Yohanes 21
21
I Tiberias yenggelekma at Yesus ebe, it agoromi inebe 7 nen inilenggen kowagaluk inelokoma winam agike wene
1At Yesus nen esigit diluk kagakikesik oba nen, i Tiberias yenggelekma, at agoromi ane waganggo laguka mende yomenogo yabunggane inelokoma winam agike. Inelokoma winam agike eti, wene ebe yigit diluk. 2Ininggi omanggi etinem, at Simon Petrus etnogo inom, Tomas endaga omanggi Kulup Mende etnogo inom, Natanael ago o Galilea agum o unggul endaga Kana mende inom, Zebedeus aʼburi inom, Yesus agoromi inebe mbere inom, nandokuka. 3Esigit diluk nandokukasik nen, Simon Petrus etnogo nen, it pelakngge men yogisasike,
“An yogondak ikan wagani lagaluk,” yiluk yisikemo, it pelakngge yomenogo nen,
“Nit ninomat luwok o,” yiluk yisukasik nen, inom lagukasik nggu paga unggisukasik laguka mende, o yibanggo-kibanggo ikan omanggiat kalok mondok waganggidek. 4Esigit diluk waganggidegat werekma, o wiko nggorlek, at Yesus lagikesik, i aik oba mendek welagike mende, it agoromi ane waganggo laguka mende yomenogo nen,
“Eti Yesus ebeat o,” yiuk didigidek. 5Esigit diluk didigidek werekma, at Yesus nen men yogisasike,
“Warligi yi. Nagoromi. Ikan amberek waganggep a?” yiluk yogisasikemo, it nen,
“Mondok dek o,” yiluk yogokukama, 6at Yesus nen, men yogisasike,
“Kinayoge eti, nggu abel kininggi ebengge mit-mot wusa ʼbini. Esigit diluk wusa ʼbumo ikan waganugunat o,” yiluk yogisasikemo inayoge etnogo ima wusa ʼbisukama ikan mondok dogalegat yukat lagikemo, likalok liyaʼbusak erlok dek agike. 7Esigit diluk erlok dek agikemo dogolik, at Yesus agoromi mende omanggi, at endainggen kunik mende etnogo nen, Petrus men yogokike,
“Petrus, ap eti ninewe Endaganggok etnogoat o,” yiluk yogokike. At Yesus agot etnogo nen,
“Ap eti ninewe Endaganggok etnogoat o,” yiluk Petrus yogokonem asuk kolkikesik nen, iyom sikmangge mende nonggorlogo ʼbisikesik su nonggorlek welagike mende ibat yikasikesik nen, ima mbok wusasike. 8Esigit diluk mbok wusasi nggorlek, Yesus agoromi pelakngge yomenogo it welagukama nen kurli i yimbitla walegat dek. Korogat 100 meter negen eti paga, ikan dogalegat yoge ambem kerokogo etnogo likalok wolok nggu warogo i yimbitla unggi waguka. 9Arat unggi wagukasik nggu akla nen duki laguka kak, ikan inom, roti inom, werago kindu enggen oba dukogo werekma inilenggen kasuka. 10Esigit diluk inilenggen kasukama, at Yesus nen, men yogisasike,
“Nagoromi. Ikan ngget waganggep yomenogo amberek wolok witni o,” yiluk yogisasikemo, 11at Simon Petrus etnogo nggu akla unggisikesik nen, ikan nggokndek mondok ebe 153 paga yoge ambem kerokogo etnogo likalok wolok, i yimbitla unggi wagike. Ikan mondok dogalegat mende, yoge etnogo ʼbugurlagat kalok omanggi liʼbilagidek, panoat welagike. 12Su esigit diluk wolok duki wagikemo, at Yesus nen, men yogisasike,
“Nagoromi. Kimbiri nuwok nen witni o,” yiluk yogisasike. Esigit diluk yogisasikemo, it at agoromi yomenogo nen,
“Yi ninewe Endaganggok ebeat o,” yiluk enggagat kasukasik nen, at omanggi nen,
“Kat ta,” yiluk kinok waganusak inayuk agikemo togot disuka. 13Esigit diluk togot disukasik werekma, at Yesus nen yabunggane inoba korokogo lagikesik nen, roti etnogo waganggikesik, it sumburisalok, ikan etnogo esigit dilugat sumburisasike. 14At Yesus esigit diluk kagakike eti at ebe watlagikesik nen suguluk iluk agikesik oba nen, inggi mbere paga agoromi inelokoma winam agikesik nen omanggi yabunggane winam agike o.
