Mélékusu 2
2
Yésusu e é éŋúgíe gɛcɛ́gɛlɛ gá mɔtɔ
1Naá nnyimé ya baaná bá medúgú, gɔ́ɔ Yésusu a ncomɔ́ gunde naá tɛ́sɔnɔ ya Kapɛlɛnahɔ́mɛ. Batɔ báaba naá tɛ́sɔnɔ gó ɔ́bɔ goŋaá Yésusu a ná lɛ́ naá nnyaŋá#2.1 naá nnyaŋá: aŋa na 1.29, dɛ lɛ́ ba go ɔ́bɔ goŋaá bó lɔ́mɔ́ nnyaŋá ya Símono na Andɛlɛ́ɛ.. 2Gitúu gá batɔ go nco bábándɛgɛna bá báá hóógó naá nnyaŋá dácɛ, nnɛɛnɔ́ ɛbaná ɛ dɛ mbáá lɛ gɔnɔ́ hɔ́ɔ, akɛ́ naá gɛasɛ́. Yésusu a mba lɛ́ a bó oyanɛna Gɛnɔ́gɔ́ gá Cɔ́mɔ gá Asaŋa. 3Batɔ bóncodío go bola, bénni bú úle bá bɛga gɛcɛ́gɛlɛ gá mɔtɔ. 4Aŋa batɔ bá mbaá lɛ naá nnyaŋá dácɛ, bá dɛ ɛ́ná pɛ́ ya go ɛnda bɛ́ ɛ́da bola nɛhɛ́ anáa Yésusu. Gáábɔ́ go fága gɛasɛ́ naá mpɔnɔ́ mmoɛná#2.4 gáábɔ́ go fága gɛasɛ́ naá mpɔnɔ́ mmoɛná mpɔnɔ́ mmoɛná sá nnyaŋá sá batɔ bá Palɛsɛtɛ́na, naá gɛcamɛna gíiní, sɛ́ mba lɛ́ aŋa balánda bá nnyaŋá mmoɛná, maanáná maanáná na bɛcambá na mɛɛ́tɛ., bá báá dúmbíe dokandá dɔ́ɔdɔ gɛcɛ́gɛlɛ gɛ́ mbaá lɔmɔ́ kɔ́ɔ mbɛ́dɛ́ɛ naá gɛasɛ́ moánɛ, go mo siisie anáa Yésusu a mbaá lɔmɔ́. 5Aŋa Yésusu a mbɛɛ́ ɛ́ná goŋaá bá ágana odɛ́má yábɔ́ naá mɔ́ɔ, go oyana gɛcɛ́gɛlɛ a amɔ́: «Moɔnɔ́ bamɛ, bá á go hééhínyée bɛlɔgɔ báhɔ.»
6Nɛnamá ná muloodio má gicele nɛ́ mba lɛ́ hɔ́ɔ ndukíi. Mó báá lɛ gó ɛ́da go bágálɛnagalɛna naá ɛdɛ́má mó amɔ́: 7«Nɛɛ́nɛ mɔtɔ mɔ́ɔnyɔ a gálagalamɔ́ náana o? A sɛga Asaŋa. Mɔtɔ ohanɛ́ a lɔ́mɔ́ ba go héehineninye bɛlɔgɔ aáŋa caá Asaŋa mokáa#2.7 A sɛga Asaŋa: o bana, go eninye na kálata ya Léfi 24.16. … Asaŋa mokáa: go ɛ́na Ɛsagɔ 103.3, Iseyíi 43.25.!» 8Hɔ́ɔ na hɔ́ɔ, Yésusu go íyime mbééníŋínyí sɛ́ɛsɛ batɔ bá mbaá lɛ na sɛ́ naá ɛdɛ́má, gɛ́hɛ́ go bó gálɛda a amɔ́: «Goakɛ́ no lɔ́mɔ́ na mbɔ́dɔ sá mbééníŋínyí aŋa sɛ́ɛsɔ nɔ́ɔnɔ naá ɛdɛ́má yɛnyɔ́ o? 9Bóhanɛ́ bó lɔ́mɔ́ fɛaŋɔ go oyana gɛcɛ́gɛlɛ: “Bá á go hééhínyée bɛlɔgɔ báhɔ”, ɛ́na lí, “Fadɛ́gɛ́na, gɔ́lɔ́ dokandá dáhɔ, ɛndá o?” 10Ɛɛ́ɛŋ! Kanɛ́ goŋaá no íyime no amɔ́ Moɔnɔ́ ba mɔtɔ a bɛanana nɛgaŋa ná go héehinenye bɛlɔgɔ naá cí háalá, go oyana gɛcɛ́gɛlɛ a amɔ́: 11“Ŋgaá go oyáná caá: fadɛ́gɛ́na, o gɔ́lɔ dokandá dáhɔ, go ɛ́da naá mamɔ́ nnyaŋá”.» 12Mɔtɔ go fadɛgɛna, go dómba go gɔ́lɔ dokandá dɛ́hɛ́, go húme naá oŋgíso yá batɔ biimée, gáábɔ́ go ɛ́da go békúke, bá búlugenye Asaŋa, bá gálagala bá amɔ́: «Dɛ gá báasa dɛ dɛ ɛ́ná mbɔ́dɔ ya boóma aŋa yɛ́ɛyɛ náana.»
