Meŋiigíe 16
16
Timotée a á bégídéné naá olɔŋɔ yá Póolo na Sɛ́lasɛ
1Gɔ́ɔ Póolo a bolamɔ́ naá Dɛ́lɛbɛ, a báá dómbá naá Lísitele. Uŋgolímínyí ummue a mba lɛ́ hɔ́ɔ ufíno yɛ́hɛ́ Timotée; nnyeedíi a mba lɛ́ uŋgolímínyí, mbéní ya Beyúdene, kanɛ́ isée a mba lɛ́ ba Bágɛlɛ́gɛ. 2Boolímínyí báaba naá Lísitele na báaba naá Ikoniumu bá mba lɛ́ bɛ́ ɛ́nana gɛɔyɔ gá Timotée bese, bá mo ségisegi. 3Kɔ́ɔ Póolo a lɛ́gamɔ́ go mo gɔ́lɔ goŋaá bá bɛ́ɛmba olɔŋɔ. A báá mo ancá go ndoŋá ya Beyúdene, goakɛ́ Beyúdene báaba bá mbaá lɛ́ hɔ́ɔ bá mba lɛ́ bí íyimene goŋaá isée a mba lɛ́ ba Bágɛlɛ́gɛ. 4Naá tɛ́sɔnɔ iŋkimée sɛ́ɛsɛ bá mbaá lɔmɔ́ bá bolana hɔ́ɔ, bá mba lɛ́ bá dúmbeninye boolímínyí báaba hɔ́ɔ nɛgóda ná baapótɛlɛ na bafɛanɔ́ɔ bá giimbó gá boolímínyí gɛ́ɛgɛ Naá Yolósalɛmɛ, bá bó oyanɛna goŋaá bá gumbene nɛgóda moánɛ bese bese. 5Biimbó bá boolímínyí gó ɛ́da go gónɛna naá gioliminyo, bɛpáa bá boolímínyí bɛ́ bégídenine miisí miimée.
Bá á dɔ́ŋɛ́nɔ́ Póolo naá Masɛdóanɛ
6Gimmúmpúu gá Giliíli go lege Póolo na Sɛ́lasɛ goŋaá bá dɛ ɛ́dá go oya nogálɔ ná Asaŋa naá gigísi gá cí gá Esíi. Kɔ́ɔ bá bácamɔ́ gɛdɔŋɔ gá Filisíi na gá Gelesíi ndɛ́áŋálɛaŋa. 7Aŋa bá mbaá bolá mekúígíi na gigísi gá cí gá Misíi, gáábɔ́ go béeniŋinye go ɛ́da naá gigísi gá cí gá Bitiníi, kanɛ́ Gimmúmpúu gá Giliíli go gɔnɔ bó lege. 8Kɔ́ɔ bá bácamɔ́ Misíi ndɛ́áŋálɛaŋa, gáábɔ́ go ɛ́da bola naá nɛyooga ná Tolóasɛ. 9Na budúgú bɔ́ɔbɔ, mɔtɔ ba Masɛdóanɛ go ɛ́nɛgɛna Póolo go mo bósógolidio a amɔ́: «Sɔ́kɔlɛ, úlé naá Masɛdóanɛ, o nco có óhiginyo hɔ́ɔ.» 10Naá nnyimé ya giínigie gɛ́ɛgɛ Póolo a mbɛɛ́ ɛ́ná, gɛ́cɔ́ go ɛ́da go fúmbe pɛ́ go go ɛ́da naá Masɛdóanɛ. Mammana, dɛ mba lɛncá dɛ amɔ́ Asaŋa mɔ́ɔ a mbaá có dɔ́ŋɛ́nɔ́ go go ɛ́da go oya Gɛnɔ́gɔ́ gá Cɔ́mɔ hɔ́ɔ.
