SAN JUAN 4
4
Jesús tén han kelán'a eñama Samaria
1Apkelleg'ak axta amya'a fariseos apxáma énxet apyetleykekxa Jesús, tén han apxáma apyakpasáseyak yegmen, axta kaxnawok ma'a Juan. 2(Háwe axta eykhe Jesús ma'a apyakpasásegko axta yegmen énxet, apkeltámeséyak axta eyke m'a). 3Xama axta apleg'a amya'a Jesús, aptekkek axta yókxexma Judea apmahágko m'a yókxexma Galilea.
4Axta peyk eyeykhágwók Jesús apxega m'a yókxexma Samaria. 5Apwokmek axta Jesús nátegma ekwesey Sicar yókxexma Samaria, keto' axta xóp apmeyáseykekxexa axta apketche Jacob ma'a, cham'a apketche apwesey axta José,#Gn 33.19; Jos 24.32. appagkancheso axta yakwayam egkések. 6Yetneyk axta yámelchet ekwesey axta Jacob apagkok ma'a. Apyampagwokmek axta Jesús náxet ámay, keñe axta aphakmo nekha yámelchet, keto' axta anhan ektémakxa yetseksókhem. 7-8Nátegma axta apkelmahágkok apkeltámeséyak aptegyágwokmo aptéyak. Wákxeyk axta xama Samaria kelán'a ekyahayam ekyekwákxo yegmen ma'a yámelchet nak. Aptahak axta apcháneya Jesús se'e:
—Ko'o xa ketsék yegmen.
9Entahak axta eyátegmowágko kelán'a s'e:
—¿Yaksak ektaha selmaxneya nak yegmen?, xép neykhe apteme judío, ko'o eyke sekteme Samaria kelán'a. Hakte mepakhetchesek axta cha'a énxet'ák judíos ma'a apheykha nak Samaria.#Esd 4.1-5; Neh 4.1-2.
10Aptahak axta apchátegmowágko Jesús se'e:
—Ya'ásegkok agkok xeye' m'a aksok segmésamol'a cha'a Dios, ya'ásegkok agkok nahan se'e apkelmaxneya nak yegmen, kalmaxnak xeyk xeye' yegmen, keñe exchek egkések ma'a yegmen ekyennaktésamo nak egnenyek.#Is 44.3; Jer 2.13; 17.13; Jn 7.37-39.
11Entahak axta eyáneya kelán'a Jesús se'e:
—Wese', méko exchep apyekwé yegmen, tawanyek nahan se'e yámelchet nak: ¿Háxko sat kañék hegkések ma'a yegmen ekyennaktésamo nak egnenyek? 12Nelyeyheyncha'a Jacob axta sempekkencháseykekxa negko'o s'e yámelchet nak, keso apyamakxa axta nahan cha'a yegmen se'e, axta nahan apyeneykegkaxa cha'a yegmen apketchek se'e, tén han ma'a apnaktóso. ¿Xép enxeykel'a apteme apyekhágweykmoho Jacob?
13Aptahak axta apchátegmowágko Jesús se'e:
—Apyókxoho énxet ektahakxa enxoho apyenéyak se'e yegmen nak, kakhekxak sat cha'a ekhem; 14énxet ektahakxa enxoho apya yegmen peya nak agkések ko'o, megkakhekxék sat cha'a ekhem. Hakte katyapok sat aksa apwáxok énxet yegmen peya nak agkések ko'o, ektémol'a m'a ekteyapmakxal'a yegmen, kagkések sat nahan ekyennakte egnenyek megkatnegwayam enéxa.
15Entahak axta eyáneya kelán'a Jesús se'e:
—Wese', hegkes sat ko'oxa xa yegmen nak, yakwayam enxoho meheyakhekxék cha'a ekhem, kamaskok nahan sekyekwakto yegmen se'e yámelchet nak.
16Aptahak axta apcháneya Jesús kelán'a s'e:
—Kaltennásekxa atáwa, keñe sat keyxyók makham se'e.
17—Méko eyke ko'o etáwa, axta entahak eyátegmowágko xa kelán'a nak.
—Aptahak axta apchátegmowágko Jesús se'e:
—Nakso' xa ektahakxa nak ekpeywa exche' ekxéna méko atáwa; 18cinco axta apweykmok anakteyegka'a exche', keñe m'a énxet ekmeykekxa nak kaxwo', háwe atáwa agko'. Nakso' xa ektahakxa nak ekpeywa.
19Xama axta ekleg'a kelán'a xa, entahak axta eyáneya Jesús se'e:
—Wese' ekya'ásegwokmek xép aptaha Dios appeywa aplegaso. 20Apkelpeykesamok axta cha'a Dios ẽlyepmeyk nano' negko'o s'e néten egkexe nak, apkelánamákpoho apkeleñama nak Samaria, keñe kéxegke kéltaha nak judíos kélxeyenma eyéméxko kólpeykeshok Dios ma'a tegma apwányam Jerusalén.
