لُکَ 22

دَبَرٜ نَنغُغٛ عِيسَى

(مَتَّ 26‏:1‏-5؛ مَرْکُسْ 14‏:1‏-2؛ يُحَنَّ 11‏:45‏-53)

1جُولْدٜ تَمْسٜىٰجٜ طٜ عُڢْنَاکَ، وِعٜتٜىٰندٜ ݠَسْکَ ࢡَدَکٜ يٛتَّاغٛ#غُرْتَاکِ 12‏:1‏-27؞؞ 2مَوْࢡٜ لِمَنْعٜنْ عٜ مٛودِࢡّٜ تَوْرٜىٰتَ طٛنْ طَࢡَّ دَبَرٜ حَا ࢡٜمبَرَ عِيسَى، عَمَّا ࢡٜطٛنْ کُلَ يِمْࢡٜ؞

يَحُودَ زَمْبِ عِيسَى

(مَتَّ 26‏:14‏-16؛ مَرْکُسْ 14‏:10‏-11)

3ندٜنْ سَيْطَانُ نَسْتِ ندٜرْ يَحُودَ، بِعٜتٜىٰطٛ عِسْکَرِيٛتْ، غٛوتٛ ندٜرْ سَݠّٛ عٜ طِطٛ؞ 4عٛيٜحِ، عٛنَرِّ بٜى مَوْࢡٜ لِمَنْعٜنْ عٜ مَوْࢡٜ عَيْنٛوࢡٜ حَيْکَلِيرُ، دٛوْ دَبَرٜ نَنغُغٛ عِيسَى؞ 5ࢡٜشٜيِ، ࢡٜنَرِّ حٛکُّغٛ مٛ شٜىٰدٜ؞ 6يَحُودَ جَࢡِ، عٛڢُطِّ طَࢡُّغٛ دَبَرٜ نٛ ࢡٜنَنغِرَ عِيسَى بٜى سِرِّ نغَمْ تَا مٛوࢡْرٜ يِمْࢡٜ حٜࢡْتَ؞

تَاسْکَرَ ࢩَامْدُ جُولْدٜ ݠَسْکَ

(مَتَّ 26‏:17‏-25؛ مَرْکُسْ 14‏:12‏-21؛ يُحَنَّ 13‏:21‏-30)

7ࢩَلَادٜ تَمْسٜىٰجٜ طٜ عُڢْنَاکَ، ندٜ ࢡٜکِرْسَتَ جَوْغٜلْ ݠَسْکَ يٛتَّکٜ؞ 8عِيسَى نٜلِ ݠِيٜرْ عٜ يُحَنَّ، عٛوِعِ ࢡٜ‏: «نجٜحٜ، تَاسْکِتِنَنٜ عٜنْ ࢩَامْدُ ݠَسْکَ حَا ࢩَامٜنْ» 9ࢡٜࢨَمِ‏: «تٛيْ نغِطَّ مِنْ تَاسْکِتِنَ ندُ؟» 10عٛجَابِ ࢡٜ‏: «ندَا، تٛ عٛنْ نَسْتِ بٜرْنِوٛلْ، عٛنْ ݠٛتَّنْ بٜى غٛطّٛ دٛونْدِيطٛ مبُلْکُ ندِيَمْ؞ تٛکّٜ مٛ حَا سَارٜ ندٜ عٛنَسْتَتَ، 11مبِعٜ جَوْمُ سَارٜ مَنْ‏: مٛودِبّٛ وِعِ‏: تٛيْ سُودُ حَا مِࢩَامَ کِيرْتَارِ ݠَسْکَ بٜى ݠُکَرَعٜنْ عَمْ؟ 12عٛحٛلَّنْ عٛنْ سُودُ مَوْندُ، دٛوْرُ، مٛعِّتِنَاندُ، حَا تٛنْ عٛنْ نغَطَتَ تَاسْکَرَ؞» 13ࢡٜنجٜحِ، ࢡٜتَوِ کُوجٜ مَنْ بَنَ عٛوِعِ ࢡٜ، ࢡٜتَاسْکِتِنِ کِيرْتَارِ ݠَسْکَ؞

