Matie 7
7
Ta ĩ fa ngbanga tɛ afɔ̃ ĩ ma
(Luk. 6.37-38,41-42)
1Yezo apa ya: “Ta ĩ fa ngbanga tɛ afɔ̃ ĩ ma, so Nzapa afa nga ngbanga tɛ ĩ. 2Ta sanga ma, se ko la ĩ ndofa na ngbanga tɛ azi mɛ ndɛ̃ ko, se mɛ nga gbanda Nzapa afa na ngbanga tɛ ĩ la. Ko ye mɛ lo na hɛ̃ngɔ ĩ ko, lo na hangɔ na ye mɛ ndo ĩ hɛ̃ afɔ̃ ĩ. 3Mɔ ndoba bo nyi sã pele mɛ ati lɛ nyita mɔ, wa ta mɔ ndohũ ponzo kɛkɛ mɛ ati lɛ mɔ ma ya nɛ? 4Mɔ mɛ ta mɔ ndohũ bɛ ponzo kɛkɛ mɛ ati lɛ mɔ ma ko, ta mɔ pa hɛ̃ nyita mɔ ya: ‘Zia mbi hã ponzo kɛkɛ ko lɛ mɔ, mbi zi ma.’ 5Wa poroso, ponzo kɛkɛ mɛ ati lɛ mɔ ko, hã ni uzu mɔ zi, mɔ hũ ndo nzɔ̃ni, wa se mɛ mɔ hã nyi sã pele mɛ ati lɛ nyita mɔ, mɔ zi la.
6“Ta ĩ hɛ̃ ye mɛ santo hɛ̃ ambo ma, so ala sana tɛrɛ la, atɛrɛkɛ ĩ. Ta ĩ sa nga lenge tɛ ĩ na gbɛlɛ akɔsɔ ma, so ala dɔdɔrɔ ni.”
Yɔngɔ ye ka ti Nzapa
(Luk. 11.9-13)
7Yezo apa ya: “Ĩ yɔ ye, wa Nzapa ahɛ̃ ĩ, ĩ gi ye, ko ĩ lua ni, ĩ gɔngɔ nyɔ ngise, wa Nzapa azi ni hɛ̃ ĩ. 8Ta sanga ma, zo zu ko la ayɔ ye ko, Nzapa ahɛ̃ ni hɛ̃ lo, zo zu ko la agi ye ko, lo lua ni, ko zo zu ko la agɔngɔ nyɔ ngise ko, Nzapa azi ni hɛ̃ lo. 9Na popo tɛ ĩ, zo mɛ se nyi lo ayɔ mapa ti lo ko, lo mu tɛnɛ, lo hɛ̃ lo na? 10Bere se nyi lo ayɔ susu ti lo ko, lo gbɔ̃ ngbɔ, lo hɛ̃ lo na? Ta zo mi da ma! 11Singa na ĩ mɛ asiɔ azi, ĩ ndohɛ̃ anzɔ̃ ye hɛ̃ aya ĩ, o singa na To ĩ mɛ ka yayu ma! Lo na hɛ̃ngɔ anzɔ̃ ye hɛ̃ azi ko la ndoyɔ ye ti lo! 12“Ye kwɛ zu mɛ ĩ ndoye ya, azi ali tɛrɛ ĩ ko, ĩ li nga bo gi tɛrɛ ye ni ko na tɛrɛ la, na lo mɛ ya, se mɛ ndia tɛ Mɔizɛ, nga na se mɛ buku tɛ awa pangɔ nyɔ Nzapa apa na ni la.”
Nyɔ ngise mɛ pitoto
(Luk. 13.24)
13Yezo apa ya: “Ale ĩ li ti nyɔ ngise mɛ pitoto! Ta sanga ma, nyɔ ngise ko la gbangabu ko, adu woni ya zo aɔ ti da, ko lo mu lege mɛ ndoto zo ka lifɛlo, ko azi gba la ndoɔ ti da. 14Kanda nyɔ ngise ko la pitoto ko, adu kpengbani ya, zo aɔ ti da, ko lo lua bɛta du. Azi mɛ ndoɔ ti da ko, ta ala gba ma.”
