AEMAWIRISAS 9
9
Saulus ay bi binip aceceremef
1Barewen. Saulusam jokmen atakam awutut e Tuhan mamkawi ow aotawa ajiawirien. Aram e ow bacatiw atakam aotawa ajiawirien. Aramat ipic masirin, e Allah atakam mamtaw tugas ipic awut bipu ajisosefen. 2Ar surat kuasa janim aanimefen. Ar e surat kuasa, e kota Damsik sembahyang cem takas kepala ow batetam aememefen. Inimas erasan ara, Saulus, e Tuhan bokot bacowojar owerownew, cepesnew, aporcow, aramat ipic e ow ban bakimom ara. Aram e ow manam bajikapom, wunam Yerusalem bajisomosom ara. Inim surat kuasa janim aanimefen. 3Bare, Saulus e Damsik ajarefen. Damsik sotop inim ajaref masirin, onam op sereas awutnakut afumi asarimseremnemefen. 4Bare, aramat ipic cenes aneyjuamesef, wunam atakam jen ajiefen. “Saulus. Saulus. Or dor jopom ajurusumamenem?” Inim atakam jen ajiefen. 5Saulus masirin, “Tuhan. O cam?” Inim aeefen. Aramat ipic masirin, “Do Yesus ara. Dor e ajurusumamenem ipic ara. 6Or ara nat, basitey. E kota aman apiwey. Ow, e aemcemas, atakam or aotawceman.” Inim aeefen. 7E Saulus akac ajarfes owam, atakamin jen ajifesen. Ar ow bi bapor opok cowoken. Inimas ar junum awutnakut aefesen. Aram jokon cowok ajiemfesen. 8Bare, Saulus asitefen. Aram manmok terey aememef, e nat, aram bwempor asan opok cowok arawen. Ow masirin, aramat ipic ban fe e kota Damsik ajijimomiwfesen. 9Bar mamincop ajiwar, aramat ipic, manmok bwemtiw asan opoken. Ar amosam, bwiam, ban opok cowok arawen.
10Barewen. E Damsik ara, Yesus mamkawi ipic juwas Ananias aemapefen. Aramat ipic pok cowok desen aporefen. Tuhanam, atakam, aramat ipic aotawefen. “Ananias.” Inim aeefen. Ananias masirin, “Tuhan. Dor awamcey ara.” Inim aeefen. 11Tuhan masirin, “Oam basitey. E bokot jof juwas Tarowat mamjisosey. Or masirin, Yudas cem mamojisosey. Erasan kota Tarsus ipic juwas Saulus jonow mamtowporey. Aramat ipic janim dor aanimaman. 12Aram jipic cowok juwas Ananias esen aporma. Ananias ban e aramat ipic dam ton atatiwma. Er e amanmok bateremtamas ara. Inim pok desen aporma.” Tuhan inim aeefen. 13Ananias masirin, “Tuhan. Dor e ipic aemefas, atakam arke jen ajia aeof. Wun orow tarowat e Yerusalem aemapmes. E ipic, jokmenas e ow aomefen. Doram inim atakam jen ajiof. 14E Allah atakam mamtaw tugas ow awut, e ipic, e or asicimamenes ow, manam bajiktiw, atakam aamsakamfes.” Inim aeefen. 15Tuhan nat, atakam e Ananias aotawefen. “Bare. Oram baysosey. Dor e ipic, e dojuwas, e Yahudi opok samatam, e raja owam, e Israel owam, atakam botaw aeremtewof. 16E ipic kerja dor aemtamceman. Inimas aram ajurusemcema. Doram eras aramat ipic aporomtamcimin.” Inim aeefen.
17Bare. Ananias ajisosefen. Ar e cem afiwef, wunam aban Saulus dam ton atatiwefen. Aram atakam aotawefen. “Saulus. Or dojowow ipic ara. Or e bokotpu arasan aenawfem, Tuhan Yesus masirin, e obipu afomisfan. Aramat ipicam dor arasan atewenamaman. Er e omanmok batereyas ara. Eram Roh Kudus or momomkurumas ara.” Inim aeefen. 18Bare, enampa cimin pokk Saulus e amanmok ewkorneyefen. Amanmok masirin, aotereyemefen. Saulusam asitef, wunam ow, aramat ipic bwi abwimfesen. 19Aramat ipic masirin, amos aemenef, wunam fak aoememefen.
Saulus, Damsik acacapiomef
Bare, aramat ipic e Damsik capinmi Yesus mamkawi ow, bar mamincop cowkon ajamememefen. 20Aramat ipicam Yesus atakam e sembahyang cem aman akan acacapiomefen. “Yesus Allah atiw ara.” Inim aeefen. 21E aratakam jen ajifes ow takas junum aefesen. Aram jonow atowporfesen. “Ewamec ipic e Yerusalem Yesus basicim ow ajurusumef ipic aranew? Aram, e ow manam bajikapom, wunam e Allah atakam mamtaw tugas ow awut abipu batowom aenawef ipic aranew?” Inim aefesen. 22Saulus e atawef atakam, fak kayimin akakayimtawefen. Aram atakam umutonnakut, e Damsik aemapfes Yahudi ow, aotawefen. “Yesus, e Allah Aeremtewef Ipic ara.” Inim aeefen. E ow masirin, atep bwemjit asan opoken.
23Isi arke ara masirin, e Yahudi ow, e Saulus bacatiw, atakam aamsakamfesen. 24Saulus nat, e atakam aamsakamfesas, jen ajiefen. E ow jokam, iramam, e kota fumi ek pagar jimasap takas, manmok atiwapfesen. Ar Saulus bacatiw aemfesen. 25Iram nat, Saulus amamkawi ow, aramat ipic atewfesen. Ar aramat ipic ek pagar jof afimisimfes, wunam tem ese aman cenes atewnemfesen.
Saulus Yerusalem jaki ajitef
26Bare, Saulus Yerusalem ajisosefen. Ar e Yesus mamkawi ow ajamkawiemporefen. E ow nat, ar omar aefesen. Ar Saulus, Yesus mamkawi pir aeef inim arawen. 27Barnabas nat, aramat ipic atawef, wunam e atakam botaw batewosom ow bipu atowocenefen. Aram atakam e ow aotawefen. “A Saulus e bokotpu ajaref, ar Tuhan bi aporef. Tuhanam atakam aramat ipic aotawef. Aramat ipicam e kota Damsik aememef, ar Yesus atakam umutonnakut acacapiomef.” Barnabas inim aeefen. 28Barewen. Saulus e ow e Yerusalem asan takas akac ajarfesen. Aram Tuhan atakam umutonnakut acacapiomefen. 29Aram e Yunani atakam Yahudi ow, atakam aamtawfesen. E ow nat, Saulus bacatiw aemfesen. 30E Yesus mamkawi ow inim atakamam jen ajifesen. Inim atakam jen ajifes masirin, ar Saulus e kota Kaisarea ajisomosfes, wunam aramat ipic kota Tarsus atewosomfesen.
31Bare, e Yudea capinmiam, e Galilea capinmiam, e Samaria capinmiam, e Yesus basicim barewsi ow takas bojurus opok aemapfesen. Ar Yesus fak ajamkawifesen. Aram Tuhan omar aefesen. E Roh Kudusam jak fak e ow atetamefen. Inimas Yesus basicim ow, arke kayimin akakayiemfesen.
Petrus, Lidaam, Yopeam, jaki ajitef
32Barewen. Petrus e asanin asanin acowojarefen. Jofay ara, aram e Lida capinmi tarowat ow bipu ajisosefen. 33Erasan, aramat ipic jipic juwas Eneas biamnuk aemamtewefen. E ipic, japow ipic arawen. Tuhan delapan ajiwar ar e tepen ton bwemsit asan opoken. 34Bare, Petrus atakam e ipic aotawefen. “Eneas. Yesus Kristus or ajaworomsumutumaman. Basitey. Otepen batawkenemapomey.” Inim aeefen. Bare. Aramat ipic asarimsitefen. 35E kota Lida aemapfes ow takasam, e Saron capinmi aemapfes ow takasam, aramat pic aporfesen. Aram bin afirifes, wunam Tuhan ajamkawifesen.
36Barewen. Kota Yope ara, Tuhan mamkawi cowoc juwas Tabita aemapefen. (Yunani atakam, ajuwas “Dorkas” arawen. E juwas “Dorkas” daratakam juw buwumtew, “rusa” ara.) E cowoc aemawirias akatnakut arawen. Aram pok opok ow, pok atatamawirien. 37Jofay ara, e cowoc dam ajowef, wunam damir aafefen. Ow masirin, e damir cowoc bwi abwimtiwfesen. Bwi abwimtiwfes masirin, op kamar atomettatiwfesen. 38E Yesus mamkawi ow nat, “E Petrus, Lida capinmi awap,” inim atakam jen ajifesen. Aram Lida ase opok aporfes, wunam jipic jamnuk, e Petrus bayte, atewosomfesen. “‘Sarim mamenawey,’ e Petrus inim mameey.” Inim aefesen. 39Bare, Petrus asitef, wunam e ow akac ajarfesen. Erasan ajaremef masirin, ow, aramat ipic, e op kamar atowotometfesen. E fwisma cepesam, afumi aamwiciremfesen. Aram e Dorkas, e tetakay emapawiri, e akekemawiri bajuam, pakaianam, takas aporomtamfesen. 40Petrus nat, e ow takas, cesen bawarimwis, jirmec ajirimefen. Ar masirin, jine onok aotapef, wunam janim Allah aanimefen. Aram e damir cowoc bin afiromef, wunam atakam aotawefen. “Tabita. Basitey.” Inim aeefen. E cowoc masirin, manmok atiwtereyefen. Ar Petrus bi aporef, masirin asitapefen. 41Bare, Petrus e cowoc ban atewef, wunam asumutumemefen. Ar masirin, e tarowat owam, e fwisma cepesam, ajateefen. Aram e cowoc, tetakay, e ow aporomtamtotorefen. 42E kota Yope ow takasam inim atakam jen ajifesen. Owam arke Tuhan asicimfesen. 43Bare, Petrus bar arke e Yope aemapefen. Ar binatang picin kerja ipic juwas Simon acem aemapefen.
Одоогоор Сонгогдсон:
AEMAWIRISAS 9: LAICNS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
