SAN JUAN 17
17
Jesús apkelmaxnéseso apkeltámeséyak
1Apkenmexawók axta néten Jesús natámen apxeyenma xa, aptahak axta appakmeta s'e: “Táta wokmek kaxwo' ekhem. Yána sat kataxchek ektémakxa nak aptakmalma Apketche, yakwayam enxoho nahan exekmósek xép Apketche ektémakxa nak aptakmalma exchep. 2Hakte apmések axta exchep Apketche yakwayam etnehek meyke ekhémo nepyeseksa énxet'ák keso náxop, yakwayam enxoho elmésagkok elyennakte apnenya'ák ma'a apyókxoho énxet ektaha axta apméso exchep Apketche yakwayam eltakmelchesek. 3Enxet'ák ektahakxa enxoho apya'áseykegkoho exchep aptaha wánxa xama Dios, tén han apya'ásegkoho enxoho m'a Jesucristo aptaha axta apcháphaso exchep, keytek sat ekyennakte apnenya'ák megkatnegwayam enéxa.
4“Ekxekmósek axta ko'o ektémakxa aptakmalma exchep keso náxop, hakte eksawhawók axta ko'o selana sektamheykha apkeltamho axta alána' xép. 5Táta hegkes ko'o makham seyeymáxkoho ekyetnama axta ko'o xamo' xép amonye elánamáxche keso náxop, eñama m'a aphamakxa nak xép.
6“Elya'asásegwokmek ko'o aptémakxa exchep ma'a énxet'ák apkelyéseyncha'a axta exchep keso náxop, cham'a segkésa axta. Xép axta énxet'ák apagkok xa énxet'ák nak, egkések axta eyke ko'o exchep, apkelyahákxók axta nahan xép appeywa. 7Apkelya'ásegkok nahan kaxwo' ektaha eñama exchep m'a ekyókxoho aksok segkéso axta exchep; 8hakte eltennáseyha axta ko'o m'a amya'a segkésa axta exchep, axta nahan elya'ásekmok. Apkelya'ásegwokmek axta anhan eyámnaksoho señama ko'o m'a aphakxa nak xép, axta nahan elya'ásekmok aptaha seyáphaso exchep xa énxet'ák nak.
9“Elmaxnakkek ko'o exchep seltamho epasmok xa énxet'ák nak, malmaxnesásak ko'o seltamho epasmok ma'a énxet'ák apkelyetleykekxa nak ektémakxa keso náxop, akke elmaxnesásak ko'o m'a énxet'ák segkéso axta exchep, hakte xép énxet'ák apagkok xa énxet'ák nak. 10Apyókxoho ektaha nak ko'o énxet'ák ahagkok, xép nahan énxet'ák apagkok xa, keñe m'a ektaha nak xép énxet'ák apagkok, ko'o nahan énxet'ák ahagkok ma'a, xekmowásexkók nahan ektémakxa nak ko'o sektakmalma eñama xa énxet'ák nak.
11“Kaxwo' sat eyke kamassegwók ko'o sekha keso náxop, elenxanmohok sat eyke apheykha xa énxet'ák nak, keñe sat ko'o amyekxak ma'a aphakxa nak xép. Táta aptakmalma, eltakmelches xép xa énxet'ák nak, eñama nak ma'a ektémakxa nak ekmowána exchep apwesey, cham'a apwesey segkésa axta, yakwayam enxoho etnehek mekxeymákpoho xa énxet'ák nak, ekhawo ektémakxa nak negyepetcheyo egmók negko'o. 12Eltakmelchesegkek axta cha'a ko'o xa énxet'ák nak, neyseksók sekha xamo' keso náxop, ekmasmeyk axta anhan cha'a yetlo m'a xép apwesey ekha nak ekmowána, cham'a apwesey segkésama axta exchep. Axta anhan exyánegweykmok xama enxoho xa énxet'ák nak, wánxa axta apxegánegweykmo m'a aptaha axta apxegányam, yakwayam enxoho katnehek ma'a ektémakxa nak eknaktáxésamaxche weykcha'áhak.#Sal 41.9; Jn 13.18.
