La’biyaske 3
3
Petrus nen ap iyok ut warek mende pano kagakike wene
1Ininggi omanggi jam 3 paga, mulinggi korok lagaluk kagako nggorlek, Petrus Yohanes imbisak, akoni Allah ago palekma sembayan yisi laguka kak yuwogoluk kagakonem, inoba dagasuka. 2Dagasinem, ap omanggi agoya akla nen iyok ut warek endak lagikesik welagike mende, kolagambe mbalekma endaga Pano yiluk yisi lagukama etoma ʼbi wagukama werekma kasuka. Akoni nen ap eti ininggi omanggi puk agidek kibitngge-yogongge akoni amberek Allah ago palekma unggisinem, yi mende ndi mende ambe nggino weyak yogisasi dogowagaluk, kolagambe mbalekma etoma yerogo ʼbi wago laguka. 3O etinem ʼbisukama korek werekma, Petrus Yohanes imbisak Allah ago palekma ungguwogoluk kagakonem, ilenggen iyalok nen, it nen yi mende ndi mende omanggi wogosuwagaluk nggino yogisasike. 4Nggino yogisasikemo, it imbisak nen inilenggen ʼbirogo dogolik, at Petrus nen,
“Kilenggen lakniyan o,” yiluk yogokike. 5Yogokikemo, at ap eti akla nen,
“It nen yi mende ndi mende omanggi woknisugun a,” yiluk ilenggen inoba welagike. 6Ilenggen inoba werekma, at Petrus nen men yogokike,
“Uang emas inom, perak inom, an ninggimo mondok dek o. Mende, an werek mende omanggi wokisigin. Eti, kebe melatluk nen kolak lago dogonok nen, Yesus Kristus ago Nazaret mende endaga mbalogo yokigi,” yiluk yogokike. 7Esigit diluk yogokikesik nen, inggi ebengge pagogo nen mendisike. Mendisinem, ap etnogo iyok ut warek werekma, iyok unggut inom, anggulim owak inom, eranogoat obatne agike. 8Obatne agikesik, mendokogo melatluk nen, kolak lagikesik, Petrus Yohanes inom Allah ago palekma unggisuka. Unggisi dogolik, ap etnogo nen Allah pogorako dogolik, ya mbok dagagik, nda mbok dagagik, unggisike. 9Esigit diluk unggisinem akoni taʼbokogonat inilenggen kasuka. 10Inilenggen kasukasik, at ebe enggagat didisukasik nen,
“Allah ago palekma kolagambe endaga Pano kolagambe mbalekma eta korek dogolik, yi mende ndi mende wogoko dogowagaluk nggino yiligogo mende etnogo ebe yi. Iya! Ninggit diluk nen pano aga. Ninayuk o,” yiluk pogorakuka.
Petrus nen inasuk wakike wene
11Ap etnogo Petrus Yohanes imbisak ininggi yirlelogo Allah ago palekma nen duki wagukasik, monggarai endaga Salomo monggaraila yiluk yisi laguka paga eti duki wagonem, akoni taʼbokogonat nen pogorarik mbirirli inoba nandokuka. 12Nandokukama, at Petrus ilenggen iyalok nen, men yogisasike,
“Kit akoni Israel mende yirani! Ap yi kolak liligogo yi, nit ninenggaerek ninobatne paga kagakik, ninobabut pano Allah wene kologo kagarigogi paga, kagakik, nit nen kagako salek, pogorakik, kinilenggen ʼbit niyigik, kagarigogi yoma nenaluk. 13Ninombae Allah eti, Abraham nen pogorakik, Ishak nen pogorakik, Yakub nen pogorakik, ninakombalak amberek nen pogorakik, kagako laguka mende etnogo nenat, aʼbut Yesus nggogot deke o. Mende, kit nen, it amberek nen wasuwagaluk ininggimo ʼbegepma, at Pilatus nen inggi kerle piyalogo wula ʼbigiluk kagake mende, kit nen,
Ap eti ninaʼit o, yiluk yegep etnogo. 14At Allah nen laʼbi wagikemo obabut mot-mot kagarigogo mende, kit nen Pilatus yogoko dogolik,
Ap eti ebe ninaʼit o. Ap omanggi akoni inako mendeat, kit nen ap etiat inggi kerle piyalogo woknisan o, yiluk nggino yogokep ambigi. 15Ninilugut ninabigogo mende erlo ebe at mende, kit nen wakepma Allah nen, ebe warek mende ilugut dekemo, nit ninilenggen eberogonat kogosik nen yokisiligogi o. 16Ap iyok ut warek welaga mende yi nen,
Yesus eti eberogonat, yiluk endaga mbalogo, endainggen at oba panggot deke eti paga, ap yi kinilenggen kasi lagap mende, ebe kinilu mende etnogoat obatne aga yi. Endainggen esigit diluk Yesus oba panggot deke eti paga, kit kinil oba mondok panot dekemo yi. 17Mende, nagarlagi nirugi o. Kit kineugi ap nggokndek kinom Yesus ake kagakep eti, kinonggodek dogolik kagakepma eti, an nilu o. 18Paganeat Allah nen,
An nen ndil kinabigin mende Kristus kinoba laʼbi wisigin eti, ebe yi aik ndi aik oba ʼbiluk wasugunat o, yiluk abok yisike mende eti, ebe it ap at ane yogisasi laguka mende yomenogo inebe taʼbokogonat nen yisi laguka eti kagat, kagat lasuwagaluk kagat laga yi. 19-20Eti paga, kit weyak kagako lagap mende eti, ninombae Endaganggok Allah nen sagalogo deget diluk, kinendainggen ake kinil enggatogo kagat kinabi wagik, nen, at nen,
Kristus kinebe ndil kinabigogo mende kinoba laʼbi wisigin, yiluk abok yogisasike etnogo ebe Yesus etiat kinoba yabunggane laʼbi wagik, kagasuwak nen, kinobabut kwalatluk kineloke Allah wogotni o. 21Yogondak ya, Yesus ebe mbogot oba dogusak obaat dogogin o. Dogoluk nen, kurli Allah nen yi mende ndi mende taʼbokogonat ngget kagarogo kagasigin eti kurliat wusa ʼbi wisigin o, yiluk paganeat it ap Allah ake dogolik at ane yogisasi laguka mende yomenogo nen yisuka kak, kagat lasigin o. 22At Musa nen, men yogisasike,
Ninombae Endaganggok Allah wene yokisasi dogowagaluk, ap kit mende omanggi an mendanggike eti kak, yabunggane mendigin etnaga. Mendumo, at nen yi wene ndi wene yokisagin mende etiat kinasuk mondok panorogo kolko dogusak o.
23Ta nen wene at nen yokisagin mende eti, asuk kolkidek mende kalok, at Allah nen, at aʼburi inakla nen pulogo wula ʼbiyalok weyagat digin o, (Ul. 18:15, 18-19)
yiluk yogisasike. 24It ap alebat Allah wene yogisasi laguka mende yomenogo, kurli at Samuel eti kurli nen, it yabunggane Allah wene yogisasi laguka mende inomat, inebe taʼbokogonat nen, wene nit o yogondak werek ya dogolik kagako lago mende ake yisi laguka. 25Allah nen wene abok yoknisasike mende it ap alep at ane yogisasi laguka mende yomenogo nen yogisasi laguka eti, kit pasigat o. Nen, Allah nen nit ninakombalak wene warogo woginakike eti, kit pasigat o. At Allah nen Abraham yogoko dogolik,
Kat nen endago mende eti paga akoni agat oba mende yoma yi akoni ndi akoni inunggulowak endaga dombok panorinabigin o, (Kej. 22:18)
yiluk abok yogisasike. 26Allah nen, wene eti abok yogisasike kak, kit weyak kagako lagap mende kinebe dombok kinomborlikngge togot diyawagaluk aʼbut ebe pano kinabigin mende kit ndak kinoba wusa ʼbi wagike o,” yiluk inasuk wakike.
Одоогоор Сонгогдсон:
La’biyaske 3: DNA
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
