Meŋiigíe 15
15
Gɛsɛnɛ gá buencí
1Batɔ bóncoó bá go ɛ́da fadɛgɛna naá Yudée go bola naá Óntiosi, gáábɔ́ go ɛ́da go húunenye boolímínyí báaba hɔ́ɔ bá amɔ́: «No do báá ba go bɛa gisódio aáŋa no do ancábá aŋa gicele gá Mɔ́sɛsɛ gɛ́ oyamɔ́#15.1 Go ɛ́na bɔ́ɔbɔ naá Léfi 12.3..» 2Póolo na Banábasɛ go lɔbɛnɔ bá dɛ húmé ukelú nabɔ́, gɛantá gá cuŋí go oba go ŋgoyáamɔ́ ya ndiemi. Gɔ́ɔ Boolímínyí bá gediemú goŋaá bá dóma naá Yolósalɛmɛ, Póolo, Banábasɛ na batɔ bóncodío, go go ɛ́da gálagala gɛsɛnɛ moánɛ na baapótɛlɛ na bafɛanɔ́ɔ bá gioliminyo báaba hɔ́ɔ. 3Boolímínyí go bó óhiginyo go oŋɛndɔ yɔ́ɔyɔ. Bá báa lɛ gó biene pɛ́. Bá báa dómbá Fenesíi na Samalɛ́ɛ, bɛ́ ɛ́da bó oya aŋa batɔ báaba bá lɔ́mɔ́ bá dɛ bɛ́ɛ́mbá Beyúdene bá mbaá ágá odɛ́má yábɔ́ naá Daadáa: boolímínyí go ɔ́bɔ bɛyaŋa makɔ́nɔ́ na gɛpáa moánɛ.
4Aŋa bá mbaá bolá naá Yolósalɛmɛ, boolímínyí báaba hɔ́ɔ, baapótɛlɛ na bafɛanɔ́ɔ bá gioliminyo go bó gɛ́ndɛgɛna. Póolo na Banábasɛ na batɔ bóncoó báaba bá mbaá lɔmɔ́ olɔŋɔ go ɛ́da go bó oyanɛna buimée bɔ́ɔbɔ Daadáa a mbaá ŋanánáa gábɔ́.
Goádona gá gɛsɛnɛ
5Nɛnamá ná boolímínyí bá giimbó gá Befelisiéŋe nɛ́ɛnɛ nɛ́ mbɛɛ́ ɛ́yá boolímínyí go fadɛgɛna bá amɔ́: Gó sɛmɛganana go anca boolímínyí báaba bá lɔ́mɔ́ bá dɛ bɛ́ɛ́mbá Beyúdene, bá gɔnɔ bó lɔsɛnɔ goŋaá bá gumbene gicele gá Mɔ́sɛsɛ. 6Kɔ́ɔ baapótɛlɛ na bafɛanɔ́ɔ bá gioliminyo bá bábándɛgɛnamɔ́ go go bide bosɔ́mɔ bá ndiemi.
7Kanɛ́ aŋa cuŋí sɛ́ mbaá lɔmɔ́ sɛ́ ɛ́dana naá busío, Píele go fadɛgɛna, go gɔ́lɔ dogálɔ a amɔ́: «Bolimóní, no íyimene no amɔ́ Asaŋa a mba ŋgiyídé naá kadɛ́gadɛ́ɛ yɛnyɔ́, bó ná lɛ́ fueké, goŋaá ŋgoya Gɛnɔ́gɔ́ gá Cɔ́mɔ go báaba bá lɔ́mɔ́ bá dɛ bɛ́ɛ́mbá Beyúdene, bá gɛ́ ɔ́bɔ bá gunde bó oliminyo. 8Asaŋa mɔ́ɔnyɔ i íyimenemú ɛdɛ́má ya batɔ a mba dúfíe goŋaá a á bó olímínyóo a báá bó fáá Gimmúmpúu gá Giliíli aŋa a mbaá có fáá tɔ́nɔ, 9kanɛ akɛ́ boóma bá go dádoga nɛcɔ́ nabɔ́; a báá sogáa ɛdɛ́má yabɔ́ goakɛ́ bá mbo olímínyóo. 10Goakɛ́ kanɛ́ no magamɔ́ Asaŋa na go fúmbe go dóɛgɛna boolímínyí gilúututu gá gɛnóɛ́ gɛ́ɛgɛ akɛ́ biisée bɛ́cɔ́, akɛ́ bɛɛcɔ́ɔ moatɛ́, dɛ mbaá lɔmɔ́ dɛ dɛ hódá o? 11Dɛ béeniŋenye goana goŋaá go niibo ná Daadáa Yésusu gɔ́ɔ Asaŋa a có sódonyomú caŋa táŋɛ́ mmue aŋa bɔ́ɔ.»
