Kucangtsi 24
24
Ibrahim Sha Unda Na Umbae-wu
1Ibrahim kyáen tag pu wu, asang-wu ama ko pu yi. Ama Yaweh nde wu itinyang yi meme iken ti awu ku nde. 2Ibrahim ri te upyi-wu ti ndufu ti ta risu meme iken ti awu site baa, “Sa kujwo-fu sang runwan-m, 3ti fu ben uben yi rinyi Yaweh, Rimam na apupwen ti riben baa, afu na u pu-fu unda uwae anyisu wandab ti Kanana, uwog ti ame som atang ne, na baen umbae-m be. 4Amaa afu na u ru yi uten-m, uwog ande-m, kaa pu unda atang ba na umbae-m Ishaku.”
5Upyi wu rang wu baa, “Asiti unda wu a cwe-wu ti wu u putsa m ba be re? Ame u pu umbae-fu kafe ru ti uten ti afu ru atang ba a.” 6Ibrahim ri te wu baa, “Nung nyinyang, pu umbae-m kafe ru-fu atang be. 7Yaweh, Rimam na apupwen, ti pu m ruye kusog itse-m, ti uten ti ana-m, yer unju ti uben ti ben te m baa, ‘Riben wune, ame u sa wu na rishi-fu,’ awu u tom atom-wu ru uwe-fu, ti afu u tu unda atang ba na umbae-m. 8Asiti unda wu a cwe-wu ti wu u putsa fu ba be, afu nwangru pu fu uwae unju ti yer yine. Amaa pu umbae-m ru-fu yi atang be.” 9Ikyaen yine, upyi wune sa kujwo-wu sang runwan Ibrahim, itsekuru-wu, u ben uben risu ira yine.
Upyi Ibrahim Jwam Rimam Ti Awu Ā Tatso Wu Unda Ti Awu u Pu Ba
10Upyi wune pu ikyinnsu ti kumunn isim rijwe ana itsekuru-wu fa ti iken ti tinyang ti tsotso nwunn u ru yi uten ti Aram yi Mesopotamiya, u ka sang uten Nahor. 11Ti usir kujwo ureb ti aba ka sang unju ribung ti ta fer uten wu. Kiye wu si kiye ti anda ba ku txi ambyi. Awu nda ikyinnsu yine ku riben fer atang. 12Ama awu jwam Rimam baa, “Yaweh, Rimam na itsekuru-m Ibrahim, nda m iken ti ame ku sha yaka ne. Tso unde ti kununn-m Ibrahim, ure-fu ti tsi kukunn. 13Nung, ame tsi unju ribung ike tine, ne si kiye ti anyisu wandab ande ti uten wune u sī ba txi ambyi. 14Nde fengo ti ame a jwam wandab iki baa, ‘Ye kukwer-fu sī ti m u ngwa ra ambyi.’ Ama awu a cwe u ri baa, ‘Ngwa, ame u nda ikyinnsu-fu ama,’ awu ā si unda ti afu tsab tsi ikyaen upyi-fu Ishaku. Asiti ayi a nde ahan, ame u nung baa, afu na nde pu fu Itsekuru-m titinyang.”
15Tí ti awu ta ti uwae Rimam ti jwam, Rebeka si ba ti kututong ambyi ukwae-wu. Awu si unda Betuwel, umbae Milika uwa Nahor, inja Ibrahim. 16Wandab wu waen unda timambe, u nung-wu urom khika be. Awu si ka txi ambyi munn kututong-wu, u tsoye ba. 17Upyi Ibrahim ter ka tu wu, u ri baa, “Mbawandab, txi ra na m ambyi pang uwae kututong ambyi-fu.”
18Ti ritsen, awu ye kututong ambyi-wu si, u ri baa, “Mbe ngwa itsekuru-m.” 19Isim ti awu ngwa pu wu, Rebeka ri baa, “Ame u txi ambyi na ikyinnsu-fu ama, ti ayi ā ngwa meme.” 20Awu nde-wu kukyib be, u ye ambyi ti tsitsi uwae kututong-wu yaensi na ikyinnsu yi uwae kutsaen, u ter ka txi tishe ba na ikyinnsu yi. 21Ko unju, upyi wune mbub-wu be, ku sae iken ti wandab wu ku nde, ti awu u nung baa, Yaweh na nda ikyin-wu ci pu yi iji.