Lɛ́dɛa o ó olímínyóo nogálɔ ná Asaŋa a báá béyumínyée
11Kɔ́ɔ dɛ gɔ́lɔmɔ́ sitíme naá nɛyooga ná Tolóasɛ, kanɛ go dɛ́lɛmɛna go pɛ́, gɛ́cɔ́ go ɛ́da naá Samotalásɛ. Gó bélenye, dɛ bɛ́ɛ́ ɛ́dá naá Nɛyapólɛsɛ. 12Dɛ lɛ́ hɔ́ɔ, dɛ bɛ́ɛ́ ɛ́dá naá tɛ́sɔnɔ ya Filípe, bó lɔ́mɔ́ tɛ́sɔnɔ ya busío ya Masɛdóanɛ; batɔ bá Olóma bá mbaá lɔmɔ́ bá gɛ́ga hɔ́ɔ. Dɛ báá ŋaáa baaná bá medúgú hɔ́ɔ. 13Buisí bá sábadɛ, gɛ́cɔ́ go úlukie naá tɛ́sɔnɔ yɛ́ɛyɔ, gɛ́cɔ́ go ɛ́da naá cɔ́lɔ ya nofámbálá, anáa dɛ mbaá lɔmɔ́ dɛ béeniŋenye dɛ amɔ́ dɛ gɛɛ́ ɛ́na hoóma háaha Beyúdene bá bósógolonyomú hɔ́ɔ. Aŋa dɛ mbaá lukúméné, gɛ́cɔ́ go ɛ́da go gálagala bakɔ́dɔ báaba bá mbaá lɛ bábándɛ́gɛ́náalú hɔ́ɔ. 14Naá bakɔ́dɔ bɔ́ɔbɔ, ummue a mba lɛ́ hɔ́ɔ, ufíno yɛ́hɛ́ Lɛ́dɛa; ɛ ɛ́da go úlene naá tɛ́sɔnɔ ya Teyetíle. A mba lɛ́ udúí mbáaga sá bɛla bá go ɛ́la bɛ́ɛbɛ bɛ́ oŋonamɔ́ muinyí gɛca. A mba lɛ́ a búlugenye Asaŋa, a có bódólonyo. Daadáa go mo buune odɛ́má yɛ́hɛ́ goŋaá ɔ ɔ́bɔ dogálɔ dá Póolo bese bese. 15Gɔ́ɔ a béyuminyemú, mɔ́ɔ, na nnyaŋá yɛhɛ́ ya batɔ. Kanɛ́, gɛ́hɛ́ go có dɔ́ŋɛnɔ a amɔ́: «Aŋa no ɛ́nanamɔ́ no amɔ́ ŋgolimonyo mammana Daadáa, úlé nɔnɔ ncó no gɛ́ga naá yɔmɔ́ nnyaŋá.» A báá lɛ gó ŋa buimée goŋaá dɛ oliminyo.
Gigumbene gá Póolo na gisódio gɛ́hɛ́ naá Filípe
16Buisí búmmue, dɛ ná lɛ́ go ɛ́dana naá hoóma há mbósógólí, gɛ́cɔ́ go lumene na gɛɔlɛ́ gá ombóla ba okɔ́dɔ: a mba lɛ́ na gɛdɔ́ɔ gá nobóga, a bóganɛna bagɔ́nɔ́ɔ bɛ́hɛ́ goŋaá bá bóda gɛca gá muinyí. 17Gɛɔlɛ́ gɛ́ɛgɔ go ɛ́da go síene gɛ́ có bienene naá nnyimé, gɛ́ ánca gɛ́ amɔ́: «Batɔ báaba bá lɛ́ boyogóní bá Asaŋa mɔ́ɔnyɔ a dómbanamɔ́ baasaŋa biimée. Bá nyó oyanɛna pɛ́ ya gisódio.» 18Miisí miimée máama a mbaá lɔmɔ́ a có ɛ́na, gɔgɔ́ a gálagala nɔ́ɔnɔ caŋa mmue. Aŋa bó mbaá ncó fáa Póolo odɛ́má gofɛ́ɔ, gɛ́hɛ́ go áncɛdɛna gɛgáda gá giliíli gɛ́ɛgɔ a amɔ́: «Go ufíno yá Yésu Kilítu, húmé naá nnyɔ́dɔ ya okɔ́dɔ mɔ́ɔnyɔ.» Hɔ́ɔ na hɔ́ɔ, gɛgáda gá giliíli gá gɛ́ go dómba go húme. 19Aŋa bagɔ́nɔ́ɔ bá gɛɔlɛ́ gɛ́ɛgɔ bá mbɛɛ́ ɛ́ná goŋaá pɛ́ yabɔ́ ya nobóda na gɛɔlɛ́ gɛ́ɛgɔ yɛ á maná, gáábɔ́ go dómba go gumbene Póolo na Sɛ́lasɛ, go ɛ́da bá bó gɔ́gɔ naá hoóma há mógála. 