12Kɔ́ɔ batɔ biimée báaba bá mbaá lɔmɔ́ naá nɛganda bá mámamɔ́ pɔ́ɔ́, go ɛ́da go bódólonyo Póolo na Banábasɛ bó oya muune na bɛsɛɔ mɔ́ɔmɔ Asaŋa a mbaá ŋanánáa gábɔ́ naá kadɛ́gadɛ́ɛ ya batɔ báaba bá lɔ́mɔ́ bá dɛ bɛ́ɛ́mbá Beyúdene.
13Aŋa bá mbaá dɔmbɔ́ go gálagala, Sáakɛ go gɔ́lɔ dogálɔ a amɔ́: «Bolimóní, mbódólígínyóomú nɔnɔ. 14Símono a bóo oya aŋa Asaŋa a mbaá beŋé naá mabayɛga batɔ báaba bá lɔ́mɔ́ bá dɛ bɛ́ɛ́mbá Beyúdene go go iyide boɛ́nɔ bɔ́ɔbɔ bó ɔ́bɔnɛnɔmɔ́ nɛhɛ́ naá kadɛ́gadɛ́ɛ yabɔ́. 15Gɔnɔ́ dogálɔ dá mbúsí sá Asaŋa dó lumenene na ŋgoyáamɔ́ moánɛ goakɛ́ bó lɛ́ ɔ́ŋɔ́ɔlú goŋaá:
16“Daadáa o oya a amɔ́: naá medúgú má go ɛ́da go úle,
nná nco gunde go go gɔnɔ sume gincumu gá Défidi gɛ́ɛgɛ gɛ́ mbaá gadɛ́gá,
Nná gɛ́ gedegedie
Kɔnɔ gɛ́ díliminye tɛ́nɛ́ɛ.
17Gɔ́ɔ batɔ báaba bóncodío biimée bá ná fúmbemú
Daadáa, ɛɛ́ŋ, bɛdɔŋɔ biimée bɛ́ɛbɛ ndɔ́mɔ́
iyídéelú go go bɛ́ɛmba bámɛ.
18Nɔ́ɔnɔ gɔ́ɔ Daadáa o oyamɔ́,
mɔ́ɔ mɔ́ɔnyɔ a mbaá lincíe batɔ
moóma mɔ́ɔmɔ fueké#15.18 Ámoso 9.11-12..”
19«Sáakɛ go gídene a amɔ́: Boóma moánɛ bɔ́ɔ ŋgɛ́nanamɔ́ caá: dɛ dɛ ágɛ́ná batɔ báaba bá lɔ́mɔ́ bá dɛ bɛ́ɛ́mbá Beyúdene, báaba bá áganamɔ́ odɛ́má yábɔ́ naá Daadáa, bɛdɔmbɔ. 20Kanɛ́, ŋgáa dɛ bó ɔ́ŋɛnɔ, dɛ bó oyana dɛ amɔ́ bá dɛ nyáá mesugé má biséégé bá moɔcɔ, bá bébeŋe go gɛdáŋa, bá dɛ nyáá nnyama ya kanɛ go sɛ́sɛda ukelú, akɛ́ manɔ́ŋɔ́#15.20 Go ɛ́na naá Gihúmie 34.15-16; Léfi 17.10-16.. 21Mammana, fueké fueké, batɔ bá húunenye gicele gá Mɔ́sɛsɛ naá tɛ́sɔnɔ iŋkimée, bá gunde bá gɛ́ bana miisí miimée má sábadɛ naá nnyaŋá sá mbósógólí.»