کِيرْتَارِ شٜنِيندِ

(مَتَّ 26‏:26‏-30؛ مَرْکُسْ 14‏:22‏-26؛ 1 کٛرِنْتُعٜنْ 11‏:23‏-25)

14ندٜ وَکَّتِ مَنْ وَطِ، عِيسَى ڢُطِّ ࢩَامُغٛ بٜى نٜلَاࢡٜ؞ 15عٛوِعِ ࢡٜ‏: «مِيٜلِ مَسِنْ ࢩَامُغٛ ࢩَامْدُ ݠَسْکَ ندُ بٜى مٛوطٛنْ حِدّٜکٛ مِتٛرّٛ؞ 16نغَمْ مِطٛنْ وِعَ عٛنْ، مِمٜىٰتَتَا ࢩَامُغٛ ࢩَامْدُ ݠَسْکَ حَا تٛ مَانَ مَارُ وَنغِنَامَ ندٜرْ لَامُ اَللَّه؞» 17ندٜنْ عٛحٛوعِ جَرْدُغٜلْ، عٛيٜتِّ اَللَّه، عٛوِعِ‏: «کٛوعٜ جَرْدُغٜلْ نغٜلْ، شٜنْدٜ حَکُّندٜ مٛوطٛنْ، 18نغَمْ مِطٛنْ وِعَ عٛنْ، يٜىٰسٛ طٛ مِمٜىٰتَتَا يَرُغٛ عِنَبٛوجَمْ سٜيْ تٛ لَامُ اَللَّه وَرِ؞» 19ࢡَاوٛطٛنْ عٛحٛوعِ تَمْسٜىٰرٜ، عٛيٜتِّ اَللَّه، عٛيٜوِ ندٜ، عٛحٛکِّ ࢡٜ، عٛوِعِ‏: «طٛ طُمْ ࢡَنْدُ عَمْ حٛکَّاندُ نغَمْ مٛوطٛنْ، مبَطٜ طُمْ نغَمْ حَا عٛنْ شِڢْتٛرَمِّ؞» 20بَنَ نٛنْ بٛو، عٛحٛوعِ جَرْدُغٜلْ ࢡَاوٛ ࢩَامْدُ، عٛحٛکِّ ࢡٜ نغٜلْ، عٛوِعِ‏: «جَرْدُغٜلْ نغٜعٜلْ طُمْ عَلْکَوَلْ کٜسَلْ؞ اَللَّه تَبِتِنِرِ نغَلْ بٜى ࢨِيࢨَمْ عَمْ ندُڢَاطَمْ نغَمْ مٛوطٛنْ#يٜرٜمِيَ 31‏:31‏-34؞؞

21«عَمَّا ندَا زَمْبٛتٛوطٛ يَمْ طٛنْ ࢩَامْدَ بٜى عَمْ حَا طٛ#جَبُورَ 41‏:10؞؞ 22ڢَکَتْ، ࢡِي-نٜطّٛ مَايَنْ بَنَ نٛ اَللَّه تَبِتِنِرِ طُمْ، عَمَّا بٛنٜ لَاتَنْتٛ نٜطّٛ زَمْبٛتٛوطٛ مٛ‏! 23ࢡٜݠُطِّ ࢨَمْࢨَمْتِرْغٛ، مٛيْ شَکَ مَࢡّٜ تَمِّيطٛ وَطُغٛ طُمْ»؞

