Yoane 7
7
Yesu na bagala babo
1Nenyuma wemyatsi eyi Yesu mwalendera eGalilaya: ku sangwa siarisonda erilendera eYudea, kusangwa abaYuda basonda erimwita. 2Nekiro kinene kyabaYuda, ekiro kyama hema, kyabya hakuhi. 3Neryo abagala babo mobamubwira, bati, Ulwe eno uye, eYudea, abiga bawe ibatoka erilangira emibiri ukakola. 4Kusangwa sihali mundu ukakola ekindu bubi-sobiso, akasonda eriminyikala. Wamakola emyatsi eyi, uyiminyikalaye oko kihugo. 5Kusangwa abagala babo nibya mobatamwikirirya. 6Yesu mwabwirabo, ati, Endambi yage siriyahika; nikwa endambi yenyu ineho ebiro biosi. 7E kihugo sikyangatoka eribakwa obusu; nikwa ingye kikangwa obusu, kusangwa ngatulago, kwe mibiri yakyo ni mibi. 8Muhetukire oko kiro kikulu: sindinahetukira oko kiro kikulu; kusangwa endambi yage siriyaberwa. 9Amabibwirabo emyatsi eyi, mwasigala eGalilaya.
10Nikwa omugulu abagala babo bamabihetukira oko kiro kikulu ekyo, naye mwahetuka, butsira neriminyikala, nikwa bubi-sobiso. 11Neryo abaYuda mobamusonda-sonda oko kiro kikulu, bati, Arihi kwehi? 12Mohabya erisiningula inene omukati-kati kendeko busana naye; abandi bati. Ni mubuya; nabandi bati, Eyihi, akatalaya endeko. 13Nikwa sihabya mundu oyo kamwahula neriminyikala busana neriubaha abaYuda.
Erikangirirya ryaYesu omo Hekalu
14Nikwa omukati-kati kekiro kikulu ekyo Yesu mwahetukira omo hekalu, mwakangirirya. 15AbaYuda nabo mobasweka, bati, Omundu oyu akaminya erisoma ati kwehi? isiaritiga na kera kwehi? 16Neryo Yesu mwasubiryabo, ati, Erikangirirya ryage si ryage, ni ryoyo wanyituma. 17Omundu amanza erikola erisonda riwe, asyaminya erikangirirya eryo, ngaryalwa oko Mungu, kutse nga ngabuga ingyowene. 18Oyu kayahula iyowene akasonda-sonda olukengerwa luwe: nikwa oyukasonda-sonda lukengerwa loyo wamutuma, iye ni wakwenene, nebitatunganene sibiri omwisi wuwe. 19Musa mwatabaha ebihano kwehi? nikwa sihari nomuguma kwinywe oyu kakola ebihano. Busana naki mukasonda-sonda erinyita kwehi? 20Endeko moyasubirya, iti, Uri ko mbinga: nindi akasonda erikwita kwehi? 21Yesu mwasubirya mwabwirabo, ati, Monakola mubiri muguma, nenyu momwaswekerago. 22Musa mwabaha eribana (isirya Musa, nikwa ni ryabotata wenyu); noko sabatu mukabanaya omundu. 23Omundu amabanibwa oko sabatu, ebihano byaMusa sibiponawe; mukanyihitanako, kusangwa nabirilamya mundu ndeke oko sabatu kwehi? 24Simutswere busana nerilangirwa, mutswere olubanza lutu nganene.
