Israelfɔ Ɩlʋ 32
32
Aha Yile Ansɩ Igyi Bulu Ɩwɩ
Dawid atosuna ɩlʋ.
1Ansɩ igyi ɔha ánɩ́ Bulu lasi mʋ lakpan kie mʋ,
bun ansibi mʋ lakpansʋ.
2Ansɩ igyi ɔha ánɩ́ Nana Bulu mɔ́hɔ mʋ lalahɛ,
afunu ɩma mʋtɔ.
3Tsufɛ brɛá nekina mɩ lakpan lɛ blɩ a,
nosu ekekegyiɛkɛ alɩɩ wʋlɩ lɛ akankawu.
4Tsufɛ fɛbɩtɩ mɩ ɩsʋ ɔpa mʋ́a onye.
Ɔŋɛ lɛta mɩ awútɔ, fɛ alɩá ntsu tɛkpɩ awikpanbɩ. Ɩya.
5Ɩnʋ nɛlɛ mɩ lakpan fɛ́ɛ́ bla fʋ.
Mmesi kʋkʋ ŋain fʋ.
Nɛblɩ mbɛɛ, “Nɛ́lɛ mɩ lakpan fɛ́ɛ́ bla Nana Bulu.”
Ɩnʋ fesi mɩ ɩsʋbɩtɩ kie mɩ. Ɩya.
6Mʋ́ sʋ ha aha ánɩ́ bʋtamakpa fʋ ɔma fɛ́ɛ́ abʋsu kpoli fʋ, brɛá bɛ́talɩ nya fʋ.
Mɛnɩ nɩ ntsu ɩbʋla alɩágyialɩá kʋraa a, ɩmɛ́ɛkɩta amʋ́.
7Oŋainkpa fʋgyi ha mɩ,
fʋtogyo mɩ ɩwɩ ɩkplanbɩ.
Falɛ mɩ, pʋ mʋ́ ɩlʋ bomli mɩ. Ɩya.
8Ɩnʋ Nana Bulu lɛblɩ ɔbɛɛ,
“Nósuna fʋ asʋn-asɩnu pʋ́ ɔkpa ánɩ́ fɔ́tsʋn mʋ́sʋ.
Nɔ́tɔɩ kpla fʋ, kɩ fʋsʋ.
9Mábwɛ fɛ ɔpɔnkɔ ntɛ ɔpɔnsʋraá omeyin tɔtɔ.
Nkɛtɩ fapʋ datɔbi mʋ́a mʋ́ ɩwɩ ɔfɛ wa mʋ ɔnɔtɔ, bɩtɩa mʋ asa ɔtɛba fʋ wa.”
10Ɔha lalahɛ ipian ɩhɩɛ tsɔ,
tamɛ ɔha ánɩ́ ɔlɔpʋ ansɩ dɩnka Nana Bulusʋ a,
ɔbɔ́pʋ mʋ ɔdwɛá ɩma ɔka gyi ɩban wa mʋ.
11Aha yile, mlɩ ansɩ igyi Bulu ɩwɩ, amlɩtswɩ ope.
Aha ánɩ́ amʋ́ asʋn da ɔkpa, mlɩkplʋn kanfʋ mʋ.
Одоогоор Сонгогдсон:
Israelfɔ Ɩlʋ 32: nko
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation