Salmos 6
6
1DSAˉJØ̱Ø̱Hˈ kya̱a̱nꜙ, taꜙ jʉʉhˋ kinꜙ maˊ lle̱e̱hꜘ
hiꜙ taꜙ jmeehˋ jnäꜘ maˊ yaˉjë̱ë̱ˈ hohꜘ.
2DSAˉJØ̱Ø̱Hˈ kya̱a̱nꜙ,
waˊ läˉñihꜘ hohꜘ jnäꜘ kihꜗ heˉ dsaahnˊ.
Miˉhlä̱ä̱ˈ jnäꜘ DSAˉJØ̱Ø̱Hˈ kya̱a̱nꜙ,
jëëhꜘ moꜙsoꜙ chaˉ beꜘ kinꜙ.
3Hneˉ DSAˉJØ̱Ø̱Hˈ kya̱a̱nꜙ,
lɨhꜘ baˊ jñuuhˊ heˉ cha̱a̱nˉ chaˉmiihˉ hʉʉˊdsëˉ.
4Ñaˉ DSAˉJØ̱Ø̱Hˈ kya̱a̱nꜙ mahꜗ lä̱ä̱ˋ jnäꜘ.
Hiꜙ lä̱ä̱ˋ jnäꜘ läꜙlluꜗ heˉ läˉñihꜘ hohꜘ chaˉmiihˉ.
5Niꜙ ja̱a̱ˉ hi̱ˉ maˉnaˉju̱u̱ˊ moꜙsoꜙ läꜙdsooh˜ dsëyꜗ hneˉ.
Niꜙ ja̱a̱ˉ moꜙsoꜙ jmeeꜗ jʉʉhˉ kyahꜗ jeeˊ naˉho̱o̱ˉ.
6Läꜙji̱i̱hˈ ngooꜗ gaꜙdsa̱a̱nꜗ heˉ kɨˊhoohnˊ.
Hiꜙ läꜙjëꜙ hwëˈ baˊ hoohnˊ jeeˊ kya̱a̱nꜗ,
läꜙji̱i̱hˈ maˉläˉgyʉhꜘ jeeˊ kya̱a̱nꜗ kya̱a̱hˊ jmɨɨˉ heˉ tu̱u̱ˉ mɨˈnënꜙ.
7Läꜙkye̱ˉ mɨˈnënꜙ ngooꜗ gaꜙløøˉ kihꜗ heˉ jëën˜ wɨɨꜘ.
Ngooꜗ gaꜙgyu̱u̱hnˉ kwa̱a̱t˜ kihꜗ dsaˉ hi̱ˉ naˉhøøhˊ kinꜙ.
8Jñuuhˊ hnähꜘ kinꜙ, dsaˉ hi̱ˉ hñaaˉ dsëꜗ.
Jëëhꜘ maˉnuuˉ baˊ DSAˉJØ̱Ø̱Hˈ kya̱a̱nꜙ kihꜗ läꜙjëꜙ heˉ kɨˊhoohnˊ.
9Maˉnuuˉ baˊ DSAˉJØ̱Ø̱Hˈ kya̱a̱nꜙ läꜙjëꜙ heˉ chu̱u̱nꜘ kya̱a̱yhˊ
hiꜙ maˉhe̱e̱hˉ bihꜗ heˉ ngɨɨnˊ kiyhˈ.
10Läꜙjë̱ë̱ꜙ hi̱ˉ naˉhøøhˊ kinꜙ jä̱ꜗ oˉhihꜙ.
Niꜙ juuˈ gaˊ saꜙ hɨɨꜗ waˊraˉ gaꜙjä̱yꜘ kya̱a̱hˊ oˉhihꜙ.
Одоогоор Сонгогдсон:
Salmos 6: chz
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2003, Wycliffe Bible Translators, Inc. All rights reserved.