AEMAWIRISAS 10
10
Kornelius
1Barewen. Kota Kaisarea ara, jipic juwas Kornelius aemapefen. Aramat ipic tentara komandan ipic arawen. E tentara ow, juwas “Italia Tentara Ow” arawen. 2Aramat ipic agama mamkawi fak ipic arawen. Aram, acem ow takasam, Allah asicimawirisen. Aram uang awut, e Yahudi pok opok ow, atatamawirien. Aram janim Allah aanimawirien. 3Bare, jofay ara, jam tiga porow inim, aramat ipic, Allah malaikat desen aporefen. E malaikat abipu umuton cowok afomisef aporefen. E malaikatam atakam aotawefen. “Kornelius.” Inim aeefen. 4Aramat ipic masirin, e malaikat manmok aoromsimopef wunam, “Tuhan. Or ucimasam?” Inim aeefen. E malaikat masirin, “Allah e janim aanimawarmemas jen ajima. Aram e uang e pok opok ow atetamawarmem aporma. Ar or bi binip acomomama. 5Bare, oram ow kota Yope mamtewosomey. Jipic juwas Simon mamjateey. Ar wun juwas Petrus ara. 6Aramat ipic binatang picin kerja ipic juwas Simon acem awap. E cem e jopir awames.” E malaikat inim aeefen. 7Barewen. E Kornelius atakam aamtawef malaikat, ajisosefen. Ajisosef masirin, Kornelius, akerja bwemtam ipic jamnukam, tentara ipic cowokam, ajateefen. E tentara ipic agama mamkawi fak ipic arawen. Aram Kornelius kerja bwemtamawar ipic arawen. 8Bare, Kornelius e atakam takas e ow aotawefen. Aotawef masirin, ar e ow Yope atewosomefen.
9Ajofay masirin, e ow e wasec ajarfesen. Aram Yope sotop ajarfes ara, e Petrusam e cem onewmak op, Allah janim manim atometemefen. Er jok ara, jam dua belas arawen. 10Barewen. Petrus amosto arawen. Ar amos memem akaten. E wun ow amos a bajewtam aememfes ara, aramat ipic pok desen aporefen. 11Ar e onam op amuwapef aporefen. Wunam co pok cenes aneyef aporefen. E pok, picin awut inim cimin arawen. Aram jep tete empat ajiwar banitep aneyefen. 12Bwey empat ajiwar epcom binatang jukpiriam, capinmi fafasijarmes pok jukpiriam, onam op apipimes sok jukpiriam, e co pok aman arawen. 13Petrusam atakam jen ajiefen. “Basitey. E pok bacatiwey. E das memeney.” Inim atakam jen ajiefen. 14Petrus masirin, “Tuhan. Inimas arapok. Dor e karow poknew, e ponow poknew, memen nomsom opok.” Inim aeefen. 15Bare, Petrus e atakam jen aojiefen. “Or e Allah memen pok akenemapomefas, karowas baji arapok.” Inim atakam jen ajiefen. 16Eras bar mamincop aemef, wunam e co pok onam op aosarimtometefen.
17Barewen. Petrus e desen aporefas bi binip arke aceceremefen. “E ucim pokam?” Inim bi binip aceceremefen. Inim bi binip cowocceceremamepaw, e Kornelius atewosomef ow e cem aporfesen. Ar masirin, e cem pagar jimasappu aememfesen. Bap ara, e wo kawey ow jonow atowporfesen. “Simon cem onakaram?” Inim aefesen. 18Bare, e ow e cem pagar jimasappu aememfes, ar atakam awut aotawfesen. “A cem, jipic juwas Simon Petrus awap open?” Inim aefesen. 19Petrus nat, e desen aporefas bi binip cowocceceremamepaw, e Roh Kudus, atakam aramat ipic aotawefen. “Jakaperey. Jipic mamincop or apowmenes. 20Oram basitey. Bakorneyey. E ow jamkawiey. Oram omar arapok Dor e ow dorma atewenamof.” E Roh inim aeefen. 21Bare, Petrus e ow bipu cenes aneyemefen. Atakamam aotawefen. “Caram jakapor. Dor e apowmenokom ipic awamcey ara. Arasan aenawmokom ucimasam?” Inim aeefen. 22E ow masirin, atakam aotawfesen. “Kornelius tentara komandan ipic ara. Aram tarowat ipic ara. Aram Allah omar ipic ara. E Yahudi samat ow takas e ipic asicimames. Malaikat tarowatam atakam aramat ipic aotawefen. ‘Or Petrus mamjateey. Aram e ocem baenawcow. Or masirin, aratakam jen pajiey.’ E malaikat inim aeefen.” Inim aefesen. 23Bare, Petrus, e ow, e cem atowomiwefen.
