SAN JUAN 5
5
Jesús aptakmelcheseyam énxet megkamopwána eltakheykha
1Apkelanak axta apchakneykekxa énxet'ák judíos ekhem melwagkayam natámen xa, keñe axta Jesús apmeyákxo tegma apwányam Jerusalén. 2Yetneyk nahan ekhó yammáxek ma'a tegma apwányam Jerusalén, cham'a keto' átog ekwesey nak Nekkések átog apagkok, cháxa ekhó yammáxek apkeltéma nak hebreo Betzatá xa. Cinco nahan kélpakxeneyak neyáwa xa ekhó yammáxek nak. 3Apxámok axta cha'a etnohok énxet'ák apkelháxamap xa cinco kélpakxeneyak nak, meyke apakta'ák tén han ma'a meyke aptaknák nak, tén han ma'a énxet megkamopwána nak eltakheykha. Náxop axta cha'a apheykegkok xa. Apkelhaxneykegkek axta cha'a kalpaktépok yegmen xa énxet'ák apkelháxamap nak. 4Apwa'akteyk axta agkok cha'a Dios apchásenneykha m'a ekhó yammáxek nak, keñe axta cha'a kalpaktépok yegmen, etakmelwók axta nahan cha'a énxet apháxamap ektaha enxoho apmonye kéltaxnéso yegmen, kamaskok ma'a ektémakxa enxoho apháxamap. 5Apheyk axta anhan nepyeseksa apkelháxamap xama énxet ekweykmo axta treinta y ocho apyeyam apháxamap. 6Xama axta apwet'a Jesús apyetna xa énxet apháxamap nak, apyekpelchawók axta ektaha nano' ektémakxa apháxamap. Aptahak axta apkelmaxneyeyncha'a Jesús se'e:
—¿Apmenyéya exchep etakmelwók?
7Aptahak axta apchátegmowágko énxet apháxamap se'e:
—Wese', méko cha'a ko'o hetaxnések ekhó yammáxek elpaktepa enxoho yegmen. Ekmokók agkok cha'a atxek ko'o, pók aksa cha'a kóltaxnések apmonye.
8Aptahak axta apcháneya Jesús se'e:
—Exnekxa néten, emekxa aptaháno, exeg.
9Aptakmelwokmek axta m'a énxet ektaha axta apháxamap, apmákxeyk axta aptaháno, apxegkek axta anhan. Chakhawók axta ekhem nellókasamakxa negyampé m'a, 10ékeso eñamakxa aptaha axta apcháneya énxet'ák judíos énxet ektaha axta kéltakmelcheseyam se'e:
—Sakhem nellókasamakxa nelyampé, magáneyamaxche ansawha nentaháno sakhem.#Neh 13.19; Jer 17.21.
11Aptahak axta apchátegmowágko énxet ektaha axta kaxwé aptakmelwayam se'e:
—‘Emekxa aptaháno, exeg,’ exchek aptahak seyáneya m'a énxet ektaha exchek setakmelcheseyam
12Aptahak axta makham apkelmaxneyeyncha'a judíos se'e:
—¿Yaksak exchek énxet aptaha apcháneya: ‘emekxa aptaháno, exeg’?
13Axta eyke ey'ásegkok ektaha ektakmelcheseyam ma'a énxet kaxwé aptakmelwayam, hakte apxeganakmek axta aksa Jesús nepyeseksa énxet apxámokma. 14Keñe axta apwetágwokmo Jesús apha kañe' tegma appagkanamap ma'a énxet ektaha exchek aptakmelcheseyam. Aptahak axta apcháneya s'e:
—Cháxa aptakmelwokmo nak xép neylánekxa aksa kaxwo' mey'asáxma, yakwayam enxoho megkahapweyk xép aksok ekmaso agko'.
15Apxegkek axta xa énxet ektaha axta aptakmelwayam, apkeltennásekxek axta énxet'ák judíos ektaha Jesús aptakmelcheseyam. 16Ekeso eñamakxa melwatésekmo axta énxet'ák judíos aptaknagko Jesús, hakte apkelanak axta aksok Jesús ekhem nellókasamakxa nelyampé. 17Wánxa agkok, aptahak axta Jesús apkeláneya s'e:
—Aptamháha cha'a ko'o Táta, ektamháha nahan cha'a ko'o xa.