20Gɔ́ɔ bɛ́ ɛ́damɔ́ nabɔ́ naá bagɔ́nɔ́ɔ bá besúmbí bɛsɛnɛ báaba bá mbaá lɛ Balomɛ́ŋɛ, go bó oyana bá amɔ́: «Batɔ báaba bá lónconyo bɛsɛnɛ naá tɛ́sɔnɔ yɛcɔ́. Bá lɛ́ Beyúdene. 21Kɔ́ɔ bá húunenyemú caŋa sɛ́ɛsɛ gicele gɛ́ có legenemú bɛɛcɔ́ɔ Balomɛ́ŋɛ goŋaá dɛ oliminyo, ɛ́na dɛ ŋanana aŋa caŋa moánɛ sɛ́ oyamɔ́.» 22Gitúu go dómba go bó hancɛna. Bagɔ́nɔ́ɔ bá besúmbí bɛsɛnɛ go bó gadona bɛla, bá bíi íŋéné bisimbi bogaaga goŋaá bɛ́ bó gide. 23Aŋa bisimbi bɛ́ mbaá ŋá bɛ́ báa go bó gide na bɛságɔ, bɛ́ báa lɛ gó bó ága naá ncíbo ya gɛaŋɔ́, bá báa bébégídíné umbeŋíbéŋí goŋaá a bó beŋe bá dɛ ságɛ́ná. 24Aŋa umbeŋíbéŋí a mbaá bɛáa mbébégidine yɛ́ɛyɔ, gɛ́hɛ́ go dómba go ɛ́da bó buigene naá nokɛɛ́kɛlɛ́ nɔ́ɔnɔ nó mbaá lɛ naá tiídinye ya ncíbo ya gɛaŋɔ́, a báá bó ágá mokɔ́ndɔ́.
25Boóma bá tólóbóo ya budúgú, Póolo na Sɛ́lasɛ bá mba lɛ́ bá bósógolonyo, bá ágana ɛsagɔ go go búlugenye Asaŋa. Basɔ́gɔ́ɔ bóncodío báaba naá ncíbo ya gɛaŋɔ́ bá bó bódólonyo. 26Hɔ́ɔ na hɔ́ɔ, cí go yiŋkimide na bogaaga, mogoná má ncíbo ya gɛaŋɔ́ mó báá bégélídíe. Bɛasɛ́ bá ncíbo ya gɛaŋɔ́ biimée go dómba go bébuune, iŋgolí ya batɔ biimée báaba bá mbaá lɔmɔ́ naá ncíbo ya gɛaŋɔ́ ɛ báá súdésúdée. 27Aŋa ombeŋíbéŋí a mbaá foyógá, gɛ́hɛ́ go ɛ́na goŋaá bɛasɛ́ bá ncíbo ya gɛaŋɔ́ bɛ́ ná lɛ́ biŋgólíi, go dómba go somona kalafɔ yɛhɛ́ a amɔ́ a bóóna, goakɛ́ a mba fegé a amɔ́ batɔ biimée báaba naá ncíbo ya gɛaŋɔ́ bá báa go ságɛna. 28Kanɛ́ Póolo go áncɛda na bogaaga bɛ́hɛ́ buimée a amɔ́: «O do hóámá o do bégíídé, bɛɛcɔ́ɔ bábáa biimée háalá.» 29Kɔ́ɔ umbeŋíbéŋí u úhunemú goŋaá ŋgá bá lulie íyuke, go dúmbie go bɔ́yɔdɛgɛnɔ naá nokɛɛ́kɛlɛ́, ɛ ɛ́da a dagadana na bofoá, go obɛna Póolo na Sɛ́lasɛ naá bɛgɔ́ndɔ́. 