Gyenesis 6
6
Adasamba Hɔn Emumuyɛ
1 #
Job 1.6; 2.1 Na ɔbaa dɛ nyimpa hyɛɛ ase dɔree wɔ asaase enyi, na wɔwoo mbabaa maa hɔn no, 2Nyankopɔn ne mba hun nyimpa mbabaa no dɛ hɔn ho yɛ fɛw; na wɔwarwaar hɔn mu dza wɔpɛ nyinara. 3Na EWURADZE see dɛ, Mo sunsum nnkɛnye nyimpa edzi aper daa, osiandɛ ɔyɛ honam ara. Ofi dɛm ber yi ne nda bɛyɛ mfe ɔha eduonu. 4#Nka 13.33 Nda no mu no nna eso n’ekyir no, nna abran akɛse wɔ asaase do, osiandɛ ber a Nyankopɔn ne mba nye nyimpa mbabaa hyiae no, wɔwoo mba maa hɔn, woyinom nye tsetse etumfo no, nkorɔfo a wɔgyee dzin no. 5#Mat 24.37; Luk 17.26; 1 Pet 3.20 Na EWURADZE hun dɛ nyimpa n’emumuyɛ ayɛ kɛse wɔ asaase do, na dɛ n’akoma mu nsusui nyinara yɛ bɔn ara nko daa no, 6EWURADZE nuu noho dɛ ɔyɛɛ nyimpa wɔ asaase do, na ɔyɛɛ no yaw wɔ n’akoma mu. 7Na EWURADZE see dɛ, Mebɛsɛɛ nyimpa a mabɔ no no efi asaase enyi: nyew, nyimpa, nye mbowa nyinara; osiandɛ menu moho dɛ mayɛ hɔn. 8Naaso Noa dze, onyaa enyimpa wɔ EWURADZE enyim.
Noa Adaka No
9Iyinom nye Noa no ho asɛm. Nna Noa yɛ nyimpa tseneneenyi na odzi mu wɔ n’ebusuasantsen mu: Noa nye Nyankopɔn nantsewee. 10Na Noa woo mbanyin baasa, Sem, Ham, nye Jafet. 11Nna asaase asɛɛ wɔ Nyankopɔn enyim, na ewurkadze ahyɛ asaase ma. 12Na Nyankopɔn hwɛɛ asaase, na, hwɛ, asɛɛ; osiandɛ nyimpa asɛɛ no kwan wɔ asaase do.
13Na Nyankopɔn see Noa dɛ, Abɔdze nyinara n’ewiei edu m’enyim; osiandɛ ɔnam hɔn do na ewurkadze ahyɛ asaase do ma; na hwɛ, mebɛsɛɛ hɔn nyinara nye asaase so. 14Fa dua pa pam hɛn ma woho; yɛ adan wɔ hɛn no mu, na fa ihua tar no mu nye n’ekyir. 15Na mbrɛ ibesi ayɛ no nye yi: ehɛn no ne tsentsen basafa ɔha eduonum, ne tɛtɛr basafa eduonu enum, na no krɔn basafa duenum. 16Yɛ ntokura wɔ hɛn no ho, na wie no anamɔn kor na fa wɔ sor; na hɛn no n’abow no fa si ne nkyɛnmu; yɛ no nsamdo, dza odzi ase, dza otsia ebien, nye dza otsia ebiasa. 17Na hwɛ, emi, medze nsuyirii reba asaase do abɛsɛɛ abɔdze a nkwahom wɔ mu nyinara efi sor ase: adze a ɔwɔ asaase do nyinara bowu. 18Na menye wo bedzi ahyɛmu: na aba hɛn no mu, ɔwo, nye wo mba, nye wo yer, nye wo mba hɔn yernom ka wo ho. 19Na fa honam nyinara mu adze a nkwa wɔ mu n’ahorow nyinara mu ebien ebien bra hɛn no mu, ma wonnya nkwa nka wo ho; fa hɔn onyin nye ɔber. 20Ntumbowa ahorow, fiembowa ahorow nye mbowa ahorow nyinara hɔn mu ebien ebien bra wo nkyɛn; ama woeenya nkwa. 21Na fa edziban nyinara bi ma woho, na boa ano kɔ wo nkyɛn; ama ɔaayɛ edziban ama ɔwo nye hɔn. 22#Heb 11.7 Na Noa yɛɛ dɛ mbrɛ Nyankopɔn hyɛɛ no no nyinara pɛpɛɛpɛr.
Одоогоор Сонгогдсон:
Gyenesis 6: MFANBRPC
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Mfantse Bible © Bible Society of Ghana, 2011.
