Makitiko Ga Maapostolo 5
5
1Koma mundu lihina lyake Anania, pamonga na Safira mhanu mundu, 2akahemisi kindu kyawe, nakafihiti pa uhemesi wake, mhanu mundu kawili akayufwangini nako, pakatoliti lilundu likitinu, akawikiti pa njayo sya maapostolo. 3Leka Petro akajowiti, Anania, kwa kiki Shetani akamemisi mwoyo wako kukonga Roho Mbalafu, ni kufiha pa uhemesi wa ngunda? 4Pala ukahweliti, si ukayili wako ati? na pala ukahemaliki, si ukayili baho pa chengo kyako? Ndawa yake kiki ukaholiti kindu iki mu mwoyo wako? ukadetiti lepa kwa wandu koma kwa Mulungu. 5Na Anania, pakuyufwana malowe aga, akagwili pasi, na akafwilingani: nu woga ukulungu ukawagwili wohawa wakayufwini iki. 6Leka wapalo wakayimiti, wakamniengiti, na wakantoliti kunja ni kumbika mu manyinja.
7Leka yikayili ngati lukumbi lwa saa sidatu panyuma pake, nu mhanu mundu, akayingili nukumanya lepa iki kikakitiki. 8Nu Petro akamhigiti yombe, Unijowele pangi mukahemisi ngunda ukitinukitinu? Nuyombe akajowiti, Ena, kwa kitinu. 9Leka Petro akanjowili, Ndawa kiki mukayufwangini pamonga kungesa Roho wa Bambo? lola, njayo sya wala wakambikiti ngwanao siyii pa ndyango, na yawakutole wenga kunja. 10Leka akagwili hino apa pa njayo syake, akafwilingani: leka wapalo pawakayingili wakankolili afwili, na wakantoliti kunja na wakambikiti mu manyinja pa ngwana mundu. 11Na woga ukulungu ukawaligwili kanisa lya mfilimila, na wohawa wakayufwini ifi.
12Leka pa mawoko ga maapostolo fiwalalilo ni finyantiti fya mahele fikakitiki pa nsafi; na wakayili woha nu mwoyo umonga pa lufuka lwa Solomon. 13Leka wa wakusigala haka mundu akangamili lepa kuwungikana nawo: koma wandu wakawakwisiti; 14na kulutila wakukela wakayili kuyonjakesa kwa Bambo, wingi wagosi na wadala kawili; 15mpaka haka kutola wa fitamu ku ndila, ni kuwawika pa mipasa ni pa ndengati, nausi haka kifwili kya Petro pakuyicha kiwalekelele mfwili ayi yoha wa wombe. 16Leka lipuga kawili kuhumila makaya gakusyungutila Yerusalem, wakachiti pamonga kutola watamu, na wala wahumbusiki ni mahoka mawifu: na wakalamasiki ayi yoha.
17Koma akayimiti kasisi nkulungu, na woha wakayili pamonga nako (kaka kapatuliko ka waSadukayo), na wakamemiti nu kuwina mwoyo, 18na wakawawikili mawoko maapostolo, na wakawawikiti pa kugoheka wandu wa waka. 19Leka malaika wa Bambo kilo akadindwili milyango ya pakugoheka, 20na akawatoliti kunja, kuwajowela, Mubitaye, muyimaye ni kulongela mu hekalu kwa wandu malowe goha ga Kulama uku. 21Leka pawakayufwini iki, wakayingili luwuliku pa hekalu, na wakayigalisi. Koma kasisi nkulungu akachiti, na wala pamonga nako, na wakawunganisi pamonga chengo, na wa mbili woha wa wana wa Israel, na wakatumiti ku nyumba ya kugoheka nausi watoleke. 22Koma wa polisi pawakafiki wakawakolili lepa pakukungika; na wakakilawiki, 23na wakatawalili, kujowa, Nyumba ya kukungika tikakolili kidindikile, na wakulindalila wakayimiti pa milyango: koma pala tikadindwili, tikakolili lepa mundu mgati mula. 24Leka pala wakayufwini malowe aga nduna wa ngondo wa hekalu na makasisi makulungu, wakayambaniki mwoyo panani pa wala kukita iki yakikule mpaka kiki. 25Leka nunuyu akafiki kuwakokosela kukita, Lola, wagosi wala mukawawikiti pakukungika wayii mu hekalu kiyimile ni kuyigalisa nsafi. 26Bahalapala nduna wa ngondo akawukiti pamonga na wa polisi, na wakawatoliti pangali na makakala; pakuya wayii mu kuyogopa nsafi, wasilekeleka maganga. 27Leka pawakachiti nawo, wakawayimiki pagati pa chengo. 28Nu kasisi nkulungu akawakotiti, kujowa, Tikawataukili musiyigalisa pa lihina ili: na lola, mwamemisi Yerusalem ni mayigaliso ginu, na mulonda kutipela tenga mhalo wa mwasi wa mundu uyu. 29Leka Petro na maapostolo wakahigiti kujowa, Tilinganila kunjufwana Mulungu kulutila wandu. 30Mulungu wa wakadadi witu akansyusiti Yesu, uyu mukankomiti, kumpagika pa libihi. 31Yuyu Mulungu akankwesiti aye Wakulongosa nu Njokosi pa kiwoko kyake kya ndilo, kwa kupela Israel kupela na kulekelekesa sambi. 32Na tenga tiyii walungamakiso wa findu ifi; nu Roho Mbalafu kawili, uyu Mulungu ampeliki kwa wala wakunjufwana.
33Leka wala, pawakayufwini, wakahomiki mu mwoyo, na wakalonditi kuwakoma. 34Koma yumonga akayimiti pa chengo, mFarisayo lihina lyake Gamaliel, wakuwula wa torah, wakuginikika nu nsafi woha, na akapawili kukita wombe wakawikike kunja pachokope. 35Na akawajowili, Wagosi wa Israel, mwigohe wicho panani pa wandu awa, mulonda kukita wuli. 36Pakuya palongolo pa magono aga Theudas akayimiti, kujowa kukita mwene ni kandu; kwa yombe lipuga lya wandu, ngati mia ncheche, wakawunganiki: uyu nuyombe akakomiki; na woha wala wakakongiki nuyombe, wakayambaniki, wa wakahotwiki. 37Panyuma pa uyu akayimiti Yuda wa Galilaya pa magono ga kulembeka, na akapatwili wangi kunkisa yombe: yuyu kawili akayanangiki, na woha wala wakakongiki nuyombe, wakayambaniki. 38Na hino niwajowela, Mupatuke na wandu awa, muwaleke waka: pakuya wona malango aga pangi lihengo ili gayii ga wandu, yagagwisike pasi: 39koma wona gayii kuhumila pa Mulungu, yamuhotole lepa kuwagwisa pasi; musikolaleka wakukomana nu Mulungu. 40Leka wakayufwangini nuyombe: na pala wakawakemili maapostolo kwawe, wakawatowiti na kuwataukila wasijowa kawili pa lihina lya Yesu, na wakawawopwili. 41Mumu wala wakawukiti pa kyene kya chengo, kuhekelela kukita wakawalangiki wakulinganila kuwona lihamu ndawa ya Lihina. 42Na ligono ni ligono, pa hekalu na pa nyumba, wakakotwiki lepa kuyigalisa ni kuwandisa Yesu kukita ayii Kristo.
Одоогоор Сонгогдсон:
Makitiko Ga Maapostolo 5: MGS1937
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
First published by the British and Foreign Bible Society in 1937.