22Ti ikyinnsu ti kumunn isim yi ngwa tag pu yi ambyi, unde wu sa kunyang ti site aser timambe sang Rebeka ruwen, u pu atsen ifaen fwa wu kujwo. 23Awu rang wu baa, “Afu si umbae aye? Kusog ta atang ti ati u nae atang utitang ne a.”
24Rebeka ri baa, “Ame si umbae Betuwel, umbae Milika ti awu mbae na Nahor.” 25Cwucwo, awu ri baa, “Ati site uwog ti nae ti wuci na asinn fa ti asog ti ani u nae atang utitang ne.”
26Ama unde wu ku riben u fen Yaweh, 27u ri baa, “Ititeb ā si ana Yaweh, Rimam na itsekuru-m Ibrahim ti nee awu ye su itinyang-wu, ti kubenti-wu, te unde ti kununn-m. Yaweh tae m ba sang pu wu kusog unde ti kununn-m.”
Rimam Fxen Itijwam Upyi Ibrahim
28Rebeka ter ru kununn, u ka ri te iya-wu meme iken ti nde. 29Rebeka site inja-wu iki ti rinyi-wu si Laban, ama awu ter ka tu unde wu ribung atang. 30Ti awu nung kunyang ruwen ti atsen kujwo mbiya-wu, ti awu fxen ira ti Rebeka ku tsag risu ira ti unde wu ri te wu, Laban ka tu unde wu ti ikyinnsu-wu, tsi fer ribung atang. 31Awu ri baa, “Afu tsi ku sha-fu imi ike? Ba, afu ti Yaweh nde pu wu afu itinyang! Ame kyae kusog ti nae ti rukug tsi pu m afu ti ikyinnsu-fu.”
32Ikyaen yine, unde wu ru ka sang kununn atang. Laban ru ti ritsen ka saen isu isim ikyinnsu yi, u pu yi ka sang rukug, ama u nda yi irum ti wuci, u txi ambyi ba na unde wu, ti ande imbyi-wu, ama aba jwo afxen-ba. 33Tiri, aba pu wuci ba na ba ti a na ci, ama upyi wu ri baa, “Ame u ci-m be, se ame a ri pu m ira ti sa m ba titawe.” Laban ri baa, “Ri-fu.” 34Ama awu ri baa, “Ame si upyi Ibrahim. 35Yaweh wae fa unde ti kununn-m, ama awu site rifunn timambe. Yaweh nda wu iwen ti indag ti zinariya ti azurfa ti apyi ti arom ti ti anda ti ikyinnsu ti kumunn isim ti ikyinnsu yang-yi. 36Saratu, uwa unde ti kununn-m, mbae umbae ti urom kiye ti awu kyáen tag pu wu, ama unde ti kununn-m pu meme iken na umbae wu kujwo. 37Unde ti kununn-m nda m ben uben baa, ‘Mbe-fu unda uten Kanana, uwog ti ame som atang ne, na umbae-m be, 38amaa, ru yi kusog itse-m, uwog ande-m, ka mbe unda atang ba na umbae-m.’ 39Ama ame rang Itsekuru-m baa, ‘Asiti Umbaewandab wu a cwe-wu ti wu u putsa m be re.’ 40Awu ri baa, ‘Awu Yaweh, ti nee ame ku fen, u tom atom-wu putsa fu. Awu u nde ikyin-fu itinyang, afu u mbe unda ru uwog ande-m, kusog itse-m ba na umbae-m. 41Asiti afu a ru uwog ande-m, afu nwangru pu fu uwae uben ti ben-m. Ko aba a pyir, u nda-ba afu unda wu be, afu nwangru pu fu.’
42“Kiye ti ame ba sang ribung yaka ne, ame ri baa, ‘Yaweh, Rimam na unde ti kununn-m, Ibrahim, ayi a si utob-fu, nde m itinyang uwae ikyin ti ame ba ne. 43Nung ti ame tsi unju ribung ike ne, asiti wandab iki a ru ba ku txi ambyi, ame a jwam wu baa, “Si na m ambyi uwae kututong ambyi-fu ti m ngwa,” 44ama awu a cwe u ri baa, “Mbe ti fu ngwa, ame u nda ikyinnsu ti kumunn isim-fu ti ayi ā ngwa ama,” awu ā si unda ti Yaweh tsab ku na umbae unde ti kununn-m.’
45“Ti ti ame jwam mam-m itijwam yi utob-m khika be, ti ame u nwunn, Rebeka ba ti kututong ambyi ukwae-wu. Awu si yi ribung, u ka txi ambyi, ama ame ri te wu baa, ‘Si na m ambyi ti m ngwa.’ 46Awu ye ra kututong ambyi-wu si ti ritsen, u ri baa, ‘Mbe ti fu ngwa, ame u txi na ikyinnsu-fu ti ayi ā ngwa ama.’ Tiri, ame mbe ngwa, awu txi ka na ikyinnsu-m ngwa ama. 47Ame rang wu baa, ‘Afu si umbae aye?’ Awu ri baa, ‘Ame si umbae Betuwel, umbae Milika ti awu mbae na Nahor.’ Ama ame sa kunya fwa wu ruwen, u sa atsen fwa wu kujwo, 48u ku riben u fen Yaweh, Rimam na unde ti kununn-m Ibrahim, ti tae m ba tu umbae na umbae inja unde ti kununn-m, ti m u pu kaa na Ishaku umbae unde ti kununn-m. 49Tine, asiti afu a tso m ure ti tsi kukunn ti kubenti uwog unde ti kununn-m, ri te m, ayi a si-yi ahan be, ri te m, ti m u nung iken ti ame u nde.” 50Laban ti Betuwel ri baa, “Ayine si ira ti ru uwog Yaweh ba. Ati ri-ti ira iki txi te fu be. 51Nung Rebeka ta re, pu wu ru pangma ti Yaweh ri, ti awu ā ka si uwa umbae unde ti kununn-fu.” 52Ti upyi Ibrahim fxen ira ti aba ri, awu ku riben uwe Yaweh. 53Ama awu pu zinariya ti azurfa ti atupwa na Rebeka, u pu iken ti tinyang ti site aser yang-yi, na iya-wu ti ameinja-wu meme.
54Isim yine, awu ti ande imbyi-wu, ci u ngwa, u nae atang utitang wu. Ti aba nwunn ucwefam-yi, upyi Ibrahim wu ri baa, “Ame u kafe ru ka tu unde ti kununn-m.”
55Ama inja umbaewandab wu, ti iya-wu, ri baa, “Rebeka ā som ra te ti ike ka usir rijwe, titawe ti awu ā te ni ru.” 56Upyi wu ri baa, “Ni ye-su ni ame ike be. Yaweh nde pu wu ame itinyang. Ni ya m ta ti m u kafe ka tu unde ti kununn-m.”
57Ama aba ri baa, “Ati u kunn umbae ti unda wu, ti ti rang wu ama.” 58Aba kunn Rebeka, u rang wu baa, “Afu u te unde wune ru tetso a.” Awu cwe baa, “Een ame u te wu ru tetso.” 59Ama aba tē Rebeka ru, awu mbiya-ba, ti umbae-rimunn-wu, ti upyi Ibrahim ti ande-wu. 60Aba wae ira na Rebeka, u ri te wu baa,
“Mbiya-ti, afu u mbae jwunn,
u si iya na ande ambukwen.
Itso-fu ā sikyi uten ande ti rika-ba!”
61Ama Rebeka, ti aba wandab-wu, nwunn u tso ikyinnsu ti kumunn isim, u putsa unde wu ru. Ayine si fengo ti upyi Ibrahim pu Rebeka ru.
Ishaku Mbe Rebeka
62Kiye wune, Ishaku nwunn pu wu ribung Lahai Royi, ba ku som Negeb#24:62 Negeb Negeb si kutur tiyang iki ti ta kujwo isi Kan-ana.. 63Ama ureb usir iki awu ruye ti wu ka kab ira uwae kutur. Ti awu txaen pu ayib tso, awu sae ikyinnsu ku ba. 64Rebeka ama txaen pu ayib tso u nung Ishaku. Awu si risu ikyinnsu wu, 65u rang upyi wu baa, “Awune si aye ti kyang ku ba tu ti ne?” Upyi wu ri baa, “Awu si unde ti kununn-m.” Ikyaen yine Rebeka sa atupwa bur kyi ijwe-wu.
66Upyi wu tsag te Ishaku meme iken ti awu nde. 67Ishaku pu Rebeka sang ufug na iya-wu Saratu, ama Rebeka kafe uwa-wu. Ishaku ye ure te Rebeka, u tu kujimshwur utob isim iticwu iya-wu.
सध्या निवडलेले:
Kucangtsi 24: kubNT
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© Wycliffe Bible Translators, Inc. and
© The Nigeria Bible Translation Trust 1995, 2017