AEMAWIRISAS 11
11
Petrus, Yahudi opok samat Yesus ajamkawifes, atakam Yerusalem ow aotawef
1E atakam botaw batewosom owam, e Yudea capinmi takas Yesus mamkawi owam, atakam jen ajifesen. “E Yahudi opok samatam, Allah atakam jen emejifes.” Inim atakam jen ajifesen. 2Bare, Petrusam Yerusalem ajisosefen. E sunat bwem akat ow nat, e Petrus atakam aamtawfesen. 3“Or sunat opok ow cem jaki ajitfem, wunam amos e ow akac aemenfokom.” Inim aefesen. 4Petrus nat, e aemefas takas, atakam e ow aotawkurumefen.
5“E Yope aemapof, doram janim Allah aanimof. Dor masirin, pok cowok desen aporof. Pok picin awut cimin, onam op ewneyef. E picin, jep tete empat ajiwar aanitepef. E pok e dobipu cowok aneyef. 6Doram e pok manmok aoromsimopof. Dor masirin, binatang bwey empat ajiwar epcomam, wasan binatangam, fafasijarmes pokam, sokam, aporof. 7Doram atakam jen ajiof. ‘Petrus. Basitey. E pok bacatiwey. E das memeney.’ Inim aefan. 8Dor masirin, ‘Tuhan. Inimas arapok. E karow poknew, e ponow poknew, e dobweyof batowokop nomsom opok cowok.’ Inim aeof. 9Bare, e onam op atakam jen aojiof. ‘Or, Allah e memenas akenemef pok, karowas baji arapok.’ Inim atakam aotawfan. 10Inimas takas bar mamincop aemef, wunam e pok takas onam op aotometfes. 11Bare, inimas aemfes cowok masirin, Kaisarea ipic mamincopam e cem jimasappu asarimememfes. Ow e ow do bayte atewenamfes. 12E Roh Kudusam atakam aotawfan. ‘E ow mamkawiey. Oram omar arapok.’ Inim aefan. A Yesus mamkawi ipic enam ajiwaram, ajamjisosfenes. Daram e Kornelius cem afiwfom. 13Aramat ipic masirin, atakam aotawforow. ‘Dor malaikat, e docem aman aememef aporof. E malaikatam atakam aotawfan. “Ow, Yope mamtewosomey. Erasan jipic juwas Simon Petrus awap. E ipic mamjateey. 14Aramat ipic oram, ocem ow takasam, e ajoremcokom bokotpu, atakam aotawceman.” E malaikat inim aefan.’ E Kornelius inim atakam aotawforow. 15Dor atakam inimnakap atawof masirin, e Roh Kudus, e ow jak aman afiwaptotoref. Ar e bap aemforowas inim cowok ara. 16Dor masirin, e Tuhan atawef atakam bi binip acomomof. ‘Yohanes, ow, bwi abwimef. Roh Kudus nat, e cajak aman afiwaptotorceman.’ Tuhan inim aeef. 17Daram Tuhan Yesus Kristus asicimfom ara, Allah, Roh Kudus dar atetamforow. Allaham inimas cowok e ow atetamef. Dor inimas aporof masirin, dor Allah bwemcakekem asan opok.” Petrus inim aeefen. 18E ow inim atakam jen ajifes masirin, aram jokon ajiapfesen. Aram Allah asicimfesen. “Bare, Allah, dosa bak bapayemtotor, inim bi binip, e Yahudi opok samat emetetamef. E owam jiwnenak aatamemawarcemes.” Inim aefesen.
Antiokia ow Yesus ajamkawifes
19Bap ara, ow Stefanus acatiwfesen. Wun owam e Yesus mamkawi ow takas ajurusumfesen. Inimas e Yesus mamkawi ow, Fenisia capinmiam, wow juwas Siprusam, kota Antiokiam, apacayosfesen. E ow nat, e Yesus atakam, Yahudi samat ow cowok, aotawfesen. 20E wun Yesus mamkawi ow, bare Siprus ow ara. Wun masirin, kota Kirene ow ara. Bare, e ow Antiokia ajarapfes, ar Tuhan Yesus Atakam Akat, e Yunani samat owam, acacapiomporfesen. 21Tuhanam, e ow akac aemefen. Inimas ow arkenakut e atakam asicimfesen. Aram bin afiremfes, wunam Tuhan ajamkawifesen.
22Bare, e Yerusalem Yesus basicim barewsi ow, inim atakam jen ajifesen. Ar masirin, Barnabas, Antiokia atewosomfesen. 23Aramat ipic erasan ajarapef ara, ar, Allah, asan akat e ow emcatetamef aporefen. Ar masirin, jak akat aememefen. Wunam ar e ow takas Tuhan mamkawiawar fak atjen aowefen. 24E Barnabas, bare jipic akat ara. Roh Kudusam, aramat ipic aomomkurumef arawen. Aramat ipicam, Tuhan basicim fak ipic arawen. Bare, e Tuhan asicimfes ow, arke kayimin akakayiemfesen.
25Barewen. Barnabas, Saulus bapowpor Tarsus ajisosefen. 26Ar Saulus atewef masirin, Antiokia ajisomosefen. Bare, tahun cowokut ara, Barnabasam, Saulusam, e Yesus basicim barewsi ow akac ajarewsifesen. Aram atakam ow arke amememtamfesen. Bare, e Antiokia ara, ow, e Yesus mamkawi ow “Kristen Ow,” inim juwas bap a takam ajiapomfesen.
27Bare, e jofay ara, Allah atakam botaw ow, Yerusalem ewsitfes, wunam Antiokia aenawfesen. 28E wun ipic juwas Agabus arawen. Bare, Roh Kudus, atakam bi binip, aramat ipic atetamefen. Aramat ipic masirin, asitef, wunam atakam aotawefen. “Asep jofay ara, e capinmiin capinmiin ow takas amosto awutnakut aemapcemes.” Inim aeefen. Asep ara masirin, Klaudius raja ipic aememef ara, ow amosto awutnakut aemapfesen. 29Inimas e Yesus mamkawi ow, uang, e Yudea capinmi Yesus mamkawi ow batiwirim, atakam aamsakamfesen. Uang awut ow, uang awut batiwirim, wunam uang kanim ow, uang kanim batiwirim, inim atakam aamsakamfesen. 30Bare, inimas cowok aemfesen. Ar e Barnabasam, Saulusam, e pok, e ketua ow batowocentam, atakam aotawfesen. Bare, e Barnabasam, e Saulusam, e uang atowocenfes, wunam e ketua ow atetamfesen.
Одоогоор Сонгогдсон:
AEMAWIRISAS 11: LAICNS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