Abandi bakasonda eritsimba Yesu
25Neryo abandi bakubo beYerusalema mobabuga, Oyu siyoyo bakasonda eriita kwehi? 26Lebaya akabuga neriyiminyikalya, isibebuga naye. Ko barongani banasi kundu oyu kwari Kristo kwehi? 27Nikwa oyu tunasi ahalwa: nikwa omugulu Kristo asyasa sihari mundu wasyaminya ahalwa. 28Neryo Yesu mwatulago omo hekalu akakangirirya ati, Munyasi, mwasi naho nalwa; isinditasa busana nage, nikwa ayu wanyituma ni kwenene, inywe simumwasi. 29Ingye nyi mwasi; kusangwa nalwa kwiye, naye yo wanyituma. 30Neryo mobasonda-sonda erimutsimba: kandi mohatabya mundu wamuhira kwebyala kusangwa endambi yiwe siriyahika. 31Ni kwa bangi ababyaho omo ndeko mobamwikirirya, bati, Kristo asyabya asa, asyakola ebitikotiko bingi kwilaba ebyo mundu oyu akakola kwehi? 32AbaFarisayo mobowa endeko ika siningula emyatsi eyi busana naye; nabahereri bakulu na baFarisayo mobatuma abalima erimutsimba. 33Neryo Yesu mwabuga, ati, Hakisiya akatambi kake na ndi haguma nenyu, neryo ngaya okwoyo wanyituma. 34Mwasyanyisonda-sonda simwendisyanyibana: naho nyiri, simwangatoka eriasaho. 35Neryo abaYuda mobakania haguma omukati-kati kabo, bati, Omundu oyo asyaya hahi kwehi? ati sitwedi syamubana asyaya oko bapanzawa omukati-kati kabaGiriki, nerikangirirya abaGiriki kwehi? 36eKinywa eki ni kyahi ekyo akabuga, ati, Mwasyanyisonda-sonda, simwendisyanyibana; neyo nyiri, si mwangatoka eriasa kwehi?
Amagetsi wengebe
37Neryo oko kiro kyenyuma, ekilengire ebindi byekiro kikulu ekyo, Yesu mwahangana mwabirikira, ati. Omundu amakwa enyota, ase kwingye apulaye. 38Oyu kanyikirirayako, ngoko amasako abiribuga, erilwa omwisi wuwe esyonyusi syamagetsi wengebe syasyasenda. 39Nikwa ahula eki busana neKirimu, ekyo abakamwikiriraya bakandisyahabwa; kusangwa eKirimu isi kyekyahabwa; kusangwa Yesu abya isiariabana olukengerwa. 40Neryo abendeko, omugulu bowa ebinywa ebi, mobabuga, bati, Kwenene oyu ni muminyereri. 41Abandi bati, Oyu ni Kristo. Nikwa abandi bati, Kwe niki, Kristo akalwa eGalilaya kwehi? 42Amasako mwatabuga ko Kristo akalwa oko lubuto lwaDawidi, noko Betelehemu, omuyi Dawidi abyamo kwehi? 43Neryo erigabana moryabya omukati-kati kendeko busana naye. 44Nabandi ibakasonda erimutsimba; nikwa mohatabya mundu oyu kamuhira kwebyala.
45Neryo abalima mobahika oko bakuhane bakulu noko baFarisayo; mobabulyabo, bati, Busana naki simwetamuleta kwehi? 46Abalima mobasubiryabo, bati, Na kera sihalimundu ukabuga ngaye. 47Neryo abaFarisayo mobasubiryabo, bati, Nenyu nibya mwamatalibwa kwehi? 48Oko barongani nabaFarisayo hali oyo wabirimwikirirya kwehi? 49Nikwa endeko eyi eyitasi ebihano ni batakirwa. 50Nikodemo mwa buga nabo (oyu wasa kwiye erimbere, abya muguma wakubo) ati, 51Ebihano byetu bikatswera omundu isibetatsuka erimowa neriminya ekyo akakola kwehi? 52Mobamusubirya bati, Nawe uri wa Galilaya kwehi? Sonda-sonda ulebaye sihali omuminye reri wangalwa eGalilaya. 53Noburi mundu mwasuba ewuwe:
सध्या निवडलेले:
Yoane 7: NTN62
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Le Nouveau Testament et les Psaumes en Ndandi © British and Foreign Bible Society, 1962.
