Salmos 7
7
1DSAˉJØ̱Ø̱Hˈ kya̱a̱nꜙ chaˉ baˊ oˉjø̱hꜙ dsëˉ kinꜙ kya̱a̱hˊ hneˉ.
Lä̱ä̱ˋ jnäꜘ kihꜗ hi̱ˉ hnøøꜗ sa̱a̱hꜗ jnäꜘ.
2Haˉ gaˉ cheˉ gaꜙjwä̱ä̱yꜗ hñiiyꜘ nëˊ kinꜙ läꜙko̱hꜘ león,
mahꜗ jmääyꜗ jnäꜘ jwɨˊdsuhꜗ
kihꜗ heˉ saꜙ cha̱a̱ˉ hi̱ˉ lä̱ä̱ꜗ jnäꜘ.
3DSAˉJØ̱Ø̱Hˈ kya̱a̱nꜙ, cherˊmahꜗ chaˉ dsooˊ kinꜙ,
cherˊmahꜗ chaˉ heˉ hlɨɨhˈ heˉ maˉjmeenꜗ,
4o cherˊmahꜗ saꜙ gaꜙmiꜙhmaahnˋ kya̱a̱hˊ juuˈ lluꜗ
kihꜗ omeꜚ kya̱a̱nꜙ,
o cherˊmahꜗ gaꜙjmeenꜗ hñaaˉ dsënꜙ
kihꜗ hi̱ˉ naˉhøøhˊ kinꜙ
hiꜙ niꜙ saꜙ chaˉ heˉ kihꜗ maˊ jmeenˋ läꜙja̱ˉ,
5waˊ cha̱a̱ꜗ bihꜗ kaahˋ kinꜙ
mahꜗ heˊsoyhꜗ kinꜙ hiꜙ jngëëyhꜗ jnäꜘ.
6DSAˉJØ̱Ø̱Hˈ kya̱a̱nꜙ, waˊ yaˉjë̱ë̱ˈ hohꜘ
mahꜗ te̱e̱ꜘ kya̱a̱hˊ hi̱ˉ hneeˉ chaˉmiihˉ kya̱a̱hˊ jnäꜘ.
Nooˉ nëˊ kinꜙ mahꜗ llaˊ taˊ läꜙko̱o̱ˉ laꜗ hihꜙ kyahꜗ.
7Jø̱ø̱hˋ kooꜘ kyahꜗ läꜙjë̱ë̱ꜙ dsaˉ hi̱ˉ tä̱ä̱hˊ läꜙka̱a̱ˉ jmɨˉgyʉʉꜙ
mahꜗ hneˉ baˊ llahꜗ taˊ kiyhˈ.
8Hneˉ DSAˉJØ̱Ø̱Hˈ kya̱a̱nꜙ hi̱ˉ kye̱ˉ kwa̱a̱t˜ kihꜗ dsaꜙ,
läꜙja̱ˉ kye̱ˉ kwa̱a̱t˜ kinꜙ
läꜙko̱hꜘ teꜗ taˊ lluˈ heˉ maˉjmeenꜗ.
Miˊjnääˈ chaˊnëˊ jeeˊ läꜙjë̱ë̱ꜙ
heˉ saꜙ chaˉ heˉ maˉhlä̱ä̱hnˉ kya̱a̱hˊ hneˉ.
9Waˊ lla̱a̱ˉ beꜘ kihꜗ läꜙjë̱ë̱ꜙ hi̱ˉ hñaaˉ dsëꜗ.
Kwaˊ beꜘ kihꜗ läꜙjë̱ë̱ꜙ hi̱ˉ llu̱u̱ꜗ, jëëhꜘ llu̱u̱ꜗ hneˉ Dio hi̱ˉ kyʉʉh˜ haˉ läꜙ laꜗ tuhˉdsëꜗ dsaˉ.
10Dio hi̱ˉ chehꜗ nëˊ kinꜙ,
hi̱ˉ heꜘ lä̱ä̱˜ läꜙjë̱ë̱ꜙ hi̱ˉ maˉnaˉjngɨɨˈ tuhˉdsëꜗ.
11Ja̱a̱ˉ hñiiꜘ baˊ Dio la̱a̱ꜗ jwëëꜚ llu̱u̱ꜗ goˉte˜,
hi̱ˉ yaˉjë̱ë̱ˈ dsëꜗ läꜙjëꜙ jmɨɨˊ kya̱a̱hˊ heˉ hlɨɨhˈ.
12Cherˊmahꜗ saꜙ gaꜙje̱e̱h˜ dsaˉ kya̱a̱hˊ Dio,
jniiyꜗ ñeˈtuuhꜚ kiyhꜗ hiꜙ maˉnaˊlluˋ flecha kiyhꜗ.
13Maˉnaˊlluˋ läꜙjëꜙ ñeˈchʉ̱ʉ̱hˉ heˉ jngɨɨhꜙ kihꜗ dsaꜙ,
hiꜙ läꜙja̱ˉ kaˉlähꜘ flecha heˉ naˉhi̱h˜ jeˉ.
14Jëëˋ daˊ hnähꜘ haˉ läꜙ laꜗ kihꜗ hi̱ˉ hñaaˉ dsëꜗ.
La̱a̱yꜗ chahˈjmooꜗ heˉ hlɨɨhˈ jeeˊ hyaꜙ heˉ hlɨɨhˈ jmahꜗ baˊ,
heˉja̱ˉ baˊ naˉ hwëëˉ hooyˊ juuˈ taˉjuuˈ jmahꜗ baˊ.
15Maˉgyuyꜗ ko̱o̱ˉ tooˉ mahꜗ maˉjmeeyꜘ ñiihˊ,
pero ja̱ˉbaˊ tooˉ heˉ maˉgyuyꜗ ja̱ˉ,
ja̱ˉbaˊ nehꜙ ja̱ˉ tä̱yhꜙ.
16Läꜙjëꜙ heˉ hlɨɨhˈ heˉ jmeeyꜙ,
dsaˉji̱i̱h˜ kihꜗ hñiiꜘ bihꜗ mahꜗ ju̱u̱yꜘ kya̱a̱hˊ heˉ ja̱ˉ.
17Jmeenꜙ jʉʉhˉ kihꜗ DSAˉJØ̱Ø̱Hˈ kya̱a̱nꜙ,
jëëhꜘ ja̱a̱ˉ hñiiꜘ bihꜗ la̱a̱yꜗ llu̱u̱ꜗ goˉte˜.
Hänˋ su̱ꜚ kihꜗ DSAˉJØ̱Ø̱Hˈ kya̱a̱nꜙ hi̱ˉ gyaꜗ gyʉʉhˈ.
Одоогоор Сонгогдсон:
Salmos 7: chz
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2003, Wycliffe Bible Translators, Inc. All rights reserved.