Israelfɔ Ɩlʋ 37
37
Ɩwɩasɩ Abapʋ Obégyi Ɔsʋlʋ Amʋ
Dawid ɩlʋ.
1Mákpla lakpan abwɛpʋ.
Lalahɛ abwɛpʋ tɔtɔ mápɛ fʋ ansɩ,
2tsufɛ ɩmɔ́ɔwa ɔpá kʋkʋ bɔ́bʋ fɛ ɩfa,
wʋlɩ fɛ ɔsʋlʋkpan.
3Pʋ ansɩ dɩnka Nana Bulusʋ, afʋbwɛ yile.
Tsia ɔsʋlʋ amʋsʋ, ɩwa alɛ ha fʋ.
4Ansɩ igyi fʋ Nana Bulu ɩwɩ,
mɛnɩ ɔbɛ́ha fʋ tɔá fʋ ɩklʋn dekle.
5Pʋ fʋ ɩwɩ wa Nana Bulu ɩbɩtɔ,
afʋpʋ ansɩ dɩnka mʋsʋ, ɔbɔ́bwɛ mʋ́ ha fʋ.
6Ɔbɛ́ha fʋ yilebwɛ ɩbɛ́lɩn ɔwan fɛ ɔyɩkɛhɛ,
fʋ asʋngyi ɛ ɩbɔ́wankɩ fɛ ɔpawi.
7Nya ɩklʋn ha Nana Bulu, tsia gyo mʋ.
Nɩ ɩdɛ alɛ wa ha ɔkʋ,
ntɛ ɔkʋ ɔtsʋn ɔkpa lalahɛsʋ nya ɩwɩ a, mákpla mʋ.
8Mánya ɔblɔ. Lɛ ɔblɔkpan lɛ fʋtɔ.
Mákpla mʋ, ɩtɛkpa ɔha wa lalahɛtɔ.
9Tsufɛ aha lalahɛ bɛ́ta,
tamɛ aha ánɩ́ bɔpʋ ansɩ dɩnka Bulusʋ obégyi ɔsʋlʋ anfɩ.
10Ɩlasi kpalobi aha lalahɛ bʋmɛ́ɛtra tsia.
Fódunka amʋ́ fʋmóowun amʋ́.
11Ɩwɩasɩ abapʋ obégyi ɔsʋlʋ amʋ,
ɩwɩ bɛ́hɩɛ lwii amʋ́.
12Ɔha lalahɛ tɛkan yile ɔbwɛpʋsʋ,
pɩɛɩ ayin suna mʋ,
13tamɛ anɩ Wie dɛ mʋ mɔsɩ,
tsufɛ oyin ánɩ́ mʋ nkɛ lawie woyi ta.
14Aha lalahɛ balɛ amʋ́ ɔflɛtɔ ɔdayi.
Babɩtɩ amʋ́ ɩta, bʋdekleá bɛ́lɛ ahianfɔ pʋ́ apɔnpʋ da;
abʋmɔ aha ánɩ́ amʋ́ asʋn da ɔkpa.
15Bulu ɔbɛ́ha amʋ́ onuto ɔdayi békpie amʋ́ ɩklʋn,
amʋ́ ɩta ɛ bébiabia.
16Atɔ kpalobiá ɔha yile bʋ legyi ansɩ,
dʋn aha lalahɛ tsɔtsɔɔtsɔ atɔ.
17Nana Bulu tɛkpa lalahɛ ɔbwɛpʋ ɩba,
tamɛ ɔtɔwa yile ɔbwɛpʋ ɔwʋnlɩn.
18Nana Bulu tɛkɩ ɔha ánɩ́ ɔlala ma mʋ ɩwɩsʋ ekekegyiɛkɛ.
Mʋ ogyikpa bétsia brɛ fɛ́ɛ́.
19Ɔtamawa mʋ pɛlɩtɔ mʋ ɩkplanbɩ.
Akʋnbɩ kʋraa a, ɔtɛha mʋ atɔ otegyi mwɛ.
20Aha lalahɛ bɛ́ta.
Nana Bulu alupʋ bʋgyi fɛ mbwɩ ogyikpa ɩfa ntswɩtswɩ.
Bʋtɔkɔsɩ fwɩ fɛ ogyasi.
21Ɔha lalahɛ ɔpan ɔtamaka,
tamɛ yile ɔbwɛpʋ mʋ́ bʋ awɩtɔlɛ, otekie atɔ.
22Ɔhagyiɔha ánɩ́ Bulu oyula obégyi ɔsʋlʋá alaha mʋ,
tamɛ ɔha ánɩ́ Bulu ɔlwɩɩ obówu.
23Nana Bulu tɛkɩ ɔha ayabi ɔtsakpa,
mʋ bwɛhɛ tegyi mʋ ansɩ.
24Nɩ ɔdɩda kʋraa a, ɔtamasin ɔsʋlʋtɔ;
tsufɛ Nana Bulu dɛ mʋ ɩbɩ.
25Tɛkɩ kebi ngyi brɛ amʋ, sei nadan.
Tamɛ mmɔkʋnu ɛkɛkɛɛkɛ bɛɛ, Bulu lakpa ɔha yile ɔma.
Ntɛ mʋ abi bakʋlɩ atogyihɛ.
26Yile ɔbwɛpʋ bʋ awɩtɔlɛ.
Otekie atɔ, ɔtɔpʋ atɔ pan aha.
Mʋ́ sʋ mʋ abi bénya oyula.
27Si lalahɛ bwɛ, afʋbwɛ yile,
mɛnɩ fétsia ɔsʋlʋ amʋsʋ brɛ fɛ́ɛ́.
28Tsufɛ Nana Bulu tekle asʋngyi ɔnɔkwalɩsʋ.
Ɔmɛ́ɛkpa aha ánɩ́ bʋtamayinki mʋ ɔma, ɔma ɛkɛkɛɛkɛ.
Ɔbɛ́kɩta amʋ́ kɔnkɔn ɩbrɛ fɛ́ɛ́,
tamɛ aha lalahɛ asɩ bɛ́ta.
29Yile abwɛpʋ obégyi ɔsʋlʋ amʋ,
tsia mʋ́sʋ brɛ fɛ́ɛ́.
30Nyansa asʋn tɛdalɩ ɔha yile ɔnɔ,
otegyi asʋn ɔnɔkwalɩsʋ.
31Mʋ Bulu atosunahɛ bʋ mʋ ɩklʋntɔ.
Mʋ́ sʋ ɔtamasrɛɩ dalɩ mʋ ɔkpasʋ ɛkɛkɛɛkɛ.
32Aha lalahɛ bʋtɛtɛ yile abwɛpʋ,
dunka ɔkpa ánɩ́ bɔ́tsʋn mʋ́sʋ mɔ amʋ́.
33Tamɛ Nana Bulu méesi amʋ́ wa amʋ́ ɩbɩtɔ,
ntɛ ha amʋ́ abʋgyi ɩpɔn asʋn agyipʋ ansɩtɔ.
34Kɩ Nana Bulu ansɩtɔ, afʋkɩta mʋ mblatɔ.
Ɔbɔ́pʋ ɔsʋlʋ amʋ ha fʋ, pʋwa fʋ numnyam.
Fówun aha lalahɛ owukpa.
35Nowun ɔha lalahɛ ɔkʋá ogyi owuntɔlɩnpʋ, alatsu ɩwɩ fʋa,
yɛyɛɩ fɛ Lebanon odum lenya ɔlɩɩkpa.
36Tamɛ nɛlakɩ a, alafwɩ.
Nodunka mʋ kʋraa mmowun mʋ.
37Hɩɛ yile ɔbwɛpʋ nsʋ, afʋlɛ ansɩ kɩ ɔha ánɩ́ mʋ asʋn da ɔkpa,
tsufɛ ɔha ánɩ́ ololwii asɩ bɛ́klɛɩ.
38Tamɛ mblasʋ magyipʋ bɛ́ta.
Lalahɛ abwɛpʋ asɩ bótu plɩplɩplɩ.
39Nana Bulu ɩbɩtɔ yile abwɛpʋ bʋtenya amʋ́ nkpahɔ tsu.
Ogyi ɔtanʋkpa ha amʋ́ brɛá bʋbʋ ɩkplantɔ.
40Otegyi amʋ́ bʋalɛ, lɛ amʋ́.
Ɔtɛlɛ amʋ́ aha lalahɛ ɩbɩtɔ.
Ɔtɔkɔ ha amʋ́, tsufɛ batanʋ mʋ.
Одоогоор Сонгогдсон:
Israelfɔ Ɩlʋ 37: nko
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation