Kucangtsi 23
23
Iticwu ti Itinji Saratu
1Saratu nde asang mae itsong mbe rikom asu itsongfaen (127). 2Awu cwu yi Kiriyati Arba ti si Hebiron ti ta Kanana. Ibrahim som kwa ricwu-wu.
3Ibrahim nwunn uwog rukom uwa-wu, u ru ka ri ira te ande ti Hiti baa, 4“Ame si rikyen kutampwa-ni ike. Ni jabci na m uwog iki ti m u nji uwa-m atang.”
5Ande ti Hiti ri te Ibrahim baa, 6“Unde ti uwe, fxen ira-ti. Afu si unde tiyang kutampwa-ti. Nji uwa-fu yi kuskab ti nyang uwae-fu. Unde iki uwae-ti u byang-wu fu kukwae-wu, ti fu na nji rukom uwa-fu atang be.”
7Ibrahim fa sunwunn, u ku riben uwe ande ti Hiti ti si ande ti uten atang. 8Awu ri te ba baa, “Ni fxen, asiti ani a cwe baa, ame na nji uwa-m, ni jwam ya m Efiron umbae Zohar, 9ti wu ā sa riben-wu ti ta uwáe rikwèn ti Makpela jabci na m, uwáe rikwèn wu ti ta ricwunnkyi risaen-wu. Ti ayib-ne ike, ame u pae na wu, u sa riben wu kafe uwog ti a nji ande atang.”
10Efiron ti risu-wu som uwae úfunn ande ti Hiti atang. Awu nwunn u ri tso te Ibrahim ti ayib ujwunn ande ti Hiti ti funn rishen ti ta ufu uten atang baa, 11“Iyee Itsekuru-m, fxen m. Ame nda pu m afu uwáe rikwèn wu ti riben wu meme, yi uwe ande-m ti funn ike ne. Ru ka nji-fu uwa-fu atang.”
12Ibrahim sī ku riben uwe ande ti uten atang, 13u ri te Efiron ti atong-ba baa, “Asiti afu a cwe, u fxen m, ame u pae na fu aser riben wu. Mbe aser kujwo-m, ti m nji uwa-m atang.”
14Efiron ri te Ibrahim baa, 15“Unde ti uwe-m, fxen m. Riben ti aser-wu si nyang azurfa ukob inje (400) amam, ayine si imi kutampwa-m te fu? Ru ka nji uwa-fu.” 16Ibrahim cwe ira ti Efiron ri, ama u myae azurfa ukob inje yi (400) na wu pangma ti awu ri uwe ande ti Hiti. Awu myae yi pangma ti a ku myae iken ritug kiye wu.
17Ikyaen yine, riben wu ti Efiron site yi Makpela uwe usir ti kiskinn na Mamre, riben ti uwae-wu renfa ituku yi ti a site a atang, a sa jabci na Ibrahim. 18Meme ande ti Hiti ti sang rishen ti ta ufu uten usir wu, aba nung baa, riben wu ti iken ti ta uwae atang meme na kafe pu yi ana Ibrahim. 19Ama Ibrahim nji uwa-wu Saratu yi uwáe rikwèn ti ta Makpela ti fer ti Mamre ti si Hebiron yi Kanana. 20Riben wu, ti fifae wu, ande ti Hiti sa jabci na pu ba Ibrahim, ama Ibrahim sa wu kafe uwog ti a ku nji ande atang.
सध्या निवडलेले:
Kucangtsi 23: kubNT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Wycliffe Bible Translators, Inc. and
© The Nigeria Bible Translation Trust 1995, 2017