18Yágwokmók axta aksa apmáheyo yakhek énxet'ák judíos ma'a Jesús, háwe axta ekwánxa agkok ellókasa énxet'ák judíos metakmelchesa Jesús ma'a eltémókxa nak antehek ekhem nellókasamakxa nelyampé, axta eyke keñamak nahan ma'a apxéna axta Jesús aphawo Dios, cham'a apxéna axta Jesús aptaha Apyap ma'a Dios.#Jn 10.30-38.
Ekha kélyaheykekxoho Dios Apketche
19Aptahak axta apchátegmowágko Jesús se'e: “Mopwanchek elának xama aksok Dios Apketche eñama m'a apmopmenyého apagko' nak elána'; wánxa aksa elának aksok apwet'a enxoho apkelana m'a Apyap. Ekyókxoho aksok apkelanakxa enxoho Apyap elának nahan ma'a Apketche. Nakso' xa sektahakxa nak seláneya kéxegke. 20Heyásekhohok cha'a ko'o Táta sektaha nak Apketche, hexekmósek nahan cha'a ekyókxoho aksok apkelanakxa enxoho; hexekmósek sat nahan ma'a aksok ektaha nak eltakmela agko', katlakkasek sat nahan kólwetak kéxegke m'a kélwet'a sat. 21Apnakxétekháseykmek cha'a ko'o Táta m'a apkeletsapma axta, egkéshok nahan cha'a elyennakte apnenya'ák, hawók nahan aptémakxa nak Apketche apkelmeyáseykegko cha'a elyennakte apnenya'ák ma'a apmokókxa enxoho egkések. 22Metnék cha'a apyekpelchémo Táta xama énxet enxoho, wánxa agkok, apmések axta eyke Apketche apmopwána etnehek apyekpelchémo énxet'ák, 23yakwayam enxoho kaxhok kélteme kéláyo Dios Apketche m'a ekwánxa nak kélteme kéláyo ko'o Táta. Agkok kóltahak kéláyo Dios Apketche, megkóltahak nahan kéláyo m'a Táta aptaha axta seyáphaso ko'o.
24“Aphaxnawók agkok énxet sekpeywa ko'o, aptemék agkok nahan mey'áseyam ma'a aptaha nak seyáphaso ko'o, cháxa ekyetna ekyennakte apnenyek xa; metnehek sat nahan apsexnánémap, hakte apyeyk'a ma'a nétsapma nak, yennakwokmek kaxwo' apnenyek. Nakso' xa sektahakxa nak sekpeywa seláneya kéxegke. 25Peyk kaxwo' kammok xa ekhem nak, keso kaxwo' nak, cháxa yakwánxa sat ellegak Dios Apketche appeywa m'a énxet'ák apkeletsapma axta; Enakxétekhágwók sat ma'a ektahakxa enxoho apkellegé appeywa. Nakso' xa sektahakxa nak sekpeywa seláneya kéxegke. 26Yetneyk ekyennakte egnenyek apagkok apagko' ma'a Táta, aptemésesek nahan eñamakxa ekyennakte egnenyek ma'a Apketche ektaha nak han apagkok apagko', 27apmések axta anhan apmopwána yakwayam enxoho etnehek apkelyekpelchémo énxet'ák eñama apteme énxet Apketche. 28Nágkatlakkas aksa kélwet'a enxoho xa, hakte kammok sat ekhem yakwánxa nak ellegak sekpeywa ahagko' m'a énxet'ák apkeletsapma axta, 29elántépok sat takhaxpop. Enakxétekhágwók sat yakwayam elxawagkok ekyennakte apnenya'ák ma'a ektaha axta apkeláneyak aksok ektakmela; keñe m'a ektaha axta apkeláneyak aksok ekmaso enakxátekhágwók sat yakwayam etnehek apkelsexnánémap.#Dn 12.2.