30Aŋa a mbaá bó húmíe go hanyɔ́, go bó úhune a amɔ́: «Badaadáa, ndɔ́mɔ́ bá go ŋa ɛkádɛ goŋaá mbɛa gisódio o?» 31Póolo na Sɛ́lasɛ go mo gundie bá amɔ́: «Ágá odɛ́má yáhɔ naá Daadáa Yésusu, manɛ́ o ná bɛamɔ́ gisódio, maamɔ́ɔ na ncíbo yahɔ ya batɔ kɛ́.» 32Kɔ́ɔ Póolo na Sɛ́lasɛ bɛ́ ɛ́damɔ́ go bó oyanɛna, mɔ́ɔ, na ncíbo yɛhɛ́ ya batɔ, masɛnɛ má Daadáa. 33Gɔgɔ́ na budúgú bɔ́ɔbɔ, ombéŋíbéŋí go bó gɔ́lɔ, a báá bó sogá mpéŋé. Kɔ́ɔ bá dómbamɔ́ go bó yuminye, mɔ́ɔ, na ncíbo yɛhɛ́ ya batɔ kɛ́. 34Gɛ́hɛ́ go bó gɔ́gɛdɔ naá ncíbo yɛhɛ́ go manyáanya. Ombeŋíbéŋí go ɛ́da go békelenye na ncíbo yɛhɛ́ ya batɔ kɛ́ goakɛ́ a mba ágá odɛ́má yɛ́hɛ́ naá Asaŋa.
35Naá gobélie, bagɔ́nɔ́ɔ bá besúmbí bɛsɛnɛ go dóma batɔ naá ombeŋíbéŋí bá amɔ́: «Dɛ́ɛ́na batɔ bɔ́ɔbɔ.» 36Ombeŋíbéŋí go dómba go ɛ́da go oyana Póolo a amɔ́: «Bagɔ́nɔ́ɔ bá besúmbí bɛsɛnɛ bá lɛ́ bá amɔ́ ŋgáa nnyó dɛ́ɛna. No ná lɛ́ ba go húme no ɛ́da naá buumbénú.» 37Póolo go oyana batɔ bá bosɔ́mɔ a amɔ́: «Bɔ́ɔ bá có gide naá oŋgíso yá gɛdɔŋɔ kanɛ go có bide aŋa gó háananamɔ́, bɛɛcɔ́ɔ báaba dɛ lɔ́mɔ́ mbíényée sá gɛdɔŋɔ gá Olóma, bá báá gundé bá báá có ágá naá ncíbo ya gɛaŋɔ́. Gɔ́ɔ godɔ́ɔdɔ bá ná lɔ́mɔ́ goŋaá bá có húmie ŋgíbiŋgíbi o? Boóma na boóma bó do báá nɔ́ɔnɔ. Ŋgáa bɔ́ɔ moatɛ́ moatɛ bú úle bá nco có hémie.» 38Batɔ bɔ́ɔbɔ go gundine bagɔ́nɔ́ɔ bá besúmbí bɛsɛnɛ na ŋgoyáamɔ́ yɛ́ɛyɛ. Gɔ́ɔ bagɔ́nɔ́ɔ báá besúmbí bɛsɛnɛ bɔ́ɔbɔ bá mbaá gɔ́lɔ́ bofoá aŋa bá mbɔɔ́ ɔ́bɔ́ goŋaá Póolo na Sɛ́lasɛ bá lɔ́mɔ́ mbíényée sá Olóma. 39Bá báá lɛ gó úle bá báá ncó go ɔŋɛnɔ Póolo na Sɛ́lasɛ bihéehinye. Bagɔ́nɔ́ɔ bɔ́ɔbɔ go bó húmie naá ncíbo ya gɛaŋɔ́, bá báa bó bósógólídío goŋaá bá húme naá tɛ́sɔnɔ. 40Aŋa Póolo na Sɛ́lasɛ bá mbaá húmé naá ncíbo ya gɛaŋɔ́, gáábɔ́ go ɛ́da naá nnyaŋá ya Lɛ́dɛa. Aŋa bá mbaá ŋá bá báa go ɛ́nanɛna na boolímínyí báaba hɔ́ɔ, bá báá bó gúlúmínyée, Póolo na Sɛ́lasɛ bá báá lɛ gó úlukie naá tɛ́sɔnɔ.
Одоогоор Сонгогдсон:
Meŋiigíe 16: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