Yésusu a á dɔ́ŋɛ́nɔ́ Léfi
13Gɔ́ɔ Yésusu a fadɛgɛnamɔ́ go go gunde naá cɔ́lɔ ya máŋɛ́ má Gelilée. Gitúu gá batɔ gɛ́ mba lɛ́ gɛ́ mo báyɛkana, a lɛ go ɛ́da go bó húunenye Gɛnɔ́gɔ́ gá Cɔ́mɔ. 14Yésusu a dómbana, gɛ́hɛ́ go ɛ́na Léfi, mɔ́ɔnyɔ bá gɔnɔmɔ́ dɔ́ŋɔnɔ bá amɔ́ Motíosi, moɔnɔ́ ba Alɛfɛ́ɛ, ndukíi naá hoóma háaha bá ncomɔ́ soanana muinyí má tásɛ hɔ́ɔ. Yésusu go mo dɔ́ŋɛnɔ go mo oyana a amɔ́: «Mbienéemú.» Léfi go fadɛgɛna go mo biene.
15A lɛ́ naá go nyáanya naá nnyaŋá ya Léfi#2.15 Ŋgɔ́ŋɛ́ na nogɛlɛ́gɛ ɛ lɔ́mɔ́ goana na nnyaŋá yɛhɛ́. Kanɛ cuŋí bó lɔmɔ́ nnyaŋá ya Léfi caá akɛ́ ya Yésusu moatɛ́. O bana Lók 5.29. olɔŋɔ na behúúní bɛ́hɛ́; gɛca gá bogólí tásɛ na bologílógí go nco bó bégídene. Bá mba lɛ́ degédegé báaba bá mbaá lɛ bá mo bienene. 16Aŋa muloodio má gicele mɔ́ɔmɔ mó lɔ́mɔ́ naá giimbó gá Befelisiéŋe mó mbɛɛ́ ɛ́ná goŋaá Yésusu a nyáanya na mbɔ́dɔ sá batɔ moánɛ, mó báá lɛ gó úhune behúúní bɛ́hɛ́ mó amɔ́: «Goakɛ́ a nyáanyamɔ́ olɔŋɔ na bogólí tásɛ na bologílógí#2.16 O bana, go eninye big 15-16, tɔ́nɔ na Lók 15.1-2. o?» 17Yésusu ɔ ɔ́ ɔ́bɔ́ dogálɔ dábɔ́ dɔ́ɔdɔ, go bó oyana a amɔ́: «Caá akɛ́ batɔ báaba bá lɔ́mɔ́ bá dɛ nómáa bɔ́ɔ bá fúmbemú ugóódíníní, bá lɔ́mɔ́ bɔgɔnɔ́gɔnɔ. Ndɛ́ kanɛ go úle go go nco dɔ́ŋɔnɔ bɛtɛ́nɛ́ɛ bá batɔ, kanɛ́ bologílógí.»