Jesús apxekmósamo aptaha ekha kélyaheykekxoho
30“Mowanchek ko'o atnehek selané ahagko' xama aksok. Ektemék cha'a ko'o sekyekpelchémo énxet ekhawo m'a apkeltémókxal'a cha'a atnehek Táta, ekpéwomo agko' nahan cha'a m'a ektémakxa nak sekyekpelchémo ko'o, hakte malenxáneykmok cha'a ko'o alának ma'a sekmámenyého ahagko' nak, wánxa m'a Táta apmopmenyého nak, aptaha axta seyáphaso ko'o. 31Ektemék agkok ko'o sekxénamaxchekxoho ahagko', méko keyxhok sektahakxa enxoho seltenneykha ko'o. 32Yetneyk eyke m'a aptaha nak cha'a sexeyenma ko'o, ekya'ásegkok nahan ko'o ektéma ekmámnaksoho apkeltenneykha sexeyenma xa. 33Kéláphásek axta kéxegke énxet aphakxa Juan yakwayam elmaxneyha, nakso' axta anhan ma'a aptahakxa axta apchátegmoweyak Juan.#Jn 1.19-27; 3.27-30. 34Akke ko'o wásenneykekxak ma'a ektémakxa nak apkeltenneykha énxet sexeyenma ko'o. Ektemék eyke seláneya kéxegke xa ektaha nak, yakwayam enxoho kólwagkasaxchek teyp. 35Máxa axta Juan ma'a chálewaso eyálewe elsáseykmohol'axma, yakwatakxoho axta leyawok kélwáxok kéxegke elseyexma apagkok. 36Yetneyk eyke ko'o m'a aptaha nak ektakmela sexeyenma ko'o, megkaxnawok ma'a ektémakxa axta cha'a sexeyenma ko'o Juan. Aksok selané nak cha'a ko'o ekteme ekxekmóso ektaha nakso' seyáphaso ko'o Táta, cham'a sektamheykha apkeltémo axta alának Táta. 37Ekmámnaksoho nahan cha'a apxeyenma ko'o sekwesey Táta, cham'a aptaha axta seyáphaso ko'o,#Mt 3.17; Mr 1.11; Lc 3.22. megkóllegeyk eykhe kéxegke appeywa, megkólweteyk eykhe nahan xama enxoho. 38Megkólhayók nahan keytek kélwáxok kéxegke m'a aptémakxa nak appeywa, hakte kélya'áseykmek kéxegke m'a aptaha nak apcháphaso Táta. 39Kóltakmelcheshok cha'a kéxegke kéltámesamaxche m'a ektémakxa nak eknaktáxésamaxche Dios appeywa, hakte kélmenyék eykhe kólwetak ekyennakte kélnenyek megkatnegwayam enéxa, eñama kélteme xa; exeyenmék eykhe ko'o xa eknaktáxésamaxche nak, 40megkólmenyék eyke helyo'ótak kéxegke yakwayam kólwetak xa ekyennakte egnenyek megkatnegwayam enéxa nak.
41“Momenyék ko'o katakmelmakha apkelpeywa hexének énxet'ák keso náxop. 42Ekyekpelchawók ko'o kéxegke, ekya'ásegkok nahan megkólásekha'awo m'a Dios. 43Ekwa'ak axta ko'o eñama seyáphaso Táta, wánxa agkok, akke helápeyha kéxegke; apwa'ak axta agkok pók énxet apwé apagko' enxoho megkatnaha enxoho kélápháseykha, kóláhapmakha axta kéxegke. 44Kélmenyék agkok cha'a kéxegke kóltehek kéláyo kélmók, ¿háxko katnehek heltehek mehelya'áseyam ko'o, megkólchetama enxoho m'a ektakmela senxeyenma nak Dios aptaha nak wánxa xama? 45Nágkaxén aksa kélwáxok peya alsexnenak kéxegke nápakto' ma'a Táta. Moisés akke apkelsexneneyk kéxegke, cham'a kéltéma nak cha'a kéláyo kéxegke. 46Agkok kólya'ásekmok kéxegke m'a apxeyenma axta Moisés, mehelya'ásemek nahan ko'o xa, hakte aptáxesegkek axta weykcha'áhak Moisés sexeyenma ko'o. 47Kélya'asékmek agkok ma'a ektémakxa axta apnaktáxeséyak weykcha'áhak Moisés, kólya'asók nahan se'e sektahakxa nak seláneya kéxegke.”
सध्या निवडलेले:
SAN JUAN 5: LEGN
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Lengua Sur (Enxet) New Testament © United Bible Societies, 1992.
