La’biyaske 1
1
Yesus nen Allah Agurengge abok yogisasike wene
1Teofilus newe. An nen alebagik wene kolal mbalogo koba laʼbi wagagi eti, at Yesus nen yi mende ndi mende kagakik, yi wene ndi wene yanggul isigik, kagako lagike wene erlo paga kurli nen 2at ombae nen ebe mbogot oba wolok dagasike eti kurli, kolal mbalogo laʼbi wagagi endi o. At ebe mbogot oba awan dagigidek werek nggorlek, at agoromi wenago inebe inayonggo ʼbiluk laʼbiyagaluk kagakike mende yomenogo Allah Agurengge obatne paga inasuk wakike. 3Yesus ebe watlagikesik nen iluk atluk, inggi 40 hari inom dogolik, at ebe senggekogo diduwagaluk yi mende ndi mende elalin dogalegat kagako lagike. Esigit diluk kagako dogolik, at nen,
“An nebe yi. Inilenggen dikogo niyawak o,” yiluk alep-yabungga inelokoma melatluk inuguriyigik, Allah apma dogogun wene yogisigik, kagako lagike. 4-5Ininggi omanggi at agoromi inom omanggimo nandorlek dogolik nen, men yogisasike,
“Yohanes nen ima wusa ʼbinasi lagike mende, kit kininggi dogalegat welagidekma, Allah nen ima wusa ʼbinagu kak, at Agurengge kinoba wusa ʼbi wisigin eti, kinebe o Yerusalem yoma nen dukugup. An nombae nen,
It wogisagin, yiluk wene yokisasike mende eti, an nen alebagik abok yokisasigiat o. Eti paga, anggorlem dogono o,” yiluk wene yogisasike.
Yesus ebe Allah nen mbogot oba wolok dagasike wene
6At Yesus nen wene eti yogisasikesik, at agoromi inom nandorlek dogolik, at oba kinok men wagangguka,
“Newe. Paganeat nit Yahudi mende ninewe nggok apma welaguka eti kak, yabunggane esigit diluk dogogun mende, yogondak ya paga ʼbinanigin a? Awan a,” yiluk yogokuka. 7Yogokukama, at Yesus nen men yogisasike,
“Wene yegep eti, an nombae indewerek nen akla ambasike ndak-ndagat kagat lasigin eti paga, kit nen,
Kurli eti kurli paga dogoluk kagat lasigin, yiluk kinilurogo dogusak erlok dek o. 8Esigit diluk mende, Allah Agurengge kinoba wusa wago kalok kinobatne asigin. Kinobatne atluk, o kota Yerusalem inom, o propinsi Yudea inom, o Samaria inom nen, kurli o yi ai ndi ai o ilugun ilugun eloma lago dogolik, an yi mende ndi mende kagarik nakonem kinilenggen niyegep mende etnogo, an nabok yogisilik lago dogono o,” yiluk yogisasike.
9Wene esigit diluk arat yogisasikemo nen, Allah nen at ebe mbogot oba wolok dagasinem inilenggen werek nggorlek oisa nen sebelkikemo, inilenggen yabunggane kigidek. 10Kigidek dogolik, at Yesus ebe wolok dagasi nggorlek inilenggen mbogot oba mot-mot liyagik werekma eranogoat, ap inebe mbere iniyom nggut mende yilik ineragalilu melasi wusa waguka. 11Melasi wusa wagukasik nen, men yogisasuka,
“Kit akoni o Galilea mende yirani. Kinilenggen mbogot oba liyagik werek eti nenaluk. At Yesus kit yoma ʼbinagaluk mbogot oba wolok dagisinem kinilenggen werek nggorlek, mbogot oba dageke eti kak, yabunggane ebe esigit diluk wusa wisigin o,” yiluk yogisasuka.