21Aptahak axta apchátegmowágko Jesús se'e:
—Kelán'a, nahey'ásem aksa, kammok sat ekhem yakwánxa kólpeykeshok kéxegke Dios Egyap meyke kélmeyeykenta s'e néten egkexe nak tén han meyke kélmeyeykekxa m'a tegma apwányam Jerusalén. 22Megkólya'ásegkok kéxegke m'a kélpeykesamo nak; negko'o eyke negya'ásegkok ma'a nelpeykesamo nak, hakte judíos keñamak ma'a nelwagkásamáxche teyp nak. 23Peyk eyke kaxwo' kammok ekhem, keso kaxwo' nak, cham'a yakwánxa sat etnésesek ekmámnaksoho apkelpeykesamo Dios ma'a énxet'ák ektaha nak nakso' apkelpeykesamo Dios, eñama apteméseso m'a Espíritu apkeñama nak Dios. Hakte apmenyék cha'a Dios Egyap etnehek énxet xa ektaha nak, cham'a ektaha nak apkelpeykesamo. 24Dios apteme Espíritu, keñe m'a énxet ektaha nak apkelpeykesamo, kéméxchek cha'a etnehek ekmámnaksoho apkelpeykesamo, eñama apteméseso m'a Espíritu apkeñama nak Dios.
25Entahak axta eyáneya kelán'a Jesús se'e:
—Ekya'ásegkok ko'o apxénamakpo ewak Mesías apkeltamhomakpo nak Cristo; apwa'ak sat agkok ma'a, hẽltennaksek sat ektémakxa ekyókxoho aksok.
26Aptahak axta apchátegmowágko Jesús se'e:
—Ko'o neykhe xa ekxéna nak, neykhe s'e ekpakhetchesa nak.
27Keñe axta apkelwakto apkeltámeséyak, pelakkasek axta nahan apwet'a appakhetchásencha'a xama kelán'a Jesús, kennókek axta eyke elmaxneyha aksok ekmámenyého xa kelán'a nak, kennókek axta nahan elmaxneyha ektahakxa elpakhetchásamáxkoho Jesús xa kelán'a nak. 28Pekkenákxek axta yátegwáxwa agkok ekmeyákxo nátegma xa kelán'a nak. Entahak axta eltennáseykxo énxet'ák se'e:
29—Kólteyanegwomho hana xama énxet seltennasa exchek ekyókxoho aksok selané nak ko'o, ¿Háweya Mesías ma'a?
30Apkelántekkek axta nátegma énxet'ák apkelmahágko aphakxa Jesús. 31Amonye apkelwé énxet'ák axta aptaha apkeltámeséyak apcháneya Jesús se'e:
—Sẽlxekmóso, etaw hana sekxo'.
32Wánxa agkok, aptahak axta apkeláneya Jesús apkeltámeséyak se'e:
—Yetneyk ko'o aksok sektawakxa megkólya'ásegko nak kéxegke.
33Aptahak axta apkelpakhetcháseykpoho Jesús apkeltámeséyak se'e:
—¿Kélsókasakmek enxeykel'a apto?
34Aptahak axta apchátegmowágko Jesús se'e:
—Neykhe ko'o sekto m'a selané nak cha'a apmopmenyého m'a aptaha nak seyáphaso ko'o, tén han apencheshok alának ma'a ektémakxa nak aptamheykha apkeltémo axta alána'. 35Kóltehek cha'a kéxegke kélpeywa s'e:
—‘Cuatro pelten makham kéméxchek yakwayam kanakxaxchek aksok ekyexna’; wánxa agkok, ektahak ko'o seláneya kéxegke s'e: Kóllano m'a aksok kélcheneykekxa nak, makhetchek kaxwo', wokmek eknakxamáxchexa ekyexna. 36Enxet ektaha nak apnakxo ekyexna aksok namyep kélcheneykekxa exkak cha'a ekyanmaga, keñe m'a aksok apnakxo nak ekteme ekyennakte egnenyek megkatnegwayam enéxa, yakwayam enxoho kaxhok mók elpayheykekxa apwáxók ma'a ektaha nak apkeneykekxa tén han ma'a ektaha nak apnakxo ekyexna. 37Nakso' ektémakxa nak cha'a amya'a ekxénamaxko s'e: ‘Xama ektaha apkeneykekxa, keñe pók aptaha apnakxo ekyexna.’ 38Eláphásek axta ko'o kéxegke yakwayam kólneyxwók aksok ekyexna m'a megkatnahakxa axta kéltekkeso eñama kéltamheykha; pók énxet'ák axta eyke ektaha apkeláneyak xa, keñe kélmákxo aksa kéxegke xa ektaha axta aptekkeso apkeltamheykha pók énxet'ák.