مٛيْ ࢡُرْدِ مَنغُ؟

24نغَابَ عُمِّ حَکُّندٜ نٜلَاࢡٜ دٛوْ مٛيْ شَکَ مَࢡّٜ تَمِّيطٛ لَاتَاغٛ مَوْطٛ، ࢡُرْدُطٛ#مَتَّ 18‏:1؛ مَرْکُسْ 9‏:34؛ لُکَ 9‏:46؞؞ 25عِيسَى وِعِ ࢡٜ‏: «لَامِيࢡٜ عُمَّاتٛوجٜ طٛنْ لَامَنٛ طٜ، مَرْࢡٜ بَاوْطٜ دٛوْ مَࢡّٜ بٛو طٛنْ عٜوْنٛ کٛعٜ مُوطُمْعٜنْ سَاحِيࢡٜ؞ 26عَمَّا نغَمْ مٛوطٛنْ کَمْ، نَا بَنَ نٛنْ؞ مٛ ࢡُرْدِ مَنغُ شَکَ مٛوطٛنْ لَاتٛ مٛ ࢡُرْدِ ڢَمْطُغٛ، مٛ طٛنْ لَامٛ بٛو لَاتٛ بَنَ جَغِّيطٛ#مَتَّ 20‏:25‏-27؛ 23‏:11؛ مَرْکُسْ 9‏:35؞؞ 27مٛيْ ࢡُرْدِ مَنغُ، جٛوطِيطٛ طٛنْ ࢩَامَ نَا مَلَّ جَغَّنٛووٛ مٛ؟ نَا جٛوطِيطٛ طٛنْ ࢩَامَ نَ؟ عَمَّا مِنْ، مِطٛنْ شَکَ مٛوطٛنْ بَنَ جَغّٛووٛ#يُحَنَّ 13‏:12‏-15؞؞

28«عٛنٛنْ نغٛنِ وٛنْدُࢡٜ بٜى عَمْ تُمْ ندٜرْ جَرِّبٛوجٜ عَمْ؞ 29مِحٛکِّ عٛنْ لَامُ بَنَ بَابِرَاوٛ عَمْ حٛکِّرِ يَمْ؞ 30ندٜنْ عٛنْ ࢩَامَنْ، عٛنْ نجَرَنْ حَا ࢩَامْرُدٜ عَمْ ندٜرْ لَامُ عَمْ، عٛنْ نجٛوطٛتٛ دٛوْ لٜىٰسٜ لَامُ نغَمْ حِيتَاغٛ لٜعِ إِسْرَاءِيلَ سَݠّٛ عٜ طِطِ#مَتَّ 19‏:28؞؞»

عِيسَى عٜ ݠِيٜرْ

(مَتَّ 26‏:31‏-35؛ مَرْکُسْ 14‏:27‏-31؛ يُحَنَّ 13‏:36‏-38)

31جَوْمِرَاوٛ وِعِ‏: «سِمٛنْ‏! سِمٛنْ‏! سَيْطَانُ ࢨَمِ دُنغَيٜىٰرٜ نغَمْ دِمْبُغٛ عٛنْ، جَارْتُغٛ عٛنْ بَنَ ࢡٜنجَارْتِرْتَ عَلْکَمَارِ نغَمْ سٜنْدُغٛ ندِ بٜى ࢩَاندٜ؞ 32عَمَّا مِتٛرَکٜ نغَمْ مَاطَ، نغَمْ تَا نُطِّنْکِ مَ تَمْݠَ؞ عَنْ، تٛ عَتُوبِ، سٜمْبِطِنْ دٜىٰرْطِرَاࢡٜ مَ؞» 33ݠِيٜرْ وِعِمٛ‏: «جَوْمِرَاوٛ، مِطٛنْ تَاسْکِ يَحُغٛ بٜى مَ، کٛو حَا ڢُرْسِنَ#22‏:33 ڢُرْسِنَ مَلَّ يَنغَدَ؞، کٛو حَا مَايْدٜ بٛو؞» 34عِيسَى وِعِ‏: «ݠِيٜرْ، مِطٛنْ وِعٜ، حَنْدٜ حِدّٜکٛ عَسْغُمْرِ#22‏:34 عَسْغُمْرِ مَلَّ عَغُغُمْرِ؞ عُعَ، عَوِعَنْ ندٜ تَتِ عَعَنْدَا يَمْ؞»

