यिर्मया 18:1-6

परमेश्वरापासून जे वचन यिर्मयाला प्राप्त झाले ते हे : “ऊठ, कुंभाराच्या घरी जा, तेथे मी तुला आपली वचने ऐकवीन.” मी कुंभाराच्या घरी गेलो तेव्हा तो चाकावर काम करीत होता. कुंभार मातीचे पात्र घडत होता; ते त्याच्या हातात असतानाच बिघडून गेले, मग त्याला पाहिजे तसे त्याने दुसरे पात्र घडले. तेव्हा परमेश्वराचे वचन मला प्राप्त झाले : “हे इस्राएलाच्या घराण्या, ह्या कुंभाराप्रमाणे मला तुमचे पाहिजे ते करता येत नाही काय, असे परमेश्वर म्हणतो. हे इस्राएलाच्या घराण्या, पाहा, कुंभाराच्या हातात माती असते तसे तुम्ही माझ्या हातात आहात.