Yesus nen, “An nanggo domba panorogo inanggorlem dogono,” yiluk Petrus yogokike wene
15Kimbiri arat nasukama, at Yesus nen, Simon Petrus etnogo endema waganggo dogolik,
“Simon Yohanes aʼbut nagot o. It kagarlagi amberek yoma, an inendainggen kunik dek negen mende, karat, an kendainggen kunik mondok werek a?” yiluk yogokikemo, at Petrus nen,
“E o, newe. An nen Kat kebe kaʼbuwa o,” yiluk yogokikemo, at Yesus nen, men yogokike,
“Nanggo domba ena mende panorogo inanggorlem dogono o,” yiluk yogokike. 16Alebagik esigit diluk yogokikesik nen, yabunggane omanggi inom endema waganggike,
“Simon, Yohanes aʼbut nagot o. Kat nen, an kendainggen mondok kunik werek a?” yiluk yogokikemo, at nen,
“E o. Newe. An nen Kat kebe kaʼbuwa werek eti, kiluat o, newe,” yogokikemo, at Yesus nen,
“Eti paga, an nanggo domba mende pagisek dogono o,” yiluk yogokike. 17Inggi mbere paga endema waganggikesik nen yabunggane omanggi waganggike,
“Simon, Yohanes aʼbut nagot o. Kat nen an nebe naʼbuwa a?” yiluk, Yesus nen endema inggi mbere paga waganggikesik nen, yabunggane dagakogo omanggi paga,
“Kat an nebe naʼbuwa werek a?” yiluk yogokike eti paga, akla weyak agikemo, at nen Yesus men yogokike,
“Newe. Kat yi mende ndi mende taʼbokogonat kilu o. An nen, newe kebe kaʼbuwa werek eti Kat kilu o,” yiluk yogokikemo, at Yesus nen, men yisike.
“Eti paga, an nanggo domba panorogo inanggorlem dogono o,” yiluk yogokike. 18Esigit diluk yogokikesik nen, wene omanggi men yogokike,
“Alebagik, kat kebe elege dogolik,
An o etoma ligin, yiluk serlok kenggaerek nen aʼbetogo yikalok lago lagagin mendeat, yabunggane kat kebe karlongga ago kalok, kinggi walokogo laʼbisinem, it amberek nen kat kinggi kerle aʼbetogo wat dagaluk nen, kat o lausak kaʼitmo wokarek lugun o, yiluk eberogonat yokigi o,” 19yiluk wene esigit diluk yogokike eti at Petrus yabunggane esigit diluk kagarogo wasugun oba Allah pogorasugun mende pasik yogokike. Esigit diluk arat yogokikesik nen, omanggi men yogokike,
“An nomborlik noko dogono o,” yiluk yogokike.
Yesus nen at agoromi mende omanggi endainggen kunik mende pasik abok yogisasike wene
20At Yesus nen wene esigit diluk yogokikemo, at Petrus eloke mirlokogo ilenggen omborlik lakasike mende, Yesus agot omanggi endainggen kunik mende etnogo inomborlik wagonem lakasike. At eti ebe alebat kimbiri nasi dogolik Yesus eragalilu korokogo korek dogolik, at nen,
“Yesus newe. Ta nen newe Kendaganggok kasuwagaluk yonggo ligin,” yiluk oba kinok waganggike mende etnogo. 21At Petrus nen ap eti ilenggen lakasikesik nen, Yesus men yogokike,
“Newe. At ap eti yabunggane ninggit diluk kagasigin ambegen,” yiluk yogokikemo, 22at Yesus nen,
“An nakla nen, ap eti, yabunggane an wisigin eti paga ebe ilugat dogowagaluk nakla ambigi kalok, kat nen kagasusak mende ʼbuk. An noba dombok o. Esigit diluk mende, karat, an nomborlik noko dogono o,” yiluk wene esigit diluk yogokike mende 23it Yesus agoromi ane waganggo laguka mende nen,
“Yesus nen,
Nagot eti ebe yabunggane watlasigin mondok dek o,” yiluk yeke salek, abok wika disuka. Mende, at Yesus nen,
“An nagot eti yabunggane watlasigin mondok dek o,” yiluk yigidek. At nen,
“An nakla nen, ap eti an yabunggane wisigin eti paga ebe ilugat dogowak nakla ambigi kalok, kat nen kagasusak mende ʼbuk. An noba dombok o,” yiluk wene eti mende pasik yisike mende, esigit diluk yisuka.
24At Yohanes nen ilenggen kasike mende nenat ʼbukakogo yokisau kak, kolal mbalogo ʼbeke yi o. Wene eti at ilenggen kasike mende nenat ʼbukakogo yokiseke eti eberogonat, yiluk, nit taʼbokogonat ninilu.
Wene ilunggun oba kolal mbalkike wene
25At Yesus nen yi wene ndi wene amberek kagako lagike mende dogalegat werek mende, wene taʼbokogonat omanggindek-omanggindek mbilin-mbalintogo kolal mbalogo ʼbilepma, o agat oba yoma obalikmo nggoma ʼbuʼbugat nggerlekogo kagat latlep kigi o.
Одоогоор Сонгогдсон:
Yohanes 21: DNA
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү