La’biyaske 4
4
Petrus Yohanes imbisak ap wene erlo mbileligogo mende inoba wogisek laguka wene
1It Petrus Yohanes imbisak nen wene esigit diluk akoni yomenogo awan yogisasinem eranogoat, it ap Allah indewerek mende inom, Allah ago palek anggorlem welaguka mende inewe nggok mende inom, ap Saduki mende inom, inoba waguka. 2Wagukasikmo, it Petrus Yohanes imbisak nen wene akoni yanggul isasi dogolik,
“Yesus watlagasik iluk aga eti, akoni watlarigogi mende inilugurinabiginat o,” yiluk yogisasi laguka eti paga, it ap yomenogo inakla agaga dagasike. 3Inakla agaga dagaluk, ininggi kerle warogo nen, o arat ki agikemo, kubulukngge inendema waganuwogoluk, o akoni kerle warogo ʼbiyasukama nggola ʼbiyasukasik pagisek noge yisuka. 4Esigit diluk mende, it Petrus Yohanes imbisak esigit diluk awan nggola ʼbiyigidek werek nggorlek, wene akoni yogisasukama, it wene inasuk kolkuka mende yomenogo inebe dogalegat nen,
“Wene eti eberogonat,” yiluk waganggukama, it alep mende inom, yabunggane mende inom, dambukogo, ap arlek ininggi wenaginakonem dogalegat 5.000 negen kagat laguka.
5-6Esigit diluk kagat lagukasikmo kubulukngge it ap nggokndek yomenogo inom, inarluwendek yomenogo inom, Allah wene kolal mbalek indewerek mende yomenogo inom, nandorlogo, it Allah indewerek mende inewe nggok Hanas inom, Kayafas inom, Yohanes inom, Aleksander inom, Allah indewerek inewe nggok mende agoromi amberek inom, o Yerusalem nandokuka. 7Nandokukasik nen, Petrus Yohanes imbisak inoba wogisek wagukasik inebe orlo mendiyasukasik nen, inendema wagangguka. Inendema waganggo dogolik,
“Kit nen ap iyok ut warek mende kagakep eti, nena mende obatne paga kagakep. Nen, ta endaga mbalogo kagakep,” yiluk yisukama, 8at Petrus Allah Agurengge akla nggerlek welagike mende etnogo nen wene men yogisasike,
“Neugi, nombae lak wa. 9Kit yogondakne,
Ap iyok ut warek mende eti nena mende obatne paga pano kagakepma, yiluk ninendema waganigogi yi. 10Eti pasik, kit taʼbokogonat inom, akoni inunggulowak endaga Israel mende inebe amberek taʼbokogonat inom, kinilu asuwagaluk wene erlo kundukogo yokisak. At Yesus Kristus ago Nazaret mende kit nen o paga mendiluk wakepma Allah nen ilugut deke mende etnogo endaga paga ap yi pano agasik kinil oba mendek pano werek yi. 11Paganeat Allah wene paga kolal men mbalogo ʼbisuka,
Kit o nggit mende palko dogolik,
Nggit yi weyak o, yiluk togot diyegep mendeat, o kerlaga kagat laga yi, (Mzm. 118:22)
yiluk Yesus pasik, kolal mbalogo ʼbisuka o. 12At Allah nen, nit akoni agat oba yoma mende at omanggi nen ndil ninabuwagaluk endaga yanggul nisigidek eti paga, ap werlek mende nen ndil ninabusak erlok dek o. At Yesus nen ndil ninabuwagaluk, at arligat endaga yanggul nisasike o,” yiluk yogisasike.