13“Kaxwo', peyk amyekxak ma'a aphakxa nak xép; ektahak ko'o sekpeywa xa neyseksók sekha makham keso náxop, yakwayam enxoho kayawhok agko' elpayheykekxa apwáxók xa énxet'ák nak, ekhawo ektémakxa nak ko'o ekyawe ekpayheykekxa ewáxok. 14Eltennáseyha axta ko'o exchep appeywa xa énxet'ák nak, wánxa agkok, aptaknagkamchek eyke énxet'ák apkelyetleykekxa nak ektémakxa náxop xa énxet'ák nak, hakte háwe apkeleñamakxa apagko' keso náxop, ekhawo nak han ko'o xa magwañamak keso náxop. 15Maltamhok ko'o elwátésesek xép apheykha náxop xa énxet'ák nak, eltamhok eyke elmeyók neyseksa elenmexeykha m'a kelyekhama'. 16Háwe apkeleñamakxa apagko' náxop xa énxet'ák nak, ekhawo ektémakxa nak ko'o magwañamak keso náxop. 17Etnéses xép apkelpagkanamap xa énxet'ák nak eñama m'a amya'a ekmámnaksoho apagkok nak; xép appeywa ekteme ekmámnaksoho. 18Eláphásek nahan ko'o xa nepyeseksa énxet'ák apkelyetleykekxa ektémakxa náxop xa énxet'ák nak, ekhawo ektahakxa axta nahan seyáphaso exchep nepyeseksa énxet'ák keso náxop. 19Sekpagkanchásamáxkoho ahagko' ko'o ektahak xép, eñama xa énxet'ák nak, yakwayam enxoho etnahagkok nahan apkelpagkanamap xa énxet'ák nak eñama m'a amya'a ekmámnaksoho nak.
20“Malmaxnesásak ko'o wánxa xa énxet'ák nak, akke elmaxnesásak nahan ma'a peya nak han etnahagkok mehey'áseyam ko'o, cham'a apkelleg'a enxoho apkeltenneykha xa énxet'ák nak. 21Elmaxnakkek ko'o exchep seltamho etnahagkok mekxeymákpoho apyókxoho xa énxet'ák nak; emenyék ko'o etnehek segyepetcheyo xa énxet'ák nak ekhawo ektémakxa nak xép sépetcheyo ko'o, ekhawo ektémakxa nak han sekyepetcheyo ko'o exchep, yakwayam enxoho melya'ásemek énxet'ák apheykha náxop aptaha seyáphaso ko'o exchep. 22Ekmések axta ko'o yakwayam etnahagkok apkeltakmalma xa énxet'ák nak, ekhawo setnésesakxa axta exchep setnésesa sektakmalma, yakwayam enxoho etnahagkok mekxeymákpoho xa énxet'ák nak, ekhawo nentémakxa nak negko'o, xép tén han ko'o, nenteme wánxa xama: 23Ektemegkek ko'o sekyepetcheyo xa énxet'ák nak, keñe exchep aptaha sépetcheyo ko'o, yakwayam enxoho etnahagkok ekmámnaksoho agko' wánxa xama xa énxet'ák nak, keñe sat elya'ásegwók énxet'ák apheykha náxop aptaha seyáphaso ko'o exchep, tén han elya'ásegwók apkelásekhayo exchep ma'a ektaha nak énxet'ák apagkok, ekhawo ektémakxa nak seyásekhayo ko'o exchep.
24“Táta, egkések axta ko'o exchep xa énxet'ák nak, emenyék nahan ko'o hexhok xamo' xa énxet'ák nak, cham'a yakwánxa nak axnók ko'o, yakwayam enxoho elwetak ektémakxa nak ko'o seyeymáxkoho, cham'a seyeymáxkoho segkésa axta exchep; hakte eyásekhayók axta exchep amonye elánamáxche axta keso náxop. 25Xép Táta appéwomo, melya'ásegkok énxet'ák apheykha náxop aptémakxa exchep; ekya'ásegkok eyke ko'o exchep, apkelya'ásegkok nahan aptaha seyáphaso ko'o exchep se'e ektaha nak énxet'ák apagkok. 26Elya'asásegwokmek axta ko'o aptémakxa exchep xa énxet'ák nak, alenxanmohok sat nahan sekteme xa, yakwayam enxoho keytek apwáxók ma'a ektémakxa nak seyásekhayo exchep, yakwayam enxoho ko'o xa atnehek sekyepetcheyo xa énxet'ák nak.”
सध्या निवडलेले:
SAN JUAN 17: LEGN
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Lengua Sur (Enxet) New Testament © United Bible Societies, 1992.
