Israelfɔ Ɩlʋ 38
38
Lakpan Lɛblɩ
Dawid ɩkaɩn-afɔdɩɛ ɩlʋ.
1Oo Nana Bulu, mápʋ ɔblɔ wa ɩyɩn wa mɩ!
Mápʋ ansɩpɛpɛ bɩtɩ mɩ ɩsʋ!
2Fʋ ɔbɩn lakpie yi mɩ,
fayia mɩ manta ɔsʋlʋtɔ.
3Fʋ ɩyɩn sʋ, ɩwɩ ma mɩ ɔnlɩn.
Mɩ lakpan sʋ awútɔ labwiebwie mɩ.
4Mɩ lakpan ladʋbɩ.
Ɩlabwɛ atɔ sʋrahɛá mmɛtalɩ sʋra.
5Mɩ mimla sʋ
mɩ nlɔ laplɔ, idebon.
6Naklo, ndɛ ipian wun.
Nawa nwɛ, ndesu ekekegyiɛkɛ.
7Awútɔ ɩdɛ mɩ okunku,
ɩdɛ mɩ dwindwiin.
8Ɔŋɛ lata mɩ fɛ́ɛ́, awútɔ labwɛ mɩ yɔyɔɔyɔ.
Mɩ klʋn dɛ mɩ han.
Nasu kʋklʋkʋʋ, ndɛkɩmɩ.
9Mɩ Wie, fʋyin tɔá ndedunka.
Tɔá sʋá ndesu wa ɩwɩtɔ ɩda fʋ ansɩtɔ.
10Mɩ klʋn dɛda ɔwʋnlɩnsʋ.
Ɔŋɛ lata mɩ, mɩ ansibi lapunya tin.
11Mɩ ɩlɔ sʋ mɩ adwɛpʋ pʋ́ mɩ anyawie basrɩ mɩ.
Mɩ abusuanfɔ onuto kʋraa bawa ɩfɔ mɩ ɩwɩ.
12Aha ánɩ́ bʋmɛdɛ mɩ yile kle bafɩnɩ mɩ ayibi.
Mɩ lalahɛ adunkapʋ ɛ bʋdekleá bɛ́lɛ mɩ ɩnʋ.
Ɔpa-onye bʋdɛ mɩ ɩwɩ agywɩɩn lalahɛ susu.
13Tamɛ mɩ mʋ́ netila asʋ fɛ ɩsʋtin.
Nɛkpa mɩ ɔnɔ bun mwɩ fɛ omumu.
14Nɔbwɛ ɩwɩ ɔha ánɩ́ mʋ asʋ letin,
ɔtamalɛ ɩla ɔnɔ.
15Tsufɛ Nana Bulu, mɩ ansɩ dɩn fʋsʋ.
Oo mɩ Wie, mɩ Bulu, fʋ ɔbɛ́lɛ mʋ́ ɔnɔ.
16Mɩ asʋn ánɩ́ nɛblɩ gyi,
“Máha ansɩ igyi mɩ alupʋ nɩ nɛsrɛɩ dɩda.”
17Tsufɛ nna ndɛ afu kɔ,
ndɛ ɩwɩɔsɩn wun ekekegyiɛkɛ.
18Nalɛ mɩ lakpan blɩ.
Ɩlahɔ mɩ ɔsɩn ánɩ́ nabwɛ mʋ́.
19Ɩwɩ bʋ mɩ alupʋ ɔnlɩn, bʋbʋ ɔwʋnlɩn.
Aha tsɔtsɔɔtsɔ bʋtolu mɩ kʋkʋ kpalɩ.
20Aha ánɩ́ bɔpʋ lalahɛ ka mɩ yile ɩkɔ bakʋsʋ lɩɩ mɩsʋ,
tsufɛ yile ɔkpa ngya.
21Oo Nana Bulu, mákpa mɩ ɔma.
Mɩ Bulu, máwa ɩfɔ mɩ ɩwɩ.
22Mɩ Wie, mɩ Ɔhɔpʋ,
wa ɔsa bɔhɔ mɩ!
Одоогоор Сонгогдсон:
Israelfɔ Ɩlʋ 38: nko
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation