Mbete Luk 11
11
1Zezu ƴo ɓah ɓay ke Ŋgerzah ké gel a hani-u mbew. Ke ɔk dale, nzuk mbew ké sakra nzukri ké ƴo dih fal ye gi ta̧w ye ɓahri : « Ŋgernzuk, mú firma na ɓáh ɓay ke Ŋgerzah kandɔk Za̧h batisi firma nzuk-dih fal yeri pi. »
2Bale Zezu ɓahri : « Gelke i ƴo ɓah ɓay ziŋ Ŋgerzah le, í ɓah kandɔkay :
Baah, riŋ ɗina wo mbew yaŋ ɓá mgbe ké nzak nzukri ɓahri, mu ɓa záh woyri. Lák mbay wo ɓá ya̧ gelri ɔh riw. 3Mú hi̧ na fe su̧na a namu-aw náh su̧ nam ke nam. 4Mú lu salɓay suya ké tul wah ɓayu ké nah ƴo sel nzukri ké ƴo laɓ na suya gbam. Le mú hi̧ fe-leh law ɓá ziŋ na ya. »
5Zezu el ɓahri se : « Ké sakra woiri-ay a ge mí mgba ya̧h ya le wo ? Nzuk mbew rih tul ya̧h ye ke haŋgel. Ke ɓahri : “Ya̧h, mú ta mi peŋ say. 6Gahru gi puh bi, mí mi ko fe mbew ké ɓay mgba ni keni ya.” 7Ya̧h-u ba, ɓay yih nzak ye ɓahri : “Ya̧h, mú zɔklɔ mi ya. Tuhru vul tu-tuh da. A wah ke gun biri, nah na nam. Mahful ɓay mí ur síɓa hi̧ mu peŋ ta-a.”
8Mi ƴo ɓah hi̧ wuri, ke sa ur síɓa ɓay mbi fe hi̧ mbaŋ ye ɓayu ké-e ɓa ya̧h ziŋ ni ya. Ɓay su̧hru mí ke úr ɓay hi̧ fe-mgba gahru gbam hi̧ ya̧h ye. 9Mí-i ƴo ɓah hi̧ wuri, í vbi Ŋgerzah, ke ɓay lah wuri. Í ƴah ni, ke ɓay hi̧ í ziŋ ni#11.9 Í mgba Mbete Amos 5.4, Mbete Deutéronome 4.29, Mbete Esaïe 55.6 tuh ke gel ki̧na-ay.. Í vba̧ nzak vul ye ŋguŋ ŋguŋ, ke ɓay mgbur nzak vulu hi̧ wuri. 10Ɓayu ké nzuk a suŋ suŋ ké vbi Ŋgerzah le, nzuku ƴo ya̧-ya̧. Nzuk ké ƴah ni le, nzuku ƴo zíŋ ni. Nzuk ké vba̧ nzak vul ye le, ke ɓay mgbur nzak vulu hi̧ ni.
11Ké sakra woiri nzukri ra wa, gun vbi bah ye nzuy le, bah ye ɓay mbi soy hi̧ gun ye ra le wo ? 12Gun vbi pa̧hra ndoy le, bah a suŋ ɓay mbi ndáy ɓu ndɔk ye le ? 13Mí kaŋaw ba, a woiri nzuk law a pipiri-uri, i tu hi̧ fe a suki hi̧ gun woiri-aw ra wa, ɓay laɓ ani ɓáy mí baah ké nunmbam ba, ɓay hi̧ Tempuki hi̧ nzukri ké ƴo vbi ni, ya le wo ? »
14Mbiki a hani ƴo ri. Záh mbih kusol ye. Mí Zezu ni̧h záh ké tul mbiki ra bale, ke el ɓah ɓay. Fe-u na daɓa nzukri yer. 15Nzuk a hani-uri ba, ɓahri : « Ke ŋgerna mbay záh tukala a ye Belzebul mí ke ƴo ni̧h záhri ké tul nzukri-aw. »
16Nzuk a ɓoruri ba, fah Zezu ɓay ké laɓ fe saŋ hi̧ niri kú ko, sa̧wu ɓa nunmbam le ? 17A ye ba, ke tu kerɓay woyri tu, mí ke ɓah hi̧ niri ɓahri : « Puh lakna a suŋ suŋ ké nzukuri kehr hani le, gbakra hani ƴo ri. Kerpuh ké nzukuri kehr hani le, ti̧h ɓa kaŋpele. 18Kaŋaw mí mbay záh tukala kehr ra hani ke záh yeri le, lák mbay ye ɓay ƴo ani ɓáy le ? A woiri i ɓahri se, ke ŋgerna mbay záh tukala mí-i ni̧h záhri ra ley ? 19Ke ŋgerna Belzebul mi ni̧h ra záhri wa, gun-toŋ fal woiri ba, ni̧h záhri ke ŋgerna fe le ? Sa̧wu mí ku ɓay nda pol ɓa mbay woiri.
20Mí-i ni̧h záhri ke ndɔk Ŋgerzah bale, lák mbay Ŋgerzah ti̧h tul woiri da. 21Gelke nzuk huhrumun ƴo ke fe remri, mí ke kɔr keni kerpuh ye le, fe yeri na ɗeŋ. 22Nzuk huhrumun a ɓoru gi rih tul nzuk a polaw mí haw ni ke ŋgermu dale, ke nah fe remri ké nzukaw ŋger mun ye keni dara mí ke fá̧h fe yeri riw el wal. 23Nzuk ƴo fal ŋgaŋ bi ya le, ɓa nzukbaa bi. Nzuk mbu̧h nzukri gel mbew ziŋ mi ya le, gbakra nzukri.
24Gelke záh tukala ti̧h ke tul nzuk le, ke ha̧rma ɓil lawkɔr yek yek ƴo fakla gel nam. Ke ziŋ ya dale, ke el ɓahri se, a ye ke él si doro gel kaɓna ye a pol ra.
25Ka̧hna ye dale, ke ziŋ gelu te-teh, gelu lek na guk guk ɓa suki. 26Wara mí ke si fa̧h záh a ɓoruri toŋndɔk say ké mgbɔrna woyri kal mgbɔrna ye ka-kal. Ku gi ɗeh puh ké tul nzuk ra. Wara mí kó nzuku baseh mbamba kal nzuku a pol. »
27Zezu ƴo ɓah ɓayaw bale, kusol wu̧y a hani ɗi fe ma síɓa ɓeleŋ ké sakra daɓa nzukri ɓahri : « Pol tehna ɓa a wu̧y ké mbuŋ mu ké hi̧ mu nzo pam ye. »
28Bale Zezu ɓahri : « Pol tehna ɓa a nzukri ké lah ɓay Ŋgerzah kú-u ƴo tulu ma. »
29Ké daɓa nzukri ƴo mbu̧h haniri tul Zezu nzuturu ra, ke ɓah ɓay ɓahri : « Gun tukala-ayri ɓa nzuk law a pipiri-uri. Ku nzah ɓay ko fe saŋ. Mí fe saŋ le ku ɓay ko ya. Sa ɓa fe saŋ a a̧y ké laɓ Zonas gun nzak pihna Ŋgerzah a lewsa̧ kú-u ko-aw. 30Kandɔk fe saŋ ké ti̧h tul Zonas#11.30 Fe saŋ ké ti̧h tul Zonas na ɓil Mbete Jonas. hi̧ nzuk Ninive a lewsa̧ri ko ra, fe saŋaw ɓay ti̧h tul gun nzuk pirmatul kaŋ hi̧ gun tukala-ayri pi.
31Mbay a wu̧yu ké lak mbay tusiɓa a fál ɓel ɓil seh lewsa̧ ɓay ti̧h ke gun tukala-ayri#11.31 Ɓay mbay a wu̧yu ra na ɓil Mbete 1 Rois 10.1-10.. Ku mbú̧h ma gel-kuŋ salɓay. Fe laɓna ye ɓay ten suya woyri hi̧ salɓay suya mgba tul woyri ɓay fe le, a ye ke ur ke gbu̧h tusiɓa si lah ɓay ru̧na Salomoŋ mbay a luki. Mí nzuk ké ƴo-ay ba, mba tul Salomoŋ ra mba-mba.
32Nzuk Ninive a lewsa̧ri ɓay ti̧h ke gun tukala-ayri. Ku mbú̧h ma gel-kuŋ salɓay. Fe laɓna nzuk Niniveri ɓay ten suya gun tukala-ayri hi̧ salɓay suya mgba tul gun tukala-ayri ɓay fe le nzuk Niniveri lah kahɓay Zonas ra, mí ku mbi law woyri ké tul suya ma fal el kan law tul nzak pihna Zonas. Mí nzuk ké ƴo-ay ba, mba tul Zonas ra mba-mba.
33Nzuk oh hɔrɔ ta lampe ɓay el mu̧h ké duh gel ya. Ke mbi mbɔhrɔ guɓ ri ya pi. Wara le nzuk oh hɔrɔ ta lampe ɓay mbi kan síɓa hi̧ nzukri ko gel tehna. 34Lampe ké mun wo mí ɓa nun wo. Nun wo te-teh le, gel te-teh ké mun wo gbam. Mí nun ra̧h le, gel sih nduŋ ké mun wo pi. 35Dale mú mgba sa̧w nun wo ger rɔkɔ gel tehna ɓá sih nduŋ ké mun wo. 36Gel teh ké mun wo gbam mí gel sihna ta ri ya le, gel tehna ɓay teh ké mun wo gbam kandɔk lampe ké teh gel gberere ké ɓil vul kaŋ. »
37Zezu ɓah ɓayaw, mí farizi mbew ɗi ni, ké si su̧ fe ké puh ye. Ku si, ku ka̧h, mí Zezu gi kaɓ nzak fe su̧na kaŋ. 38Farizi ko Zezu kaɓ kaŋ dan wɔk ndɔk. Mí a woyri ku wɔk ndɔk ɓa fe laɓna sa̧w zih woyri ɓay kú teh, mí gosoɓay mba ni. 39Bale Gaŋ tul feri riw ɓah hi̧ ni ɓahri : « Uwa. A woiri fariziri ra, i ƴo wɔk fal koɓ ke fal tasawri ɓa teh-u kaɗ kaɗ. Mí fál ɓilu bale mbah ɓa law bahu̧hmi ke law a pipiri-uri. 40Kɔk nzukri. A ye ké-e laɓ mun nzuk a fal kala ra wa, ɓa a ye mbew yaŋ ké-e laɓ law nzuk a fál ɓilu pi, ya le wo ? 41Mí-aw le, í laɓ law in ziŋ nzuk sehri. Dale fe laɓna woiri gbam ɓay na ɓa teh-u hi̧ wuri ɓáy.
42Ké fe laɓna woiri teh hi̧ wuri ya le, koseh ɓa nzuku a woiri fariziri. Ɓay fe le i ƴo hal gay-kar feri ké mah gelu ɓoɗ ɓoɗ ké waka woiri, i ƴo ŋga̧h ke gelu gelu ɓa gel boh boh, mí i mbi mbew mbew dim keni Ŋgerzah, mí sal in Ŋgerzah ke law sana ye le, i ƴo tulu ya. Dím Ŋgerzah ke fe ziŋna-uri su-su le, póŋ sal in ye ke law sana ye ɓá ta-a pi.
43Kúy. Koseh ɓa nzuku a woiri fariziri ɓay fe le, káɓ gel kaɓna ŋgernzuk ké ɓil vul misoŋ ɓa fe law sana woiri. I yih ɓay hi̧ nzukri ɓá vah wuri ndɔk seɗe seɗe ké gel daɓa.
