لُکَ 23

عِيسَى يٜىٰسٛ ݠِلَاتُ

(مَتَّ 27‏:1‏-2‏،11‏-14؛ مَرْکُسْ 15‏:1‏-5؛ يُحَنَّ 18‏:28‏-38)

1ࢡٜعُمّٛدِ ࢡٜ ڢُو، ࢡٜنجَحْرِ عِيسَى حَا ݠِلَاتُ؞ 2ࢡٜݠُطِّ وُلَّاغٛ مٛ، ࢡٜمبِعِ‏: «مِنْ تَوِ غٛرْکٛ عٛو طٛنْ عُمِّنَ تُورْتٛلْ شَکَ عُمَّاتٛورٜ عَمِنْ، عٛطٛنْ حَطَ يِمْࢡٜ يٛࢡُغٛ غَرَامَ حَا کَيْسَرَ، عٛطٛنْ وِعَ بٛو کَنغْکٛ وٛنِ اَلْمَسِيحُ، لَامِيطٛ؞» 3ݠِلَاتُ ࢨَمِمٛ بَنَ نِعِ‏: «عَنْ وٛنِ لَامِيطٛ يَحُودُعٜنْ نَ؟» عِيسَى جَابِمٛ‏: «نٛنّٛنْ بَنَ مبِعْطَ؞» 4ݠِلَاتُ وِعِ مَوْࢡٜ لِمَنْعٜنْ عٜ مٛوࢡْرٜ ڢُو‏: «مِتَوَايْ کٛو طُمٜ حَا غٛرْکٛ عٛو نغَمْ حِيتَاغٛ مٛ؞» 5عَمَّا ࢡٜتِينَنِ وِعُغٛ‏: «عٛطٛنْ تُورْتِنَ عُمَّاتٛورٜ بٜى وَازِنغٛ ندٜرْ لٜسْدِ يَحُودَ دِغَ غَلِيلِ، حَا يٛتِّ حَا طٛ؞»

عِيسَى يٜىٰسٛ حِرُدُسْ

6ندٜ ݠِلَاتُ نَنِ طُمْ، عٛࢨَمِ تٛ غٛرْکٛ عٛو عٛ غَلِيلِيجٛ؞ 7ندٜ عٛنَنِ عِيسَى عِوِ حَا مَرَلْ لَامُ حِرُدُسْ، عٛنٜلْدِمٛ حَا حِرُدُسْ، نغَمْ ࢩَلْطٜ مَنْ حِرُدُسْ طٛنّٛ حَا عُرُسَلِيمَ؞ 8ندٜ حِرُدُسْ يِعِ عِيسَى، عٛسٜيِ سٜيٛ مَنغٛ، نغَمْ دُورِ عٛيِطْنٛ يِعُغٛ مٛ، نغَمْ عٛنَنِ کٛ ࢡٜمبِعْنٛ دٛوْ مَاکٛ، عٛتَمِّ عٛيِعَنّٛ عِيسَى وَطَنْ عَلَامَ کَايٜىٰڢِيحَ ڢٜىٰرٜ؞ 9عٛࢨَمِمٛ ࢨَمْطٜ طُوطّٜ، عَمَّا عِيسَى جَابَاکِمٛ کٛو طُمٜ؞ 10مَوْࢡٜ لِمَنْعٜنْ عٜ مٛودِࢡّٜ تَوْرٜىٰتَ طٛنّٛ تٛنْ؞ ࢡٜنغُلِّمٛ بٜى سٜمْبٜ؞ 11حِرُدُسْ عٜ سٛوجٜعٜنْ مُوطُمْ نجَنْشِمٛ عٜ ࢡٜنجَوِمٛ؞ ࢡٜࢡٛرْنِمٛ مٛجَارٜ طٜلْکَنْدٜ، ࢡٜلٛرْنِمٛ حَا ݠِلَاتُ؞ 12ࢩَنْدٜ مَنْ ندٜنْ حِرُدُسْ عٜ ݠِلَاتُ شٛوبِرِ، نغَمْ عَرَنْ ࢡٜنَرَّتَانٛ؞

ࢡٜکِيتِ عِيسَى کِيتَ مَايْدٜ

(مَتَّ 27‏:15‏-26؛ مَرْکُسْ 15‏:6‏-15؛ يُحَنَّ 18‏:39‏–19‏:16)