Kɛkɛ na le kɛkɛ
(Luk. 6.43-44)
15Yezo apa ya: “Ĩ du na kpengba lɛ na ndo awa pangɔ nyɔ Nzapa na nvɛnɛ. Ala ndoga ka tɛ ĩ nga ma angasã ngbaga, kanda ka ya bɛ la ko, ala nga ma azɛ̃. 16Ĩ hĩnga gbanda la na se lingɔ ye tɛ la. Ta andokɔ le ndimɔ ka li kɛkɛ nza ma. Ta andokɔ nga le avoka ka li mburu ma. 17Nzɔ̃ kɛkɛ ndohɛ̃ nzɔ̃ le kɛkɛ, siɔ kɛkɛ ndohɛ̃ nga siɔ le kɛkɛ. 18Ta nzɔ̃ kɛkɛ alengbi ti hɛ̃ngɔ siɔ le kɛkɛ ma, ko ta siɔ kɛkɛ alengbi nga ti hɛ̃ngɔ nzɔ̃ le kɛkɛ ma. 19Kɛkɛ zu mɛ ta ndohɛ̃ nzɔ̃ le kɛkɛ ma ko, andofa ni abi ya wá agbi. 20Se mɛ nga gbanda ĩ hĩnga na awa pangɔ nyɔ Nzapa na nvɛnɛ, na lo ti se li ye tɛ la la.”
Azi mɛ gbanda ta asi ka Kɔdɔrɔ Gbia tɛ Nzapa ma
(Luk. 13.25-27)
21Yezo apa ya: “Ta adu azi mɛ ndopa hɛ̃ mbi ya: ‘Gbia, Gbia,’ la asi gbanda ka Kɔdɔrɔ Gbia tɛ To mbi Nzapa ma, kanda adu bo ala mɛ ndoli yɛ mɛ bɛ lo aye la asi gbanda kai. 22Ngoi mɛ gbanda lá ti fangɔ ngbanga alengbi ko, azi gba apa gbanda hɛ̃ mbi ya: ‘Gbia, Gbia, e pa ndo nyɔ Nzapa na nguru tɛ mɔ, e toma ndo asiɔ tɔrɔ na ya tɛrɛ azi na nguru tɛ mɔ, e li ndo nga aye ti kpɛnɛ ma wo ma na nguru tɛ mɔ!’ 23Ko mbi pa gbanda hɛ̃ la ya: ‘Ta mbi hĩnga ĩ bɛ gbɔ ma, í ɔ lɛ mbi, ĩ du awa lingɔ siɔ ye!’ ”
Da tɛ wa ndara na da tɛ wa buba
(Luk. 6.47-49)
24Yezo apa ya: “Nda mɛ zo zu ko la ndoma tɛnɛ tɛ mbi, ndoli nga tɛnɛ ni na seni ko, lo nga ma wa kɔdɛ mɛ awa da tɛ lo na ndo tɛnɛ la. 25Ngoi mɛ ngu ani gbua gbua, asĩsĩ lɛkɛ lɛkɛ, yá aya kpengbani aga ti ndo da ni ko, ta da ni abukana ma, na lo mɛ ya, awa da ni na ndo tɛnɛ. 26Kanda zo zu ko la ama tɛnɛ mɛ mbi tɛnɛ, wa ta lo li ni na seni ma ko, lo nga ma wa buba mɛ awa da tɛ lo na ya butu. 27Ngoi mɛ ngu ani gbua gbua, asĩsĩ lɛkɛ lɛkɛ, yá aya kpengbani aga ti ndo da ni ko, da ni akara lupu lupu.”
Yezo aha azi na ye nga ma se tɛ gbia
28Ngoi mɛ Yezo ĩ kɔ nda hangɔ alo ni na azi butu butu wɛ ko, ala bema sĩ na lo ti se kɔdɛ tɛ lo ti hangɔ la na ye, 29ta sanga ma, lo ha ndo la na ye ni nga ma se tɛ gbia. Ta lo ha ndo la na ni nga ma se tɛ awa hangɔ ndia ma.
Одоогоор Сонгогдсон:
Matie 7: NGB87
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Ngbandi New Testament © United Bible Societies, 1987.