44Kúy. Koseh ɓa nzuku a woiri ɓay fe le, i ɓa tupal ké siɓa gɔr malak, mí nzukri si nda tulu dan tu-u#11.44 Bolkusol Ŋgerzah ké Mbete Nombres 19.18 ɓahri, gelke nzuk nda tupal le, ɓa ɓay.. »
45Bale nzuk goso fe tuna mbete bolkusol Ŋgerzah mbew ɓahri : « Metere, ɓayri ké mu ɓah-aw ra tuŋ tul wah pi munu. »
46Mí ke ɓahri : « A woiri nzuk goso fe tuna mbete bolkusol Ŋgerzahri kara koseh ɓa nzuku a woiri pi ɓay fe le, i ŋga̧h sukna a yih-u dik dik ɓu tul nzukri, mí gun ndɔk mbew kara i laŋ ɓay za keni ya.
47Kúy. Koseh ɓa nzuku a woiri ɓay fe le, i mboh tupal gun nzak pihna Ŋgerzahri ké zih woiri i lewsa̧. 48Kaŋ dale i ɓa nzuk-teh ɓay hul woyri ké zih woiri i niri, mí i el bem fe laɓna zih woiri ra kan gari woiri ɓay fe le, ku i gun nzak pihna Ŋgerzah a lewsa̧ri ba, a woiri le, i mboh tupaluri ba.
49Sa̧wu mí Ŋgerzah ɓah ke ru̧na ye ɓahri, ke ƴo pih gun nzak pihnari, ke ɓáŋ ɓay ye ndoh nzak nzuk a ɓoruri ké-e ƴo pih-u pi. Ké sakra gun nzak pihnari, ku ɓay i a haniri. A ɓoruri ba, ku ɓay laɓ niri koseh. 50-51Ɓayu hi̧ dalbaa sem gun nzak pihnari ké ku̧ kpah ur ke titilu da̧y ɓá laɓ ké tul gun tukala-ayri. Hul nzuk a lewsa̧ri titilu ke tul Abel#11.50-51 Ɓay Abel na ɓil Mbete Sa̧w fe 4. Hul Abel ɓa hul a titilu ɓil mbete Ŋgerzah a polri. kpu̧ru ka̧h tul Zakari#11.50-51 Ɓay Zakari na ɓil Mbete 2 Chroniques 24.20-22. Mbay ziɓri i ni ndikpo. Hul Zakari ɓa hul a ɔh tɔru kú-u vbeh ɓil mbete Ŋgerzah a polri., a ye kú-u i ni ɓil ila vul kani Ŋgerzah ké haŋsekle gel fe puhna ke vul kani Ŋgerzah ra, dalbaa hul woyri ɓay laɓu gaŋ. Mi ƴo ɓah hi̧ wuri ɓahri se, ke ɓay sor mbɔlu ké tul gun tukala-ayri.
52Kúy. Koseh ɓa nzuku a woiri nzuk goso fe tuna mbete bolkusol Ŋgerzahri ɓay fe le, lakele-mgbur nzakful fe tuna na ndɔk woiri, mí i lu. A woiri i sa rih ri ya pi, nzukri ké yih rih ri kara i ƴo gboh niri rihna pi. »
53Zezu ur ke nzak fe su̧na ké puh farizi ra tɔr poŋ niri, mí nzuk-sɔk mbete bolkusol Ŋgerzahri ke fariziri gi tur nun ye ke ɓay, ku vbi ni ɓayri ɓoɗ ɓoɗ. 54Ku mu̧h kpɔl ƴo geŋ ni ɓay mgba ni ke ɓay.
Одоогоор Сонгогдсон:
Mbete Luk 11: SIAFNK
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© Wycliffe Bible Translators, Inc. All rights reserved.