13ݠِلَاتُ مٛوࢡْتِ مَوْࢡٜ لِمَنْعٜنْ عٜ مَوْࢡٜ يِمْࢡٜ عٜ يِمْࢡٜ ڢُو؞ 14عٛوِعِ ࢡٜ‏: «عٛنْ نغَدَّنِ يَمْ غٛطّٛ عٛو بٜى وِعْغٛ عٛطٛنْ عُمِّنَ تُورْتٛلْ شَکَ عُمَّاتٛورٜ؞ ندَا، مِࢨَمِمٛ يٜىٰسٛ مٛوطٛنْ، مِتَوَايْ عَيْبٜوٛلْ حَا مَاکٛ ندٜرْ کٛ نغُلِّرْطٛنْ مٛ؞ 15حِرُدُسْ بٛو تَوَايْ، نغَمْ عٛلٛرْنِمٛ حَا مٜىٰطٜنْ؞ غٛرْکٛ عٛو وَطَايْ کٛو طُمٜ کٛ حٜعِ مبَرُغٛ مٛ؞ 16نغَمْ مَاجُمْ مِࢡٛشَّنْ مٛ، مِيٛوڢَنْ مٛ؞» 17نغَمْ کَلَ جُولْدٜ ݠَسْکَ ڢُو، دٛولٜ ݠِلَاتُ يٛوڢَنَ ࢡٜ ڢُرْسِنَاجٛ#23‏:17 ڢُرْسِنَاجٛ مَلَّ کَࢡَّاطٛ مَلَّ دَنغَيْجٛ؞ غٛوتٛ؞ 18ࢡٜݠُطِّ وٛوکُغٛ بٜى سٜمْبٜ، ࢡٜ ڢُو‏: «مبَرْ غٛرْکٛ عٛو‏! يٛوڢَنْ مِنْ بَرَبَّسْ‏!» 19غٛرْکٛ عٛو نَسْتِنَامَ ڢُرْسِنَ نغَمْ ڢِتِنَ ڢٜىٰرٜ ندٜرْ بٜرْنِوٛلْ عٜ نغَمْ دَلِيلَ مبَرْ-حٛورٜ بٛو؞ 20ݠِلَاتُ وٛلْوَنِ ࢡٜ ڢَحِنْ نغَمْ عٛيِطِ يٛوڢُغٛ عِيسَى؞ 21ࢡٜکٛولِ بٜى سَوْتُ‏: «ࢡِلْ مٛ حَا لٜغَّلْ غَاڢَانغَلْ‏! ࢡِلْ مٛ‏!» 22ݠِلَاتُ وِعِ ࢡٜ ندٜ تَتَࢡْرٜ‏: «عَيْبٜ طُمٜ عٛوَطِ؟ مِتَوَايْ عَيْبٜ حَا مَاکٛ کٛ حٜعِ مبَرٜىٰغٛ سَمْ؞ مِࢡٛشَّنْ مٛ، ندٜنْ مِيٛوڢَ مٛ؞» 23عَمَّا ࢡٜتِينَنِ طُمْ، ࢡٜمبَطِ حٛولٛ مَنغٛ، ࢡٜنغِطِ عٛࢡِلٜ حَا لٜغَّلْ غَاڢَانغَلْ؞ حٛولٛ مَࢡّٜ جَالِمٛ؞ 24ݠِلَاتُ يٜرْدِ وَطَنْغٛ ࢡٜ کٛ ࢡٜࢨَمِ؞ 25عٛيٛوڢِ نَسْتِنَاطٛ ڢُرْسِنَ نغَمْ ڢِتِنَ عٜ مبَرْ-حٛورٜ، مٛ ࢡٜࢨَمِ غٛ، عٛحٛکِّ ࢡٜ عِيسَى حَا ࢡٜمبَطَ مٛ طُمْ کٛ ࢡٜنغِطِ ڢُو؞

غَاڢٜىٰکِ عِيسَى

(مَتَّ 27‏:32‏-44؛ مَرْکُسْ 15‏:21‏-32؛ يُحَنَّ 19‏:17‏-27)

26ندٜ ࢡٜطٛنْ نجَحْرَ عِيسَى، ࢡٜݠٛتِّ بٜى سِمٛنْ، غٛطّٛ سِرٜنٜ، طٛنّٛ وَرْتَ لَدّٜ؞ ࢡٜنَنغِمٛ، ࢡٜندٛونْدِ مٛ غَاڢَانغَلْ حَا عٛتٛکّٛ عِيسَى ࢡَاوٛ؞