Ap omanggi Yudas obalikmo mendisuka wene
12Esigit diluk yogisasukama, ndom Zaitun oba etoma nen wusa wagukasik nen, o kota Yerusalem walegat dek. Korogat satu kilometer kak unggi waguka. 13Unggi wagukasik, uma etoma unggisukasik nen, o konaimbo welagukama etomaat dagasukasik welaguka. It eti inebe Petrus inom, Yohanes inom, Yakobus inom, Andreas inom, Filipus Tomas imbisak inom, Bartolomeus Matius imbisak inom, Alfius aʼbut Yakobus eti inom, Simon,
“O yoma ninaiwerek mende dombok dogogun,” yiluk yisi lagike mende eti inom, Yakobus aʼbut Yudas eti inom, inom etoma welaguka. 14It inebe eta inom, kumi amberek inom, Yesus agoya Maria inom, Yesus agoromi omborlik mende inom, inebe taʼbokogonat inendainggen omanggiat dogolik, sembayan yisi mondok welaguka.
15Etinem, Allah aʼburi amberek inom inebe 120 kak nandorlek dogolik, at Petrus inakla melagikesik nen, wene men yogisasike,
16-17“Nagarlagi nirugi. At Yudas etnogo, nit ninom yabu pano kagako dogowagaluk Yesus nen ayonggo ʼbiluk mendisikemo, nit ninom pano welagosik mende, paganeat wene Allah Agurengge nen at Yudas ake yisikemo, at Daud nen kolal mbalogo ʼbisike mende werekma, at Yudas nen ap nen Yesus ebe pakawagaluk wogisek waga eti, kagat lasusak obaat kagat laga eti,” yiluk yogisasike.
18(At Yudas weyak kagakike eti ake, iyok onggo wogokukama, agat onggo mbalko lagikesik etoma lalok elokonggen sogum warasi dogolik, elabut subukogo dukisikesik watlagike. 19Esigit diluk watlagikemo, akoni o Yerusalem welaguka mende inebe taʼbokogonat inasuk kolkukasik inilu atluk, agat eti ake, nit ninane paga amep wusasikemo yu kak, it inane paga endaga Akeldama salkuka.)
20Esigit dilugat, at Petrus nen men yogisasike,
“Endai kolal mbalek endaga Mazmur etnogo paga men yisuka,
O at werekma aguma wum asuwak. Ap omanggi at aguma etoma inebe degat dogowak o, (Mzm. 69:25=TB 69:26,109:8)
yiluk kolal mbalkuka. Nen, omanggi men yisukaat,
At ebe indewerek dogoligogo mende eti ap omanggi korlawak o, (Mzm. 109:8)
yiluk yisuka. 21-22Eti paga, nit ninom noko doguwogoluk, ap omanggi menduwok. Ap mendusak eti, kurli at Yohanes ima wusa ʼbiyasi lagike eti kurli nen, ninewe Endaganggok Yesus ninom kibitngge-yogongge omborlik noko lago, kurli Yesus ombae nen nit ninakla nen nggigilogo mbogot oba wolok dagasike eti kurli, nit ninom noko lago mende kalok,
Yesus iluk aga eti eberogonat. Ninilenggen kogosik, yiluk ninom yogisilik noko doguwogoluk, menduwok o,” yiluk yogisasike.
23Yogisasikemo, it nen,
“Ap yi menduwok a? Ap yi menduwok a,” yiluk inebe mbere inendaga yisuka. Ap omanggi endaga kenagan, Yusuf yigik, Barsabas yigik, Yustus salogo yigik, yisi laguka mende. Nen, ap omanggi Matias imbisak. 24-25Inendaga yisukasik, Allah ayonggo ʼbisi dogolik,
“Ninombae. Yudas kat kane yogisilik noko dogowagaluk ayonggo ʼbisigin mende, at nen togot diluk watlasusak ndak-ndagat watlagama, obalikmo ap inebe mbere yi, kat nen ap nggi kak ayonggo ʼbegen. Kat akoni inebe taʼbokogonat inendainggen kilu o. Eti paga,
Ap ebe yi ayonggo ʼbigi, yiluk, kat nen yanggul nisan o,” yiluk yogokuka. 26Esigit diluk yogokukasik,
“Ap yi menduwok a? Yi menduwok a,” yiluk omandok ta oba mot-mot asigin inendaga salogo walkasukama, Matias etnogo oba mot-mot agike. Mot-mot agikemo, it ap Yesus nen inebe inayonggo ʼbiluk laʼbiyasike mende yomenogo inebe 12 mende 11 agikemo nen, suguluk 12 asuwagaluk Matias inom dogowagaluk mendisuka.
Одоогоор Сонгогдсон:
La’biyaske 1: DNA
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
