Yoane 8
8
Omukali musingiri
1Nikwa Yesu mwaya oko kitwa kya Mizeituni. 2Nomo ngyakyangyakya mwatsinduka kandi omo hekalu, nabandu bosi mobasa ahali; Neryo mwikala, mwakangiriryabo. 3Na basaki na baFarisayo mobamuletera mukali oyo weyibawa omwiteta; neryo mobamuhira omukati-kati, 4mobamubwira, bati, Mukangirirya, omukali oyu ariatsimbawa akateta. 5Omu bihano Musa atutegeka ati itwita oyu ringoyu omo mabwe: nawe ukabugaki busana naye kwehi? 6Babuga eki, erimu lengako, imobatoka erimuhandikirira. Nikwa Yesu munama mwasaka nomunwe wuwe oko kitaka. 7Nikwa omugulu bamamuhatikana erimubulya, munamuka, mwabuga nabo, ati, Oyu te nebibi omukati-kati kenyu, atsuke erimugusa kwe ribwe. 8Nakandi munama, mwasaka momunwe oko kitaka. 9Nabo mugulu bowakyo, mobahuluka muguma muguma, eritsuka oko mukulu erihika oko wenyuma: na Yesu mwasigala iyowene, nomukali, aho abya katikati omo. 10Neryo Yesu munamuka, mwabuga naye, ati, Mukali, barihi kwehi? sihalwe mundu nomuguma wamakutswera lubi kwehi? 11Naye mwabuga, Sihalwe mundu, Mukama. Na Yesu mwabuga, ati, Nage sindikutswera lubi: genda; susyeswakola ekibi kandi.
Yesu ekyakakala kye kihugo
12Nakandi Yesu mwabuga nabo, ati, Ingye indi ekyakakala kye kihugo: oyu kangwama siendisyagendera omo mwirimya, nikwa asyabya nekyakakala kyengebe. 13AbaFarisayo moba mubwira, bati, Ukatulago busana nawe; eritulago ryawe si kwenene. 14Yesu mwasubirya mwabwirabo, ati, Nomo nanga tulago busana nage, eritulago ryage ni kwenene; kusangwa nyasi eyo nalwa, neyo ngaya; nikwa inywe simwasi eyo nalwa, kutse eyo ngaya. 15Inywe mukatswera omusindo womubiri; ingye sinditswera mundu nomuguma. 16Nibya namatswera, eritswera ryage ni kwenene; kusangwa sindi ingyowene, indi na Tata oyo wanyituma. 17Nibya omo bihano byenyu bisa kire, biti, eritulago ryabandu babiri ni kwenene. 18Ingye indi oyu katulago busana nage, na Tata oyo wanyituma akatulago busana nage. 19Neryo mobamubulya, bati Tata wawe ari hahi kwehi? Yesu mwasubirya, Simunyasi, na Tata simumwasi: kumbe mulwe munyasi, nga mwasi na Tata nibya. 20Ebinywa ebi abugirabyo omu ngonde yeribikamo esyofaranka iniaka kangiriraya omo hekalu: mohatabya mundu ukamutsimba; kusangwa endambi yiwe isiriyahika. 21Neryo kandi mwabuga nabo, ati, Ngagenda, mwasyansondya, mwasyahola omobibi byenyu: eyo ngaya, simwangatoka eriasayo. 22Neryo abaYuda mobabuga, bati, Akandisyayita kwehi? kwakabuga, ati, Eyo ngaya, simwangatoka eriasayo. 23Neryo mwabuga nabo, ati, Inywe muri beyikwa; ingye indi wendata: inywe muri be kihugo eki; ingye sindi we kihugo eki. 24Kikaleka inabuga nenyu, nyiti, Mwasyahola omo bibi byenyu: kusangwa mwamatindiki rirya ko nyiri ininaye, mwasyahola omo bibi byenyu. 25Neryo mobabuga naye, bati, Uwendi kwehi? Yesu mwabwirabo, ati, Ngoko nababwira erimbere. 26Nyiri na myatsi mingi eriba bwira neritswera busana nenyu: nikwa oyo wanyituma ni kwenene; nemyatsi eyo ngowa kwiye, yo ngabuga oko kihugo. 27Nabo mobataminya ngakabuga busana nIse. 28Neryo Yesu mwabuga, ati, Omugulu mwasyasumba Mugala womundu, imwasyaminya kwari ini nangye, kondekola kindu ingyowene, nikwa ngoko Tata akanyikangiriraya, ko ngabuga emyatsi eyi. 29Noyo wanyituma ane haguma nage; siaritanziga ingyowene; kusangwa ngakola ebiro byosi emyatsi eyikamutsemesaya. 30Abere anemobuga emyatsi eyi, abangi mobamwikirirya.
Eriboholwa kwenene
31Neryo Yesu mwabuga nabaYuda abamwikiriraya, ati, Mwamabya omo kinywa kyage, imuri biga bage kundu; 32mwasyaminya omwatsi wakwenene, nomwatsi wakwenene asyababohola. 33Mobamusubirya, bati, Turi lubuto lwa Abrahamu, sitwetabya mo muliki womundu nomuguma na kera: niki kyukabuga, uti, Mwasyaboholwa kwehi? 34Yesu mwasubiryabo, ati, Kundu, kundu, ngabuga nenyu, Omundundi oyu kakola ebibi ni mukobe webibi. 35Nomukobesiarikala omo nyumba ebiro byosi: omugala yukikala ebiro byosi. 36Neryo omugala amababohola, imwamaboholwa kundu. 37Nyasi ko muri olubuto lwa Abrahamu; nikwamukasonda-sonda erinyita, kusangwa eKinywa kyage sikiwite mwanya omwisi wenyu. 38Ngabuga emyatsi eyo nabirilolako uku Tata: nenyu mukakola emyatsi eyo mowa uku tata wenyu. 39Mobasubirya mobabuga naye, bati, Tata wetu ni Abrahamu. Yesu mwabwirabo ati, Mwamabya bana baAbrahamu, imwa kola emibiri ya Abrahamu. 40Nikwa lino mukasonda-sonda erinyita, ingye mundu nabiribabwira omwatsi wa kwenene, ebyo nowa oko Mungu: Abrahamu mwatakola atya. 41Muka kola emibiri yatata wenyu. Mobabuga naye, bati, Sitwabutawa omwiteta; tuwite Tata muguma yo Mungu. 42Yesu mwabuga nabo, ati, Kumbe Mungu abya Tata wenyu, nga munyanzire: kusangwa nahuluka ingalwa oko Mungu; mondasa busana nage, nikwa iye anyituma. 43Busana naki simweminya mubuge wage kwehi? Kusangwa simwetoka eriowa eKinywa kyage. 44Inywe muri batata wenyu Satani, nesyongumbu syatata wenyu syo mwanzire erikola. Iye abya mwiti eritsuka na kera, isialihangana omwisi womwatsi wakwenene, kusangwa sihali mwatsi wa kwenene omwisi wuwe. Omugulu akabuga mabihi, iniakabuga biwe iyowene: kusangwa ni mubihi, nise wa mabihi. 45Nikwa kusangwa ngababwira ebyekwenene, simwenyikiriraya. 46Nindi kwinywe oyu kanzinga busana nebibi kwehi? Namabuga ebyekwenene, niki kikaleka muta nyikirirya kwehi? 47OwoMungu akowa ebinywa byoMungu: busana nomwatsi oyu simuriowa, kusangwa simuri boMungu. 48AbaYuda mobasubirya mobamubwira, bati, Sitwetabuga ndeke kuri munyaSamariya, kuri ko mbinga kwehi? 49Yesu mwasubirya, ati, Sindi ko mbinga; nikwa ngasikaya Tata wage, nenyu simurinyisikaya. 50Nikwa sindisonda-sonda oluke ngerwa lwage: hari muguma oyu kasonda-sondalo naye asyabya mutsweri. 51Kundu, kundu, ngabuga nenyu, Omundu ama bika eKinywa kyage, siendisyalola oko luholo na kera. 52AbaYuda mobamubwira, bati, Lino tunasi kuri kwembinga. Abrahamu mwahola, nabanabi; nawe, uti, Omundu amabika eKinywa kyage, isiendisyagerya oko luholo na kera. 53Uri mukulu uku tata wetu Abrahamu oyo wahola kwehi? nabanabi mobahola: ukayiyira mondi kwehi? 54Yesu mwasubirya, ati, Namayiha erikengwa, olukengerwa lwage ni buyira: ni Tata oyu kamba erikengwa; oyo mukahula, muti ni Mungu wenyu; 55nenyu simuritamuminya: nikwa ingye nyimwasi; namabuga, nyiti, Smyimwasi, inabya omubihi, nga nywe: nikwa nyimwasi, ngabika nekinywa kiwe. 56Tata wenyu Abrahamu mwatsema erilola oko kiro kyage; mwalangirakyo, mwatsema. 57Neryo abaYuda, mobabuga naye, bati, Ka suriwabuga emituta ama kumi atano, nawe wabirilola uku Abrahamu kwehi? 58Yesu mwabuga nabo, ati, Kundu, kundu, ngabuga nenyu, Kera Abrahamu ateabutwa, inyine. 59Neryo mobatola mabwe erimugusagoko: nikwa Yesu mwayibisa, mwalwa omo hekalu.
सध्या निवडलेले:
Yoane 8: NTN62
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Le Nouveau Testament et les Psaumes en Ndandi © British and Foreign Bible Society, 1962.