27مٛوࢡْرٜ طُوطْندٜ تٛکِّمٛ؞ رٜوْࢡٜ ݠِيِ بِࢡّٜ مُوطُمْعٜنْ، مبٛيِمٛ؞ 28عِيسَى يٜىٰسِتِ غَلْ مَࢡّٜ، وِعِ‏: «رٜوْࢡٜ عُرُسَلِيمَ، تَا مبٛيٜ نغَمْ عَمْ؞ عَمَّا مبٛيَنٜ کٛعٜ مٛنْ عٜ ࢡِࢡّٜ مٛوطٛنْ؞ 29نغَمْ ندَا، ࢩَلْطٜ نغَرَنْ طٜ ࢡٜمبِعَنْ‏: سٜيٛ لَاتَنِ رٜوْࢡٜ رِمَرْࢡٜ، ࢡٜنْ مٜىٰطَايْ دَࢩُغٛ عٜ مُسِنِنغٛ؞ 30ندٜنْ يِمْࢡٜ مبِعَنْ کٛوسٜىٰجٜ‏: ندٛعّٜ دٛوْ عَمِنْ‏! ࢡٜمبِعَنْ تٛوْندِيجٜ بٛو‏: شُدّٜ مِنْ#حٛسٜعَ 10‏:8؛ وَحَيُ يُحَنَّ 6‏:16؞‏! 31نغَمْ تٛ ࢡٜنغَطَنِ لٜغَّلْ کٜشَّلْ بَنَ نِي، نٛيْ طُمْ لَاتٛرْتٛ نغَمْ جٛورْنغَلْ بٛو؟»

32ࢡٜنجَحْرِ وٛرْࢡٜ حَلُّࢡٜ طِطٛ، نغَمْ حَا ࢡٜمبَرْدَ ࢡٜ بٜى عِيسَى؞ 33ندٜ ࢡٜنجٛتِّ حَا نٛکُّورٜ وِعٜتٜىٰندٜ غُمْبَلْ-حٛورٜ، ࢡٜࢡِلِمٛ تٛنْ، بٜى حَلُّࢡٜ طِطٛ غٛ ڢُو، غٛوتٛ حَا ࢩَامٛ، غٛوتٛ بٛو حَا نَنٛ؞ 34عِيسَى وِعِ‏: «بَابِرَاوٛ، يَاڢَ ࢡٜ، نغَمْ ࢡٜعَنْدَا کٛ ࢡٜمبَطَتَ؞» ࢡٜشٜنْدِ لِمْشٜ مَاکٛ حَکُّندٜ مَࢡّٜ بٜى ڢِيُغٛ شَاشَ#جَبُورَ 22‏:19؞؞ 35عُمَّاتٛورٜ طٛنّٛ ندَرِ تٛنْ، لَارَ؞ مَوْࢡٜ يَحُودُعٜنْ نجَنْشِمٛ، ࢡٜمبِعِ‏: «عٛحِسْنِ وٛطْࢡٜ، عٛحِسْنَ حٛورٜ مَاکٛ بٛو کَدِ، تٛ عٛ اَلْمَسِيحُ، مٛ اَللَّه، شُࢡَاطٛ‏!» 36سٛوجٜعٜنْ بٛو نجَنْشِمٛ، ࢡٜࢡَدِتِمٛ، ࢡٜندٛکِّمٛ لَمُّطَمْ، 37ࢡٜمبِعِ‏: «تٛ عَ لَامِيطٛ يَحُودُعٜنْ کَمْ، حِسْنُ حٛورٜ مَ کَدِ‏!» 38ࢡٜمبِنْدِ حَا دٛوْ لٜغَّلْ غَاڢَانغَلْ نغَلْ ࢡٜࢡِلِمٛ‏: «عٛو وٛنِ لَامِيطٛ يَحُودُعٜنْ؞»

39غٛوتٛ ندٜرْ حَلُّࢡٜ ࢡِلْدَاࢡٜ بٜى مَاکٛ غٛ، حُطِمٛ، وِعِ‏: «نَا عَنْ وٛنِ اَلْمَسِيحُ نَ؟ حِسْنُ حٛورٜ مَ عَنْ عٜ مِنِنْ بٛو‏!» 40عَمَّا طِطَࢡٛ ڢٜلِمٛ، وِعِ‏: «عَحُلَتَا اَللَّه نَ؟ عَنْ، عَ کِيتَاطٛ بٛو؞ 41نغَمْ مٜىٰطٜنْ کَمْ کِيتَ کَ ڢٛتِ دٜيْدٜيْ کُوطٜ مٜىٰطٜنْ، عَمَّا کَنغْکٛ وَلَا حَلّٜىٰندٜ ندٜ عٛوَطِ؞» 42ندٜنْ عٛوِعِ‏: «عِيسَى، سِڢْتٛرَمْ سَاعِ نغَرَتَ ندٜرْ لَامُ مَاطَ؞» 43عِيسَى جَابِمٛ‏: «غٛونغَ مبِعَنْمَامِ، حَنْدٜ عَوٛنْدَنْ بٜى عَمْ ندٜرْ عَلْجَنَّ؞»

مَايْدٜ عِيسَى

(مَتَّ 27‏:45‏-56؛ مَرْکُسْ 15‏:33‏-41؛ يُحَنَّ 19‏:28‏-30)

