.
Kó Néná bi̱ katsó:
—Tsi sa̱kóna ki̱a̱a̱ yichán ún xota̱ xi kixi̱, sa̱ꞌinkjiéjín an.
29Kó Abraa̱n ti̱ bi̱ ti̱ katsó nguinií Néná:
—Kó tsi ta̱ yichán tsí má xota̱ xi kixi̱ xi sa̱ko̱ó ki.
Kó Néná bi̱ katsoó:
—Sa̱ꞌinkjiéjín an, ta̱ngatꞌanii̱ nga tjóna kui xota̱ xi yichaán.
30Kó ti̱ bi̱ ti̱ katsó nguiní Abraa̱n:
—Ne tsa̱ꞌa̱n, ngata̱ niꞌínxchínjín ji tsi ta̱kó kuichjiájoraa̱, ta̱nga, kó tsi ta̱ kantié tsí má xota̱ xi nda xi tjín ki̱a̱a̱ ki.
Kó Néná bi̱ katsó:
—Tsi sa̱kóna kantié kui xotaa̱, sa̱ꞌinkjiéjín an na̱xi̱ńdaá.
31Kó Abraa̱n ti̱ bi̱ ti̱ katsó nguiní:
—Ne tsa̱ꞌa̱n, achichí sénkjo̱a̱ an nga bi̱ tsꞌén chjiájoo̱ ji, ta̱nga, kó tsi ta̱ kan tsí má xota̱ xi kixi̱ síndo kui ngu̱i̱ndiee̱ ki.
Kó bi̱ katsó Néná:
—Ngaskande nda tsi ta̱ kan tsí má xi síndo, sa̱ꞌinkjiéjín an.
32Kó ti̱ bi̱ ti̱ katsó nguiní Abraa̱n:
—Ngata̱ niꞌínxchínjín ji Ne tsa̱ꞌa̱n tsi ingo ndi̱ya kuichjiájoo ji. Kó tsi ta̱ tie tsí má xi síndo ki.
Kó Néná bi̱ katsó:
—Ta̱ngatꞌanii̱ nga tjóna kui xi tiee̱, sa̱ꞌinkjiéjín an.
33Nguije Néná tsíchji̱a̱jo Abraa̱n xín kijí, kó Abraa̱n kijí nínga tikón ndiꞌa xi tji̱xi̱ín cho̱ kiniꞌándanii̱.
सध्या निवडलेले:
Jénesii̱s 18: MAIX
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014