Makitiko Ga Maapostolo 4
4
1Leka pakulongela wombe nu nsafi, makasisi nu nduna wa ngondo wa hekalu nu waSadukayo, wawayichili, 2kuwina mwoyo ndawa wakayigalisi nsafi, ni kuwandisa pa Yesu kusyuka kwa wakufwa. 3Na wakawawikili mawoko, na wakawawikiti pakugoheka mpaka lukela lwake: pakuya kyayili kimihi hino. 4Koma wingi wa awa wayufwini malowe wakeliti; na kawalangiko ka wagosi kakayili ngati elfu mhano.
5Leka lukela lwake ikayili kukita wakupawula wawe na wakulu‐wakulu na wakulembela wakakokini pa Yerusalem; 6nu Anna kasisi nkulungu akayili baho, na Kayafa, nu Yohana, nu Alexander, na woha wala wayili wa ntangilo wa kasisi nkulungu. 7Na pakawayimiki pagati, wakotiti, Pa makakala wuli, pangi pa lihina wuli, mukakiti iki mwenga? 8Bahalapala Petro, wakumema nu Roho Mbalafu, akawajowili, Mwenga wakupawula wa nsafi, na wakulu‐wakulu, 9ngati tenga tikoteka lilino ya lihengo linofu likitiki pa mundu wakulegaleka, kukita kwa nani ayokoliki yombe; 10imanyike kwa mwenga mwawoha, na kwa nsafi woha wa Israel, kukita pa lihina lya Yesu Kristo wa Nazareti, yula mukambambiti pa msalaba, yula Mulungu akansyusiti pa wakufwa, pa yuyu uyu ayimiti pa miho pinu wakulama. 11Yuyu ni liganga lila lyakaniwi nu mwenga wakujenga, upatiti kuya mutu wa ndusula. 12Na pa yungi ayi yoha pawaka uyokosi: pakuya haka lihina lingi kawili pawaka pasi pa mafundi, lipeliwi pa wandu, pa lila tilinganila kuyokoleka.
13Leka pakuwona kusindimala kwawe Petro nu Yohana, na pawakaholalili kukita wayii wandu nakuyigilasiwa na wangamanyika, wakakangichi; na wakawalalili kukita wakayili pamonga nu Yesu. 14Na pakumbona mundu yula wakulamasika nakayimiti pamonga nu wombe, wakayili wangali kindu kyakupindika. 15Leka pawakapawili kukita wawuke pa chengo, 16wakapangiti malango ni wayawe, kujowa, Yatiwakitile wuli wandu awa? pakuya kukita kiwalalilo kyakumanyika kyakitiki pa wombe, kiwoniki pa lulanga kwa woha wakuhwela pa Yerusalem; na tihotola lepa kukikana. 17Koma nausi kisiyonjakaseka pa nsafi, tiwakile nyamhope wasilongela kawili ni mundu ayi yoha pa lihina ili. 18Na pawakawakemili, wakawataukili wasijowa haka lilowe limonga haka kuyigalisa wasiyigalisa pa lihina lya Yesu. 19Leka Petro nu Yohana wakahigiti kuwajowela, Wona kiyii kya malinga pa miho ga Mulungu kuwayufwana mwenga kulutila kunjufwana Mulungu, mupawulaye: 20pakuya tenga nakukotoka kulongela gala tagaweni. 21Leka wala, pawakawakiliti kawili, wakawapili mwanja, nakukolela kindu umu ngawawayambulisi, ndawa ya nsafi; pakuya woha wakayili mu kunkwisa Mulungu pa kila kyapatiti kuya. 22Pakuya mundu uyu akayili wakulutila miaka makumi ncheche pa yula kiwalalilo iki kyakulamisa kikakitiki.
23Leka pala wakapeliwi mwanja, wawachilili wayawe, ni wakawakokosili fiyi fyoha makasisi wakulungu ni wakulu‐wakulu wakawajowili. 24Na wala, pawakayufwini, wakakwesiti malowe nu mwoyo umonga kwa Mulungu, kujowa, Bambo, wenga wakupanga kunani nu ndima ni nyanja, na fyoha fiyii mumu: 25ukajowiti pa Roho Mbalafu, pa ndomo wa dadi witu Daudi mpalo wako,
Kwa kiki Mihuku wasokosili,
Ni misafi wakaholiti fya waka?
26Wakayiyimisi watwa wa ndima,
Na wakupawula wakokini pamonga,
Kumpindika Bambo, nu kumpindika Wakubakasika wake:
27pakuya chakaka wakokini pamonga pa likaya ili kumpindika Mpalo mbalafu wako Yesu, yula ukammakisi, Herode na Pontio Pilato kawili, pamonga ni Mihuku ni misafi ya Israel, 28kukita fiyi fyoha kiwoko kyako na malango gako gakawikiti palongolo kukitika. 29Na hino, Bambo, lola pa malowe gawe gakuyogofya: na uwapele wawanda wako kulongela malowe gako pa kusindimala, 30pakutambalisa kiwoko kyako pa kulamisa; na fiwalalilo ni finyantiti fikitike pa lihina lya Mwanao mbalafu Yesu. 31Na pawakaluwiti awa, pandu pala pawakawunganiki pakanyukunywiki; na wakamemiti woha nu Roho Mbalafu, na wakalongili lilowe lya Mulungu ni kusindimala.
32Leka lipuga lya wala wakeliti wayili nu mwoyo nu wumi umonga: na haka yumonga wawala ayii mu kujowa kukita kindu kya ifi akayili nafyo kikayili kya yombe wakape; koma fikayili kwawe fyoha pamonga. 33Na pa makakala makulungu maapostolo wakayili mu kulasa ulungamakiso wa kusyuka kwake Bambo Yesu: ni neema ngulungu yikayili pa awa woha. 34Pakuya mundu pagati pawe akayilepe ngaju: pakuya wayii woha wakayili nayo migunda pangi nyumba wakasihemisi, na wakatoliti uhemesi wake fila wakafihemisi, 35ni wakauwikiti pa njayo sya maapostolo: na wapeliwi kwawe ayi yoha umu fyansowili mundu.
36Leka Yosefu, yula akakemaliki Barnaba na maapostolo (liyii kukokoseka, Mwana wakunyamasa), mLevi, mundu wa Kupro pa nsafi wake, 37pala akayii nawo ngunda, akauhemisi, akachiti nu uhemesi wake, ni akauwikiti pa njayo sya maapostolo.
Одоогоор Сонгогдсон:
Makitiko Ga Maapostolo 4: MGS1937
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
First published by the British and Foreign Bible Society in 1937.
