Salmos 5
5
1Läꜙ maˊ kɨˊhoohnˊ jeeˊ ngɨɨnˊ kinꜙ,
nʉʉˉ heˉ hlë̱ë̱hnˊ hneˉ DSAˉJØ̱Ø̱Hˈ kya̱a̱nꜙ.
Jmeeˊ heꜗ kihꜗ läꜙjëꜙ heˉ cha̱a̱nˉ.
2Nʉʉˉ läꜙjëꜙ heˉ chu̱u̱nꜘ kya̱a̱hˊ hneˉ,
ja̱a̱ˉ hneˉ baˊ llaˉkya̱a̱nꜗ dsaˉtaˊ jø̱ø̱hꜗ kya̱a̱nꜙ
hi̱ˉ la̱a̱ꜗ Dio kya̱a̱nꜙ.
3Taꜙlaꜙ høøˉ nuuhˈ baˊ hneˉ juuˈ kinꜙ.
Tiih˜ goˉte˜ jwë̱ë̱hnꜚ hneˉ läꜙjëꜙ heˉ cha̱a̱nˉ.
Ko̱o̱ˉ jø̱ø̱ˊ baˊ jnäꜘ heeˉ naˉ jmeehˈ.
4Maꜙ baˊ jnäꜘ, hneˉ la̱a̱hꜗ Dio hi̱ˉ saꜙ tɨh˜ dsëꜗ heˉ hlɨɨhˈ,
hiꜙ läꜙjë̱ë̱ꜙ hi̱ˉ hlë̱ë̱hˈ saꜙ të̱ë̱yꜗ dsaˉta̱a̱yhˋ kooꜘ kyahꜗ.
5Maꜙkeꜙ jäˊ kooꜘ kyahꜗ
saꜙ chaˉ jwëˈ dsaˉta̱a̱hˋ hi̱ˉ jmää˜ hñiiꜘ ka̱a̱hˊ.
Hiꜙ naˉhøøhˊ hneˉ kihꜗ heˉ hlɨɨhˈ heˉ jmeeꜙ dsaˉ.
6He̱e̱hˈ goˉte˜ läꜙjë̱ë̱ꜙ hi̱ˉ taˉju̱u̱ˈ.
Hiꜙ saꜙ läꜙ jë̱ë̱hˈ hneˉ läꜙjë̱ë̱ꜙ hi̱ˉ tʉ̱ʉ̱˜ jmaˉ kihꜗ dsaꜙ
hiꜙ läꜙjë̱ë̱ꜙ hi̱ˉ miˉga̱a̱ꜙ dsaˉ.
7Pero ka̱hꜘ baˊ laˈ kinꜙ.
Leꜘ baˊ dsaˉhenꜘ chaˊnehꜙ kyahꜗ, läꜙlluꜗ heˉ hnaahꜙ jnäꜘ chaˉmiihˉ.
Maꜙläꜙgohnꜙ jmeenˋ jʉʉhˉ kyahꜗ nehꜙ gwahꜙ naˉjngɨɨˈ kyahꜗ, jëëhꜘ ja̱a̱ˉ hneˉ baˊ la̱a̱hꜗ jø̱ø̱hˈ.
8DSAˉJØ̱Ø̱Hˈ kya̱a̱nꜙ, jä̱ä̱ꜙ jnäꜘ läꜙko̱hꜘ hnoohˉ hñaahꜗ, mahꜗ saꜙ le̱hꜙ hi̱ˉ naˉhøøhˊ heꜘ jnäꜘ.
Chiihˊ jnäꜘ heeˉ naˉ jmeenˋ, heeˉ jwëꜘ kanˋ.
9Dsaˉ hlë̱ë̱hˈ heꜘ ji̱hˊko̱hꜘ saꜙ hlëëyhꜙ juˈdsooꜘ.
Tuhˉdsëyꜗ naˉka̱hˈ goˉte˜ heˉ hlɨɨhˈ jmahꜗ.
Tʉꜗ tʉˊluuyˋ laꜗ läꜙko̱hꜘ toˉhø̱ø̱ˉ naˉnaˊ.
Kya̱a̱hˊ waˊhooyˊ hlëëyhꜙ juuˈ taˉjuuˈ jmahꜗ baˊ.
10Hneˉ Dio kya̱a̱nꜙ llaˊ taˊ kiyhˈ.
Waˊ tä̱yhˉ nehꜙ läꜘ kiyhꜗ.
Moꜙtoꜙ jmääyꜙ heˈ, kihꜗ heˉ maˉhlä̱ä̱yhˉ gaꜙngëëꜘ jwë̱ë̱ˈ,
jëëhꜘ moꜙsoꜙ nuuyꜗ kyahꜗ.
11Waˊ jë̱ë̱ˉ dsëꜗ läꜙjë̱ë̱ꜙ hi̱ˉ maˉchaˉ oˉjø̱hꜙ dsëˉ kihꜗ kya̱a̱hˊ hneˉ.
Waˊ jë̱ë̱ˉ dsëyꜗ tä̱ä̱ꜘ, jëëhꜘ hneˉ baˊ lä̱ä̱hˊ hnihꜘ.
Läꜙjë̱ë̱ꜙ hi̱ˉ hnääꜗ hneˉ jë̱ë̱ˉ dsëyꜗ taꜙlaꜙ kyahꜗ hneˉ baˊ.
12Hneˉ baˊ hi̱ˉ miˉjä̱ä̱ꜗ hi̱ˉ llu̱u̱ꜗ.
Läꜙlluꜗ heˉ hnaahˉ hnihꜘ chaˉmiihˉ, heˉja̱ˉ hä̱ä̱hꜙ hnihꜘ kihꜗ läꜙjëꜙ baˊ.
Heˉ ja̱ˉ naˉ laꜗ läꜙko̱o̱ˉ ñeˈ heˉ hiiꜘ läꜙkuˊ läꜙji̱i̱ꜗ kiyhꜗ.
Одоогоор Сонгогдсон:
Salmos 5: chz
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2003, Wycliffe Bible Translators, Inc. All rights reserved.