13It Petrus Yohanes imbisak inayuk dek dogolik, wene ʼbukakogo esigit diluk yogisasinem, it ap yomenogo nen pogorinako dogolik,
“Ap yi sekolah yanggul kidek. Inonggodek uma mendeat ogwe, Yesus inom noko laguka mende etnogo nen kigi o,” yiluk didiyasuka. 14Didiyasukasik, ap iyok pano kagakuka mende etnogo, it Petrus Yohanes imbisak inom mendek werekma, inilenggen kalok nen, it ap yomenogo nen wene ninggit diluk yogisaʼbugat kagat lagikemo nen, yogisigidek togot disuka. 15-16Togot disukama, Petrus Yohanes ap etnogo inom, o wene erlo mbileligogoma nen wula ʼbiyasukasik, it-it wene yisi dogolik,
“Ap inebe mbere eti ninggit diluk kagarinabuwok ambegep. It nen kagasusak dek mende elalinat kagakama, akoni o Yerusalem dogoligogi mende taʼbokogonat inilu agaka eti paga, nit nen,
Esigit diluk kagakidek, ninonggodek, yiluk laʼbelusak, erlok dek aga o. 17Esigit diluk mende, wene eti wikakogo akoni dogalegat inasuk kolik launogo yiluk,
Yesus endaga mbalogo wene yabunggane mondok yogisagup o, yiluk inasuk warogo wene mbaluwok o,” yiluk yisuka. 18Esigit diluk yisukasik nen, imbisagat waisasukama, iniyogoba unggisukama, men yogisasuka,
“Kit nen Yesus endaga mbalogo wene akoni yogisigik, yanggul isigik, mondok kagakup o,” yiluk inasuk warogo mberisasuka. 19-20Esigit diluk yogisasukama, it Petrus Yohanes imbisak nen,
“Allah il oba mot-mot kagasusak, nggi. Kit nen,
Esigit diluk kagasusak, yiluk yegep mende eti kologo kagasusak a? At te, Allah nen,
Esigit diluk kagasusak, yiligogo mende eti kologo kagasusak a. Kinakla ebetni. Nit nen, ninilenggen kigik, ninasuk kolkik, kagako mende eti, akoni amberek yogisigidek puk dogusak erlok dek eti paga yogisasi dogogunat o,” yiluk yogisasuka. 21Esigit diluk yogisasukama, ap etnogo elalin kagakuka eti pasik, akoni taʼbokogonat nen Allah pogorako laguka eti paga, wene ninggit diluk inoba ʼbuʼbugat kagat lagikemo, inasuk negen yabunggane warogo werlegat wula ʼbiyasuka. 22Ap iyok ut warek mende elalin kagakuka eti, ebe umur 40 tahun welagikesikmo nen, pano kagakuka o.
Allah aʼburi nen sembayan yisuka wene
23It Petrus Yohanes imbisak etnogo, it ap nggokndek yomenogo nen ininggi kerle piyalogo wula ʼbiyasukama nen, inagarlagi inom inirugi inom Allah aʼburi mende yomenogo werekma inoba laguka. Lagukasik nen, men yogisasuka,
“It ap Allah indewerek ineugi nggokndek yomenogo inom, inarluwendek yomenogo inom, it nen wene yigit diluk yoknisega,” yiluk mbilelogo yogisasuka. 24Esigit diluk yogisasi lagukama inasuk kolkukasik nen, inom dambukogo inendainggen omanggiat dogolik, Allah ayonggo ʼbisuka. Ayonggo ʼbisi dogolik,
“Ninombae. Nit kat kapma werek yi. Mbogot walkigik, agat walkigik, i laut nggok yenggelek walkigik, yi mende ndi mende mbogot oba, agat oba, ima dogoligogo mende taʼbokogonat walkigik, kat nenat kagakigin o. 25Nit ninakomba Daud etnogo kat nen, at ayonggo ʼbisiginmo, Kagurengge akla dogolik, wene kat nen yisigin mende, at nen men yisike,
Yi akoni ndi akoni sikmangge mende inakla agaga dagaluk, wenemuk yiligogi eti nenaluk. Nen, it akon inunggulowak endaga ya mende nda mende wene wirlikogoat mbalka eti nenaluk.