44‏-45يَاکٜ مَنْ طُمْ شَکَ ࢩَلَوْمَ، ندٜنْ ࢩِࢡْرٜ وَطِ دٛوْ لٜسْدِ ڢُو حَا يٛتِّ سَاعَ تَتِ؞ نَانغٜ مٛجِ؞ وِيرْندَلّٛ ندٜرْ حَيْکَلِيرُ سٜىٰکِ شَکَ شَکْ#غُرْتَاکِ 26‏:31‏-33؞؞ 46عِيسَى تٛوْنِ سَوْتُ بٜى سٜمْبٜ، وِعِ‏: «يَا بَابِرَاوٛ، مِطٛنْ حَلْڢِنَ رُوحُ عَمْ ندٜرْ جُنغٛ مَاطَ؞» ࢡَاوٛ ندٜ عٛوٛلْوِ بٛلّٜ طٜعٜ، عٛمَايِ#جَبُورَ 31‏:6؞؞ 47ندٜ عَرْدِيطٛ دٛوْ سٛوجٜعٜنْ رٛمَ تٜىٰمٜرّٜ يِعِ کٛ لَاتِ، عٛتٜدِّنِ اَللَّه، عٛوِعِ‏: «ڢَکَتْ، غٛرْکٛ عٛو عٛ عَدِلِيجٛ؞» 48يِمْࢡٜ وَرْنٛوࢡٜ لَارُغٛ ڢُو، ندٜ ࢡٜنغِعِ کٛ لَاتِ، ࢡٜکُوشِ، ࢡٜطٛنْ ݠِيَ بِࢡّٜ مَࢡّٜ#23‏:48 ڢِيُغٛ وِࢡّٜرٜ، طُمْ عَلَامَ مٜتَّمْࢡٜرَمْ؞؞ 49سٛوبِرَاࢡٜ مَاکٛ ڢُو عٜ رٜوْࢡٜ تٛکِّنٛوࢡٜ مٛ دِغَ غَلِيلِ، ندَرِ دَايِيطُمْ، طٛنْ ندَارَ کُوجٜ طٜعٜ#لُکَ 8‏:2‏-3؞؞

عُوٜىٰکِ عِيسَى

(مَتَّ 27‏:57‏-61؛ مَرْکُسْ 15‏:42‏-47؛ يُحَنَّ 19‏:38‏-42)

50‏-51وٛودِ غٛطّٛ بِعٜتٜىٰطٛ يُوسُڢُ، مٛ بٜرْنِوٛلْ لٜسْدِ يَحُودَ، بِعٜتٜىٰنغٛلْ عَرِمَتٜ؞ عٛ بٛوطّٛ، عَدِلِيجٛ؞ عٛطٛنّٛ رٜىٰنَ غَرٛيْکِ لَامُ اَللَّه؞ عٛطٛنْ شَکَ دَوْرٛوࢡٜ، عَمَّا عٛحَوْتَنَايْ وٛطْࢡٜ ندٜرْ دَبَرٜ عٜ کُوطٜ مَࢡّٜ؞ 52عٛيٜحِ حَا ݠِلَاتُ، عٛࢨَمِ طُمْ ࢡَنْدُ عِيسَى؞ 53عٛجِݠِّنِ ندُ دِغَ غَاڢَانغَلْ، عٛحَسْنِ ندُ بٜى کَسَ کٜسَ، ندٜنْ عٛوَلِّنِ ندُ ندٜرْ يٜنَاندٜ وَسَاندٜ ندٜرْ تَݠَارٜ، ندٜ غٛطّٛ مٜىٰطَايْ وَلِّنٜىٰغٛ ندٜرْ مُوطُمْ؞ 54طُمْ ࢩَنْدٜ تَاسْکَرَ سِوْتٛرْدٜ؞ ندٜ ࢡَدِنٛ نَسْتُغٛ؞

55رٜوْࢡٜ وَرْدُنٛوࢡٜ بٜى عِيسَى دِغَ غَلِيلِ، نجَحْدِ بٜى يُوسُڢُ، ࢡٜندَارِ يٜنَاندٜ عٜ بَنَ نٛيْ ࢡَنْدُ عِيسَى وَلِّنِرَ؞ 56ࢡٜلٛرِ، ࢡٜتَاسْکِتِنِ لٜطّٜ عُورْطٜ عٜ عُورْدِ؞

ندٜنْ ࢡٜشِوْتِ ࢩَنْدٜ سِوْتٛرْدٜ ڢٛدّٜ تَوْرٜىٰتَ#غُرْتَاکِ 20‏:10؛ تٛوکْتَاکِ تَوْرٜىٰتَ 5‏:14؞؞

सध्या निवडलेले:

لُکَ 23: داَ

ठळक

सामायिक करा

कॉपी करा