Ajofay masirin, Petrus asitefen. Ar e ow ajamjisosefen. Wun Yope Yesus mamkawi owam ajamjisosfesen. 24Petrusam, e owam, e bowsec isi cowok aememfes, wunam kota Kaisarea ajaremfesen. Korneliusam, e ow manmok afeefen. Bap ara, Kornelius arowcamweyam, ajowowam, aaramsisimefen. 25Petrus e cem bafiw aememef ara, e Kornelius, aramat ipic biamnuk aemamtewefen. Kornelius masirin, Petrus bweypu fop aneyjiapefen. Aram Petrus asicimefen. 26Petrus nat, e Kornelius asumutumefen. “Basitey. Doram asmat ipicman.” Petrus inim aeefen. 27Aram e Kornelius atakam aoamtawef, wunam e cemam afiwefen. Ar e ajarewsiapfes ow arke aporefen. 28Aram atakam e ow aotawefen. “Caram camsom ara. Yahudi samat ipic, Yahudi opok samat ow, mamkawiap karow ara. Aram e Yahudi opok samat ow acem jaki karow ara. Allah nat, dor kawey ow, karowam, pwicakam, baji arapok, inim aporomtamfan. 29Inimas ara, car ajatefenokom, dor bi binip arke opok aemof. Do nat, jonow ca batowpor. Car ucim pok jatefenokom?” Petrus inim aeefen.
30E Kornelius masirin, “Atowmar ara, jam tiga jok inim dor e docem aman, janim Allah aanimof. Er inim inim jam ara. Jipic cowok pakaian sereas epcomam a dobipu asarimememef. 31Aramat ipicam atakam aotawfan. ‘Kornelius. Allah e janim aanimawarmemas jen ajima. Aram e uang e pok opok ow atetamawarmem, inim bi binip acomomama. 32Oram ow Yope mamtewosomey. Oram ipic juwas Simon Petrus mamjateey. Aramat ipic binatang picin kerja ipic juwas Simon acem aemapma. E cem e jopir awames.’ E ipic inim atakam aotawfan. 33Dor ara masirin, or akan ajatefin. Oram jak akat aememfem. Inimas or arasan aenawfem. Bare, dar takas, e Tuhan jirmec or ajirimfanas takas jen baji, Allah bipu aemapmom ara.” Kornelius inim aeefen.
Petrus acacapiomef
34Barewen. Petrus atakam e ow aotawefen. “Allah, ‘inim ow akat, inim ow pwicak,’ baji opok. Aram damos takas ajiomama. Dor inimas apormin ara. 35Allaham e samatin samatin aromar owam, e akatas bwem owam, akat aporma. 36Allaham ow aratakam e Israel ow botaw atewosomef. E Atakam Akat, inim ara: ‘E Yesus Kristus aemefas, Allaham, Asmatam, damos mamjiomas ara. E Yesus Kristus, bare ow takas aTuhan ara.’ Ar ow inim atakam e Israel botaw atewosomef. Caram e atakam camsom. 37Bap ara, Yohanes bwi babwim atakam acacapiomef. Asep ara masirin, Yesus, awutnakutas, e Galilea capinmi aemef. Wunam ar eras e wun Yudea capinmi takas aemef. Caram inimas camsom. 38Bare, Yesus e Nasaret ipic ara. Allaham, Roh Kudus, aramat ipic atetamef. Aram fakas aramat ipic atetamef. Aram aramat ipic akac aemawiri. Inimas aramat ipicam e asanin asanin ajisosawiri. Aram akatas aemawiri. Bare, Iblis e wun ow aomoma aeef. Yesus nat, e ow ajaworomtawa aeef. Caram inimas camsom ara. 39Bare, dar Yesus e Yahudi ow capinmi aemefas takasam, e Yerusalem aemefas takasam, darma aporfom. Owam, aramat ipic salib os op atewtopomfes. Inimas ar aramat ipic acatiwfes. 40Bar mamincop nat, Allah, aramat ipic aojaworomsumutumef. Aram aramat ipic umuton aporomef. 41Wun ow nat, Yesus bi bopor opok. E Allah bap aereremtawforow ow cowok, Yesus bi aporfom. Allah, aramat ipic aojaworomsumutumef masirin, dar amosam, bwiam, aramat ipic cowkon aanfom. 42Aramat ipicam e Atakam Akat bacacapiom, jirmec ajirimforow. Allah, aramat ipic, e tetakay owam, e damir owam, adosa, atakam basakamtiw ipic atewemef. Ar inimas atemen bwe jirmec ajirimforow. 43Ametnak ara, Allah atakam botaw ow takas, aramat ipic atakam aotawfes. ‘Allah e aramat ipic aemcowas aporcemar. Inimas ar e aramat ipic asicimces ow takas, adosa akokoromosomcema.’ Inim aefes.” Petrus inim aeefen.
Wun Yahudi opok ow Roh Kudus atewetfes
44Petrus atakam basakaypi opok ara, e Roh Kudus, e atakam jen ajifes ow takas jak aman afiwaptotorefen. 45-46E ow masirin, kawey samatin samatin atakam jukpiri atawtotorfesen. Aram e Allah awutnakut aporfes, wunam aramat ipic asicimfesen. Bap ara, wun Yahudi samat Yesus mamkawi ow, e Petrus e Yope akac ewenawfesen. Aram e Yahudi opok samat ow atakam atawfesas jen ajifesen. Inimas ar Allah e Roh Kudus, e Yahudi opok samatam atetamef aporfesen. Ar masirin, junum awut aefesen.
Bare, e Petrusam atakam aotawefen. 47“A ow, Roh Kudus ateweteres. Aram dar cimin aemeres. Inimas a ow bwi babwim, acuw bat ow open?” Inim aeefen. 48Petrus masirin, ow Yesus juwas bajiem, wunam e ow bwi babwim, jirmec ajirimefen. E ow masirin, e Petrus, bar mamincop erasan akac bemap, janim aanimfesen.
Одоогоор Сонгогдсон:
AEMAWIRISAS 10: LAICNS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