26It ap inendaganggok agat oba mende yoma melatluk, nggokndek amberek inom dogalogo nandorli witluk, ninombae Endaganggok Allah eti, it nen, Ebe ninaʼit. Aʼbut Kristus ayonggo ʼbiluk laʼbi wagike mende eti, ninaʼirat. Ninom abuwok, yiluk eti pasigat kwalogo werek, (Mzm. 2:1-2)
yiluk yisiginmo ebe Daud nen yisike o. 27Esigit diluk yisigin kagat, at Herodes inom, Pontius Pilatus inom, akoni sikmangge mende inom, akoni Israel mende inom, kat kenggaerek kanduwanengge mende, Yesus nit akoni ndil ninabuwagaluk mendisigin mende etnogo, wasuwogoluk eberogonat o yoma dogalogo nandorli waguka eti ake yisigin. 28Mende, wene eti, kat kinggi obatne werek mende, kakla nen,
Esigit diluk kagasuwak, yiluk kakla ambasigin obaat, esigit diluk kagaka o. 29Mende, ninombae. Nit ninasuwogoluk yiligogi eti kilenggen iyan o. Wene kat nen yisigin mende eti, nit kagoromi yoma nen ninayuk dekogo yogisasi dogowagaluk kobatne woknisan o. 30Kat kobatne woknisasinem, kenggaerek kanduwanengge mende Yesus endaga paga kat kinggi pagaat akoni u pano kagarinakik, akoni wene diduwagaluk kagasusak dek mende elalinat kagarinakik, kagasigin eti, ebe nit nen kagarinako dogowagaluk kobatne woknisan o,” yiluk Allah ayonggo ʼbisuka.
31Esigit diluk Allah ayonggo ʼbisi lagukama, o it nandorlek welagukama eti aborlok yugul aborlok salek yisike. Aborlok yisinem, Allah Agurengge inebe taʼbokogonat inakla nggerlekogo unggisikemo, wene Allah nen yisike mende akoni inayuk degat yogisasi laguka.
Allah aʼburi inamende inebe taʼbokogonat sumbusogo kagako laguka wene
32It wene eberogonat yiluk wagangguka mende eti, inebe dogalegat mende, inendainggen omanggiat welaguka. Dogolik, inamende yi mende ndi mende taʼbokogonat,
“Yi an mende,” yiluk yigidegat mende,
“Nit taʼbokogonat ninamende,” yiluk yisi laguka.
33Esigit diluk yisi dogolik, it ap Yesus nen inebe inayonggo ʼbiluk laʼbiyasike mende yomenogo nen,
“Ninewe Endaganggok Yesus iluk agama ninilenggen arat kogo o,” yiluk inane mondok obatnerogonat yogisasi laguka. Yogisasi nggorlek, Allah obabut pano etnogo nen nggokogo yamagiyasi lagike. 34-35Esigit diluk yamagiyasi nggorlek, ineyagat indewerek welaguka mende inom, inago palek indewerek welaguka mende inom, akoni werlek mende inoba onggo uang waganggo laguka. Waganiluk nen, uang eti it nen wolok ap Yesus nen inayonggo ʼbiluk laʼbiyasike mende yomenogo ininggimo ʼbi wago laguka. ʼBi wagonem, it amberek inamende dek mende inebe dombok erlok sumbusogo wogisasi lagukama, it amberek inamende dek agidek welaguka.
36Esigit diluk kagako dogolik, ap omanggi endaga Yusuf. Unggulowak endaga Lewi mende. Ago endaga Siprus mende, it ap Yesus nen inebe inayonggo ʼbiluk laʼbiyasike mende yomenogo nen, nit ninane paga endaga Inendainggen Sebeligogo mende yiluk yu kak, it inane paga endaga Barnabas salkuka. 37Ap eti eyagat werekma, it amberek inoba onggo uang waganggikesik nen, uang eti wolok, it ap Yesus nen inayonggo ʼbiluk laʼbiyasike mende yomenogo ininggimo ʼbi wagike.
Одоогоор Сонгогдсон:
La’biyaske 4: DNA
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