(Mot 9.14-17; Lók 5.33-39)
18Naá gɛcamɛna gɛ́ɛgɛ behúúní bá Sáŋa Begiyuminye na Befelisiéŋe bá mbaá lɔmɔ́ bá bécelene manyáanya, gɔ́ɔ batɔ bú úlemú, go úhune Yésusu bá amɔ́: «Bɛcamɛna bɛ́ lɛ́ hɔ́ɔ bɛ́ɛbɛ behúúní bá Sáŋa Begiyuminye na báaba bá Befelisiéŋe bá bécelenemú manyáanya, behúúní báhɔ bɔ́ɔ bá lɔ́mɔ́ bá dɛ bécelénée goakɛ́ o?» 19Yésusu go bó gundie a amɔ́: «Batɔ báaba bá lɔ́mɔ́ dɔ́ŋɛ́nɔ́ɔlú naá gibíné gá gigiŋe bá lɛ́ ba go bécelene manyáanya gɛcamɛna gɛ́ɛgɛ ugiŋénú a gá lɔ́mɔ́ nabɔ́ o? Gɛcamɛna giimée gɛ́ɛgɛ ugiŋénú a gá lɔ́mɔ́ nabɔ́, bá dɛ bósó bá go bécelene manyáanya. 20Kanɛ́ medúgú má úlene, bá ná bó úlinye ugiŋénú, kɔ́ɔ bá ŋgaá bécelénée manyáanya.»
21«Mɔtɔ a dɛ gídée gilunú gá gɛla na gigísi gá gɛla gɛfáa; goŋaá gigísi gá gɛla gɛfáa gɛ́ɛgɛ bá gídenemú gɛ́ gaá bécílídé gɛ́ gɔ́gɛdɔ gá gilunú, gilefi gɛ́ gɔnɔ go áyɛkanɛna. 22Bá dɛ fɛgáa gɛkɔ́sɔ gá mɔgɛ́bɔ naá bilunú bá kɔbɛ sá bɛɔbɔ, bó amɔ́ bó bɛ́ɛmba nɔ́ɔnɔ, mɔgɛ́bɔ má gaá ŋaáa goŋaá bilunú bá kɔbɛ bɛ́ gúdegude, o yímie oŋɛndɔ yúmmue mɔgɛ́bɔ na kɔbɛ kɛ́; go gɛkɔ́sɔ gá mɔgɛ́bɔ, tɔ́nɔ gɛpáa gá kɔbɛ.»
Yésusu na buisí bá sábadɛ
23Go buisí bá sábadɛ búmmue, Yésusu go nco fɛ́lɛda naá ntɛ́mɛ́ sá belée. Behúúní bɛ́hɛ́ go ɛ́da go sóga bɛondá bá sɛ́, bɛ́ ɛ́da bɛ́ ɛnda#2.23 Go ɛ́na Bicele 23.26., 24Befelisiéŋe go ɛ́da go oyanɛna Yésusu bá amɔ́: «Núúnée bɔ́ɔbɔ behúúní báhɔ bá ŋananamɔ́ go buisí bá sábadɛ! Bó lɛ́ gicele#2.24 Go ɛ́na Gihúmie 34.21..» 25Yésusu go bó gundie a amɔ́: «No gá báasa no do banáa boóma bɔ́ɔbɔ Défidi a mbaá ŋaáa buisí búmmue bɔ́ɔbɔ a mbaá lɛ ɔ ɔ́bɔnɔ ncaná o? Mɔ́ɔ moatɛ́ na batɔ bɛ́hɛ́ bá mba lɛ́ bá lɛ́galɛga go nyáanya. 26Naá gɛcamɛna gá Abɛatáalɛ, Ufuŋe yá bedúmbí bɛbáágá naá Asaŋa, Défidi a mbií íŋéné naá Nnyaŋá ya Asaŋa a báá nyáá bɛlɛ́dɛ bá bɛbáágá bɛ́ɛbɛ bedúmbí bɛbáágá naá Asaŋa bákáa bá lɔ́mɔ́ na bogaaga bá go nyáa#2.26 a báá nyáá bɛlɛ́dɛ… go ɛ́na 1 Sémuele 21.2-7. Abɛatáalɛ : go ɛ́na 2 Sémuele 15.35 bedúmbí bɛbáágá naá Asaŋa bákáa… go ɛ́na Léfi 24.9., a báá fáá tɔ́nɔ báaba bá mbaá lɛ olɔŋɔ nɛhɛ́ o?» 27Yésusu go gɔnɔ bó oyana a amɔ́: «Asaŋa a mbi iyídé buisí bá sábadɛ go besé ya mɔtɔ. A lɛ́ kanɛ go gedie mɔtɔ go busío bá sábadɛ, go go mo íyie gɛɔlɛ́ gá yɛ́. 28Gɔ́ɔ moánɛ, Moɔnɔ́ ba mɔtɔ a lɔ́mɔ́ ogɔ́nɔ́ɔ ba sábadɛ.»
Одоогоор Сонгогдсон:
Mélékusu 2: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү