LITANGA 39
39
Josefu nu Mukali wa Potifa
1Kalunu avandu va Ishimaeli vaavugura Josefu nivamuhila mukivala cha Egebeti. Vamuguliza ku Potifa, uwaali mulala ku vanene vu mwami wa Egebeti, kandi uwaali munyabara wu vulindi vwi inyumba yu vwami. 2Yahova yaali harara na Josefu kandi yamugasiza. Josefu yamenya munyumba yu munene weve Potifa, 3uwalola ndi Yahova yaali harara na Josefu kandi yaali na mugasizi ligali mu vuli kindu choosi cha yakola. 4Potifa ya yaanza Josefu ligali kandi naamukora ave mutumikiri weve wa himbi ligali. Kunangwa yakola Josefu kuva munene munyumba yeeye kandi kusingilira vindu viosi via yaali navio. 5Kutura ing'inga yene yeyo, Yahova yagasiza inyumba ya Potifa, harara ni vindu viosi viali munyumba kandi mu mulimi. Yago goosi gakolekaa kigira Josefu. 6Potifa yavika vindu viosi mu vulindi vwa Josefu. Si yenya kumanya vindu yivi mba, nitali yenya kumanya vuzwa chukulia cha yaalia.
Josefu yaali wi zinguru kandi wi ligondo lilahi ligali. 7Inyima wi vindu yivi, mukali wa Potifa yaatanga kwegomba Josefu. Yavolera Josefu vave harara naye. 8Navuzwa Josefu yasura na muvooleraa, “Henza, munene wange siamanyi kindu choosi munyumba yeeye mba, kigira amali kokora inzi kuva nuvunyari ku vindu viosi munyumba yeeye. 9Inzi mbeeye nuvunyari munyumba yiyi kuli oyo. Si keveeye ho ni kindu choosi cha yaavisa kutura ku inzi mba, nitaveeye ivi, kigira oveeye mukali weve. Inzi nyara ndi kokora uvudamanu ovonene kuli yivu kandi ukwonera Nyasaye?” 10Kali niiva mukali uyu yahongera komoloma na Josefu vuli lidiku, Josefu si yenya kumuhuliriza mba, kinga si yenya kogona naye mba.
11Navuzwa lidiku lilala lwa Josefu yazia munyumba kokora miyinzi jije, si haali ho nu mundu kali mulala ku vatumikiri vumunyumba mba. 12Mukali uyu yagumira Josefu inguvu, namuvolera, “Hamba ove harara ninzi!” Navuzwa Josefu yiruka nazia ichova, naamulekera inguvu yeeye mu mukono gwigwe. 13Lwu mukali uyu yalora ndi Josefu yiruki na yaleki inguvu yeeye mu mukono gwigwe, 14yalanga avatumikiri veve vinyumba yeye navavoolera, “Heenzi ku yaga! Muheburaina uyu wu musaza wange aleeti munyumba hagati hiitu akokoleraa kehenyahenye. Yaazi mu keng'oze change ma nageriza konzonogonya, navuzwa manyi ninguba zikwiri zinene. 15Lwa ahuliyi ningubaa zikwiri, yiruki nazia ichova, ma niyandekera inguvu yeeye.”
16Maku yavika inguvu ya Josefu kuduuka lwu munene weve yaza. 17Mukali uyu yavolera munene ulugano lulala lwere, “Mutumikiri mutugwa wa umali koleta amenye ni kunyi, yaazi mu keng'oze change kongolera kehenyahenye. 18Navuzwa lwa huliyi ningubaa zikwiri, yiruki nazia ichova, ma ni yandekera inguvu yeeye.”
19Lwu munene weve yahulira makuva gu mukali weve yamuvolera, kuli mutumikiri weve mutugwa yamukolera, munene oyo vutima vwivwe vwiginga. 20Yalaga Josefu agumilwi, ma avikwi mu vuhambe, havundu ha vahambe vandi vu mwami vavohelangwa. 21Navuzwa Yahova yaali harara na Josefu, kandi yamuyanza ligali, kandi namugasiza imbiri wu mulindi winyumba ya vahambe. 22Hene yaho, mulindi winyumba ya vahambe, yakola Josefu kuva munene wa vahambe vandi vosi; kandi yamukola kuva nuvunyari ku kindu choosi chekoleka munyumba ya vahambe. 23Mulindi winyumba ya vahambe si yaahenzeriza kandi nuvunyari ku vindu viosi viali mu vulindi vwa Josefu mba, kigira Yahova yaali harara na naye; kandi yamugasiza mu vindu viosi via yakola.
Одоогоор Сонгогдсон:
LITANGA 39: LOGOOLI
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
©Bible Society of Kenya, 2019