بٛورٛ شٜىٰدٜ، بٛورٛ نجٛوࢡَارِ، کَاڢَحِ

35عِيسَى وِعِ ࢡٜ ڢَحِنْ‏: «ندٜ مِنٜلْنٛ عٛنْ بِلَا بٛورٛ شٜىٰدٜ، بِلَا بٛورٛ نجٛوࢡَارِ، بِلَا ݠَطٜ، وٛودِ کٛ عٛنْ شٛويِنٛ نَ؟» ࢡٜنجَابِمٛ‏: «وَلَا کٛو طُمٜ مِنْ شٛويِ#مَتَّ 10‏:9‏-10؛ مَرْکُسْ 6‏:8‏-9؛ لُکَ 9‏:3؛ 10‏:4؞؞» 36عٛوِعِ ࢡٜ‏: «عَمَّا جٛنْتَ نَا نٛنْ؞ مَرْطٛ بٛورٛ شٜىٰدٜ حٛوعَ نغٛ، مَرْطٛ بٛورٛ نجٛوࢡَارِ بٛو حٛوعَ نغٛ؞ مٛ مَرَايْ کَاڢَحِ، سٛورَّ لِمْشٜ مُوطُمْ، سٛودَ کَاڢَحِ؞ 37نغَمْ مِطٛنْ وِعَ عٛنْ، سٜيْ بِنْدَاطُمْ دٛوْ عَمْ غٛونغْطَ‏: عٛلِمَامَ شَکَ حَلُّࢡٜ؞ نغَمْ کٛ وَاجِبِ دٛوْ عَمْ طٛنْ لَاتٛ؞» 38ࢡٜمبِعِ‏: «جَوْمِرَاوٛ، ندَا کَاڢَاجٜ طِطِ؞» عٛوِعِ ࢡٜ‏: «طُمْ حٜعِ#عٜسَايَ 53‏:12؞؞»

عِيسَى وَطِ دٛعَارٜ حَا غٜشٜمَنٜ

(مَتَّ 26‏:36‏-46؛ مَرْکُسْ 14‏:32‏-42)

39ندٜنْ عِيسَى وُرْتِ، عٛدِلِّ حَا حٛوسٜىٰرٜ جَيْتُنْجٜ بَنَ نٛ عٛوٛووِ؞ ݠُکَرَعٜنْ مَاکٛ تٛکِّمٛ؞ 40ندٜ عٛيٛتِّ نٛکُّورٜ مَنْ، عٛوِعِ ࢡٜ‏: «تٛرٜ اَللَّه نغَمْ تَا عٛنْ ندٛعّٛ ندٜرْ جَرِّبٜىٰکِ؞» 41ندٜنْ عٛدَايْتِ ࢡٜ بَاکِنْ سَکِّنَنْدٜ حَيْرٜ، عٛتُغِّ کٛݠِّ، عٛوَطِ دٛعَ، 42عٛوِعِ‏: «بَابِرَاوٛ، تٛ عَمُويِ، عِتَّنَمْ جَرْدُغٜلْ تٛرَّ نغٜعٜلْ؞ عَمَّا تَا وَطْ کٛ مُويٛ عَمْ يِطِ، سٜيْ کٛ نغٛ مَ يِطِ؞» 43ندٜنْ مَلَاعِکَاجٛ وَنغَنِمٛ دِغَ عَسَمَ نغَمْ سٜمْبِطِنغٛ مٛ؞ 44ندٜ طُمْ سُنِمٛ مَسِنْ، عٛوَطِ دٛعَ بٜى تِينَارٜ، وُلْوٜىٰندٜ مَاکٛ لَاتِ بَنَ تٛࢡّٜ ࢨِيࢨَمْ دٛوْ لٜسْدِ؞

45ࢡَاوٛ وَطُغٛ دٛعَ، عٛعُمِّ، عٛلٛرْتِ حَا ݠُکَرَعٜنْ، عٛتَوِ ࢡٜطَانِ نغَمْ شٛمْرِ سُنٛ؞ 46عٛوِعِ ࢡٜ‏: «نغَمْ طُمٜ طَانٛتٛوطٛنْ؟ عُمّٜ، تٛرٜ نغَمْ تَا عٛنْ نَسْتَ جَرِّبٜىٰکِ‏!»

