Mbete Luk 10
10
1Fá-falu-aw Gaŋ tul feri riw san nzukri ɓa bon toŋndɔk say#10.1 Mbete sa̧w nzak a haniri vbeh ɓahri, nzukri ɓa bon toŋndɔk say falu seɗe Í mgba gel ki̧na-ay tuh ke Mbete Sa̧w fe 10. Ki̧na sa̧wnzukri ké tusiɓa ka̧h bon toŋndɔk say.. Ke mgba niri seɗe seɗe el pih niri si pol ye ma puhri gbam ke gelri riw ké-e ɓay si ri. 2Ke ɓah hi̧ niri ɓahri se : « Naŋ na ndekle ké waka mah vbehna, mí nzuk-vbeh naŋuri ŋgi̧ ya. Dale í goŋ nzuk waka ɓá pih nzuk-vbeh naŋ a ɓoruri gi dɔm tul nzuk a polri ɓáy.
3Í si wuri. Mí í lah, mi ƴo pih wuri ɓa samiri ma sakra gaykoyri. 4Í mgba ɓɔl lari ya, ɓɔl ɓay goŋ fe ya, sabɔk a ɓoru ya. Í ta̧h ké mahful ɓay vah nzuk ya pi. 5Kerpuh a a̧y ké mgba wuri gahru le, í ɓah kandɔkay : “Ɗeŋ ɓá ƴo ziŋ wuri.” 6Nzuk law ɗeŋ ƴo ra ri le, mgbɔkɔ ɗeŋ woiri ɓay kaɓ ziŋ nzuku. Nzuk law ɗeŋ ta-a le, ɗeŋ ra ɓay el ziŋ wuri. 7Í na kerpuh ye. Í na puh gahru seɗe ya. Fe su̧na kerpuh-aw, i ɓay su̧-u. Mbih kerpuh-aw, i ɓay nzo-u, ɓayu ké gun ké laɓ pihna le, kpaŋndɔk ye mah pihna ye. 8Gelke i ka̧h puh mbew, mí puh-u mgba wuri le, fe su̧na kú-u hi̧ wuri, í su̧. 9Í gah senari ké puh-aw. Í ɓah hi̧ niri kandɔkay : “Lák mbay Ŋgerzah gi ka̧h ta̧w woiri.”
10-11Gelke i ka̧h puh a ɓoru, mí puh a a̧w sa mgba wuri gahru ya le, í ti̧h wuri mahful mboŋ, í ɓah ɓay ɓahri se : “Kasal puh-ay ké mgbahla bɔk wah-ay, nah ƴo tak ma fal. Mí í ko wuri nzuk puh-ayri, lák mbay Ŋgerzah ka̧h ta̧w woiri.” »
12Zezu el ɓah hi̧ gun nzak pihnari-aw ɓáy ɓahri se : « Nam ké ɓay gi-u-aw le, salɓay suya ké ku̧ tul nzukri ké puh-aw ɓay kpuh mba salɓay suya ké ku̧ tul nzuk a lewsa̧ri ké Sɔdɔm mba-mba.
13Kúy, gun Izarayelri a woiri ziɓri ké Korazin ke Beɗsayda, koseh ƴo geŋ wuri ɓay fe le, sa̧wnzuk a ɓoruri ké Tir ke Sidoŋ a lewsa̧ ku ko ra fe saŋri ké laɓ ké ɓil Korazin ke Beɗsayda le, nzuk Tir-ri ke Sidoŋri-aw ɓay ndoh gar seh, ku ɓay buklu mun woyri ɓil seh hɔrɔ, ku mbí law ké tul tukala ma fal el kan law tul bi. 14Keni-aw gaŋ kara salɓay suya ké ku̧ tul woiri nzuk Korazinri ke nzuk Beɗsaydari ra ɓay kpuh mba salɓay suya ké ku̧ tul nzuk Tir-ri ke Sidoŋri mba-mba. 15A woiri nzuk Kapernayumri, i ker ɓahri, tul woiri ɓay gaŋ kal tul a ɓoruri si ka̧h nunmbam ley ? Hay. Tul woiri ɓay gɔr malak ma puh Hul.
16Nzuk ké lah ɓay woiri gun nzak pihna biri le, lah ɓay bi. Nzuk ké ko wuri ɓa kɔkɔ le, ko mi ɓa kɔkɔ. Nzuk ko mi ɓa kɔkɔ le, ko nzuk ké pih mi ɓa kɔkɔ munu. »
Kandɔkaw mí Gaŋ tul feri riw pih gun nzak pihnari ké bon toŋndɔk say.
17Elna gun nzak pihnari ké bon toŋndɔk say ra#10.17 Ɓayay si mbew ke ɓay ké gel ki̧na mbew ɓil mah-u-ay., ku ɓah ke law rihna ɓahri : « Ŋgernzuk, nah haw ŋgerna záhri ke riŋ wo. »
18Mí Zezu ɓahri : « Mi ko-ko. Mbay záh tukala ɗer ke gel kaɓna ye vbu siɓa gbim kandɔk mbam ké sak yela. 19Í lah. Mi hi̧ wuri ŋgerna hi̧, ŋgerna-nda tul soyri ke tul ndáyri, ŋgerna tul nzukbaa a ye satan pi. Ŋgerna fe mbew ta ik tul woiri ya.
20Keni-aw kara law woiri ɓá rih wuri ɓay haw ŋgerna záhri ya. Law woiri ɓá rih wuri ɓay fe le, riŋ woiri vbeh ké sakra riŋ gunri kú-u ki̧ ké nunmbam ma#10.20 Ɓay mbete ké nunmbam kú-u vbeh riŋ nzukri kan ri ra na ɓil Mbete Siŋ (Psaumes) 87 ke Mbete Ten sa̧wɓay 3.5; 17.8; 21.27. Mbete a ɓoruri ɓah ɓayu pi.. »
21Sa̧wseh-u bale, Tempuki laŋ law Zezu wa̧y wa̧y, mí ke ɓahri : « Baah, a wo ké mu ɓa Gaŋ tul feri gbam ké nunmbam pi, ké tusiɓa pi riŋ ɗina wo mgbe ké nzak bi ɓay fe le, mu mu̧h ru̧na wo ké nun nzuk ru̧nari, ké nun nzuk kerlawri pi. Gunri ba, mu hi̧ ku tu sa̧wu. Riŋ ɗina wo mgbe ké nzak bi gaŋ ɓay fe le, baah, mu ko fe laɓna-u su-su ké nun wo.
22Bah bi ndoh feri riw ɓil ndɔk bi. Nzuk mbew ké tu gun tu ta-a, sa ɓa baah mí tu gun ye. Nzuk ké tu baah tu ta-a. Sa ɓa gun ye mí tu ni. Nzukri ké gun ƴo ke law rihna ɓay kú tu baah, mí ku tu ni. »
23Zezu el ko kona ma tul nzuk-dih fal yeri mbew mbew gbam, mí ke ɓah hi̧ niri ɓahri : « Pol tehna Ŋgerzah teh tul nzukri ké ko fe ké i ƴo ko-u. 24Mi ɓahri se, gun nzak pihna a lewsa̧ri ke mbay a lewsa̧ri ɓa daɓa ku taw ɓay ko fe ké i ko-ay, mí nun woyri ko ya. Ku taw ɓay lah ɓay ké i lah-ay, mí suk woyri lah ya. »
25Nzuk goso fe tuna mbete bolkusol Ŋgerzah a hani-u ƴo ri. Ke ur síɓa. Ke leh law Zezu ke ɓay ɓahri : « Metere, a fe mí-i láɓ ɓay ya̧ puh a a̧y ké ɓay mí kaɓ sew ke sew ɓa ŋgɔh le ? »
26Zezu ɓah hi̧ ni ɓahri : « Mbete bolkusol Ŋgerzah ɓah ani le ? Mu lah ɓayu na ani le ? »
27Ke yih nzak ye ɓahri : « Miƴori ɓa Ŋgerzah wo, mu sá ni ke law wo gbam ke mun wo gbam ke huhrumun wo gbam ke kerɓay wo gbam, mu él sa nzuk mbaŋ wo eŋ mun wo kaŋ pi#10.27 Ɓayay na ɓil Mbete Deutéronome 6.5 ke Mbete Lévitique 19.18.. »
28Zezu el ɓahri : « Gelu gaŋ mú-u yih vbiɓayaw. Mu laɓ kandɔkaw le, mu ɔ́-ɔkna. »
29Nzuk-sɔk mbete bolkusol Ŋgerzah ra yih ɓay sɔk mun ye ɓa nzuk ké ƴo mbew ziŋ Ŋgerzah ɓa záh ye, mí ke el vbi Zezu ɓahri : « Mí-aw ba, nzuk mbaŋ bi ɓa sam nzuk a suŋ le ? »
30Zezu yih vbiɓay nzuk-sɔk mbete bolkusol Ŋgerzah ra kandɔkay : « Gun Izarayel mbew ur ke Zurusalem, mí ke ɗer ke mahful-si ma Zeriko dale, kuper-ri ti̧h tul ye kpah. Ku fa̧h fe ye poŋ ni diŋ ndikpo. Ku el ndakla ni mo̧r mo̧r, mí ku tɔr poŋ ni vbu nun hul. 31Gun Izarayel mbew, nzuku ɓa nzuk-fe puhna Ŋgerzah. Ke ɗer si ke fulaw pi bale, ke ti̧h tul ye, mí ke gȩn geɗeɗe mí ke kal. 32Gun Izarayel a fál ndɔk Levi a ɓoru ka̧h gel ké nzuk ra na tul mun. Ke ko ni bale, ke gȩn geɗeɗe mí ke kal. 33Nzuk a sa̧w Samari mbew si ke fulaw. Ke ti̧h tul ye. Ke ko ni bale, law ye sa̧h. 34Mí ke fer yim wɔk keni no̧k ra, ke fer num ku̧ ri pi, mí ke ŋga̧h bale, ke mbi ni kan tul bamnde ye suk ni keni si ka̧h vul nam gahru kú-u ƴo puh ke lari, mí ke mgba sa̧w ye. 35Tipele-u, ke ten lari mah mgba sa̧w sena namri ɓa ŋgi̧-u#10.35 Sa̧w nzak vbeh ɓahri, denari seɗe. Denari mbew mah kaɓ vul gahru nam boh falu seɗe., mí ke ndoh ndɔk nzuk vul gahru ɓahri : “Ya̧h, mú mgba sa̧w sena ke lari-ay. Mu ɓeɓ ra lari a ɓoru kal tulu le, mi púh mu seh elna bi ɓáy.”
36Aŋay, a wo ba, mu ko ani le ? Ké haŋsekle nzukri-aw wa, nzuk a suŋ mí mgba nzuk ké kuper-ri vba̧ ni ra ɓa nzuk mbaŋ ye le ? »
37Nzuk-sɔk mbete bolkusol Ŋgerzah ɓahri : « Nzuk ké mgba in ziŋ ni mí sa ni ɓa nzuk mbaŋ ye. »
Mí Zezu ɓah hi̧ ni ɓahri se : « Mú si. Mú laɓ kaŋ pi. »
38Zezuri ƴo tul ful-si ma Zurusalem ra, mí ku ka̧h puh a hani. Ku si kerpuh wu̧y a hani mbew. Riŋ ye ɓa Marta. Marta ra ta̧h ké tul woyri mí ƴo mgba niri gahru. 39Yi̧n ye Mari ba, kaɓ ké bɔk Gaŋ tul feri riw. Ke ƴo lah ɓay ye. 40Marta le pihna ƴo zaŋ tul ye lɔɗ ké tul pihna ɓoɗ ɓoɗ ɓa ŋgi̧-u. Dale ke ta̧h ƴo ké ta̧w Zezu, mí ke ɓahri se : « Ŋgernzuk, yi̧n bi-ay poŋ mi diw ke ta̧hma-ay wa, ɓayu ko mu ya ley ? Mú ɓah hi̧ ni, ké gi ya̧ ndɔk bi. »
41Mí Gaŋ tul feri riw yih nzak ye ɓahri : « Marta, Marta wo, mu ƴo yɔklɔ mun wo ke kerɓay ɓa ŋgi̧-u. 42Fe mbew yaŋ mah nzuk pirmatul seeh, ɓayu ké Mari mbi suki ɓa fe ye. Suki ye-ay ra nzuk ké ɓay nah ké ndɔk ye ta-a. »
Одоогоор Сонгогдсон:
Mbete Luk 10: SIAFNK
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© Wycliffe Bible Translators, Inc. All rights reserved.