39Apxámok axta énxet'ák apkeleñama Samaria mey'ásekmo Jesús, axta keñamak ma'a ektaha axta eltennáseykxo kelán'a s'e: “Eltennásekxók xeyk ko'o ekyókxoho aksok selané nak.” 40Xama axta apkelwokmo énxet'ák apkeleñama Samaria aphakxa Jesús, apkeltamhok axta exek sekxo' xamo' Jesús xa énxet'ák nak. Anet ekhem axta anhan aphakmok Jesús ma'a, 41apxámágkek axta aksa énxet apteme mey'áseyam Jesús apleg'a appeywa apagko'.
42Entahak axta amya'a eyáneyáxko kelán'a s'e:
—Magya'ásekmok kaxwo' negko'o, háwe ekwánxa agkok magya'ásekmo m'a ektahakxa exchek sẽltennaseykekxa exche', hakte negko'o egagko' nahan nenleg'ak kaxwo' aptahakxa appeywa, magya'ásekmok nahan aptaha nakso' agko' apkelwagkaso teyp énxet'ák keso náxop.
Jesús aptakmelcheseyam wese' apwányam apkeláneykha apketche
43Anet ekhem axta entahak ekyeykhe, keñe axta aptepa Jesús Samaria apmeyákxo m'a Galilea. 44Hakte Jesús apagko' axta apteme appeywa s'e: Méko katnehek eyáyo Dios appeywa aplegaso m'a apha enxoho apchókxa.#Mt 13.57; Mr 6.4; Lc 4.24. 45Xama axta apwákxo Jesús Galilea, apchápeyha axta énxet'ák ektaha axta apheykha m'a yókxexma nak, hakte apkelmahágkek axta anhan Jerusalén xa énxet'ák nak, cham'a elánéxko axta apchakneykekxa énxet ekhem melwagkayam axta judíos kéltéma axta Pascua, apkelwet'ak axta anhan ma'a ekyókxoho aksok ektahakxa axta apkelané Jesús ma'a.#Jn 2.23.
46Apwákxeyk axta makham Jesús ma'a nátegma Caná yókxexma Galilea, cham'a aptemesáseykxexa axta yegmen vino.#Jn 2.1-11. Apheyk axta anhan xama apkemha apmonye wese' apwányam apchásenneykha m'a, apyetna axta apketche apháxamap ma'a tegma apwányam Capernaum. 47Xama axta apleg'a amya'a wese' apwányam apchásenneykha apwakto Jesús Galilea apkenyekto m'a Judea, apteyánegwokmók axta, apkeltamhok axta nahan emhagkok apxagkok, apkeltamhok axta etakmelchesesók apketche apháxamap keto' apketsapmakxa. 48Aptahak axta apchátegmowágko Jesús wese' apwányam apchásenneykha s'e:
—Kólya'asók kéxegke megkólwet'awo enxoho m'a aksok sempelakkaso nak agweta'.
49Wánxa agkok, aptahak axta makham apchátegmowágko wese' apwányam apchásenneykha s'e:
—Wese', epekhésa, etyánegwomho heykxa hatte amonye apketsapma.
50Aptahak axta apcháneya Jesús se'e:
—Etakhoho apxagkok; apyennákxeyk kaxwo' xép apketche.
Axta nahan ey'ásekmok wese' apwányam apchásenneykha m'a aptahakxa axta apcháneya Jesús, aptakháwok axta apxagkok. 51Apkelanyexágkek axta apkelásenneykha apwet'a apkexyekmo xa wese' apwányam apchásenneykha nak, aptahak axta apcháneya s'e:
—¡Apyennákxeyk apketche!
52Apkelmaxneyáha axta apkelásenneykha ekwánxa hora aptakmelwokmo apketche, aptahak axta apcháneya s'e:
—Hem axta la una taxnam axta ekmassa ekmexanma apyempehek.
53Xénwákxók axta apwáxok sakcha'a apyap ekwánxa axta hora aptaha apcháneya Jesús se'e: “Apyennakwokmek xép apketche”. Aptemék axta mey'áseyam Jesús xa énxet nak, tén han ma'a ekyókxoho ekheykha nak apxagkok.
54Cháxa ektaha axta ánet ekwetamaxche apkelané Jesús aksok sempelakkaso agweta' xa, cham'a apmeyánto axta makham Galilea apkenyekto m'a Judea.
सध्या निवडलेले:
SAN JUAN 4: LEGN
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Lengua Sur (Enxet) New Testament © United Bible Societies, 1992.