نَنغٜىٰکِ عِيسَى

(مَتَّ 26‏:47‏-56؛ مَرْکُسْ 14‏:43‏-50؛ يُحَنَّ 18‏:3‏-11)

47ندٜ عِيسَى طٛنْ وٛلْوَ تَوٛنْ، يِمْࢡٜ نغَرِ؞ بِعٜتٜىٰطٛ يَحُودَ، غٛوتٛ ندٜرْ سَݠّٛ عٜ طِطٛ غٛ طٛنْ عَرْدِ ࢡٜ؞ عٛࢡَدِتِ عِيسَى نغَمْ عٛحٜبّٛ طُمْ؞ 48عِيسَى وِعِمٛ‏: «يَحُودَ، بٜى کٜبَّاکِ زَمْبٛرْتٛوطَ ࢡِي-نٜطّٛ نَ؟» 49ندٜ وٛنْدُࢡٜ بٜى عِيسَى نغِعِ کٛ تَمِّ لَاتَاغٛ، ࢡٜمبِعِ‏: «جَوْمِرَاوٛ، مِنْ شٛݠَّ ࢡٜ بٜى کَاڢَحِ نَ؟» 50غٛوتٛ مَࢡّٜ سٛݠِّ سُکَ حٛورٜىٰجٛ لِمَنْعٜنْ، تَعِمٛ نٛڢْرُ ࢩَامْرُ؞ 51عَمَّا عِيسَى وِعِ‏: «عَشّٜ طُمْ‏!» عٛمٜىٰمِ نٛڢْرُ غٛرْکٛ غٛ، عٛيَمْطِتِنِمٛ؞

52ࢡَاوٛطٛنْ عِيسَى وِعِ مَوْࢡٜ لِمَنْعٜنْ عٜ مَوْࢡٜ عَيْنٛوࢡٜ حَيْکَلِيرُ عٜ ندٛتِّعٜنْ وَرْࢡٜ نَنغُغٛ مٛ‏: «کٛنِ عٛنْ نغَرِ بٜى کَاڢَاجٜ عٜ شَبِّ نغَمْ نَنغُغٛ يَمْ بَنَ مِ ݠَسٛووٛ؟ 53ࢩَلْطٜ ڢُو مِ طٛنّٛ بٜى مٛوطٛنْ ندٜرْ حَيْکَلِيرُ، عٛنْ نَنغَايْ يَمْ؞ عَمَّا جٛنْتَ طُمْ سَاعِيرٜ مٛوطٛنْ عٜ بَاوْطٜ ࢩِࢡْرٜ#لُکَ 19‏:47؛ 21‏:37؞؞»

ݠِيٜرْ وِعِ عٛعَنْدَا عِيسَى

(مَتَّ 26‏:57‏-58‏،69‏-75؛ مَرْکُسْ 14‏:53‏-54‏،66‏-72؛ يُحَنَّ 18‏:12‏-18‏،25‏-27)

