Mélékusu 1
1
Sáŋa Begiyuminye a dúmenye Gɛnɔ́gɔ́ gá Cɔ́mɔ
(Mot 3.1-6,11-12; Lók 3.1-6,15-18)
1Mabayɛga má Gɛnɔ́gɔ́ gá Cɔ́mɔ gɛ́ɛgɛ gɛ́ oyamɔ́ gɛɔyɔ gá Yésu Kilítu, [Moɔnɔ́ ba Asaŋa] mámáa. 2Naá kálata ya mbúsí ya Asaŋa Iseyíi, bó lɛ́ ɔ́ŋɔ́ɔlú goŋaá:
«Ɛ́ná,
ŋgaá dúényée mɔtɔ bamɛ ba bosɔ́mɔ naá busío gáhɔ,
goŋaá a gedegedie pɛ́ yahɔ.»
3Ukelú yá mɔtɔ
yó mba lɛ́ yó dónogogana naá giolóo gá bodɛ́agadɛ́ yó amɔ́:
Gedégédíe nɔnɔ pɛ́ ya Daadáa,
bónónáa nɔnɔ ŋŋɛndɛ́ná sɛ́hɛ́#1.3 O bana Melesíi 3.1; Iseyíi 40.3, bó lɔ́mɔ́ naá ŋgɔ́ŋɛ́ na nogɛlɛ́gɛ ná cóá cóá..
4Gó moánɛ Sáŋa Begiyuminye a buyugugemú naá giolóo gá bodɛ́agadɛ́, a yumeninye batɔ ɛ ɛ́da a bó oyanɛna a amɔ́: Núgíe nɔnɔ gɛɔyɔ gɛ́nyɔ́#1.4 gokikilidie gúncodío gó lɔ́mɔ́ Núgíe nɔnɔ ndoŋá ɛ́na gɔnɔ́ bógoodóomú nɔnɔ bɛoba. , no béyuminye, manɛ́ Asaŋa a ná héehinyemú bɛlɔgɔ bɛ́nyɔ́. 5Gɛcɛcá gá batɔ gá go ɛ́da go úle naá Yudée na biimée báaba bá Yolósalɛmɛ bɛ́ ɛ́damɔ́ go úlene naá Sáŋa; bó oya bɛoba bábɔ́ daŋɛ́daŋɛ, a bó yumeninye naá Yɔlɔdɛ́ŋɛ.
6Gɛla gɛ́ɛgɛ Sáŋa a mbaá lɛ a bɛga gɛ́ mba lɛ́ gedíelú na binúmpe bá nnyama yɛ́ɛyɛ bá dɔ́ŋɔnɔmɔ́ bá amɔ́ samóo, kandáa ya gɛɔbɔ básómbɛ́náalú go nosɛ́ŋɛ́#1.6 Go ɛ́na 2 Mefuŋe 1.8.. A mba lɛ́ a bédúge na bɛatatalá na megúdé má póɔ́ŋɛ́. 7Sáŋa a mba lɛ́ o oyanɛna gitúu gá batɔ cɔ́mɔ ya Asaŋa a amɔ́: «Mɔtɔ ummue u úlene naá nnyimé yamɛ, a lɛ́ gɛgaaga a tómbana, cɛ háánánáa naá odɛ́nɛ́ yá go gudimene, pulune nuelí ná nnaadɛna sɛ́hɛ́. 8Yɔmɔ́ɔ ŋgaá nyó yuménínyée na miimpo, mɔ́ɔ a ná nyó yumeninye na Gimmúmpúu gá Giliíli.»