Bá á dómá batɔ bá bosɔ́mɔ na kálata naá Óntiosi
22Kɔ́ɔ baapótɛlɛ, na bafɛanɔ́ɔ bá boolímínyí, na boolímínyí biimée, bá gediemú go iyide batɔ bá bosɔ́mɔ naá kadɛ́gadɛ́ɛ yabɔ́ go go bó dóma naá Óntiosi olɔŋɔ na Póolo na Banábasɛ. Gáábɔ́ go iyide Yúude, mɔ́ɔnyɔ bá mo dɔ́ŋɔnɔmɔ́ bá amɔ́ Balasábasɛ, na Sɛ́lasɛ, biimée báandɛ́ báaba bá mbaá lɛ batɔ bá ufíno naá kadɛ́gadɛ́ɛ ya boolímínyí. 23Bá báá bó íŋéné kálata go go ɛ́da na yɛ́. Dogálɔ dá kálata moánɛ dó mbaá lɛ náana: «Bondimóní bɛ́nyɔ́ baapótɛlɛ na bafɛanɔ́ɔ báaba naá gioliminyo, bá á bédíígíe bolimóní bábɔ́ báaba bá lɔ́mɔ́ bá dɛ bɛ́ɛ́mbá Beyúdene, bɔ́ ɔyɔmɔ́ naá Óntiosi, naá Silíi na naá Silisíi. 24Dɛ lɛ́ ɔ́bɔ́ɔlú goŋaá batɔ bá go nco go úle naá bɛɛcɔ́ɔ bá lɛ́ ncó nyó hencíelú bá báá nyó gólío bofoá na ŋgoyáamɔ́ yabɔ́. Bɛɛcɔ́ɔ dɛ lɛ́ kanɛ go bó dóma. 25Boóma moánɛ bɔ́ dɛ lɔ́mɔ́ húméelú ukelú yúmmue, dɛ bíí iyídé batɔ bá bosɔ́mɔ, dɛ báá nyó bó dómɛ́ná. Bá lɛ́ olɔŋɔ na bondimóní bɛ́cɔ́ bá odɛ́má Banábasɛ na Póolo, 26báaba bá lɔ́mɔ́ íŋénéelú gɛɔyɔ gábɔ́ naá Daadáa bɛcɔ́ Yésu Kilítu. 27Dɛ á nyó dómɛ́ná kanɛ́ Yúude na Sɛ́lasɛ, bɔ́ɔ bá gaá ná nyó dúmbínyée na nyuudé nábɔ́ bɔ́ɔbɔ dɛ á nɔ́ ɔ́ŋɔ́ naá kálata yɛ́ɛyɛ. 28Mammana, Gimmúmpúu gá Giliíli na bɛɛcɔ́ɔ moatɛ́ dɛ lɛ́ gedíelú goŋaá dɛ dɛ bósó ba go nyó dóɛgɛna gɛnóɛ́ gíncoó, bó do dómbá goana bɛ́ɛbɛ bɛ́ lɔ́mɔ́ ba go nyó oyo; 29bɛ́bɛ́ɛ bɛ́ lɔ́mɔ́: No do nyáá mesugé má biséégé bá moɔcɔ, no do nyáá manɔ́ŋɔ́, no do nyáá nnyama ya kanɛ go sɛ́sɛda ukelú, no bébeŋe go gɛdáŋa. No amɔ́ no bébeŋe go moóma mɔ́ɔmɔ muimée, no á ŋaáa bese. Mbédíígí nɛnyɔ́.»
30Kɔ́ɔ bá ádoganamɔ́ na batɔ bá bosɔ́mɔ, báaba bá báa biené pɛ́ go go ɛ́da naá Óntiosi. Hɔ́ɔ hɔ́ɔlɔ́ bá báá bándɛ́gɛ́ná boolímínyí biimée, bá báá bó íŋéné kálata. 31Aŋa bá mbaá bó banɛ́ná kálata, boolímínyí go ɛ́da go békelenye go cɔ́mɔ ya gigúluminye yɛ́ɛyɛ ɛ mbaá lɔ́mɔ́ naá kálata moánɛ. 32Yúude na Sɛ́lasɛ báaba bá mbaá lɔmɔ́ mbúsí sá Asaŋa, go fáanana boolímínyí gɛantá gá gɛcamɛna ɛsɔ́mɔ há gigúluminye na há go bó gíndie. 33Kɔ́ɔ bá dúmbiemú baaná bá medúgú naá hoóma hɔ́ɔhɔ, bá báa lɛ gó ádogana na boolímínyí naá buumbénú, bɔ́ɔbɔ bá báa lɛ gó bó sɔ́nɛnɔ gɛnɔ́gɔ́ gá oŋɛndɔ gá go gunde naá báaba bá mbaá bó dómá. [34Kanɛ́ Sɛ́lasɛ mɔ́ɔ go ɛ́na bese goŋaá a síene.] 35Kɔ́ɔ Póolo na Banábasɛ bá manɛmɔ́ gɛ́gɛda naá Óntiosi. Bá mba lɛ́ bá húunenye, bó oya Nogálɔ ná Daadáa, olɔŋɔ na gɛca gá batɔ gíncodío.
Póolo na Sɛ́lasɛ bɛ́ ɛ́ ɛ́dá go bosɔ́mɔ
36Gɛcamɛna gɛ́ á dómbá, Póolo go oyana Banábasɛ a amɔ́: «Ŋgáa dɛ gunde, dɛ ɛ́da dɛ mɛ́nɛgana boolímínyí naá tɛ́sɔnɔ iŋkimée sɛ́ɛsɛ dɛ lɔ́mɔ́ oyá oyá nogálɔ ná Daadáa hɔ́ɔ, dɛ ɛ́na aŋa bá lɔ́mɔ́.» 37Banábasɛ mɔ́ɔ a mba lɛ́ a maamana goŋaá gásɛ́ bɛ́ ɛ́ ɛ́dá olɔŋɔ na Sáŋa Mélékusu; 38Kɔ́ɔ Póolo a ŋamɔ́ a dɛ ɔ́bɔ́ bese goŋaá bɛ́ ɛ́da nɛhɛ́, goakɛ́ a mba bó síé naá Penfilíi, a dɛ gɔnɔ́ bó díligenene naá buelí bábɔ́. 39Kɔ́ɔ bá díenemú, Póolo na Banábasɛ, bá báá ádógáná. Banábasɛ a báá gɔ́lɔ́ Sáŋa Mélékusu, bá báá yalá sitíme, bá bɛ́ɛ́ ɛ́dá naá Sípele. 40Póolo, naá bɛ́hɛ́ boayá, go gɔ́lɔ Sɛ́lasɛ, bá bɛ́ɛ́ ɛ́dá nɛhɛ́ aŋa boolímínyí bá mbaá ŋá bá báá go bó íŋene go gibeŋe gá Daadáa. 41Póolo a báá dómbá naá Silíi na naá Silisíi, ɛ ɛ́da a gíndenye biimbó bá boolímínyí bɛ́ɛbɛ hɔ́ɔ.
Одоогоор Сонгогдсон:
Meŋiigíe 15: YAS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