54ࢡٜنَنغِ عِيسَى، ࢡٜنجَحْرِمٛ حَا سَارٜ حٛورٜىٰجٛ لِمَنْعٜنْ؞ ݠِيٜرْ طٛنّٛ تٛکِّ ࢡٜ دَايِيطُمْ؞ 55ࢡٜکُࢡِّ يِيتٜ شَکَ دَلْدَلْ سَارٜ، ࢡٜ ڢُو ࢡٜنجٛوطٛدِ؞ ݠِيٜرْ بٛو جٛوطِ شَکَ مَࢡّٜ؞ 56ݠَاࢩٛ دٜبّٛ، کٛرْطٛ ندٜرْ سَارٜ مَنْ يِعِ عٛطٛنْ جٛوطِ کٛمْبِ يِيتٜ، لَارِمٛ، وِعِ‏: «غٛرْکٛ عٛو بٛو طٛنّٛ وٛنْدِ بٜى مَاکٛ؞» 57عَمَّا ݠِيٜرْ يٜدِّ طُمْ، وِعِ‏: «کَيْ دٜبّٛ، مِعَنْدَا مٛ سَمْ؞» 58ࢡَاوٛ سٜطَّ غٛطّٛ ڢٜىٰرٜ بٛو يِعِمٛ، وِعِ‏: «عَنْ بٛو، عَ غٛوتٛ مَࢡّٜ؞» عٛوِعِ‏: «کَيْ‏! غٛرْکٛ، مِوٛنَايْ ندٜرْ مَࢡّٜ؞» 59ࢡَاوٛ سَاعِيرٜ وٛورٜ غٛطّٛ ڢٜىٰرٜ تَبِتِنِ حَالَ مَنْ، وِعِ‏: «ڢَکَتْ غٛرْکٛ عٛو طٛنّٛ وٛنْدِ بٜى مَاکٛ، عٛ غَلِيلِيجٛ مَا‏!» 60ݠِيٜرْ جَابِ‏: «غٛرْکٛ، مِعَنْدَا کٛ نغِطَّ وِعْغٛ؞» دِغَ عٛتِمِّنَايْ وٛلْوُغٛ، عَسْغُمْرِ#22‏:60 عَسْغُمْرِ مَلَّ عَغُغُمْرِ؞ عُعِ؞ 61جَوْمِرَاوٛ يٜىٰسِتِ، لَارِ ݠِيٜرْ؞ ندٜنْ ݠِيٜرْ سِڢْتٛرِ کٛ جَوْمِرَاوٛ وِعْنٛ مٛ‏: «حِدّٜکٛ عَسْغُمْرِ عُعَ حَنْدٜ، عَوِعَنْ ندٜ تَتِ عَعَنْدَا يَمْ؞» 62ݠِيٜرْ وُرْتِ حَا يَاسِ، وٛيِ مَسِنْ؞

جَنْشُکِ عِيسَى

(مَتَّ 26‏:67‏-68؛ مَرْکُسْ 14‏:65)

63يِمْࢡٜ عَيْنٛوࢡٜ عِيسَى نجَنْشِمٛ، ࢡٜݠِيِمٛ؞ 64ࢡٜشُدِّ غِتٜ مَاکٛ، ࢡٜࢨَمِ‏: «حٜࢡْتُ، مٛيْ ڢِيِ مَ؟» 65ࢡٜمبٛلْوَنِمٛ بٛلّٜ کُطٛوجٜ غٛطّٜ طُوطّٜ؞

عِيسَى يٜىٰسٛ مَوْࢡٜ

(مَتَّ 26‏:59‏-66؛ مَرْکُسْ 14‏:55‏-64؛ يُحَنَّ 18‏:19‏-24)

66ندٜ وٜىٰتِ، ندٛتِّعٜنْ يَحُودُعٜنْ عٜ مَوْࢡٜ لِمَنْعٜنْ عٜ مٛودِࢡّٜ تَوْرٜىٰتَ مٛوࢡْتٛتِرِ، ࢡٜنغَدِّ عِيسَى حَا دَوْرِيندٜ مَࢡّٜ؞ 67ࢡٜمبِعِ‏: «تٛ عَنْ وٛنِ اَلْمَسِيحُ، وِعْ مِنْ؞» عِيسَى جَابِ ࢡٜ‏: «تٛ مِوِعِ عٛنْ طُمْ، عٛنْ نُطِّنْتَا؞ 68تٛ مِࢨَمِ عٛنْ بٛو عٛنْ نجَابَتَاکٛ؞ 69يٜىٰسٛ طٛ ࢡِي-نٜطّٛ جٛوطٛتٛ حَا ࢩَامٛ اَللَّه بَاوْطٛ؞» 70ࢡٜ ڢُو ࢡٜمبِعِ‏: «عَنْ کَمْ عَ ࢡِطّٛ اَللَّه نَ؟» عٛجَابِ ࢡٜ‏: «نٛنّٛنْ بَنَ عٛنْ مبِعِ؞» 71ندٜنْ ࢡٜمبِعِ‏: «عٜنْ نغٛودِ حَاجٜ سٜىٰدَمْکُ ڢَحِنْ نَ؟ عٜنٜنْ بٜى کٛعٜ مٜىٰطٜنْ عٜنْ نَنِ طُمْ دِغَ حُنْدُکٛ مَاکٛ‏!»

सध्या निवडलेले:

لُکَ 22: داَ

ठळक

सामायिक करा

कॉपी करा