Giyuminye gá Yésusu
(Mot 3.13-17; Lók 3.21-22)
9Naá gɛcamɛna moánɛ gíiní, gɔ́ɔ Yésusu a mbɛɛ́ ɛ́dá fadɛgɛna naá tɛ́sɔnɔ ya Násalɛdɛ ba Gelilée go go úle naá osaá yá Yɔlɔdɛ́ŋɛ; Sáŋa go mo yuminye hɔ́ɔ. 10Hɔ́ɔ na hɔ́ɔ, aŋa Yésusu a mbaá lɔmɔ́ a húmene naá miimpo, gɛ́hɛ́ go ɛ́na mmoɛná ɛ bébuune, Gimmúmpúu gá Giliíli go mo siisene aŋa mmɛŋá. 11Gɛ́hɛ́ go ɔ́bɔ ukelú yó ɛ́da go úlene naá mmoɛná yó oya yó amɔ́: «O lɛ́ Moɔnɔ́ bamɛ ba odɛ́má, ŋgaá ágá bɛyaŋa bámɛ biimée naá maamɔ́ɔ#1.11 O bana, go eninye Ɛsagɔ 2.7; Iseyíi 42.1..»
12Hɔ́ɔ na hɔ́ɔ, Giliíli ba Asaŋa a báá lɛ gó ɛ́da nɛhɛ́ naá giolóo gá bodɛ́agadɛ́. 13A mba gɛ́gáa hɔ́ɔ medúgú otíno áhandɛ́, Sátana a mo gogona. A mba lɛ́ ɔ ɔyɔ émmué na nnyama sá gɛsɔgɔ. Bɛɛ́ŋgɛlɛsɛ bá mo yɔgɔnɛnɔ.
Yésusu a dóogonyo Gɛnɔ́gɔ́ gá Cɔ́mɔ
(Mot 4.12-17; Lók 4.14-15)
14Naá nnyimé ya go gumbene Sáŋa, bá báá mo ágá naá ncíbo ya gɛaŋɔ́#1.14 Sáŋa… ya gɛaŋɔ́: A lɔ́mɔ́ Sáŋa Begiyuminye mɔ́ɔ bá gálagalamɔ́ háalá. Go ɛ́na 6.17., Yésusu go ɛ́da naá Gelilée. A mba lɛ́ a dúmenye Gɛnɔ́gɔ́ gá Cɔ́mɔ gá Asaŋa, o oyanɛna batɔ a amɔ́: 15«Gɛcamɛna gɛ́ á háá, Bufuŋe bá Asaŋa bó á báyɛkɛ́ná. Núgíe nɔnɔ gɛɔyɔ gɛ́nyɔ́, no oliminyo gɛnɔ́gɔ́ gá Cɔ́mɔ.»
Yésusu a dɔ́ŋɔnɔ bonóbí moɔbɔ́
(Mot 4.18-22; Lók 5.1-3,10-11)
16Yésusu ɛ ɛnda naá cɔ́lɔ ya máŋɛ́ má Gelilée, gɛ́hɛ́ go ɛ́na bonóbí moɔbɔ́ báandɛ́, Símono na ondimóní Andɛlɛ́ɛ, bá nɔɔnɔnɔ mafɔ́ɔ́dɔ́ɔ naá máŋɛ́. 17Yésusu go bó oyana a amɔ́: «Mbienéemú nɔnɔ, nná nyó íyie bonóbí batɔ.» 18Bá báá lɛ gó dómba go síe bá báá cecúgíe mafɔ́ɔ́dɔ́ɔ mábɔ́, bá báá mo biené. 19Yésusu a á gɔnɔ́ báyɛkɛdɛna naá busío go ɛ́na bahaŋa bá Sebedée báandɛ́, Sáakɛ na ondimóní Sáŋa. Bá mba lɛ́ naá gilué, bá gedegedie mafɔ́ɔ́dɔ́ɔ mábɔ́. 20Yésusu go dómba go bó dɔ́ŋɛnɔ. Bɔ́ɔ tɔ́nɔ go dómba go síe isée babɔ́ Sebedée na boyogóní bɛ́hɛ́ naá gilué, go mo biene.
Yésusu a bɛanana bogaaga bá go gúne bɛgáda bá biliíli
(Lók 4.31-37)
21Yésusu na behúúní bɛ́hɛ́ go bola naá tɛ́sɔnɔ ya Kapɛlɛnahɔ́mɛ. Go buisí bá sábadɛ, gɛ́hɛ́ go íŋene naá nnyaŋá ya mbósógólí, go ɛ́da go húunenye. 22Batɔ bá mba lɛ́ na bibékúkí na mbɔ́dɔ yɛhɛ́ ya go húunenye, goakɛ́ a mba lɛ́ a bó húunenye aŋa mɔtɔ mɔ́ɔnyɔ a bɛananamɔ́ nɛgaŋa, caá akɛ́ aŋa muloodio má bicele. 23Mɔtɔ ba gɛgáda gá giliíli go bɛ́ɛmba hɔ́ɔ naá nnyaŋá ya mbósógólí; gɛ́hɛ́ go áncɛda ukelú naá mmoɛná a amɔ́: 24«Yésusu ba Násalɛdɛ, ɛkádɛ o fúmbemú nɛcɔ́ o? O lɔ́mɔ́ úléelú go go nco có fúugie lí? Ŋgíyimene ánɛ́ɛ o lɔ́mɔ́: o lɔ́mɔ́ Gimmúmpúu mɔ́ɔnyɔ Asaŋa a mbaá dómá.» 25Kɔ́ɔ Yésusu a áncɛdɛnamɔ́ gɛgáda gá giliíli gɛ́ɛgɔ a báá gɛ́ gálɛ́dá a amɔ́: «Buigé nyuudé, o húme naá mɔtɔ mɔ́ɔnyɔ!» 26Gɛgáda gá giliíli go dómba go mo búgulidie, gɛ́ báá húmé naá mɔ́ nnyɔ́dɔ gɛ́ ɛ́da gɛ́ ágana kóokóo. 27Batɔ biimée go ɛ́da go békúke, bá búúhenihenine bá amɔ́: «Bɔ́ɔbɔ náana ŋkádɛ o? Gɛpáa gá gohúunenye gɛ́gɛ́ɛ na nɛgaŋa dácɛ! A gálagala akɛ́ na bɛgáda bá biliíli bɛ́ mo ɔ́bɛnɔnɔ!» 28Ufíno yá Yésusu go dómba go saa hoóma hiimée naá gigísi gá cí gá Gelilée.
Yésusu e éŋugenye ɛgɔnɔ́ mbɔ́dɔ mbɔ́dɔ
(Mot 8.14-15; Lók 4.38-39)
29Yésusu a á húmé naá nnyaŋá ya mbósógólí, gɛ́hɛ́ go ɛ́da olɔŋɔ na Sáakɛ na Sáŋa naá nnyaŋá ya Símono na Andɛlɛ́ɛ. 30Kanɛ́ naá ncíbo, nnyeedíi ba ogánɛ́ Símono a mba lɛ́ mbɛ́dɛ́ɛ, nnyɔ́dɔ ɛ báá go bólɛga. Gɔ́ɔ bó oyanamɔ́ Yésusu. 31Yésusu a á báyɛkɛ́ná, go mo gumbene go ombɔ́gɔ a báá mo fedígínyée, hɔ́ɔ na hɔ́ɔ, nnyɔ́dɔ ya okɔ́dɔ go fuuge, mɔ́ɔnyɔ a báá lɛ gó dómba go go bó ala.
32Na hɛɔbɔ́bɔ́ɔ, buisí bó báa go fúe púmú#1.32 buisí bó báa go fúe púmú: sábadɛ (go ɛ́na gig 21) ɛ mba lɛ́ ɛ manana na muotóti má busío aŋa mó dúmemú go noma., batɔ bá báá lɛ gó ɛ́da go úlenine Yésusu na bɔgɔnɔ́gɔnɔ mbɔ́dɔ mbɔ́dɔ, na batɔ bá bɛgáda bá biliíli. 33Kɔ́ɔ batɔ biimée báaba naá tɛ́sɔnɔ bá ncomɔ́ béhunde naá gɛasɛ́ gá nnyaŋá. 34Yésusu a báá lɛ gó ɛ́da go éŋugenye bɔgɔnɔ́gɔnɔ mbɔ́dɔ mbɔ́dɔ, a gúne gɛca gá bɛgáda bá biliíli; a dɛ bɛ́ fáá pɛ́ ya go gálɛda, goakɛ́ bɛ́ mba lɛ́ bɛ́ íyimene ánɛ́ɛ a lɔ́mɔ́.
Yésusu a dúmenye Gɛnɔ́gɔ́ gá Cɔ́mɔ naá tɛ́sɔnɔ sɛ́ɛsɛ go maayá
(Mot 4.23; Lók 4.42-44)
35Aŋa gó mbaá bélíe, Yésusu go húme na gɛyɛ́nɛ́ túlúbú, mobínobínó má gá lɛ́, go ɛ́da naá giolóo gá hoóma, go oba go bósógolonyo hɔ́ɔ. 36Símono na biimée báaba bá mbaá lɛ nɛhɛ́ go ɛ́da go go mo fúmbe. 37Aŋa bá mbɛɛ́ ɛ́dá mo gíde, bá báá lɛ gó mo oyana bá amɔ́: «Batɔ biimée bá go fúmbe.» 38Kanɛ́ Yésusu go bó oyana a amɔ́: «Ŋgáa dɛ no ɛ́da hoóma hóntió, naá motɔtɔ́ŋɔ má maayá. Hɔ́ɔ tɔ́nɔ, cɛmɛganana go dúmenye Gɛnɔ́gɔ́ gá Cɔ́mɔ: mammana, ndɔ́mɔ́ úléelú go busío moánɛ#1.38 ndɔ́mɔ́ úléelú go busío moánɛ: gokikilidie gúncoó gó lɔ́mɔ́ ndɔ́mɔ́ húméelú (naá Kapɛlɛnahɔ́mɛ)..» 39Gɔ́ɔ Yésusu ɛ ɛ́damɔ́ ɛ ɛnda naá bɛdɔŋɔ bá Gelilée biimée, ɛ ɛ́da o oya Gɛnɔ́gɔ́ gá Cɔ́mɔ naá nnyaŋá sábɔ́ sá mbósógólí, a gúne bɛgáda bá biliíli.
Yésusu e é éŋúgíe ukúnúkunu
(Mot 8.1-4; Lók 5.12-16)
40Gɔ́ɔ ukúnúkunu ummue a ncomɔ́ gule enúu go ɛ́da go béyéeyenye Yésusu a amɔ́: «Aáŋa o lɛ́galɛga, o lɛ́ ba go cogona.» 41Mahana go gɔ́lɔ Yésusu#1.41 Mahana go gɔ́lɔ Yésusu: ŋgɔ́ŋɛ́ síncoó sɛ́ amɔ́ mpímí go gumbene Yésusu., a á gaanóná ombɔ́gɔ go mo báláfɛna a amɔ́ gɛ́hɛ́ aá: «Ndɛ́galɛga, bɛ́ɛ́mba sogónáalú.» 42Hɔ́ɔ na hɔ́ɔ, mɔtɔ go dúmbie go éŋuge, kúnú yɛhɛ́ ɛ báá maná. 43Yésusu go dómba go mo gúlugie na mbébégene, a amɔ́: 44«O bébeŋe, o do oyáná mɔtɔ boóma, kanɛ́ ɛ́dá bédúfie naá udúmbí bɛbáágá naá Asaŋa, o fáa go gɛsogona gáhɔ gɛbáágá gɛ́ɛgɛ Mɔ́sɛsɛ a mbaá sómbá, bó gaá dúfíe mɔtɔ uŋkimée goŋaá go é éŋúgé#1.44 Go ɛ́na Léfi 14.2-32..» 45Mɔtɔ moánɛ a á fídé pɛ́, gɔ́ɔgɔ gá goŋaá a buige nyuudé nɛ́hɛ́, go ɛ́da a gúmenye hoóma hiimée aŋa Yésusu a lɔ́mɔ́ mo éŋúgíelú. Go boóma moánɛ, Yésusu a dɛ mbáa lɛ bá go gɔnɔ go íŋene naá tɛ́sɔnɔ mmue daláŋɛ́ dalaŋɛ. Gɛ́hɛ́ go bɔ́gɔ́gɛdɔ go ɛ́da go gɛ́ga naá hoóma há kanɛ nnyaŋá, akɛ́ nɔ́ɔnɔ, batɔ bá mba lɛ́ bá mo úlenine maayá miimée.
Одоогоор Сонгогдсон:
Mélékusu 1: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү